Amo 7 | XteSC | STEP | Amosdi pepu. Allah Yahweh erda akeca-keca yuma talepra, deiki tara erepra, ila puto weik deiyo ngebo kuredi, ne Amos tep peten keipupa, nedi epsi. Epsi kecada ake. Sul poda gung pio weika di ketenepra deipupa, kunmaipa epsi. Ataruda nimi deiyo ngebo Raja karena tep, gandum cap, yuk wa kouami keca cap, konum sekra karepmaipa, ka di ton cap ukupu panmau keca gonga kepra, jenkamau sul po ketekepra deipu. Amutmuta sekropmainge, kapul gapu silingmau taru di epsi.

Amos 7

Allah Yahwehdi, nimi wenemna tep, keteneiamu keca yuma jenek keipupa, Amosdi epunge tep, pepu upu

1 Amosdi pepu. Allah Yahweh erda akeca-keca yuma talepra, deiki tara erepra, ila puto weik deiyo ngebo kuredi, ne Amos tep peten keipupa, nedi epsi. Epsi kecada ake. Sul poda gung pio weika di ketenepra deipupa, kunmaipa epsi. Ataruda nimi deiyo ngebo Raja karena tep, gandum cap, yuk wa kouami keca cap, konum sekra karepmaipa, ka di ton cap ukupu panmau keca gonga kepra, jenkamau sul po ketekepra deipu. Amutmuta sekropmainge, kapul gapu silingmau taru di epsi.

2 Akupu keca epsi taruda, asul po gung yuma belepra yaidi, tu deiki paramu mutmuta yumada, yana jepra gawal dakropi pangeda, nedi, Allah tep upepsi. “Uo, Allah Yahweh, kanda akeca-keca yuma talepra, deiki tara erepra, pio puto weik deiyo ngebo kuruma cadi, nedi kan tep, upu pepkunada, ‘Mali pepnun’ tenen, kware kunerure.

Atep, ‘Nedi mali pepnyopda, kandi ne tep kaukepkunerum’ tenen, moropkene. Naio, kan nyapu sisa, Yakubdi deipupa, dadeipdanen yakarami nesala, sunda puto boun nesala cadi, ikin keca weik sun nong deiki deipmemnyopda, ware kupra tupa gam kutenge do? Sun gungda, yala metek nesalapu kununga cadi, kandi akeca karepmem pangeda, ware kupra tupa telep kupra gam kuptenge do?” pepra asipetepsi.

3 Upepra moropsipa, Allah Yahwehdi, ‘Ukupra wenepkamsene,’ tenen, keteneipudi ajenek kepra deipu kecada yaprou. Allahdi tamupra tenepudi, ‘Angeda tupa men kupkune’ tenen, tapu. Tapudi kange di tamupra ne tep upepneu. “Nedi ‘Israel nesala wenemna tep ukupkamne,’ tenepsi ngeda, men kupkamane,” pepneu.

Allahdi Amos tep, u butene ngeda, uku katuai kupra deipupa epka tep, pepu upu

4 Allah Yahweh erda akeca-keca yuma talepra, deiki tara erepra, pio puto weik deiyo ngebo kurya di, ne Amos tep peten keipupa, nedi epsi. Epsi kecada ake. Ada er nyapu, Israel nesala sun wenemna tep, ‘Ila uku karepkaman’ tenen, keteneipu. Aketeneipupa epsi ngeda, ukuda ila laut mokon deipkaida, uku sakudi aca di gonga kepra, amokon yuma cap, tuai mutu-mutu yuma capda, ‘Ukudi jepra gawal dakamare’ tenen, konum keteneipudi, dokotepkoua tep kupupa epsi.

5 Ukupu pangeda, ne Amosdi tamupra Allah tep pepsi. “Uo, ne nai Allah Yahweh, kanda akeca-keca yuma talepra, deiki tara erepra, pio puto weik deiyo ngebo kuruma cadi, kandi, ‘Ila uku keteneipmarem ngeda, tek sisi dokotepkun’ tenen, keteneipmarem ngeda, ‘Ange tapkurume,’ pepra moropkene. Naio, kan nyapu sisa, Yakubdi deipupa, dadeipdanen yakarami nesalada, sunda puto boun nesala cadi, kandi aila uku dokotepmem pangeda, ware kupra tupa gam kutenge do? Sun gungda, yala metek nesalapu kununga cadi, kandi akeca tek sisi karepmem pangeda, ware kupra tupa telep kupra gam kuptenge do?” pepra asipetepsi.

