Amo 5 | XteSC | STEP | Allahdi peipupa, Amosdi gekepra seku upu ake. Allahdi pepu. Nedi engena deiki di pepkamasen ngeda, sun Israel nesala ikin keca doropmumdi, kange mun kange doupkamrumnge tep, lap pepkusene. Aupuda, pio moupra gekepkurume.

Amos 5

Allahdi Israel yala nesala wenemrepa, ikin weik kunkamenge tep, pepu upu

1 Allahdi peipupa, Amosdi gekepra seku upu ake. Allahdi pepu.

Nedi engena deiki di pepkamasen ngeda, sun Israel nesala ikin keca doropmumdi, kange mun kange doupkamrumnge tep, lap pepkusene. Aupuda, pio moupra gekepkurume. 2 Ada, sun Israel nesalada, kaber ner utopu, pio telep kuramrum dinin, ukutaruda sun konum sakmarume. Sun mutu sisa neitamai konum sakrum dinin, ware ngebodi melipsetupa, tekra deipsetu do? Gume, ne Allahdi ton cap tamupra men bukeipkamsene. Kaukeptapsenepa, sun pe kunkamrum tu deikipu kunkamrume.

3 Neda Allah Yahwehdi, akeca-keca yuma talepra, deiki tara erepra, pio puto weik deiyo ngebo kunune. Neda, sun nai bo Allah kunune. Nedi pepsene. Tenpu mutuda, sun Israel yala nesala kurumu mutu di, jen talen neng denge seribu (1.000) neng wepra deipmumpa, yuk mutu nesala porbenami dinin, amenda taruda, tamupra yankameng jen talen nengda, denge seratus (100) nengpu yankamenge. Utopu, yuk mutu ati arum dopra kunung neng ton, mar podana tep, denge seratus neng wepra deipmumpa, mar porbenami dinin, sepuluh (10) nengpu tamupra yankamenge.

4 Ne Allah Yahwehdi pepsene. Uo ne nyapu, Israel yala nesala, sunda ne mawa nesala kuruma cadi, sun mali kurumu keca tapmumdi, sun tamupra ne damai yamum pangeda, sunda pio gam kunkamrume. 5 Sundi yuk tali keca cap, isok si cap eremna tep, Betel mutu embana gume. Tonda, Gilgal mutu eremnung isok tep, ‘Sun si eremepedi, melimsetenge do?’ tenen, Gilgal mutu men erbenkamrume. Utopu tonda, ‘Bersyeba mutu bepedi sun isok si erepkamepe’ tenen, bana gume.

Angeda tali tep men pepsene. Sun Gilgal ati arum dopra kunung nesala yumada, sun wenemna tep, nedi go karepnepa, yuk mutu yu nengdi, Gilgal kunge nesala popbisipmengedi, ateng kouprapmengedi, sun pe mutu dubenkamenge. Tonda, sun Betel mutu kunge nesala peda, sun wenemna tep, gum kupra deipnepa, gum kupkamenge. ‘Ukunkamepe,’ tenenge keca yumada, tek sisi nong men kupkamre.

6 Atep nengeda, sun Israel nesala yumada, ka di tamupra, ne Allah Yahweh damaipu benkurume. Bemum dingeda, sun pio tupa gampu kunkamrum dinin, ne damai tamupra men bemum pangeda, neda Allah, ne yuda uku jeramre utopu kurura cadi, sun apu bo Yusupdi deipupa, dadeipdanen yakarami nesala, sun Israel yala nesala yuma gawal dakamsene. Ukupmantoda, uku jepra gawal dangamretopu, sun wenemna tep, gum kupra deipkamsene. Tonda, Betel mutu kunge nesala peda, auku di jeprepa, gawal dakamre. Ajenkamre ukuda, ware ngebodi tapdongoptudi, anesala lyeptu do? Pio guma tep, ‘Allahdi wenepserur’ tenen, pepsena tep, sun kange moupso, pepsene.

