Col 1 | XteSC | STEP | Ne Paulus cap, nun weit utopu ngebo Timotius cap, nun butene di asurat sekeipseneme. Ne Paulusda, Yesus Kristusdi, ‘Ne upu dopra peterep embana tep gonga kemna deiyo ngebo kunkamre’ tenen, wepra deipneupa, er pelpu pio donune. Ukununada, Allahdi, ‘Paulus ne pelpu donkamnere,’ teneamneudi, wepra deiamneua tep, apelpu donune. Ukununada, Allahdi, ‘Paulus ne pelpu donkamner’ teneamneudi, wepra deipneua tep, tamna pio gum di, er pelpu talepra kunune.

Colossians 1

Paulusdi, ‘Telepe’ pena tep, pepu upu

1 Ne Paulus cap, nun weit utopu ngebo Timotius cap, nun butene di asurat sekeipseneme. Ne Paulusda, Yesus Kristusdi, ‘Ne upu dopra peterep embana tep gonga kemna deiyo ngebo kunkamre’ tenen, wepra deipneupa, er pelpu pio donune. Ukununada, Allahdi, ‘Paulus ne pelpu donkamnere,’ teneamneudi, wepra deiamneua tep, apelpu donune. Ukununada, Allahdi, ‘Paulus ne pelpu donkamner’ teneamneudi, wepra deipneua tep, tamna pio gum di, er pelpu talepra kunune. 2 Asekeipmasenem suratda, ada sun Kolose mutu kumum nesala tep sekeipseneme. Sun Kolose mutu nesalada, Allah teka teneamruma tep, er nyapu kupra deipseua cadi, nun weite-du utopu nesala kurume. Ukuseupa, sunda mali kuna gum dipapu, dumsisipu kurume. Atep, tamna pio gum di, erpu talepra kuruma cadi, nun weite-du utopu nesala kurume. Sunda, Yesus Kristus teka teneprumnya deiki di, er cap dipru dukdongopra kurume.

Nun nai bo Allahdi, sun Kolose mutu teka tenerum nesala tep, bicau teneseredi, er kange dipapu melimsere keca cap, ‘Yu tenedana gum di, kange deipra teleppu kikiman kunkameng’ tenen, karesere deiyo keca cap, kareserure. ‘Ange yumada, tupa-tupa weika di tapakra karenkamser’ tenen, sun Kolose mutu kurum nesala tep Allah morosenune.

Paulusdi Kolose nesala tep, ‘Telepe,’ pepu upu

3 – 4 Yuk nesaladi upesenunge. “Gume, sun Kolose mutu kunge nesalada, Yesus Kristus teka tenengedi, Allah tep teka tenemi nesala, yuk nesala yuma tep, bicau tenepra, sun dipru karerepa kununge,” pesenunge. Ukupra peramseipa gekenumua tep, sun Kolose mutu nesala tep Allah morosenum taru yumada, Allah tep, telepe penume. Allahda, nun Deiyo Ngebo Yesus Kristus er nai sisa kurure.

5 Yesus Kristus teka tenerumdi, yuk teka tenena nesala tep, bicau tenepra dipru kareserepa, kumumnyada, tali tep gume. Ukuruma deiyoda, Allahdi, ‘Anesala tep telep keca cap, pio gam kuna deiyo keca cap karenkamne’ tenen, ketenepra im deiki moupra deiamseu kecada, sundi, ‘Pio gam kuna deiyo ngeda, nun tek sisi doronkamepe’ tenen, kange tenimtona gum dipapu, pio ketenepra dinapu kurume. Ukuruma tep, Yesus teka tenepra, yuk nesala tep bicau tenerume. Allahdi ketenepra deiamseudi, amenda karenkamser keca upuda, ada asurat neitamai di pepmasen keca yumada, Allah er pio tek sisi nimi lyemna tep kai telep upu peteremamseiya neitamai di, konum gekeramrume.

