Amo 9 | XteSC | STEP | Ne, Amosdi dinmasipa, Allahda, akeca-keca yuma talepra, deiki tara erepra, pio puto weik deiyo ngeboda, yapi keca popra karyakaramya damai, yana tekmaupa epsi. Ada gel pala taplakra deiamya damai, Allah erpu yana tekupa, nedi konum ukupra epsipa, Allah er si Yahwehdi aupu ton peipneu. “Nedi ne si eremna tep domi ati ayumnya yumada, ne buru puto di aco deiyoi kupra deipkamne. Ukupnepa, akati atolong yuma cap, ayumnya co cap, ason yuma capda lokamre. Ukupredi akati ikra domi ayumnya yumada, urupra sakredi, nimi giso deiki dourberepa, nimi yuma depkamenge. Ataru di sun men depmange nengda, mar cap, parang ya cap dopra, yana podanmanga deiki di, popra gawal dakamne. Ukupkamne taruda, tenpu ngebo pe ton kurapra, yuk tara men benkamre. Tonda, tenpu ngebo peda, pio men tapkamne. Sun mali kunge nesala yuma, popra gawal dakamne.

Amos 9

Allah Yahwehdi, Israel yala nesala, sun wenemna tep, pepu upu

1 Ne, Amosdi dinmasipa, Allahda, akeca-keca yuma talepra, deiki tara erepra, pio puto weik deiyo ngeboda, yapi keca popra karyakaramya damai, yana tekmaupa epsi. Ada gel pala taplakra deiamya damai, Allah erpu yana tekupa, nedi konum ukupra epsipa, Allah er si Yahwehdi aupu ton peipneu.

“Nedi ne si eremna tep domi ati ayumnya yumada, ne buru puto di aco deiyoi kupra deipkamne. Ukupnepa, akati atolong yuma cap, ayumnya co cap, ason yuma capda lokamre. Ukupredi akati ikra domi ayumnya yumada, urupra sakredi, nimi giso deiki dourberepa, nimi yuma depkamenge.

Ataru di sun men depmange nengda, mar cap, parang ya cap dopra, yana podanmanga deiki di, popra gawal dakamne. Ukupkamne taruda, tenpu ngebo pe ton kurapra, yuk tara men benkamre. Tonda, tenpu ngebo peda, pio men tapkamne. Sun mali kunge nesala yuma, popra gawal dakamne.

2 Ukupkamne taruda, sun kwar kuprepa, ne tep kurapra, nimi denge nesala wengbanungai betenga peda, nedi amutu benedi doupra duyankamne. Tonda, im deiki weleptenga peda, nedi bena doupdara duyankamne. Duyanyopda, anesala yuma popkamne ja.

3 Ange utopu, sundi Karmel mutu dupai inimbetenga peda, nedi bena eprapnedi, dopropkamne. Tonda sundi, ‘Allah epseredi, popserur’ tenen, ila laut mokon numnumai amutara inimbetenga peda, nedi aila mokon pumbon amutara kure Naga bal tep, ‘Anesalada kandi si topra poprume,’ pepra kai deipnepa, erdi anesala yuma, si topra ponkamre.

4 Ange utopu, sun podan neng popbisipmengedi, ton tara neng tomopra wenemna ati dubetenga peda, nedi sun aneng tep, peipnepa ya dopra, ya di poptapkamenge. Tonda ne puto di, ‘Sun anengda tali men tamkamne,’ tenepnedi, ‘Anesalada ikin keca sun nong deiki pio derinkamne,’ tenepnyopda, akonuma. Kange di ton cap tenepnedi, ange tapra, telep keca sun tep men karenkamne. Anesalada, pio men melimkamna cadi, sun tep telep keca men karenkamne. Kange mun kange doun kecapu karenkamne.” Allahdi pepu.

5 Upepudi aupu ton pepu. “Neda, Allah ^{▼▼Allah – Akayat neitamaida, Ibrani upu deiki di, Allah er pe si sisa, ‘Yahweh’ cap, tonda, ‘Adonay’ cap, tonda ‘Sebaot’ cap, pepra sekya cadi, sun kael kemna tep, nundi aupu weneri deiyo ngeda, acapu jenek kupra sekmupu.} kunune. Ne sida Yahweh. Nedi akeca-keca yuma talepra, deiki tara erepra, pio puto weik deiyo ngebo kunune. Neda, im deiki kunge jen talen malaikat yuma talenuna cadi, sun deiyo ngebo kunune. Nedi, tuai mutu yan yanipne pangeda, tuai mutu yuma ila di longredi, boun kuprepa, me embaramretopu kupra, gum kupra barure. Tonda, ukupnepa tuai mutu kunung nesala yuma, kwar deikipu kununge.