7 Uo sun yumada, pio kange mun kange doupra kunkamrume. Kange mun keca weik karenkamsen nengda, ada sun kayapu neng tep, upu bongna taru, dumsisi upupu peptumdi, anesala kuramengtopu upu bokeiptum dinin, mok upu pena cap, mali kuna cap kurumupane, sun kayapu nesala yuma ikin kange doupra kununge. Tonda, sun dipapu dumsisi kunange yuma tapra, yaniptamrumudi, ka di tamupra mali kunangepu kurume. Atep, ne Allahdi wenepkamsene pepsene.

8 Neda Allah, ne si Yahweh kunune. Ne dipapu kuru im deiki ingamre ngeda, ketekepra deipsi. Ada kuru yuma cap, tonda nimi weik kael keaminge, kuru si Kartika cap, Belantik capda, nedipu ketekepra deipsi. Utopu, ne Allah dipapu lukunda neitamai kunungnada, ka di tamupra dirin kemdinune. Tonda, keteng komuni di tamupra lukunda kemdinune. Tonda, ila laut mokon deipsa neitamai di, me weik doprapnedi, dou tara kemdinepa, mo cemrepa, tuai mutu deiki mo cepredi me sangrure. Ange-ange yuma ukurur ngeboda, ne pua. Ne sida Allah Yahweh, ne dipapu ukunune.

9 Atep nengeda, ne Allah dipapu, perenglang pena menmena perenglang peramretopu, ne ila puto deiki di, mali nesala tep wenepnedi, gum kupra derinune. Wareto nesala do yuma, sun puto kutenga peda, sun cap, sundi gel ati dominge yuma capda, nedi gum kupra derinune. Ada, sundi, ‘Nun popsenung nesala men wektenge’ tenen, gel ati dominge cap, lyom gel beilya wiraminge cap yumada, nedi gum kupra derinune. Neda Allah, ne ila puto deiki di, sun aneng tenenung keca yuma, menmena gum kupra derinune.

10 Sun mali kurumu nesala yumada, ware ngebo do yuma, nimi upu bongdin taruda, er dumsisi upu perur ngebo tep nengeda, sundi er tep, ‘Nun songe,’ tenen, tulum kuserure. Ange utopu upu bongdina damai di, dumsisi telep upupu perur ngebo tep nengeda, ‘Nunda angebo nun songe,’ tenerume.

11 Utopu sundi tali kankan kunge nesala tep, ‘Sunda tali nesala kununge’ tenen, yanipdongopra sun gandum tali dalupra dororume. Sun keca cap, sun co bo cap upula weik dororuma cadi, pio mali kurume. Ukuruma tep nengeda, sun ange kurum nengda, pio telep gel ati donmarumada, amenda taru akati pumbon men kunkamrume. Ada sun pedi urasin pio telep kupra donmarum atida, akati yuma men kunkamrume, pepsene. Tonda sun pe puto deiki di wa pepra kouamrumu anggur du mouramre tapuda, du dakrumudi, adu taikra anggur me gwepra men jenkamrume.

12 Nedi wenepsenepa, akeca yuma men kunkamrum ngeda, mesum tep gume. Deiyoda ake. Sundi mali kecapu tenepra, ila mali kurum ngeda, ne konum kaele kemsenune. Sunda, pio mali kun keca weika di kurum ngeda, ne kaele. Ada sun upu bongdin taruda, telepngepu kupmange neng tep nengeda, “Sun mali kununge,” peptapra, ikin keca, sun nong deiki derirume. Dinin, mali kupmare ngebo tep nengeda, “Erda mali men kupmare,” pepra tali pertamrume. Ada mesum tep men kurume.

