Amo 4 | XteSC | STEP | Allahdi pepu. Uo, Samaria mutu deiki kumum isomka nerapuda, sun nong galemnada, ila sapi bisam neramretopu kurume. Sun Basan mutu nerapuda, sapi bisam galemna weik kupra neramretopu, sun peda nerume. Sunda, sun nakange yapu tep uperume. “Sun bemumdi anggur me kange yawaramne me, pio yunge doupra yasemumpa, jenkamepe,” pepra, sun nakange yapu tep, tupa-tupa mororume. Tonda, tali kankan kunge neng cap, puto boun neng cap, akeca-keca yuma men kwamre neng tep, ila di putapre nesala yuma cap, ikin keca weik, sun nong deiki derirume. Tonda, sun kankan kunge nesala taleami ngeda, upula dororumudi, ikin pel dimrume.

Amos 4

Samaria mutu nerapudi, yu me kange yawaramne me jeramidi, telep nerapu utopu kupra, sal nong-nong kuraminge tep, pepu upu

1 Allahdi pepu. Uo, Samaria mutu deiki kumum isomka nerapuda, sun nong galemnada, ila sapi bisam neramretopu kurume. Sun Basan mutu nerapuda, sapi bisam galemna weik kupra neramretopu, sun peda nerume. Sunda, sun nakange yapu tep uperume. “Sun bemumdi anggur me kange yawaramne me, pio yunge doupra yasemumpa, jenkamepe,” pepra, sun nakange yapu tep, tupa-tupa mororume. Tonda, tali kankan kunge neng cap, puto boun neng cap, akeca-keca yuma men kwamre neng tep, ila di putapre nesala yuma cap, ikin keca weik, sun nong deiki derirume. Tonda, sun kankan kunge nesala taleami ngeda, upula dororumudi, ikin pel dimrume.

2 Ukupra pio mali kuruma tep nengeda, Neda Allah Yahweh akeca-keca yuma talepra deiki tara kunedi, ila puto weik deiyo ngebo kunune. Atep, nedi tenenetopu kununa cadi, ne pio lek kununa deiki di pepsene. Tek sisi, doryankamre taruda, nedi go karepne pangeda, sun podan nesala yana popbisipsengedi, sun u pumbon bisi neitamai, besi keca dongopsengedi, akeca di gipra sun pe mutu tamupra dubenkamsenge. Ada ukupmantoda, mekina youn keca deipmangepa, mekina talepyopda, gipra dororamengtopu kupra, dopra dubenkamsenge. Ada, sun podan nesaladi, popbisipsengedi, dubenkamsenga tep pepsene.

3 ‘Nun podan nesala yana popsenung’ tenen, wiramrum lyom gel beilyada, yana uruptapkamenge. Uruptapmengopda, adipapu sun yuma tomopsengedi, ateng koupra agel beilya pumbon neitamaipu doupra, bura dubenkamsenge. Gel beilya cap, gel ati cap doramrum dinin, sun podan nengdi, yana popbisipmengedi, sun yuma tomopra popbisipsengedi, sun yuma tomopra, Hermon tara dubena donokamsenge. Ada tenpu ngebo peda, pio men tapkamsenge. Tek sisi ukupkamsenge. Neda Allah Yahweh akeca-keca yuma talepra, deiki tara kunune. Neda, sun nai bo Allahdi pepsene. Allahdi pepu.

4 Allah Yahwehdi, sun Israel nesala tep pepu. Ne nyapu Israel nesalao, sun kwar dangna gum dipapu, sun yuma Betel mutu berumudi, ne si eremna tep, gam keca popra karenyakankamrume. Ange utopu, Gilgal mutu bemumdi, ne si eremna tep yuk keca ton karyakankamrume. Sunda, mali kecapu talepra tupa-tupa kunmarumu dipapu, ne si eremnerume. Atep, gam keca popra kareryakanerum ngeda, ada nong bol deiki utopu keca kurume. Malipu kuruma cadi, ne sida tek sisi men eremnerume. Betel mutu pe, Gilgal mutu peda, ipna taru yuma yapi keca popra yamumdi, karerume.

Tonda, yapi kecapu gum dinin, sun wa pepra kourumu keca bokra, ton tara ngeda, ue weneri tumi ton konum kupre pangeda, tupa-tupa ne tep akeca kareryakanerume. Dinino, sundi mali kunmarumdipu akeca-keca yuma kareneruma cadi, tek sisi ngeda, sundi agam keca cap, wa pepra kourumu keca cap, kareneruma deiki di, mali keca weik ton cap tapakra kunmarume.

5 Tonda, sun roti kwaneng dapra keteneiprumudi, ne si eremna tep karyakanerume. Tonda, ‘Yuk nesala ton gekepmengedi, nun tep telep neng tenepkamseng’ tenen, tali kange deipra karerum keca ton, bokra karyakanerume. Ukupra karerbarum ngeda, tek sisi ne si tep eremnerum gume. Yuk nesaladi, ‘Telep neng tenepkamseng’ tenen, kange deiprumudi, akecada talipu karerume. Sun mali weik tupa-tupa kunmarumpapu, akeca karyakaneruma tep pepsene. Uo, sun Israel nesalao, angeda, ne songe. Neda Allah Yahweh, akeca-keca yuma talepra, deiki tara erepra, pio puto weik deiyo ngebo kunune. Neda, sun nai bo Allahdi pepsene.

