Colossians 2

1Sun Kolose mutu kurum nesala cap, Laodikia mutu kunge nesala cap, uda sun yuk nesala, asuru di kapul men dininge nesala yuma cap, sun melimna tep, nedi pio pe deipra, piriterenedi, pel puto di donunada, ‘Pio moupra kael kepkurum’ tenen, lap pepsene. 2Apel donuna deiyoda, butene akwapmare. Tenpu ngeda, ada sun Kolose mutu nesala cap, apepmasen mutu nesala cap, ‘Sun dipru kwa dipdangedi, Yesus teka tenepra pio dimpepra kunkameng’ tenen, pel donune. Sun dipru kwa dimdamumdi, dimpepra kunkamrume. Ada, sun dipru karedamumdi, dipru dukdongopra kuna cap, bicau tenepra makudana cap, kunkamruma deiki di, dipru kwa dimdankamrume.

Deiyo butene ngeda, ake. Ada, nun nai Allahdi er mambul upu iniamu ngeda, ‘Tek sisi moupra gekeptengedi, ila di kael kemkameng’ tenen, pel dosenune. Ila mambul upu, iniamu upuda, ada Kristus er upu tep pepsene. 3Aila mambul upu, Allahdi iniamu upu moupra gekena cap, ila kael kemna cap tep nengeda, Kristus cap dipru dukdongopra kuruma cadi, erdi melimserya deiki dipapu, moupra kaele kepkamrume. Ange men kuprumyopda, amambul keca men kael kemkamrume.

4Aupu pepmasena deiyoda, ‘Kange pio moupkamrum’ tenen, pepsene. Deiyoda, yuk mali nengdi, mok upu dinin, ila kael kemna utopu upu deiki di, tali peterepsengepa, sun Kolose mutu nengdi, ‘Uo, aupuda tek pesenunge’ tenen, mankau kange di teka teneprumudi, ‘Yuk mali bisi berum’ tenen, upu seksene. 5Upu seksenada, tali tep gume. Ada, sun cap, ne nong cap, kikiman amutupu men kunup dinino, nedi, ‘Anesalada ila mambule cadi, melimkamne,’ pio tenesenuna tep, aupu pepsene. Ne kaele, sunda, Kristus tep teka tenepra, pio dimpepra dumsisi kumumdi, tenimtona gum di, tenpu kangepu doupra, teleppu kuruma cadi, ne ila di kange derisenune.

Kristus cap dukdongopra kuruma cadi, ‘Akeca mem keca’ tali peramenge ngeda, teka tenena gume

6Uda, ‘Yesus Kristusda, nun ila deiyo ngebo kunkamser’ tenen, er tep teka teneramrumpa, er cap dipru dukdongopseua utopu, ukutaru peda, Kristus teka tenepmumdi, er cap dipru dukdongopmumdi, er upu peseretopu pio dumsisipu kunkamrume. ‘Yesus Kristus erda, nun Ila Deiyo Ngebo pio kunkamsere’ tenen, er upupu gekenkamrume. 7Co koupmengepa, er yaten tu neitam pio embaredi, tu pumbon di telep keca jepra, co nong ila di neramre utopu, Kristus upu peteremamsei utopu, sundi aupupu teka tenepra talemumdi, tapakra pio dombanapu kunkamrume.

Ukupra kumum pangeda, Kristus cap dipru dukdongopra kumumnya deiki di, erdi sun dipru puto kemdiserure. Tonda, Epafrasdi, Allah upu peteremamseu utopu, aupupu teka tenepra taleamruma deiki di, sun dipru puto kemdiserure. Ukupra kunkamrum taru yumada, nun nai Allah tep, weika di, “Telepe,” penkamrume.

8Yuk mali nengdi, ‘Sun dipru gidopepa, nun tara kepronkamseng’ tenen, mok upu peteremsenga deiki di, mankau kange di teka tenepra, yuk bisi berum atep, sun kange pio moupra kunkamrume. ‘Anengdi, nong gum upu tali peteremsenung’ tenen, sun kange moupkamrume pepsene. Amok nengdi penge upuda, Kristus er kure keca deiki di men penunge. Sun tali tuai nesala, sun kange deiki dipu tenenge keca peteremnunge. Tonda, aupu deiyoda, tali neng bol deiki utopu keca, tali tuai nesaladi, ‘Akecada, nun nong neng dordi ukuramitopu, angepu talepra kunkamepe,’ penge upu tep pepne. Tonda sundi, ‘Akecada ila mambul keca, akecada mem keca,’ tenepra, tali upu dipu petamenge upupu kurure. Tonda, aupuda Kristus yanina utopu upu kurure. Ayuma tep nengeda, amok upuda, tali upupu kurura cadi, ange men gekenkamrume, pepsene.