6 Upepra moropsipa, Allah Yahwehdi, ^{▼▼Yahweh – Acada, Ibrani upu di, ‘Yahweh Adonay’ pepra sekya cadi, nundi aupu ‘Adonay’ seki ngeda, deiyonge jenek kupra sekmupu. ‘Yahweh’ tep, lap pen upu nomor 49 dinkurume.} ‘Ukupra wenepkamsene’ tenen, keteneipudi, ajenek kepra deipu kecada yaprou. Allahdi tamupra tenepudi, ‘Angeda tupa men kupkune’ tenen, tapu. Tapudi kange di tamupra ne tep upepneu. “Neda, Allah Yahwehdi, akeca-keca yuma talepra, deiki tara erepra, pio puto weik deiyo ngebo kunedi, ‘Israel nesala wenemna tep ukupkamne,’ tenepsi ngeda, men kupkamare,” pepneu.

Lyom tapudi gel beilya kunupetepupa epka tep, pepu upu

7 Tonda ne Amosdi dinmasipa, Allahdi yuknge ton kunupetepudi, katuai deipupa epsi. Epsi ngeda ake. Allahda, akeca-keca yuma talepra, deiki tara erepra, pio puto weik deiyo ngebodi, gel beilya, ila lyom ngeda, abeilya damai teku. Abeilya wiami nesaladi pio lyom tapu dumsisinge di kunupetepra wiami. Allahda, abeilya deiki tekmaudi, er buru neitamaida, ‘Lyom do, bum do?’ tenen, kunumpeten tapu doupmaudi, ‘Awipi beilyada, kunupetepkune. Ada kwiryepu deipra wipi do, gum do?’ tenen, kunumpeten keca keteneipupa epsi.

8 Konum epsi pangeda, Allah Yahwehdi, ne Amos tep asipetepneu. “Ne buru deiki di doupman kecada, ware keca epmarem do?” pepra asipneupa, nedi tamupra pepsi. “Ne nai Allah kandi dumsisi lyom tapu kunumpetena tep, doupmareme,” pepsi. Upepsipa, Allah erda, akeca-keca yuma talepra, deiki tara erepra, pio puto weik deiyo ngebodi, upepneu. “Gume atapu doupmana deiki di, ne nyapu sisa, ne mawa nesala Israel nesalada, ‘Tek sisi pio dumsisipu kunung do, gum do?’ tenen, kunupetepkamne. Alyom gel beilya dumsisi kupra deiya wiamitopu kupra, ton men kununga tep pepne.

Sundi tupa-tupa malipu kununga tep, menop taru ange yuma kaukeamsi dinin, ukutaruda ka di ton cap, men kaukepkamne. Nedi, ‘Sun mali kunge keca wenemna tep poptapkamne’ tenen, keteneipsi ngeda, men tapkamne. Tek sisi adipapu sun tep, wenepra poptapkamne.

9 Ukunkamne taru neitamaida, Isakdi tali keca isok si eremna tep, mutu deiki gel pala deiamu ngeda, nedi urupra tapnedi, gum kupra deipnepa, amenda taruda, nimidi amutu pio men benkamenge. Tonda, Isakdi deipupa, dadeipdanen yakange nesala, Israel nesaladi, ‘Isok si eremkamep’ tenen, domipa telep kwamu ati yumada, nedi urupra tapkamne. Ukupnepa amutu yuma cap, akati yuma cap, walangapu kunkamre.

Ukupne dingeda, sun ila nimi deiyo ngebo, er si Raja Yerobeam, er taleamu keca cap, er yala nesala cap, er taleramu mutu cap, er amutara deiyo nesala yuma cap, popra gawal dakamne. Ukupnedi, yuk mutu yu neng tep, go karepnepa, parang ya doupra yangedi, Raja Yerobeam taleamu keca cap, nesala yuma cap popbisipkamenge.” Allahdi ne Amos tep peipneupa gekepsi.

Betel mutu ngebo, er si Amaziadi, Raja Yerobeam tep, pepu upu

10 Uda, Allahdi aupu yuma peipupa, nabi Amosdi aupu konum lap perbeu pangeda, Betel mutu Allah upu ati neitamai pel doramu ngebo, er si Amaziadi gekepu. Gekepudi, nimi tenpu ngebo ton wepra deipupa, Israel nesala taleamnga deiyo ngebo Raja Yerobeam kori lap perbeu. Erdi peipu upuda ake. “Ataruda Amosdi upeserure. ‘Nun deiyo ngebo Raja Yerobeam cap, er talere mutu yuma cap, gum kupkamre.’ Amosdi upepra, mali upu perura deiki di, amutu neitamai kunge Israel nesaladi, kan tep mali kudina tep upu sisingkamenge. Angeda mambul weik cadi, kange moupkurume.