6 Ware mutu do yuma, Allah er tek sisi kai telep upu, nimi lyemna upuda, teka tenena nengdi peteremengepa, nesala ban-ban yuma gekepmengedi, teka tenepmengopda, teka tenena nesala weik kupbanunge.

Ukupmantoda, du mouramre co, du weik mouramretopu, nimidi Allah er kai telep upu teka tenepmenga deiki di, dumsisi kun kecapu talepra kungedi, sun telep kun keca weik kupbarure. Ban-ban yuma neitamai di, nesala weik teka tenepmengedi, telep-telep kupra kuramengtopu, sun Kolose mutu nesala peda utopu kurume.

Ada, aupu gekeramrum taru di dipdongoprap, adinen amenda taru yumada, sun kan-kan di Allah er kai telep upu gekerumdi, du weik moupbaredi, weik nepbaramre. Ukupra kurura deiki di, nesala weik ton cap teka tenengedi, sun telep kun keca weik kupbarure. Ukuserura gonga kepu taru ada, Allahdi nun yuma tep, bicau teneseredi, lyemseryopda, er kange dipapu pio melimsere upu, nimi lyemna tep kai telep upu tek sisi gonga kepra dororamrum taru di, gonga kepseudi, tupa-tupa kuserure.

7 Aupu yuma, nimi lyemna tep kai telep upu yumada, nun kabo Epafrasdi peteremamseupa, kael keamrume. Epafras cap, nun cap, ‘Kristus er amutara kupedi, er pelpu donkamep’ tenen, kikiman pel donupe. Epafras tep, nundi pio bicau tenenume. Nunda, sun damai men yateneme dinin, nun kabo Epafrasda, tamna pio gum di, ‘Kolose nesala peterepra pio makunkamne’ tenen, Kristus er upupu talepra pel dorure. Ukuryada, Kristus tep apel doredi, nun tep melimserure. 8 Epafrasdi, nun tep, upepseue. “Allah er Lek Sambaladi, er puto kareserya deiki di, sun Kolose nesaladi, sun butene cap, uda, Allah er tep teka tenenung nesala yuma cap tep, pio bicau tenepra dipru kareserure,” pepra lap peipseupa gekepnume.

Paulusdi Kolose nesala tep, Allah moropu upu

9 Ange yuma lap peipseua tep nengeda, Epafrasdi, sun tep aupu pepseu taru di dipdongopra, ataru cap, amenda kunkamser taru cap, uda, ataru-ataru yuma peda, tamna gum di, sun Kolose nesala tep, Allah pio morosenume. ‘Allahdi sun Kolose nesala tep ukunkamre’ tenen, morosenum kecada, pepkuseneme. Ada, Allahdi sun tep, ‘Ukunkamenge, ange ton men kunkamenge,’ teneamseu keca yumada, ‘Tek sisi moupra kael kepmengedi angepu talepra kunkameng’ tenen, morosenume. Ada, ‘Ila kael kemna deiyo keca dopropmengedi, kael nesala kunkameng’ tenen, morosenume. Tonda, Allah er Lek Sambaladi, er puto kareserya deiki di, nong bol deiki kecapu gum dinin, ‘Pio neitamai deiyo kael keca ton moupra tenenkameng’ tenen, Allah morosenume.

10 Nundi sun tep, ‘Akeca yuma doronkameng’ tenen, Allah morosenumada, mesum tep gume. Deiyoda, Allahdi, ‘Ne nyapu ukupra, dumsisipu kunkamenge,’ teneseretopu, tek sisi angepu talepra, ‘Sun kunkamrum keca yuma teleppu kunkamruma’ tenen, Allah morosenume. Tonda, ‘Ukunkamrumnya deiki di, Allahdi kange derinkamser’ tenen, nundi sun tep Allah morosenume. Ukupra kumum pangeda, Allahdi kange derinkamser kecada, lelepra pepkusene. Ada, ware telep kun keca yuma do yuma, adumsisi keca yala-yala yuma kumumpane, telep du weik moupredi, teleppu kupbankamrume. Tonda, Allah cap dipru dukdongopra kumum keca cap, Allah er kure keca cap yumada, ‘Ila di kael kepbankameng’ tenen, nundi sun tep Allah morosenume.

