Amo 3 | XteSC | STEP | Allahdi Israel nesala tep peipupa, Amos gekepudi, seku upuda ake. “Ne Allah Yahwehdi, ‘Sun Israel nesala tep wenepkamsen’ tenen, peipsene upuda moupra gekepso. Uo, Israel nesala, sunda Mesir mutu kuramrumpane, ne Allah Yahwehdi doupra yanamsisi. Atep, ne Allah Yahwehdi sun Israel nesala yuma tep, awenemna upu pepsene.

Amos 3

Israel nesaladi mali weik kuramipa, Allahdi, ‘Sun tep wenepkamsene,’ pepra deipu upu

1 Allahdi Israel nesala tep peipupa, Amos gekepudi, seku upuda ake. “Ne Allah Yahwehdi, ‘Sun Israel nesala tep wenepkamsen’ tenen, peipsene upuda moupra gekepso. Uo, Israel nesala, sunda Mesir mutu kuramrumpane, ne Allah Yahwehdi doupra yanamsisi. Atep, ne Allah Yahwehdi sun Israel nesala yuma tep, awenemna upu pepsene. 2 Ada tali tep gume. Nesala ban-ban yuma akurami dinin, akan-kan di tenpu yala nengpu, sun Israel nesala tep, ne Allahdi weiamsisi. ‘Ne mawa nesala kunkameng’ tenen, sun weiamsisi dinino, ukutaruda sundi tupa mali kun kecapu pio weika di tupa kurumpa, disenuna tep, tek sisi nedi sun tep, ila di wenepra popkamsene.

3 Tonda ukupmanto ngeda, moupra tenipetepso. Sun kaele, nimi butene nengdi utotopu barurunge. Ada, sun abutene nengda, ‘Nun ukupkamaneme. Abisipu kikiman benkamaneme,’ pepra, lape men pepdanmarenge dipapu, tenpu bisipu bererung do? Gume, ‘Nun buteneda, abisipu bankuneme,’ pepra, kikiman men pepdaretengopda, kikiman tenpu bisipu men beretenge. (Ange utopu, sun cap, ne cap, tenpu kangepu men doptepeyopda, kikiman men kutepe). Allahdi peipupa, Amos gekepu.

4 Amos aupu gekepu dingeda, erdi aupu ton pepu. Israel nesala, tenipetepso. Ila yu pus utopu keca, er sida singa bura kalengmatuanen, kapang ton eptudi, popra men jeptu dingeda, ila upu peptu do? Gume, er tali mare dingeda, mesum tep ila upu men perure. Ange utopu, ila yu pus utopu keca, er sida singa pus, gam kure keca kapul men popre taruda, ‘Ne jen keca ton jepkune,’ tenen, ngoloktudi ila upu peptu do? Gume, er jen keca kapul men popre taruda, tali dimpeprappu marure.

5 Ukupmantonge ton, nimidi pena men pepmatengepapu, madi, ‘Ne youpkuner’ tenen, pena damai betupa youptu do? Tonda, pena pepmatengepa, men youptu dipapu, pena yala coda ereproptu do? Gume pena di, ma youprepa, adipapu, tuai sangrure. Ange utopu, bura baramre gam keca pena pepmangai, mangkau di yanipyopda, pena yourure.

6 Ukupmanto ngeda, sun ila kota mutu kunge nengda, mar popdankotenga tep, bung-bung pena, er si terompet, lelim di peten petengepa, gekeptenge pangeda, yo berber men peptu do? Gume terompet lelim gekepmengopda, ‘Uo, nun podan neng poryanmasenge,’ tenen, kware kurure. Tonda, ila ati arum dopra kuramtenge mutu tep, Allah Yahwehdi, ikin keca sun nong deiki deiptu pangeda, kange mun kange men douptenge do? Gume, Allah er si Yahwehdi, ‘Ikin keca anesala deiki deipkun,’ tenen, keteneiptudi, aneng tep men kareptuopda, kange mun keca sun nong deiki men yatue. Ada Allah er dia.

7 Tek sisi Allah ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi aupu, ‘Adonay’ ngeda, deiyonge jenek kupra sekmupu. ‘Yahweh’ pepra seki ngeda, ada Allah er pe si sisa tepa (Keluaran 3:14 dinkurume. Tonda lap pena upu nomor 49 dinkurume.)} Yahweh erda, Ila Eremna Ngebo, akeca-keca yuma talepra, pio puto weik deiyo ngebo kurura cadi, erdi, ‘Ukupkamne,’ teneretopu, tek sisi angepu kurure. Ukurura cadi, Allah erdi, ‘Akeca yumada ukupkamne,’ pepra, er upu lap pena neng, nabi-nabidi, ‘Gekepkameng’ tenen, lap perepa gekenunge. Sunda, er amutara pel dona neng kununge. Allahdi sun damai lap men peiamtu dipapu, er pel dore keca yuma, tali lupra men pel dorure. ‘Ukupkamne ja,’ pepra, lap perepa, nabi neng konum gekepmenge pangeda, Allahdi apel dorure.

8 Uda, ukupmanto upu konum pepmasena cadi, tenipetepso. Ila yu pus utopu keca, er si singa pus, ila upu di peptu pangeda, wareto ngebodi kwar men kuptu do? Ange utopu Allah Yahwehdi, ila mambul upu konum peipneua tep, ‘Sun Israel nesala gekenkamrum’ tenen, aupu men lap pepkamsen do? Allahda, Ila Eremna Ngebo kurura cadi, akeca-keca yuma talepra, pio puto weik deiyo ngebodi, upu pepre pangeda, wareto ngebodi dimpepra kuptupa, Allahdi peiptu ngeda, taptudi aupu men lap peptu do? Gume, ne Amosdi aupu yumada penkamsene. Angeda, men taptene pepsene.” Amosdi pepu.