Ukupmantoda, Mesir mutu neitamai, Nil me weika di onmare taru, me kait ila di welepmaryane, cepropnen bare taru yambula di kwerebaramretopu, nedi peipnepa, sun anesala kunge mutu yumada, ila di longredi, welerbandenkapredi, tamupra tuaipu sakamre. Ne Allah Yahwehdi pepsene.

6 Tonda, ne Allah Yahweh ne atida, pio im alau tara neitamai dopsi. Ukupsidi, tuai mutu ton ketenepra deipsi dingeda, ne kune ati utopu ngeda, akati ayumnya coda, tuai mutu deiki ketenepra deipsi. Tonda, ila laut mokon deipungepu, upu peipne pangeda, amokon ton doprapnedi, douai mutu tara yuma dingtamnune. Ange yuma ukununa deiyo ngeboda, ne si Allah Yahweh kunune.” Allahdi pepu.

7 Ne Allah Yahwehdi peipsene. “Uo ne nyapu, sun Israel nesala yuma tep, pumun taru, ‘Ne nyapu’ tenen, wepra anuamsisi dinino, ukutaruda sun mali kuramruma tep, taprapsisidi, Etiopia ^{▼▼Etiopia – Ton kael nengdi, amutu si tep, Etiopia mutu penunge. Ton kael nengdi, ‘Sudan mutu’ si penunge.} mutu nesala tep, wenepra poptapsitopu, sun Israel nesala pe tep, wenepra popkamsene. Tonda, sun tenipetepso. Sun Israel nesalada, Mesir mutu neitamai, kange mun kange doupra, kuramrum taru neitamai di, lyepsisidi, men duyanamsisi do? Mesir mutu neitamai di, sun doupra telep mutu men dubenamsisi do? Tonda, Filistin nesala, Kaftor ^{▼▼Kaftor mutu tep nengeda, mutu si Kereta mutu ton penunge. Tonda, Siria nesala tep nengeda, ton nengdi, Aram mutu nesala penunge.} mutu kuramipa melipra duyasi. Utopu Siria mutu nengda, Kir mutu neitamai di doupra duyasi. Ada, ne nyapu Israel nesala, sun Mesir mutu kuramrumpa, doupra yanamsisitopu kupsi.”

8 “Atep nengeda, nedi tenenetopu kupkamne ja. Neda Allah Yahweh, akeca-keca yuma talepra, deiki tara erepra, pio puto weik deiyo ngebo kunune. Ukunedi Israel nesala, sun mali kurum keca tep, tupa-tupa kalekra dinune. Atep nengeda, nedi sun Israel yala nesala mali kurumu keca men kaukepkamne. Ange gum dinin, sun yuma popra gawal dakmanto kupsenepa, tuai mutu neitamai ton, pio men kunkamenge. Dinino, sun apu bo Yakubdi deiamupa, dadeipdanen bange nesalapuda, anesala yuma popra gawal daknedi, men gum kupra deipkamne. Tek sisi aupu yumada, ne Allah Yahwehdi pepsena tep, nong kupkamre ja.” Allahdi pepu.

9 Upepudi, aupu ton dukdongopra pepu. “Aupu yumada, nedi mesum tep men pepsene. Deiyoda, ne Allahdi sun Israel nesala wenemna tep, upu pepra deipne pangeda, yuk karen mutu kunge yu kunge nesala yangedi, sun tep popkamsenge. Ukupmantoda, nimidi gandum du wena tep, ‘Telep ngeda tuai sakamre, dinin, mali ngeda, kumanya di dopra dubenkamre’ tenen, gandum du weramengtopu, nedi ne nyapu Israel nesala tep nengeda, ‘Telep nesala dan do, mali nesala dan do?’ tenen, wepropkamsene.

Yu neng yangedi, popbisipkamsenga deiki di, sun tep wepkamsene. Awepkamne taru di telepnge yuma wepropnedi, mali ngeda tapkamne. Dinino telep ngeda, tenpunge peda men gum kupkamre. Telep ngeda, lyepropkamne ja.

