Col 3 | XteSC | STEP | Uda, Allahdi Kristus gam bukra deipu taruda, sun cap tonpa gam bukra deipseue. Ada teka tenepruma tep, Allahdi pio gam kuna deiyo keca konum kareamseunge tep pepsene. Sun cap, Kristus cap konum ereipseua cadi, im deiki kure kecapu tenepra, akeca deikipu sun kange dipru derinkamrume. Ime deikida, Kristusdi Allah er dumsisi tara bukudi, akeca-keca yuma talepra, deiki tara Deiyo Ngebo kurure.

Colossians 3

“Sun cap, Yesus cap dipru dukdongopra kuruma cadi, dumsisipu kunkamrume,” pepu upu

1 Uda, Allahdi Kristus gam bukra deipu taruda, sun cap tonpa gam bukra deipseue. Ada teka tenepruma tep, Allahdi pio gam kuna deiyo keca konum kareamseunge tep pepsene. Sun cap, Kristus cap konum ereipseua cadi, im deiki kure kecapu tenepra, akeca deikipu sun kange dipru derinkamrume. Ime deikida, Kristusdi Allah er dumsisi tara bukudi, akeca-keca yuma talepra, deiki tara Deiyo Ngebo kurure. 2 Tuai mutu kure keca cap, tali tuai nesala kunge keca cap yumada, putaserepa, amali keca deiki sun kange dipru men derinkamrume. Angeda, pio gum dinin, im deiki kure kecapu tenepra putaserepa, akeca deiki sun kange dipru derinkamrume.

3 Apepmasenada, mesum tep men pepsene. Deiyoda, konum deami nesala utopu, sun pumun taru kuramrum keca yumada, konum taprumdi ukutaru tamupra men kurume. Sunda, Kristus cap dipru dukdongopra kikiman konum kurume. Yesus cap, Allah cap tonpa kurerunge. Atep, sun gam kunkamrum taru yuma, Yesusdi kalekra melimseredi, Allah damai kurure. Sun cap, Yesus cap, dipru dukdongopra kumumpa, Allah diseredi, talepra kuserura cadi, im deiki kure kecapu putaserepa, tenenapu kunkamrume. 4 Ukurumupane amendada, Kristusdi, bol kopta pio gam kemdiserur ngeboda, Kristus tamupra katuai yasere pangeda, Allahdi sun cap, Yesus cap, katuai erepra deipseredi, pio telep kupra, ila mambul keipkamsere. Ukupserepa, Yesus cap ila dirine neitamai kikiman kunkamepe.

5 Ukupkamsera tep nengeda, sun tali tuai nesala mali kwapsere keca yumada, pio tamkamrume. Konum deami nesaladi, akeca-keca yuma men putarepa, pio men kurameng utopu, mali kun keca yumada, tamkamrume. Ada, yuk nerapu tali dalupra nyangdana cap, pio yuk kange doupra, nimi men kuptenge keca, pio mali-mali nyangdaramengenge cap, mali kun keca tep ila putana cap, ange yuma tapra, dumsisipu kunkamrume. Amali kun keca yala yumada, pio men kunkamrume.

Tonda, ‘Akeca-keca yuma bunga weika di doproptene’ tenen, ila di putapseryopda, ada pio mali kuna tep, ange peda men kunkamrume. ‘Bunga weik doproptene’ tenen, dipru engerameng nengda, ada Allah tapra yuk tali keca si eremenga utopu kun keca cadi, ange peda, men kunkamrume. 6 Apepmasen keca yuma tep nengeda, Allah yu weik kuprepa, amali kun keca kunge nesala tep, ila di wenepra ponkamre. Atep, ukuna meme.

7 – 8 Pumun taruda, sun Kolose mutu nesala peda, apepmasen keca utopu kupra kuramrum dinino, ukutaruda, amali kun keca yumada, tapra pio men kunkamrume. Pio tamkamrum kecada pepkusene. Ada, yuk nesala tep deremdana cap, tulum kupserepa, yu doupra ila yu di mali kuna cap, ‘Anengda, sun nong deiki ikin keca kuptue’ tenen, mali kuna cap, yuk nesala tep luludina cap, nimi men pepmanto dinin, pio mali-mali penge upu pena cap, ange yuma tapra, dumsisipu kunkamrume. Amali kun kecada men kunkamrume.