9Allah er kange dipru cap, er kure keca yuma capda, Yesus er deiki deipupa, Yesus Kristus er dipru neitamai tek sisi kurure. 10Ware puto keca do yuma, nimi deiyo neng cap, yuk yala ila puto keca yuma cap, isok puto cap, nimi dipru talepra kusere keca yuma capda, Kristus er amutarapu kurure. Erda ila puto ngebo kurura cadi, erdi akeca-keca yuma bisbisa kapra, deiki tara kurure. Tonda, teka tenena keca cap, dipru cap, sambala cap, putasere keca yumada, Yesus Kristus dukdongopra kikiman kuruma deiki di, akeca yuma konum mumupra akapsere. Ange yuma tep nengeda, mok upu peteremna nengdi, ‘Yuk bisi dopra dubesenung’ tenen, pio kange moupra kunkamrume.

11Uda, Yahudi yala nesaladi, ‘Anengda, Allah er nyapu kunkamenge’ tenen, nimi den bam bol deiki tara sengamenga utopu gum dinin, Kristusdi, ‘Anesalada, ne mawa nesala, ne nyapu sisa kunkamenge,’ tenepseudi, nun mali keca daepseudi, ukupu dipru karepseudi, ukupu nesala utopu kupra telep kupra deipseue. Telep kupra deipseuada, peten kemdina tep kupseue. Ukupseuada, nimi buru di pel doramenge nge utopu gume. Ange gum dinin, nunda tali tuai nesala cadi, Kristusdi nun kange dipru mali kuramseunge cap, nun sambala cap, mali tenenange yuma cap, gum kupra deipseudi, telepngepu karepseue.

12Kristusdi ukupu nesala utopu kupra, telep kupra deipseu ngeda, lap pepkusene. Ada, yuk nengdi, “Kristus depupane, Allah er ila puto deiki di gam bukra deipu,” pepra peterepseipa, gekeprumdi, ‘Allahda, er puto ila weike’ tenen, teka tenepruma deiki di, konum telep kupra deipseue. Ukupseuada, ukupmantonge ton pepkusene. Ada menop taru sun cap, Yesus cap deptumpa, tu pumbon kikiman peipmasetenge. Amendada sun cap, Kristus cap, Allahdi tamupra kikiman gam bukra deipsetue utopu tep pepsene. Sun mali keca gum kupra deipseudi, ukupu nesala utopu kupra telep kupra deipseu taruda, teka teneprumpa, me dongopsei taru di ukupseue. Nun cap, Yesus cap tonpa depmepupa, kikiman gam bukra deipseuada, me dongopsei taru di kupseue.

13Uda, sun Yahudi yala gum nesalada, sun mali teneramrum keca cap, dipru mali kuramrum keca cap deiki di, konum derameng nesala utopu kuramrume. Pumun taru Allahdi, “Den bam bol deiki tara men seki neng, ne damai men yatenge,” pepra deiamutopu, sun Yahudi yala gum nesala peda, sun malipu kuramrum taruda, Allah er damai men yanmanto kuramrume. Menop taru neitamai ukupra pio mali kuramrum dinin, ataru neitamai di, Allahdi Kristus gam bukra deipka deiki di, sun peda gam bukra deipseue. Allahdi, nun mali kunup keca cap, mali tenenup keca cap, kaukepseudi, gum kupra deipseue.

14Allahdi, “Ange kunkamrume. Angeda, men kunkamrume,” pepra deipupa, Musadi sekeiamseu upuda, yaniptapra men dombanupe. Atep, aupu men dombanupa tep nengeda, Allahdi tali lupra wenepra poptapsetue. Allahdi aupu deiki wenepra popsetu dinin, nun teka tenenup neng, nun lyemna tep, Yesusdi amem upu utopu upu yuma dopra, er popkoi taruda, Yesus er nong deiki deipdapudi, sengdin co deiki deipupa, popi. Yesus popya deiki di, awenemna upu gum kupra deipseupa, ukutaruda aupu amutara tupa men kunupe.

15Nun lyemna tep, Yesus popipa, Yesus er sengdin co deiki depka deiki di, nimi dipru talesere keca yuma cap, isok-isok yuma cap, sun nimi pon keca douamya, Kristusdi dalupra dopropudi, bisbisa kapu. Bisbisa kapka cadi, Kristus tep, isok-isok sun puto ton cap men kurure. Yesus sengdin co deiki popipa depka deiki di, isok-isok yuma bisbisa kapu. Akupu ngeda, nesala ban-ban yuma kael kemnunga cadi, isok-isok cap, mali puto kure keca yuma cap, ‘Yesusda nun deiki tara kurure,’ tenen, ali dangnunge. Yesus sengdin co deiki depka deiki di, amali puto keca yuma bisbisa kapu.

16Yesus sengdin co deiki depseua deiki di, akeca-keca yuma bisbisa kapra, deiki tara kuredi, nun mali keca yuma gum kupra deipseudi, telep kupra konum deipseue. Konum telep kupra deipseua cadi, yuk nengdi, sun tep, “Anengda mali kununge,” pepra deipsengopda, angeda gekena gum di, teka men tenenkamrume. Ware nengdi do yuma, sun tep, “Gume, anesalada, ayala jen keca jenunge, ayala me jenunge, aila tumi tep, ‘Mambul tumi,’ men tenenunge. Tonda, pel dona gum, beipye peingna tumi, Sabat tumi tep, nun kunup keca utopu kecada men kununge.

