Amo 6 | XteSC | STEP | Allahdi peipupa, Amosdi gekepra seku upu. Uo, Sion mutu neitamai kumumdi, ‘Nunda teleppu kupra kunupe,’ tenen, tali kange doupra kurum nesalada, bicaue pepsene. Tonda, sun Samaria mutu deiki kungedi, ‘Ikin keca nun damai men yatue’ tenen, telep kange doupra kumum nesala peda, sun bicaue. Sun yumada, sun mali kumum dipapu, ‘Telep kunupa,’ tenerum dinin, Allahdi wenepseredi, sun deiki ikin keca deipkamsera tep, sunda bicaue. Sun Samaria mutu nengda, tali neng gume. Israel nesala yumadi, sun si konum kael keami. Tonda, Israel nesala yumadi, ‘Nun nai yapudi kalekra melimkamsenge’ tenen, sun tep kange deipra dingedi, ‘Nun melipseso,’ pepra moronunge. Dinino, sun yumada bicaue pepne.

Amos 6

Israel nesaladi, ‘Telep nesala kunupe,’ tenerami dinin, mali kuramya tep, pepu upu

1 Allahdi peipupa, Amosdi gekepra seku upu.

Uo, Sion mutu neitamai kumumdi, ‘Nunda teleppu kupra kunupe,’ tenen, tali kange doupra kurum nesalada, bicaue pepsene. Tonda, sun Samaria mutu deiki kungedi, ‘Ikin keca nun damai men yatue’ tenen, telep kange doupra kumum nesala peda, sun bicaue. Sun yumada, sun mali kumum dipapu, ‘Telep kunupa,’ tenerum dinin, Allahdi wenepseredi, sun deiki ikin keca deipkamsera tep, sunda bicaue. Sun Samaria mutu nengda, tali neng gume. Israel nesala yumadi, sun si konum kael keami. Tonda, Israel nesala yumadi, ‘Nun nai yapudi kalekra melimkamsenge’ tenen, sun tep kange deipra dingedi, ‘Nun melipseso,’ pepra moronunge. Dinino, sun yumada bicaue pepne.

2 Aupuda, mesum tep men pepsene. Sundi, ‘Ikin keca nun damai men yankamsere,’ tenerum dinin, moupra tenenkamrume. ‘Amenda taruda, ware ikin keca yankamser do?’ tenepra, kael kemna tep nengeda, sun adipapu Kalne mutu dirbeso. Amutu dipetepmum dingeda, abisipu banmamumyane, bemumdi ila ati arum domi mutu er sida, Hamat mutu bena dipetepkamrume. Ukupmumdi, adinen Filistin tara neitamai, Gad mutu ton dirbenkurume. Amutu-amutu kurami nesala yumada, Allah wenepudi, poptapra gawal dangamu.

Ukuramu dinin, sundi wareto tenemum do? Sundi tenemumnyada, ‘Gume, Kalne mutu cap, ila kota mutu, er sida Hamat mutu cap, Filistin nesala sun ila kota mutu, er sida Gad mutu capda, amutu neitamai kurami nesala yumada mali nesala kurami dinin, nun puda, telep nesala kunupe,’ tenerume. Tonda, sundi, ‘Gume, sun yuk mutu kurami nesala sun mutuda, yambul pala mutupu talerami dinin, nun mutuda, ila go weik pala mutu talenupa cadi, nun mutuda, men gum kupsetue,’ tenerumudi, tali kange dourum do? Nedi tek sisi pepsene. Allahdi gum kupra deiamu nesalada, mali kuramitopu, sun Israel nesala peda, malipu kurume. Allahdi amutu-amutu kurami nesala yuma, gum kupra deiamu ngeda, moupra tenenkamrume. Sun peda, utopu kupkamsere.

3 Uo, sun yumadi tenemumdi perumada, “Allahdi nun mali kunup keca tep, nun nong deiki ikin keca deipkamser tumida, men tenenkamepe. Angeda, men tenenkamepe. Ataru dipapu, kange mun keca men yankamsere. Ange gum dinin, pio weikanun dakunkamepa,” perume. Dinino, sun aupu perum nesala yumadi, sun mali-mali weik kurum keca deiki, Allahdi wenepkamser taruda konum damai kurure. Ila di wenepkamser ngeda, sun pedi, sun pe tep, tapakra deridarume. Allahdi sun tep wenepra ikin keca deipkamser tumida, konum damai kupre.

4 Uo, sun mana telepaipu mapra, kange telep doupra kurum neng cap, tonda pio telep domba bisam cap, sapi bisam cap, popra kailya jepmumdi, kange deipra kurumu nesala, sun yumada bicaue. Allahdi sun yuma tep, wenepra ikin keca deipkamser ja. Ange tep nengeda, kange mun kange doupra kunkamrume.

5 Tonda, tali kange doupra, telep keca kalepra jemum taruda, sun kange deipmumdi, bung-bung pena, er si kecapi deiki di, kange lon mut lipra perume. Ada, Allah er pel don ngebo Raja Dauddi, Allah tep, kange lon mut lipra peramutopu, sundi, ‘Nun ton ukunkamepe’ tenen, tali mut lipra bung-bung pena yala-yala yuma doupra, mut perume.

6 Tonda ange utopu, sun me jena tep, anggur meda me mau di gwepmumpa, dinipyopda, weika di jerume. Tonda, sun nong bol deiki pio telep kuna tep, nintong telep me lingdarume. Tali kange doupra, ange yuma ukurum dinin, Israel nesala yuma mali kununge nge tep, mambul kange doupra kutum dinin, angeda pio men tenerume. Sundi, ‘Uo, nun apu bo Yusupdi deipupa, dadeipdanen yakaramidi, nun damai kunge Israel nesalada, ware keca deiyo tep mali kudidanung do?’ pio men tenerume.