9 Tonda, sundi sun kayapu tep, mok upu tali peptapra men pedankamrume.

Amali kun keca yuma men kunkamruma deiyoda, pepkusene. Tenpu ngeda ake. Nimidi sun pumun opkal pun deiprepa, kwirirtamamengtopu, pumun taru sun kange dipru pio mali kuramseupa, mali-mali kuramrum keca konum taprume. 10 Butene ngeda, ada, mali opkal tapmengedi, ukupunge kenengamenga utopu, Allahdi sun tep, kange dipru ukupunge utopu kepra, telep kupra deipseudi, karepseupa, konum dopra kurume. Ukupu kange dipru ketekepra karepseu Deiyo Ngebo Allahda, er pe kuretopu, sun kange dipru telep kupbaserure. ‘Sun kange dipru telep kupbankamre’ tenen, er kure keca ila kael kemna tep, deiyo keca melipra kareserya deiki di, er kuretopu, sun kange dipru telep kupbaserure. Ada, Allah cap dukdongopra kurumnya neitamaida, Allahdi, ‘Ne kunetopu kupbankameng’ tenen, ukupu kange dipru utopunge karepseue. Ange tep nengeda, mali kun keca yumada pio tamkamrume.

11 Ukupra konum telep kweipseupa kuruma tep, ‘Ila mambule,’ tenepra kunkamrum kecada, Yesus Kristus er pua. Sun pe tep tenena do, yuk nesala tep tenena do, ‘Uo angeda mambule’ tenen, men asimdankamrum kecada pepkusene. Ada, “E anesalada, Yahudi yala nesala do, gum do? Sunda, den bam bol deiki tarange konum seki neng kunung do, gum do? Angeboda nun mutu ngebo do, yuk karen mutu ngebo do? Anengda kael neng do, bura tara walwal neng do? Angeboda, erdi er pe tep, pel dopra co bo dororur do? Yuk neng tep tali pel melimna ngebo ^{▼▼tali pel melimna ngebo – Pumun taru, do bo deiki kunumami nesalada, isomka nengdi, pio kankan kurami nesala tep, co bo deiki di kunuamipa, akankan kurami nesaladi, sun isomka nesala tep, sun pel talipu pel dorami. Sun pel tep co bo dorona pio gume. Tonda, lap pena upuda, nomor 36 dirume.} kuredi, mesumpu kurur do?” pepra men asimdankamrume. ‘Ange yumada, mambulnge,’ pio men tenenkamrume.

Dinino, ‘Ila mambule,’ tenenkamrum kecada, Kristus tepa. Erda, akeca-keca yuma deiki tara ila mambule Deiyo Ngebo kurure. Nun teka tenenup nesala yumada, nun kange dipru neitamai kuserura cadi, nun yumada dipru dukdongopra amsepu kunupe. Angepu tenepra kunkamrume.

12 Ange tep nengeda, Allahdi sun yuma tep, bicau teneamseudi, ‘Anesalada ne mawa nesala, ne nyapu kunkamenge’ tenen, wepra deiamseua cadi, mali kuna pio gum dipapu, sun telep-telep kupra kunkamrum kecada pepkusene. Ada, ukupu opkal kenengamenga utopu, bicau tenepra makudana cap, yuk neng tep boun kupra melimna cap, yuk neng tep dipru darapra amutara kuna cap, teng-teng pena gum di, nema di kuna cap, ayumada bouna di kunkamrume.

13 Tonda yuk nengdi, sun ikin kupra deipsenge tep, sundi tamupra aneng tep, menmena wenemna gum di, kaukemdongonkamrume. Nun Deiyo Ngebo Yesus Kristusdi, sun mali kuramrum keca tep, er kange dipapu tali kaukepseudi, sun mali keca gum kupra deipseua utopu, sun peda utopu, yuk nesaladi, mali kupsenge keca yuma tep, ‘Dakwapye’ tenen, tali kaukemdankamrume.

14 Atelep kun keca yumada, yambul mambul kurur dinin, ila mambul kunkamrum kecada pepkusene. Ada, akeca yuma telep-telep kupra, kumum taru yumada, sundi yuk nesala tep, pio bicau tenepra, dipru karedamumdi, makudanapu kunkamrume. Atelep kun keca yuma akapserepane, bicau tenepra makudanapu kumum pangeda, sun dipru telep kupra dukdongoseredi, nong tenpu utopu kemdiserepa, telep kupra kikiman kunkamrume.