6 Mali-malipu kuramrumpa, nedi sun ati arum dopra kuramruma neitamai jen putana keca kareramsisipane, sundi ange betapra men kael keprumdi, sun tamupra ne damai men yanerume.

7 Tonda autopu, sun wa pepra kouramruma neitamai, mo ton men kareramsisidi, mo pio gum kupra deiamsisi. Sun wa kouramrum kecada, ue weneri war ton cap konum kuptuopda, sun wa pepra kouamrum keca yongopra kipkamtum dinin, mo men kareramsisa tep, sun wa pepra kouamrum keca yumada, kolunapu kuramu. Tonda, sun ati arum dopra kuramrum mutu neitamaida, ton nesaladi wa pepra kouami wai damda, mo kareramsi.

Dinin, ton ati nesaladi, wa pepra kouami wai damda, mo men kareramsi. Ukuramsipa, ton tara neng, sun wa pepra kourami kecada, nong kuramu dinin, ton tara nesala, sun wa pepra kourami keca yumada, kolunapu kuramu.

8 Ukupra kuramsi taruda, ton mutu nesalada, me pio putaramudi, sun nongda bounpu kurami. Ukupupa, ‘Uo, me jeptepe’ tenen, ton mutu nengdi, ton mutu bena jepetepe dinin, pio men boupu. Sun me pio tupa putanapu kuramu. Ange yumada, nedi sun wenemna tep ikin keca kareramsisi dinin, sunda ka di tamupra ne kori pio men domyakaramnerume. Ne Allah Yahwehdi pepsene. Upepudi aupu ton pepu.

9 Ange utopu, nedi sun wa pepra kouramrumpa bo douramu keca deiki yumada, gap-gapa amuramupa lyursangamu. Tonda, sun wa pepra kouramrum keca yuma, bo kouluna kareramsipa, kouluamudi gum kuamu. Tonda, puto weik bupu kumanya kareramsipa, akumanya di wa pepra kouramrum keca yumada, mali kupra deiamsi taruda, kolupnepa men jepmanto kuramrume.

Tonda, sun anggur tapu du cap, ara co du cap, Zaitun co du cap yumada, nedi sul po kareramsipa yakaramidi, akeca yuma yan jepra gawal dakami. Ukupra ikin keca kareramsipa ukuramseiya peda, sun adipapu ne damai ton tamupra men yanamnerume. Ne Allah Yahwehdi pepsene. Upepudi aupu ton pepu.

10 Tonda, nedi Mesir mutu nesala tep, pu deiyo keca kareramsitopu, sun peda nedipu jena deiyo keca karepkamsene. Tonda kaber neng yumada, mar podanmanga neitamai nedi sun popra tapkamne. Tonda, ange utopu, sun kuda bisam peda dalupropkamne. Tonda, sun dodin ati neitamai yumada, popmange neng sun nong lyurepa, tong dipapu dinipredi, tong welepkamre ngeda, sun tupa gam kunge nesala u pumbon wekserepa, atong gekepkamrume. Ukupserya peda, sundi tamupra, ne damai ton men yankamrume. Ne Allah Yahwehdi pepsene.

11 Sun kan-kan neitamai di bokrapsidi, ton tara nesalada poptapsi. Ada Sodom mutu cap, Gomora mutu cap, mali weik kurami nesala poptamsitopu, sun Israel yala nesala peda, weika di pomsisi. Ukupra wenepra poramsisidi, Israel nesala yambula dipu tapsisi. Ukupmantoda, uku co dongopmangepa, uku jenmaryane, sirik taprepa, lukra deriramengtopu, nedi sun Israel yala nesalada, yambula dipu lyepropsisi. Ukupra lyepramsisi dinino, sundi tamupra ne damai ton men yakaramnerume. Ne Allah Yahwehdi pepsene.

12 ‘Ne damai tamupra yankameng’ tenen, bicau teneramsidi go weik kareramsisi dinin, ne damai tamupra men yakaramneruma tep, uo sun Israel nesala kumumnyai yumada, nedi wenepkamsene. Ange tep nengeda, sundi, ‘Uo, akupkamser ngeda, amenda nun nai bo Allah ila di wenepkamsere’ tenen, ketenepra kunkamrume. Tonda, sun Israel nesala yumada, ‘Uo, nun nai bo Allah cap antapkamepe’ tenen, kange mouprumudi, ikin kange doupra kunkamrume.

13 Ange yumada, tali men pepsene. Mutu-mutu yuma cap, kumanya yuma capda, Allah er dipapu ketekepra derirure. Tonda, ne Allah Yahwehdi, ‘Ukupkamne,’ tenenun keca yumada, tali tuai nesala tep, lap pepra derisenune. Tonda keteng komuni pe, lukunda peda, ne Allah dipapu ketenepra derinune. Ukupra kunedi, tuai mutu neitamai, ila mutu deiki yanipdongopra embanune. Ne sida, Allah Yahweh kunune. Neda, im deiki jen talen nesala yuma talepra kunune. Neda akeca-keca yuma talepra, deiki tara ila puto ngebo kunune. Allahdi sun Israel nesala tep pepu.