Nundi war tengdongon taru kalemnupada, men kalemnunge. Atep sun mali nesala kununge,” pepra, sun nong deiki mali upu pepra deipsengopda, sundi, ‘Dakwapye’ tenen, men gekenkamrume. 17Asi pepmasen keca yumada, kuki utopu keca kurure. Ayumada, peten kemdina utopu kuramu. Ada, ila mambul keca, tek sisi nong kapu keca, amenda taru yankamua tep, peten kemna kecapu kuramu. Dinino, tek sisi ila mambul kupra nong kurur kecada, Yesus Kristus er pua.

18Apepmasen upu utopu, ware neng do yuma sun tep, “Gume, nedi Allah er si erepra kuramne keca utopu men kununge. Ada, sun pedi sun pe tep, amnge kupra men yanidanunge. Tonda, Allah er im deiki pel don neng, malaikat tep, si men eremnunge. Nedi akeca-keca kuramnetopu men kununga tep, sunda mali nesala kununge,” pepra, mali upu pepsengopda sundi, ‘Dakwapye’ tenen, men gekenkamrume. Aupu utopu keca pesenge nesalada, sun tek sisi men dirami dinin, ‘Yuk nengdi, sunda ila neng, tenepsengedi, nun teka tenepkamseng’ tenen, “Nun epmupu keca, ila mambul keca ake-ake,” pepra, upu pio weika di lelepra tali pertamnunge.

Tonda, Yesus teka tenena gum di, sun mali tenenge keca cap, mali kunge keca cap deiki di, sun kange dipru ateng koupra, deridangedi, pio mali kununga tep, deiyo men kapmarepapu, ‘Nunda, ila mambul neng,’ tenedangedi, pio tali-tali kecapu tenepra kange eremdanunge.

19Anesalada, Yesus Kristus tep, er tek sisi upu men peteremnunge. Nun Deiyo Ngebo Kristusda, men tenengedi, pio yuk kange doupra kununge. Yesus Kristus tep teka tenepmepepa, Allah er nyapu kupra deipseu nesala yuma tep, Allahdi perepa, Kristus kalekra melimserya deiki di, Allah teneramseu utopu, dipru wisipseredi, telep kupra weik kupbanupe. Ukuseryada, nun nong deiyoda, giso kuseretopu, tonda nun nong melmel di dungdongosere utopu, Kristusdi nun teka tenenup neng yuma tep, dukdongopseudi, tonpa kupra deipseudi, nun Ila Deiyo Ngebo kuserure.

20– 21Sunda dipru dukdongopra Kristus cap kuruma cadi, Kristusdi sun tep, konum depseua cadi, adeiki di er deputopu, sun peda utopu konum deprume. Ange tep nengeda, tuai nesaladi, “Ukuna meme, akecada men jeptume, akeca talenada meme,” pepra, mem upu utopu upu pepra derisenungada, gekena gume. Ato upuda, dakwapkamre. Akeca utopu keca amutara tupa men kurum dinin, ‘Aupuda mambule’ tenen, gekemumdi dombamum ngeda, warya tep do? ‘Amem upu utopu upu yumada, mambule,’ tenepra, talepra men kunkamrume. 22Aupu utopu upu yumada, tali tuai nesaladi, sun kange dipapu tenepra peteremnunga deiki di kurura tep, tali pepterepmengepane, amendada tek sisi tapbangepa, gum kupkamre ja.

23Uda, amem upu utopu upu peteremnunga deiki di, upenunge. Ada, “Nun pedipapu tenepmepetopu, Allah si eremnada ukupra, ukupra kunkamepe,” penunge. Tonda, tek sisi dipru boun kupra, men kunung dinin, sundi, “Nun pedipapu yanipdapedi, mali kange doupra, pio amutara utopu kupedi, nun nong tep, ikin keca weik, nun pe nong deiki deipdankamepe,” penunge. Aupu pepra kungepa, yuk tali nesala epmengedi, nong bol deikingepu tenepra, nong neitamainge moupra men tenepmengedi, sundi, ‘Uo, ada ila kael di kununge,’ tenepsetenge. Ange tali teneptenge dinino, tuai nesaladi, sun nong neitamai putapre kecapu tenepra, mali-mali kuramenge ngeda, aupu utopu upu cap, akun keca cap deiki di, upu men seksetue. Akun keca deiki di, nun mali kun keca men gum kupsetue. Apepmaseng upu yuma tep nengeda, tali tuai nesaladi, “Ukuna meme,” pepra derisenung upuda, “Men talepra kunkamrume. ‘Dakwapye’ tenen, tamdongonkamrume,” pepsene.