Deiyoda, er mali kupmare ngebodi, sun upu bongdina neng tep nengeda, “Lap men pepkamanerume,” pepra, bul karen co bo karepsengepa, dororuma deiki di upertamrume. Tonda, sun tali kankan kunge nesala tep nengeda, upu bongdin taruda, anesala tali yanitamrume. ‘Anesalada, dakwapye’ tenen, tamrume. Sun tep, dumsisi telep upu men perume.

13 Sundi ukuruma deiki di, ataru neitamaida, mali kun keca pio weik kurure. Ange tep, sun pio moupra dumsisipu kunung nengdi, upu pena gum, dimpeprappu kununge. Ada, ‘Sun mali deiyo nengdi, deiyo men kwapmarepapu popsenung’ tenen, upu men penunge.

14 ‘Gam kutepe,’ tenerum nesalada, pio telep kuna tepapu, pe deiprapu kunkamrume. Mali kun keca yuma taprumudi, ton pio men kunkamrume. Adeiki di gampu kunkamrume. Ukupmumnyopda, neda Allah Yahweh, ila puto kunedi, im deiki kunge jen talen nesala yuma talenun ngeboda, tek sisi sun kan-kan kunkamne. Ada, sundi, “Allah Yahwehdi kalekra melimserure,” pepra lap peramrumtopu, tek sisi kunkamsena tep pepsene.

15 Ange utopu, ‘Mali kun kecada, nun songe’ tenen, pio dumsisipu kunkamrume. Ware mali kun keca do yuma, malinge yuma taprumudi, ‘Angeda nun songe’ tenen, malinge pio men kunkamrume. Ukupra kumumnyopda, dinkamrume. Ukumum pangeda, neda Allah Yahweh, ila puto kunedi, im deiki kunge jen talen nesala yuma talenun ngeboda, tek sisi sun tep, melimkamsene. Teleppu kumumnyopda, nedi menmena wenepra men popsenedi, kange di ton cap bicau tenepsenyopda, Yusup er yala nesala tep telep kudinkamsene. Ada, sun apu bo Yusupdi deipupa, dadeipdanen yakaramipa, ukutaru peda kurum Israel nesala tep, ne Allah Yahwehdi sun tep, bicau tenesenedi, melimkamsene.

16 Sun mali weik kuruma tep nengeda, neda Allah Yahweh, ^{▼▼Allah – Akayat neitamaida, Ibrani upu deiki di, Allah er pe si sisa, ‘Yahweh’ cap, tonda, ‘Adonay’ cap, tonda ‘Sebaot’ cap, pepra sekya cadi, sun kael kemna tep, nundi aupu weneri deiyo ngeda, jenek kupra sekmupu. ‘Yahweh’ kael kemna tep, lap pen upu nomor 49 dinkurume. ‘Adonay’ cap, ‘Sebaot’ capda, sun deiyonge konum katuai di sekmepu.} akeca-keca yuma talepra, deiki tara erepra, pio puto weik deiyo ngebo kunune. Tonda, ne ila puto deiki di, im deiki jen talen malaikat yuma talenedi, sun deiyo ngebo kunune. Teka, neda Allah Yahweh dipapu pepsene. Ada ila ati arum dopidi, daneitamai bulupra upu talenungai yumada, engenapu kunkamenge.

Tonda, akati arum dopidi daneitamai embanung bisiai yumada, sundi, ‘Uo ware keca tep, mali kuramepu do?’ tenen, teniptopmengedi, sun kange dipru pio engenapu kunkamenge. Sun yumadi, ‘Uo, wenepmaserada, nun songe,’ tenepmengedi mali penkamenge. Sun kota neitamai kunge nesaladi, bura tara tali wa pena deiyo neng upupmengepa, yangopda, “Sun ton kikiman engenkamepe,” penkamenge.

Tonda, sun engena taru ila kael keamidi, mut penge nesalada tep, upupmengepa, yangopda, “Sundi ton, mali pena mut pepra engepso,” penkamenge. Sun yumada, kange mun kange doupra kunkamenga tep, engenapu kunkamenge.