Allahdi Israel nesala tep wenepkamrenge tep pepu upu

9 Allah er si Yahwehdi aupu peipu. “Nedi konum peipmasen upu yumada, lap perbenkamrume. Asdod mutu deiyo talepra kunge nesala cap, Mesir mutu deiyo talepra kunge nesala cap tep, pepkurume. Ada, sun yuma buluprapmengedi, Samaria mutu tarapu kungedi, kalekra dinkamenge. Ada, amutu deiyo neng, Samaria mutu damai yangedi, dinmangepane, Israel nesaladi, pio ila di mali weik kuraminge cap, mali kunge keca cap, katuai keipnepa epkamenge. Ukupnepa, amutu kunge nesaladi epmengedi, ‘Uo, teka angeda, Israel nesala sun mali kunge keca weik kungeda adano,’ tenepra kael kepkamenge.

10 Allah Yahwehdi uperure. Sun Israel nesalada, pio tek sisi telep ton men kununge. Telep kun kecada konum lupropi. Dinin, yu weik kuprepa, sun yuk nesala keca yuma dalupra doronunge. Yu kuprepa, nimi pona cap, sun keca upula dorona cap, kuramya deiki di, yuk mutu nesala taleami keca weik doprami. Ukuramidi, abunga keca yuma sun gel di deipra domi ati pumbon dongorami. Atep, sun Israel nesalada, pio dumsisi kun kecada, ton men kununge. Sunda pio mali-malingepu kununge.” Allahdi peipupa Amos gekepudi seku.

11 Allahdi pepu. “Ange tep nengeda, ne Allah Yahweh, akeca-keca yuma talepra, deiki tara erepra, pio puto weik deiyo ngebo kunedi aupu pepsene. Neda, Ila Eremna Ngebo kunune. Ne kune ngebodi aupu pepsene. Ukutaruda, Israel nesala sun podan nengdi, sun kunge mutu yuma warekra ongopdongopkamenge. Ukupmenge pangeda, sun puto kuserenge yumada, boun kupkamsere. ‘Nun podan nesala yana wekmengedi, popsenung’ tenen, gel ati cap, lyom gel beilya cap wipdominge yumada, sun podan nengdi, uruptapkamenge. Ukupmenge dingeda, sun kunung mutu yuma dalupra doropkamenge.

12 Ukupmanto upu ton pepkusene. Domba pein ngebodi, er domba bisamda, ila yu pus singa utopu keca di popra konum jepmare pangeda, adomba pein ngebodi, er domba tep dorbeutu dinin, buluktapmarepa dopropkamre ngeda, yan butene cap, amol cap, singa pusdi sektapmarepa bupra duyakarure. Adomba nong yuma men lyeptue. Ange utopu, Samaria mutu neitamai kunung Israel nesala yumada, sun podan neng yangedi popra gawal dakamenge. Konum popbisipmengedi, Israel nesala konum gawal dakmanto kupmengopda, tupa gam kunkameng nengda, meteka dipu kunkamenge.

Tonda, sun bunga tupa kupkamre ngeda, pio metek pua. Ukupmantoda, sun bungna keca, tenpu yan cap, sun ason gweleptapipa, metekanun kapunge cap, apu dopropkamenge. Yuk bunga taleaminge yumada, sun podan nengdi, dalupra dopropkamenge. Israel nesala yuma popbisipmengedi, bungada yambulanunpu tapmengepa kunkamenge.” Allahdi pepu.

13 Upepu dingeda, aupu ton dukdongopra pepu. “Neda, Allah Yahweh ^{▼▼Allah – Acada, Ibrani upu di, ‘Yahweh Adonay’ pepra sekya cadi, nundi ‘Adonay’ upu deiyo ngeda, jenek kupra sekmupu.} kunune. Neda akeca-keca yuma talepra, deiki tara erepra ila puto weik deiyo ngebo kunune. Neda, im deiki kunge jen talen malaikat ^{▼▼malaikat Aupuda, Ibrani upu deiki di, ‘Allah Sabaot’ seki dinin, nundi ‘Aupu deiyo ngeda, Ketengban nesaladi, moupra kael kepkameng’ tenen, aupu deiyo ngeda, jenek kupra sekmepu.} yuma, sun deiyo ngebo kunune. Ne ila puto kunetopu yuk keca ton pio men kurure. Nedi upepsene. Ukutaruda, ne pepkusen upu moupra gekepmumdi, kael kepmumnyopda, sun pe yala nesala yumada, sun apu bo Yakubdi deipupa, dadeipdanen banung Israel nesala yuma tep, lap penkamrume.

14 Ada, ne tenepsi tumi konum damai kupre pangeda, Israel nesala sun mali kungenge tep wenepra popkamne. Tonda atarupu, isok si eremna tep, Betel mutu neitamai, gel yakra deipyaida, dakra tapnedi, gum kupra deipkamne. Ukupne dingeda, gel yakra depinge deiki tara, dana-dana yumada, sirik tara belepunge yuma dakropnepa, tuaipu sakamre. Ada, bisam sapi giso takke urasin utopu keca tep pepne.

15 Tonda, sun ila isomka nesaladi, ‘Pio telep ati kunkamep’ tenen, bupu li taru kalai tengna ati dominge yuma cap, tonda bul li taru, ‘Uku damai bukmepedi, bepe peikra kunkamep’ tenen, telep ati dominge yuma capda, urupra tapkamne. Tonda, ila telep ati domidi, pio kunumna weik keca dongorami derirami ati yumada, urupra daktapkamne. Tonda, ila ati arum dominge yumada, urupra sikke buktapkamne.” Allah er si Yahwehdi pepu.