7 Ange yumada, pio men teneruma tep nengeda, yuk mutu yu neng yana popbisipmengedi, sun Samaria mutu ila-ila neng yumada, sunpu menmena doupra, yuk mutu wenemna ati derirbenkamsenge. Allahdi go kareprepa ukupsengepa, sun Samaria mutu nesala, ila kailya kalepra jemumdi, kange deipra kumum ngeda, tek sisi gum kupkamsere.

8 Allah er si Yahwehdi pepu. Neda Allah Yahweh, ila puto ngebo kunune. Nedi akeca-keca yuma talepra, deiki tara erepra, pio puto weik deiyo ngebodi, ne pe si deiki di, pio tek sisi pepsene. Ada, sun apu bo Yakubdi deipupa, dadeipdanen yakaramidi, ukutaru kunge Israel nesaladi utenenunge. ‘Nunda, tek sisi pio telep nesala kunupe,’ tenengedi, sun dipru eremnunge. Ukununga tep nengeda, ne Allahdi pio yu kunerure.

Sun kange eremdanungada, ne songe. Tonda sundi, ‘Nun podan neng men wekra popsetenge’ tenen, ila lyom gel beilya wiraminge cap, gel ati cap dominge yuma peda, ne dipapu dinedi, yu kunerure. Atep, sun deiyo kepra kunung mutu cap, amutu neitamai kunung keca yala-yala yuma cap, amutu neitamai kunge nesala yuma capda, ne Allahdi doprapnedi, sun podan neng buru deikipu deipkamne.

9 Ukupkamne taruda, nimi takol bari di utara (10) neng ton, amutu ati bo inipmanga peda, eprapnedi adipapu sun yuma poptapnepa, depkamenge. 10 Tonda, yuk atida, nimi weika di konum depmenge pangeda, sun tara ngebo ton yaredi, sun adepmange neng peina tep, sun nong doupra bare taruda, ukupkamre. ‘Akati pumbonda, nimi tenpu ton tupa gam kunmar do, gum do?’ tenen, angebo er amnyo tara di upepra asipetepkamre. “Akati pumbonda, tenpu ngebo ton gam kunmaremdi, inipmarem do?” pepra asipetepkamre.

Asipeteprepa, tenpu ngebopu, “Ne tenpu gam kunmana,” pepyopda, depmange neng peina deiyo ngebodi, upepkamre. “Yuk nesala ton, kan gam kunmarema utopu kunmang do? Kan tenpu do?” pepra asipetepkamre. Aupu peprepa, akati gam kure ngebo gekepre dingeda, “Gume, ne tenpua. Tonda, Allah Yahweh, er si ton pio men penkamrume. Upu yambul ila di pepmempa, Allahdi gekepkeryopda, kange di tamupra yaredi, nun peda poptapserure. Atep dimpepnapu kunkurume,” pepkamre.

11 Ne tek sisi pepsene. Allah Yahwehdi peiprepa, ila ati arum dopra kungai cap, yambul ati arum dopra kungai cap yumada, urupra tapkamenge. Allahdi, ‘Ukupkurume,’ pepre pangeda, akati-akati yuma urupra sikke buktapkamenge. 12 Sun ton tenipetepso. Ukupmantoda, kuda bisamdi mutu deiki gel takke beleamtuai sepdara betu do? Tonda, ila laut mokon deipka neitamaida, nimidi sapi bisam doupra, tapu gerektengepa, sapi batengedi, pel doptenge do? Gume, sun kaele, ange yumada men kupmanto keca cadi, pio walwal neng dipu ato upu peptenge.

Dinino, sundi dumsisi teleppu kuna ngeda, tamupra yu keca utopu kupra derirume. Ukupruma deiki di, nesala weik denunge. Ange utopu, dumsisipu kutumtoda, nesala weik kange deipra teleppu kutenge dinin, sun mali weik kuruma deiki di, yuk nesala tep mali kudirumpa, mambul kange doupra, mali pepra engenunge. Telep ngeda, sundi tamupra mali kemdirume.

13 Uo, sun Israel yala nesalada, deiyo ton men kwapmarepapu, telep kange deipra kumumdi, kange lon mut perume. Tonda, sundi, “Gume nun pe puto deiki dipapu, mambul mutu cap, puto nesala cap, popbisipmepudi, dalupra doproamepu,” pepra, dipru erepra gemerume. Ange yuma upeprum dinin, tali upupu perume. Allahdi peipupa, Amosdi gekepra seku.

14 Allahdi pepu. “Ne Allah Yahweh, akeca-keca yuma talepra, deiki tara erepra kunedi, ila puto weik ngebo kunune. Neda im deiki jen talen malaikat yuma talenune. Ukunun ngebo, pio tek sisi sun Israel yala nesala yuma tep aupu pepsene. Tek sisi ne Allah Yahwehdi, yuk mutu jen talen neng dopra deipnepa, sun Israel nesala kurumu mutu yuma yangedi, yana popra gawal dakamsenge.

Ukupsengopda, sun kurum mutu neitamai yuma, ila ikin keca sun nong deiki derinkamsenge. Ada, popsengedi, ikin keca sun deiki derinkamsengada, Hamat mutu bisi banai utara di dipdongopra baramumnyane, itara Araba mutu neitamai ila banai bena deipkamsenge.” Allahdi pepu.