11 Tonda Amosdi aupu pekerure. ‘Nun deiyo ngebo Raja Yerobeamda, mar podanmanga deiki di popmengepa, depkamre ja,’ pekerure. Tonda, ‘Raja popmengedi, er taleamu Israel nesalada, tek sisi yu nengdi ateng koupmengedi doupra, yuk mutu derirbenkamenge. Sun nong deiki ikin keca weik derinkamenge,’ perure.” Imam Amaziadi doproipu ngebodi, Raja Yerobeam tep lap perbeu.

12 Aupu perbenmau taruda, Amaziadi, nabi Amos tep upepu. “Kanda Allah er upu peiprepa, amenda kupkamre keca dirum ngebo, tonda Allah er upu lap pena deiyo ngebo nabi kurume. Dinino, kandi peserem upuda, nun gekena dabal cadi, adipapu Yehuda yala nesala talepra kunge mutu neitamaipu, Allah upu doupra lap perbenkurume. Nun kori ton cap pena gume. Ukupmempa, sun Yehuda yala nesaladi kan melimna tep karenkamkenge.”

13 “Yehuda yala nesala kunge tara bana telep dinino, nun mutu neitamai, Betel mutuda, Allah upu ton cap men peteremkamsereme. Amutuda ila nimi deiyo ngebo Raja Yerobeamdi, ‘Amutuda ne mambul mutu,’ tenerura cadi, amutu neitamaida, ila mambul ati konum domudi, akati domupa yakanupe. Amutu cap, akati capda, nun nai Raja Yerobeam er mawange tep, kandi amutu ton yakana gume. Atep nengeda, Allah er upu ton amutu neitamai lap perbana gume,” Amaziadi Amos tep pepu.

14 Upepu pangeda, Amosdi tamupra Amazia tep pepu. “Kandi nabi ngebo pepra, si pepmanerem dinin, neda tek sisi nabi ngebo gume. Neda, Allah er upu lap pena cap, amenda kupkamre keca lap pena cap ngebo guma. Ange utopu, ne nai bo peda, nabi ngebo men kuramu. Tek sisa, neda bisam peina cap, bura paramre co, er si ara co du dangna cap ngebo kunune. Ne pelda apel butene pua.

15 Apel butenepu dopra kuramsi dinino, ne domba bisam peina pel doramsa neitamai, Allah Yahweh erdi ne dopropneudi, upepneu. ‘Gume kanda adipapu ne upu douprapmemdi, sun Israel nesala kunung mutu perbenkamrume. Amenda kupkamre keca lap peipkenepa, aupu doupra, nedi wepra deiamsi nesala, ne mawa nesala sun Israel yala neng tep lap perberume,’ pepra deipneue,” Amosdi pepu.

16 Upepudi aupu ton dukdongopra pepu. “Allahdi wepra deipneudi, ‘Israel nesala tep lap perberume,’ peipneu. Ange tep nengeda, Allah Yahwehdi sun tep peipseu upuda, moupra gekenkurume. Ada, kandi ne tep, ‘Nun Israel nesala damaida, Allahdi peipmaker upu lap pena gume. Israel nesala sun wenemna tep, amenda taru ikin keca sun nong deiki yankamre ngeda, kange di ton cap lap pena gume. Ange utopu, Isakdi deipupa, dadeipdanen yakanung nesala, sun wenemna tep, upu ton men lap pepkamserume,’ pepneruma tep pepkene.” Amosdi Amazia tep pepu.

17 Upepudi, aupu ton pepu. “Kandi, ‘Allah peipkeu upuda, lap men penkamserume,’ pepra, upu sekneruma tep nengeda, Allah Yahwehdi peipmaker upuda ake. Allah Yahwehdi, upepkere. Kan nerda, akota neitamai dinin, tali bisi enbanapu kurepa, nimi yumadi co bo karepmengedi, aner dopra upula tali-tali nyangkamenge. Tonda kan nyapu yumada, yuk neng yangedi, mar podanmangai di, ya dopra kan nyapu yuma popra gawal dakamkenge.

Tonda, kan talepmum mutu tu yumada, tapu di kunupetepmengedi, bokrapmengedi, yuk nesaladi atu yuma kunupra dopropkamkenge. Ukupkameng taruda, yuk mutu neng Allah Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep teka men tenenung nesaladi, ateng koupkengedi, kan nong peda, sun kan-kan bena depkamreme. Tonda ataru dipu, yuk mutu nesala yangedi, yana popbisipmengopda, sun Isarel mutu kunung nesala yuma doupra, yuk mutu derirbenkamenge. Ada pio karen mutu dubenkamenge. Allahdi upepra deipmakere,” pepra, Amosdi lap pepu.