11 Tonda, Allah er ila puto weik kuramretopu, erdi er sun Kolose nesala tep, puto weik kareserepa, kange mun keca weik kupserya peda, ‘Tamna pio gum di, pio pe deipra pel domumdi, kange tenimtona gum di, teleppu kunkamrume. Tonda, ikin kuserya peda, yuk neng tep, menmena di yu kuprepa, pel men tapkamrum dinin, dipru bouna dipu, kange deipra teleppu kunkameng’ tenen, nundi sun tep Allah morosenume.

12 Tonda, ila di kange deipra, pingpinga di, nun nai Allah tep, ‘Telepe, penkameng’ tenen, Allah morosenume. Nun nai Allah tep, tupa-tupa, ‘Telepe,’ penkamruma deiyoda, ake. Ada, Allahdi, ‘Ne nyapu yuma konum telep kupra deipnedi, im deiki menenga keca karenkamne’ tenen, keteneiamseu kecada, ‘Sun Kolose nesala im deiki welepra kungedi, sun peda doronkamenge’ tenen, konum telep kupra deipseue. ‘Im deiki menenga keca dopropkameng’ tenen, telep kupra deipseua tep, nun nai Allah tep, ‘Telepe’ pepra, ila di kange derinkamrume. Nun nai Allahdi, akeca-keca yuma taleredi, im deiki ila dirine neitamai pio kunkamraida, nun cap, sun cap, teka tenenge nesala yuma cap, kikiman kunkamepe. Sun Kolose nesala cap, ‘Im deiki kunkamruma’ tenen, Allahdi konum telep kupra deipseue.

13 “Im deiki ila dirin neitamai kumumdi, menenga keca doronkamrume,” pepmanemada, mesum tep men pepneme. Kain Jen Ngebodi, nun dipru taleamseupa, pio kunungnai utopu kuramupka neitamai di, Allahdi konum loptapra lyepseue. Lyepseudi, er kange deiamu ngebo, er Mi Sisa Yesusdi akeca-keca yuma talepra, ila deiyo ngebo keprap kurya neitamai konum dopra deipseupa akunupe. Ukuda, er Yesus dipu taleserure. 14 Allah er mi Yesus pel dopseudi, er yapi embeua deiki di, nun nai Allah lyepseudi, konum telep kupra deipseue. Ada, nun mali kuramupu keca cap, mali teneramupu keca cap tep, adipapu wenepra poptapsetu dinin, bicau teneramseudi, nun malinge kaukepseudi, gum kupra deipseua tep, gam pio kunkamepe, pepseneme.

“Yesusda, akeca-keca yuma deiki tara kuredi, ila mambul ngebo kurure,” pepu upu

15 Allah er kuretopu, er Mi Sisa Yesus peda, pio tek sisi utopu kurure. Allahda, nimi asuru di men epmanto ngebo kurure. Allahdi akeca-keca yuma ketekepra, deiamu. Dinino, ukupmanto ngeda, nimidi weni mi deipmengepa, amidi er nai yapu sun keca yuma talepra kuramretopu, Allah er Mi Sisa Yesusda, gonga kemna deiyo ngebo, pio ila mambul ngebo kurure. Ukuredi, Allahdi ketekepra deiamu keca yala-yala yuma talepra, deiki tara ila deiyo ngebo kurure. 16 Allah er Mi Sisa, akeca-keca yuma talepra deiki tara kuredi, pio ila mambul ngebo kurura tep nengeda, lelepra pepkuseneme. Ware kure keca do, yala-yala yumada, Yesus er dipapu ketekepra deiamu. Im deiki kure keca yuma cap, tuai mutu neitamai kure keca yuma cap, nimidi asuru dinung keca yuma cap, akapmar dinin, nimi asuru di men epmanto keca cap, ange yuma peda, er dipapu ketekepra deiamu.