17 Tonda anggur tapu du wa pen damai kunmange nesala yumadi, sun ton engenkamenge. Ada mesum tep men engenkamenge. Deiyoda, ne Yahweh, ila puto weik deiyo ngebo yanedi, sun yuma wenepra popkamsena tep, engenapu kunkamenge. Aupuda, ne Allah Yahweh, akeca-keca yuma talepra, deiki tara erepra, pio puto weik deiyo ngebodi, konum peipsene.

Allah er si Yahwehdi, nimi tuai nesala wenepkamre taruda, ikin weik kunkamenge, pepu upu

18 ‘Allah Yahwehdi mali kunge nesala wenepkamre tumi tep nengeda, nun kange deipmepe,’ tali pertamrum nesalada, bicaue. Tek sisa, sun mali kurumu dipapu, ne Allahdi popkamsen ja. Sun malipu kurum dinin, ware keca deiyo tep, ‘Uo, Allah Yahwehdi, dan tumi yaredi, mali nesala wenepkamre do?’ tenen, kange deipra dirum do? Sun walwal dipu kurume. Atumida dirine tumi guma. Pio kunungna tumi cadi, sunda, ‘Atumida menmena yatue,’ tenena gume.

19 Atumi er kamoda, pio ikin weik cadi, ukupmanto upu ton pepkusene. Ila yu pus utopu keca, er sida singa pus mapmarepa, epmengedi, ‘Popra jepserur’ tenen, kwar kuprepa sepdara banmankap, mangkau di yuk bura tara kure yu keca, er si beruang mapmaryai, bena beruangdi, ‘Anesala popra jepkun’ tenen, dadomamretopu kupkamsere. Ukupmanto upu ton, nimi tenpu ngebo, ‘Ne ati bena bepe peipkune’ tenen, banmare dinin, kunukmarepa kopdanen banmanka, mangkau bal taleprepa, adipapu er buru si toprepa, deramre utopu kupkamrume.

Ada, ‘Ikin kupserura tep, sepdaro bepedi lyepdatepe’ tenen, sepdara benterepkamrum dinin, ne Allahdi sun wenemna tep, ila ikin kecada, sun nong deiki deipkamsena tep pepsene.

20 Ange tep nengeda, tali tep men pepsene. Ada ne Allah Yahwehdi, mali kunge nesala wenemna tep, tenepsi tumi konum kupre pangeda, dirine men diripkamre. Tek sisi kunuknapu kupkamre. Ukupmantoda mo denepmare tumi, dua di kunung tamamretopu kupkamra cadi, atumida dirine pio men kupkamre. Kunukna pua.

21 Ne Allah Yahwehdi pepsene. Sundi mali tupa kurumupapu, ‘Nun nai bo Allah, er si eremkamepe’ tenen, ila tumi yuma ketenem dirumu ngeda, ne disenedi yu kunerure. Ange yumada, ne songe. Tonda sundi, ‘Gume, Allah gispal dona tep, mambul tumi ake,’ pepra nesala weika di bulumrumu tumi yuma tep nengeda, ne dukmanto kunune. 22 Sun mali weik tupa-tupa kurumu nesalada, ‘Nun mali keca kunumna tep, gam keca popra uku dongopmepedi, Allah tep gispal dopedi, moropkamepe,’ perumdi, gam keca domba cap, kambing cap, sun wa keca gandum cap, jagung utopu keca cap, dekanapu kurum dinin, ange yumada, ne songe.

Sundi, ‘Nun nai Allahdi lyepropkamaser ja’ tenen, yapi keca cap, gandum cap, ne damai duyakanerum ngeda, men dorosenune. Tonda, sundi ne karena tep, meta keca ila-ilange popra duyamumdi, er galemna uku dongoprumudi, ‘Nun mali kunup ngeda, daepkusera tep, nun Allah cap antapkupe,’ tenerumu ngeda, men dinkamsene. Ange yumada, tali tepapu tenepra kurume. Sun malipu kurumupapu, akeca duyana kareneruma cadi, nedi akeca yuma pio men dorosenune. Akeca ne song cadi, men dinkamne.