10 Dinino, ne nyapu, ne mawa nesala kunga kan-kan, ‘Allahdi nun tep, ila ikin keca deipra, men wenemkamsere. Ikin keca nun deiki men yana kunkamsere,’ pepra, dipru erepdangedi penung nesala yumada, popkamne. Ada, nedi go karepnepa, yuk karen mutu nesala, yu nesala yangedi, amali kunge nesala yuma parang ya di poptapkamenge. Tonda mar podana deiki di popra gawal dakamenge.” Allahdi pepu.

“Allahdi Israel nesala tep weneprepane, amenda taru tamupra telep kupra deipkamre,” pepu upu

11 Allahdi peipu. “Ne tenepsi taru konum kupre pangeda, Daud er buru deiki di taleamu nesala cap, taleamu keca cap, mutu capda, nedi ka tamupra telep kupra deipkamne. Ukupmantoda, Daud er domu ati dela yuma, pun deipudi daksaku ngeda, kange di punupra dukdongopnedi, dopra telep kupra deipkamne. Ukutaruda, amutu neitamai ati dominge cap, gel beilya wiraminge cap, akeca yumada, yuk mutu nengdi yana urupra tapkamenge. Ukupkameng dinino, amenda taruda, ne Allahdi alyom gel beilya wiaminge cap, sun ati cap, akeca-keca yuma, pio telep kamotopu ka di tamupra telep kupra deipkamne. Ukupnepa, pumun taru pio telep kwamutopu kunkamre.

12 Kange di tamupra telep kupra deipkamsena deiyoda, ake. Ada, amenda taru gam kunkameng Israel yala nesaladi, Edom mutu tupa gawal kapkamre mutu yuma dopra talenkamenge. Tonda, ware mutu nesala do yuma, ne tep, si eremkamneng nesala yuma peda, Israel nesaladi aneng yuma talengedi, sun deiyo nesala kunkamenge. Ange yumada, tek sisi nong kupkamre. Deiyoda, ne Allah Yahwehdi pepsena tep, apepmasen upu yumada, tek sisi nong kupkamre ja.” Allahdi pepu.

13 Ne Allah Yahwehdi pepsene. “Ne tenepsi taru konum kupre pangeda, gandum du do, ware koun keca do yala-yala yuma, wa pepra kouramenge ngeda, tupa kimenge taru, kapul men gawal dangmengepapu, ukupunge ton bolokredi, bongopra pankamre. Sun wa peamenge keca kiramenge nesala pe, wa pepra koun nesala peda, tenpu taru dipu pel donkamenge.

Ange utopu, anggur wa pe, tonda du keca yuk yalange peda, telep kupra bongopredi du mounkamre. Ukupra, adipapu menmena, du mouprepa, dakra kinkamenge. Tonda, ton taru kipmanga, ton taru du mouprepa kipmanga, ton taru du men mouprepa, men kipmanga men kepkamenge. Ataru-ataru yuma, anggur tapu wa pepra koupmengepa, ataru adipapu telep kupra bongopredi, du weik mounkamre.

Ukupre pangeda, ataru dipapu amutu kunkameng nengdi, anggur du ataru-ataru yuma purunkamenge. Tonda, dan mutu do yuma, anggur tapuda mutu dupai welepredi, er teruda amutu buma yuma beleka embankamre. Amutu nesala yumadi, akeca-keca weika di kinkamenge.

14 Tonda, nedi Israel nesala tep, telep kupra deipnedi, ka di tamupra ereipnepa, pio teleppu kunkamenge. Ukupne pangeda, sun kurami mutu yuma, kange di tamupra talepmengedi, sun ati yuma punupra dopmengedi kunkamenge. Ukungedi, anggur wa pepra koupmengepa, anggur tapu du telep kupra mouprepa, dakmengedi, anggur du purupra, me gwepra tupa jenkamenge. Tonda wa pengedi, kounkameng keca yala-yala yuma, wa pepmengepa, du cap, nong cap, telep kupra mouprepa, kipra weika di jenkamenge.

15 Ukupmantoda, nimidi koun keca tenpu, wa neitamai kouamengaipu, tupa-tupa bolongamretopu, ne Allahdi, ne nyapu tep, sun pumun taru kareramsi mutupu, tamupra karepnepa, pio akunkamenge. Ukupne taruda, ton cap tamupra men doropkamne. Tonda, yuk mutu nesaladi, ne nyapu sun Israel nesala tep, popbisipmengedi, amutu neitamai di pio men dubenkamenge. Nedi sun tep kareramsisi mutu neitamaipu, pio kunkamenge. Tek sisi neda, sun deiyo ngebo ne Allah si Yahwehdi pepsene.” Allahdi pepu.