Tonda, ware puto kure keca do yuma, ila-ila nimi deiyo neng, Raja neng yuma cap, pio puto weik kure keca yuma cap, nimi deiki tara kunge deiyo neng yuma cap, sun amutu tara kungedi, yambul deiyo pel talepra donge neng cap, tali neng dinin, yuk nengdi aneng tep, ‘Nun nai yapu’ tenen, deiyo upu penge neng cap, aneng-aneng yuma peda, Allah er Mi Sisadi ketekepra deiamu. Ware kure keca do, yala-yala yumada, er dipapu akeca yuma ketekepra deiamudi, ‘Akeca talenepane, akeca cap, anesala yuma cap, sundi ne si erepra gispal donkamneng’ tenen, ketekepra deiamu.

17 Allah er Mi Sisa Yesusda, akeca-keca yuma deiki tara kuredi, ila mambul ngebo kuryada, deiyo ton pepkusene. Ton ngeda, Allahdi akeca-keca yuma kapul men ketekeipra deiamu taruda, Yesus erda, konum akuramu. Tonda, Allahdi perepa, Yesus er pel dopra er kurya deiki di, akeca-keca yumada men gum kupbarure. Yesus er kure keca cap, er puto weik kurenge cap, er pere upu cap deiki di, im deiki kure keca cap, tuai mutu kure keca yuma cap, telep kupra gampu kurure. Erdi ange yuma men taleptu teptoda, akeca yala-yala yuma gum kuptue. Yesusdi akeca yala-yala yuma talerya deiki di tupa gam kurure.

18 Tonda, Allahdi er nyapu kupra deipseu nesala yumada, Yesus taleseredi, nun Ila Nimi Deiyo Ngebo kuserure. Ada, ukupmantoda, nun giso kwapseu keca yuma deiki di, akeca-keca yuma tenepra kupetopu, Yesus er peda, Allah er nyapu yuma tep, Ila Deiyo Ngebo kuseredi, taleserure.

Tonda, Allahdi, ‘Yesusda akwapre keca yuma deiki tara kuredi, ila mambul ngebo pio akunkamre,’ tenepka tep, Allah teneamutopu, Yesus depu dinin, ka tamupra Allahdi Yesus gam bukra deipu. Ukutaruda, yuk nesala ton deamengepane, Allahdi anesala gam bungdirur dinin, menmena gam bukra deiamu ngeboda, er Mi Sisa Yesus pua. Allahdi Yesus menmena gam bukra deipka deiyoda, ‘Yesusda akeca-keca yuma deiki tara kuredi, ila mambul deiyo ngebo kuredi, akeca yuma talenkamre’ tenen, Allahdi Yesus menmena gam bukra deipu. Yuk keca yumada, Yesus er amutarapu kurure. Erda pio deiki tara kure ngebo pua.

19 Ada mesum tep men penupe. Ada, Allahdi Yesus tep kange deiamnga cadi, Allah er pe kure keca cap, er puto cap, uda, er ila mambul kure keca yuma capda, Yesus er deiki deipupa, er kange dipru neitamai wengamupa, Yesusdi tuai mutu yana kuramu. Allah er kure keca yumada, Yesus er nong neitamai kuramu. 20 Allahda, pio Lek Ngebo kurura cadi, ware keca do yuma, tuai mutu kapu keca do, im deiki kapu keca do, akeca-keca yuma cap, Allah cap kikiman men kupmanto kuramu dinin, Allahdi, ‘Akeca-keca yuma telep kupra deipnedi, ne cap dukdongopra deipnyopda, telep kupra kikiman kunkamepe,’ teneramu.