23 Malipu kurumupapu, ‘Allah er si ereipkup’ tenen, kange deipra mut perumunge yumada, adipapu tapkurume. Ange utopu, sun bung-bung pena, er si kecapi doupmumdi, ne si eremna tep perum mut yuma tapkurume. Mali kurumupapu, amut peruma tep, amut lelimda ne song cadi, ne men gekesenune.

24 Dinino, pio telep ngeda, dumsisi telep kupra kunangepu talepra kunkamrume. Ne putaner ngeda, ila me puto di embaramretopu, telep kunangepu, dumsisipu kumumpane, kange derinkamsene. Tonda, me lelum talipu embaramretopu, sundi mok upu pena gum dipapu, ‘Mali kupmare ngeboda mali kupmare,’ pepra upu bongdinkamrume. Telep kupmare ngebo tep nengeda, ‘Telep kupmare,’ pepra upu bongdinkamrume. Ukupmumnya deiki di, teleppu kupra pel donkamrume. Angeda tamna gum dinin, me bungna bukra embaramretopu kunkamrume. Ukupmumnyopda, nedi sun tep kange derinkamsene. Ne Allahdi pepsene.

25 Uo, ne nyapu Israel nesalao. Angeda, ka di ton cap tenipetepmumdi, kael kepkurume. Nedi Mesir mutu neitamai di lyepropsisipa, sun ila katuai mutu neitamai bisi yakaramrum taruda, nedi melipra duyakaramsisipa, teleppu kupra yanamrume. Ada keteng tamun empat puluh (40) tahun deiki di, bisi mapyakaramrume. Ataru neitamai yumada, sundi yapi keca popra kareryakaramnerum ngeda, tek sisi ne tep duyakaramnerum do? Akeca yuma popra, uku dongoramrumnge yumada, ne si eremna tep apel dorum do? Ne kangeda, gume. Sun dipru neitamaida, yuk tali keca teppu, teneramrume.

26 Gume, ne teppu ayapi keca yuma men kareramrume. Sundi kange deipra si eremamrum ngeda, ne tep guma. Sundi tali isok si eremna tep apel doramrume. Ada, ne Allah tep pio men kael keami nesala, sun isok si Sakut cap, Kewan cap tep, sun si eremrume. Ne tep gume. Sakutda, ‘Nun Raja neng melimkamser’ tenen, er si eremrume. Ange utopu, ‘Isok si Kewan, erda im deiki kuru yuma talepra, ila deiyo ngebo kurure’ tenen, er si eremrume. Sun isok-isok tep, ‘Nun nai yape, nun deiyo neng,’ pepra, isok si eremrume. Atep nengeda, sundi tali co cap, tali gel cap dopra, betapra deiprumdi, akeca si eremrum kecada, sun pe buru dipapu ketenepra derirbaramrume.

27 Ange yuma kuruma tep nengeda, sun tep wenepkamsene. Ne konum tenepsi taruda nedi go karepnepa, yuk karen mutu yu nengdi, sun popbisipmengedi, ateng koupra dubenkamsenge. Ada, pio ila karen mutu Damsyik mutu di dortara mutu, keteng yakan tara dubenkamsenge. Akupkamseng ngeda, ada nedi donokamsen taru tep, pepsene.

Ada tek sisi, ne Allah Yahwehdi, akeca-keca yuma talepra, deiki tara kunedi, im deiki jen talen malaikat yuma, sun deiyo ngebodi pepsene. Ila Eremna puto weik ngeboda, ne pua. Nedi aupu konum pepra deipsene. Allah Yahwehdi sun Israel nesala tep peipu.