Amo 8 | XteSC | STEP | Amosdi pepu. Allah Yahweh, erda akeca-keca yuma talepra, deiki tara erepra, pio puto weik deiyo ngebodi, ne Amos tep peten keipupa, nedi epsi. Epsi kecada ake. Ada tapudi wiami alen er si keranjang pumbonda, bupu li mouramre du keca engamunge yala-yala yuma, weika di kipmaupa epsi.

Amos 8

Allahdi Amos tep, ue dumbari benbenepu ngeda, tapu weiamya pumbonda, du keca weik kupmaupa epu upu

1 Amosdi pepu. Allah Yahweh, erda akeca-keca yuma talepra, deiki tara erepra, pio puto weik deiyo ngebodi, ne Amos tep peten keipupa, nedi epsi. Epsi kecada ake. Ada tapudi wiami alen er si keranjang pumbonda, bupu li mouramre du keca engamunge yala-yala yuma, weika di kipmaupa epsi. 2 Ange konum epsi pangeda, Allahdi, ne Amos tep pepneu. “Amos kanda ware keca ton kupmaupa epmamum do?” pepra asipneu. Upepneupa, nedi tamupra pepsi. “Tenpu tapu wiamenge pumbonda, co du bupu li di, du engamunge yala-yala yuma, weik kipmangupa epmanue,” pepsi.

Upepsi pangeda, Allah Yahwehdi tamupra pepneu. “Tenpu tapu pumbon co du engamunge yala-yala yuma weik kipmangupa, epmamumnge deiyoda, ake. Aco du konum engamutopu, Israel nesala sun wenemna taru konum wisina utopu kupmara cadi, sun wenemna taru damai kupmara tep, aco du epmareme. Tupa-tupa malipu kununga tep, menop taru ange yuma kaukeamsi dinin, ukutaruda ka di ton cap, men kaukepkamne. Nedi, ‘Sun mali kunge keca wenemna tep poptapkamne’ tenen, keteneipsi ngeda men tapkamne. ‘Tek sisi Israel nesala wenepra popkamne,’ teneramsi taruda, konum damai kupre.

3 Ange kupkamre taru yumada, nimi deiyo talepra, ila telep ati kungedi, kange lon mut penung nengda, kange di tamupra kange mun kange doupra, engenapu kunkamenge. Allah Yahweh akeca-keca yuma talepra, deiki tara erepra, pio puto weik deiyo ngebo kunedi, aupu pepne. Tonda, anesala popra gawal dakne pangeda, sun depkameng neng sun nong yumada, dan cei do yuma, akapnapu kupkamre. Ada nimi weika di depmengepa, yuk nengdi dana-dana tara yuma bena donokmange. Ukupra kupkamra tep, sun yuma dimpepso, pepsene,” Allahdi pepu.

Israel nesala wenepkamrenge tep pepu upu

4 Upepudi, aupu ton pepu. “Aupuda moupra gekepso. Uo sundi kankan kunge nesala tep, ‘Sunda tali nesala kununga’ tenen, yanitamrumdi, ikin keca sun nong deiki derimumpa, sun yuma kange mun kange douna deikipu kuramenganen, denunge. Tonda, sun mutu neitamai kunge kankan kunge nesalada, pio mali kudirumpa, ikin pio weik kununge.

5 Tonda, sun mali kurum nesaladi, sun pe tep upedarume. ‘Anengo, ukupu war tengdongon taru kuprepa, Allah er si eremnup taruda, dan tumi konum gum kuptupa, nundi ka di tamupra, nun gandum menmena kunuptepe do?’ Tonda, sun pepu aupu perume. ‘Allah gispal dona tep, pel dona gum dipapu, beipye peingnup tumi Sabat tumida, dan taru gawal dakamre do? Sabat tumi konum gawal daktupa, nundi nun gandum du kunuptepedi, kunumna keca doronkamepe,’ tenerume.

Tonda, kunumna keca ‘Weika di doproptepe’ tenen, gandum du lungna kecada, meteknge dipu lungrume. Meteka dipu lungrum dinin, ‘Akeca kunumna tep, co bo weika di tapakra karepseso,’ pepra mororume. Tonda, gandum du kin keca, er si karong kipmengedi, timbangan deiki derinung taruda, sun timbanganda, mokngepu derirume. Akeca tek sisi ikinda, men perume. Ukupra kumumnya deiki di, sun mutu nesala tep, mok upupu perume. Sundi, ‘Gume, gandum du er ikinda yambul pua,’ peptapra mok upu pepmumdi, sun keca tali upula dopra jerume.

6 Tonda, sundi yuk neng tep, kunumna weik keca, er sida perak kareprumnya deiki di, tali kankan kunge nesala kunupra dororume. Ange utopu, akeca-keca yuma talepra men kunge nesalada, sundi kunumna metek kecapu, yantang deiki kenengna keca, er si sandal dopra, yuk neng tep karepmumyopda, sun kankan kunge nesala kunumrume. Angepu gume dinin, ‘Co bo weik dopropkamepe’ tenen, tek sisi gandum du telepnge gum dinin, gandum du taikmengedi wepra, tamamenge bamlapropapu buprapmumdi, ‘Gandum telepnge adano,’ pepra, mok petamrumpa, akeca walwal nengdi tali lupra kunumnunge,” Allahdi pepu.

7 Upepudi, aupu ton dukdongopra pepu. “Amali keca yuma tupa kuruma tep nengeda, neda Allah Yahweh, Israel nesaladi ne si eremnung Allah, ne si deiki di tek sisi pepsene. Sun mali kunge nesaladi kunge ngeda, tek sisi men lupronkamne. Angeda kaukepnedi, men tapkamne. Pio tupa tenenkamne.