Ukupra tenemnga tep, Allahdi Yesus wepra deipupa, Yesusdi sengdin co deiki pel dopupa, er yapi embeua deiki di, akapu keca yuma cap, nun cap, Allah cap, anupra dukdongopra deipseue. Menop taruda, im deiki kapu keca cap, tuai mutu kunup nesala cap, Allah cap, men antapdanmanto kuramepu dinin, Allahdi Yesus wepra deipupa, er pel dopseupa, er yapi embeua deiki di, konum anupra dukdongopra deipseua tep, ukutaruda, Allah cap kikiman kutepe.

Yesusdi nun mali keca daepra, telep kupra deipseudi, nun cap, Allah cap dipru dukdongopseuada, sengdin co deiki depupa, er yapi embeua deiki di, telep kupra deipseue. Ange tep nengeda, Allahdi peipupa, Yesus lyepseudi, ukutaruda nun Ila Deiyo Ngebo kuseredi, taleserure. Tonda, Yesusda, akeca-keca yuma deiki tara kuredi, ila mambul ngebo kurure. Yuk keca yumada er amutarapu kurure.

21 Uda, menop taru sunda, sun kange dipru neitamai di, ‘Allahda nun songe,’ teneramrumdi, pio mali-mali kuramruma tep, Allah er tara nesala utopu pio men kuramrume. Ange gum dinin, er tep yanipra pio yuk kuramrumdi, mali weik kuramrume. 22 Ukupra pio yuk kuramrum dinino, ukutaruda, nun nai Allahdi, sun mali kuramrum keca daepseudi, er cap kikiman kuna tep, dipru dukdongopra deipseue. Telep kupra deipseudi, er cap dipru dukdongopra antaipseuada, er Mi Sisa Kristusda nimi nong daudi, tuai mutu yana dakuramnganen, nun tep depka deiki di telep kupra deipseue.

Ukupseuada, tali tep gume. Deiyoda, ‘Ne Allahdi sun dopra, ne damai deipkamsen taruda, sun mali kun keca tenpu pe men kuptupa, pio dumsisipu kunkameng’ tenen, telep kupra deipseudi, er cap dipru dukdongopseue. Konum telep kupra deipseua tep nengeda, ware neng do yuma, sundi nun tep, ‘Anengda mali neng kununge,’ pepra mali upu men pepsetenge.

23 ‘Nun nai Allah men tapseredi, telep kupra er damai duyankamser’ tenen, putapseryopda, ukunkamrume. Sun adipapu, Allah er kai telep upu, nimi lyemna upu gekemumdi, pio tupa-tupa teka tenepra, yamdongona gum di, aupupu talepra, pio dimpeprap kunkamrume. Ukupmumnyopda, Allahdi pio telep kupra deipseredi, er damai duyankamsere. Tonda, Allah er kai telep nimi lyemna upu neitamai kapu keca yuma, peteremamseipa, konum gekeramrumnge yumada, kange bongtona gum di, ‘Tek sisi ukunkamsere’ tenen, sun adipapu ketenepra dinapu kunkamrume.

Uda, peteremamseipa, gekeramrum upu, Allah er kai telep upuda, yuk mutu neng peda, dorongedi, nimi ban-ban yuma kunge mutu konum peterep embangepa gekenunge. Tonda, ne Paulusdi Allah er kai telep upu, nimi lyemna upuda peterep embana tep, apelpu talepra pio donune.

Paulusdi, Allah er teka tenena nesala tep, melipra pel doramu keca tep, pepu upu

24 Ukutaruda, ne nong deiki ikin keca derinengepa, ikin weik kunerur dinino, tupa kange deipra kunune. Uda, sun kaele, sun cap, yuk mutu teka tenenge nesala cap melimna tep, Allah er kai telep upu peteremnepane, yuk nengdi, ‘Apel dore ngeda, nun song’ tenen, ikin keca dopra ne nong deiki derinenunge. Yesus Kristusdi ne tep, ‘Ne tep teka tenenge nesala melimna tep, Paulusdi pel dorepa, yuk nengdi ikin keca er nong deiki derinkamenge,’ teneramneudi, wepra deipneua cadi, apelpu donedi gawal dakbankamne. Kristus er nong deiki ikin keca deriramipa, ikin weik kuramunge utopu keca, ne nong deiki derinkamneng ngeda, tupa akapkamnera tep, gawal dakbankamne. Yesus teka tenepmepepa, Allah er nyapu keipsere nesalada, nunda Yesus Kristus er nong utopu kunupe. Ada er tara nesala, er amutara kunupa tep pepne.