8 Sunda pio mali weik kuruma tep nengeda, amutu-mutu neitamai kunge nesala yuma, gekepmengedi, ‘Uo,’ tenen, mambul kange doupmengedi, kware kuprepa moropsemkamenge. Tonda, sun mali kurumu keca tep, yuk neng yuma gekepmengedi, ‘Uo’ tenen, kange mun kuprepa, engenkamenge. Amutu-mutu yuma moropsepredi, berber penkamre.

Tonda, Mesir mutu neitamai embaramre ila me, er sida Nil me, oupredi, kait buka welepredi, ila di embanmaredi, me mokon yuma orbena yana kemredi, semdinmaryane, ka di tamupra kwerepredi, metekpu kupbaramretopu, sun mutu peda ukupkamre. Ada, amutu yumada, ila di lokamre.” Allahdi pepu.

9 Aupu konum pepudi, Allah Yahweh, akeca-keca yuma talepra, deiki tara erepra, pio puto weik deiyo ngebodi, aupu ton tapakra pepu. “Israel nesala, sun wenemna tep, ne tenepsi tumi konum kupre pangeda, ketengda komuni tupa kaprepapu, neitamai di bena wekamre. Tonda tuai mutuda komuni tupa akaprepapu, inkamre. Iproprepa, kunungnapu kupkamre. Tek sisi ne Allah Yahweh akeca-keca yuma talepra, deiki tara Ila Eremna Ngebodi pepsene.”

10 “Tonda sun dipru mali kupmarepapu, kailya kalepra jemumdi, ne si eremrum taru yumada, ne song cadi, nedi aila tumi yuma gum kupra deipkamne. Ukupnedi atumida, sun engena tumipu keipkamsene. Tonda kange lon mut, telep-telep perumnge yumada, tamupra engenangepu keipkamsene.

Ange utopu, nedi sun giso potong yuma toupra, gum kupra deipsenepa, giso delau nesalapu kunkamrume. Ikin keca weik, sun nong deiki derisenepane, sun yumadi kange mun kange doupra kunkamruma cadi, mali opkal di, getepdongopra bukmumdi engenkamrume. Ukupmantoda er nin er naidi, sun menmena deiamrenge mi tep depmarepa, engeramrengtopu, ikin keca weik sun nong deiki deipsenepa, engenapu kunkamrume. Ataruda kange mun deikipu kunmamumpane, sirya gawal dakamre.” Allahdi, sun Israel nesala tep pepu.

Allahdi, “Jen cap, me cap putana deiyo keca karepkamne,” pepu upu

11 Allah Yahweh, akeca-keca yuma talepra, deiki tara erepra, pio puto weik deiyo ngebodi pepu. “Ne tenepsi taru konum kupre pangeda, amutu yuma tep, ila putana deiyo keca karepkamsene. Ukupmantoda, jen putana cap, me putana cap akapyopda, nesala yuma mali kange doupra, ikin deikipu kununge. Ange utopu keca karepkamne dinin, ada tali jen sisa cap, me sisa cap putana tep, men karepkamsene.

Ne Allahdi pesene upu yumada, ton cap men penkamsene. Sun kumum mutu neitamai, ne Allahdi pesene upu dopropnepa, tenpunge peda men gekepra kunkamenge. Ukupnyopda, sun yumada kange mun kange doupra kunkamrume.”

12 “Nedi upu ton cap men pepsene pangeda, sun yumadi, ‘Uo, Allah Yahwehdi pesere upuda, dan mutu ton betepedi, er upu gekeptepe do?’ tenen, pio putarepa enkamrume. Enkamrum dinino, pio men epkamrume pepne. Tonda, ne upu gekena tep putapkamra cadi, amutu-amutu kunge nesala yumadi, epra embandankamenge. Ada laut mokon ortara kunge nesaladi, atara laut mokon damai sepdara eryakankamenge. Ange utopu, itara kunge nesaladi, utara erbenkamenge. Tonda, keteng yakan tara kunge nesaladi, keteng danban tara erbankamenge. Ukunkameng dinino, nedi sun tep pesene upu ton akapmarepa, pio men gekenkamenge.” Allahdi pepu.

13 Allahdi aupu pepudi, aupu ton pepu. “Ange kupkamre taruda, nong nepmengedi, urasin pio telep kupra puto kunge kaber neng cap, kaber nerapu yuma cap, sun yuma peda ne upu tep putaprepa, kange douna gum di, puto boun kuprepa, loka dourbenkamenge. Ada, ‘Uo, Allahdi upu tenpunge peda ton pepsetupa gekeptepe’ tenen, ila du putarepa loka dourbenkamenge.

14 Ne Allahdi Israel nesala tep wenemsen taruda, sun Samaria mutu neitamai kunge nesaladi, isok er sida Asima, aisok si eremenge nesala yuma depkamenge. Tonda, Bersyeba mutu kunge nesala cap, Dan yala nesala mutu kunge nesala capdi, isok si eremengedi, ‘Nun nai bo tek sisi gam kuretopu, kunkamepe,’ pepra, isok si eremnung neng yumada, tuai saka dourbenkamenge. Nedi aneng yuma popra gawal daknepa, depkamenge. Apoptapnepa, saka dourbenkameng nesalada, kange di ton cap tamupra gam men bukamenge.” Allahdi Amos tep peipupa lap pepu.