25 Yesus teka tenepra Allah er nyapu keipsere nesala melimna tep, Yesus er kai telep upu peteremna pelpu talepra dona ngebo kunune. Ukununa deiyoda ake. Ada, Allahdi ne tep, ‘Paulusdi ne upu yuma dopra, Yahudi yala gum nesala gekena tep, Allah upu yuma pio moupra peterep embenkamre’ tenen, apel deiyo keca karepneudi, wepra deipneue. Ukupneua tep, Allah upu bol deikinge pe, nong neitamainge peda, tenpunge peda tamna gum di, pio lelepra peteremkamsene.

26 Allahdi ne tep, ‘Ne upu peteremrume,’ pepra deipneu upuda, ada pio mambul upu dinin, inimna utopu upu, ada, ‘Deiyo ake’ tenen, men kael keptepe upu utopunge lap peipneu. Ada, Allahdi menop taru kurami nesala yuma tep, ‘Betapra men kael kepkameng’ tenen, aupu nong neitamainge iniamupa, ‘Deiyo ake,’ tenen, moupra men kael keami. Dinino, ukutaruda, Allahdi, ‘Anesalada, ne mawa nesala kunkamenge’ tenen, wepra deiamseupa, er tep teka tenenup nesala, er nyapu tep, aupu nong neitamainge konum katuai lap peserepa, ‘Deiyo ake’ tenen, moupra gekenupe. 27 Ada, Allahdi, ‘Ne nyapu kunkameng’ tenen, konum weamseu nesala tep, utenepu. Ada, ‘Ne Allahdi pumun taru neitamai iniamsi upuda, ukutaru ne nyapu tep katuai lap pepkamne,’ konum tenepu. Aupu iniamupane, ukutaru aupu katuai lap peseryada, pepkusene.

Ada, “Allahdi Yahudi yala gum nesala tep, kange deipredi, ila telep kupra deipkamre,” peserure. Iniamu upu neitamai, pio telep kapu upu ada, “Yesus Kristusdi Yahudi yala gum nesala peda, sun dipru neitamai, er cap dipru dukdongopra kunkamsere,” peserure. Ada, sun Kolose mutu nesala peda, sun dipru neitamai Kristus dukdongopra kunkamre. Sun cap, Kristus cap dipru dukdongopra kusere deiki di, sun yumada, ‘Gume sirya taruda, Allah ereipseredi, im deiki ila dirine neitamai, ila mambul nesala kupra deipkamsere’ tenen, teka tenepra, ketenepra dinapu kunkamrume.

28 Ware mutu nesala do, ware yala nesala do yuma, nundi anesala-anesala yuma tep, Kristus er kai telep nimi lyemna upu peteremnupe. Ada, ‘Mankau di mali kupnung’ tenen, “Sun kange moupso,” pepra wenemnupe. Tonda, anesala yuma tep, Kristus er upu dopra, ila kael di pio moupra peteremnupe. Ukunupada, mesum tep gume. Deiyoda, Kristus cap, dipru dukdongopra kunge nesala yuma, amenda taru Allah er damai welepkameng taruda, ‘Sun dipru wisiprepa, pio dumsisi nesalapu kunkameng’ tenen, er upu pio moupra peteremnupe.

29 ‘Yesus tep teka tenenung nesala yuma, dumsisipu kunkameng’ tenen, ne pio pe deipra pel puto di donune. Ada, Yesus Kristusdi, er puto karenerepa, ne dipru neitamai ila puto weik kunerya deiki di, pio pe deipra, piripetepra pel donune. Ne Paulusdi pepsene.