15 Uda, sun yuk-yuk kurum dinin, Allahdi, ‘Sunda upu deiki di deremdana cap, podana cap gum dipapu, nong tenpu utopu kupra, dipru dukdongopra, bouna di kikiman kunkamenge’ tenen, wepra deiamseue. Ukupra wepra deiamseua cadi, Kristusdi dipru dukdongopseupa, nong tenpu utopu kupra kuruma tep, telep kupra kikiman kunkamrume. Tonda, sundi Allah tep tupa-tupa, “Telepe,” penkamrume.

16 Tonda, Allah er kai telep upu, Kristus upu tep, ‘Tek sisi moupra kael kemkamepe’ tenen, pio piripra kael kepbankamrume. Kristus er upu pio tenenapu kumum taru yumada, ila kaele di peteremdana cap, ‘Mankau di mali kupnup’ tenen, “Kange moupso,” pepra wenemdana cap, pio melipdana kunkamrume. Tonda, ukupra kunkamrum taru neitamai yumada, pumun sengami upu, buku Mazmur Allah upu mut cap, sun pedi sekra perum Allah upu mut cap, Allah er si eremna tep, karesere mut yuma cap, penkamrume. Amut-amut penkamrum taruda, sun kange dipru neitamai di Allah tep, “Telepe,” pepra tenenkamrume.

17 Uda ware keca do yuma, sun pel donkamrumnge yuma cap, upu penkamrumnge yuma cap, nun Deiyo Ngebo Yesus Kristus, er amutara kupra, er si deikipu pel donkamrume. Ada, erdi teneseretopu, dumsisipu kunkamrume. Ukupra kunkamrum taru yumada, Yesusdi melimserepa, er cap dipru dukdongopra kurumnya deiki di, nun nai Allah tep, “Pio telepe,” penkamrume.

“Yesus teka tenena nesala kunkamrum keca ake,” pepu upu

18 Sun nerapudi, sun neng yapu tep, dipru darapra sun amutara bouna di kumumdi, sun upu moupra gekenkamrume. Sun cap, nun Deiyo Ngebo Yesus cap, dipru dukdongopra kuruma cadi, adipapu tupa ukunkamrume. Tonda ukunada telep kuna tep, pepsene. 19 Sun nimida, men di konum doprum nerapu tep, bicau tenepmumdi, dipru karepra melimnapu kunkamrume. Yu kuna cap, deremna cap gum di, dipru dukdongopra bouna di, telep kupra kikiman kunkamrume.

20 Sun nyapu yumada, sun nai yapu cap, sun nin yapu cap yuma tep, sun amutara kumumdi, ware kun keca tep do yuma, ataru-ataru yuma, sun upu moupra gekemumdi dombamum pangeda, Allahdi kange deriserura cadi, adipapu ukunkamrume. 21 Sun nai yapu yumadi, sun nyapu yuma tep, yu kuprepa weika di wenepra men ponkamrume. Ada, sundi sun nyapu tep, ila di tupa-tupa wenepmum pangeda, sun nyapudi ikin kange doupra, sun dipru sukurura tep pepsene.

22 Sun yuk neng tep, tali pel dopra melimna nesala kurum nengda, ware kun keca tep do yuma, sun deiyo nengdi pesenge upu yuma moupra gekemumdi, angepu kunkamrume. Ada, pel dabal kunge nengdi, ‘Nun deiyo nengdi, telep pel don neng, tenepkamseng’ tenen, ‘Nun damai kungepa, epsenge tarupu pel telep kupra donkamepe,’ tenenunge. Ange teneramenge nge utopu, men kunkamrume. Ange gum dinin, sunda, ‘Nun nai Allah ila mambule’ tenen, er si eremnapu kurum nesala cadi, inipra kuna gum di, tek sisi katuaipu pel telep kupra donkamrume. Atep sun deiyo nengdi disenge taru pe, men disenge taru peda, telep kupra pel donkamrume. Ada Allah er gispal dona tep ukunkamrume.

23 Ware pel do, ware kun keca do yumada, ‘Ne nai Allah er pelpu donune’ tenen, tenimtona gum di, sun kange dipru cap, sun puto cap, ayuma deiki di pio pe deipra, pel telep kupra donkamrume. Ada yuk nengdi, ‘Tali neng tep, sun pelpu donupe,’ tenepra dabal-dabal di, pel mali doramengtopu men kunkamrume. 24 Pel telep kupra donkamrumada, tali tep gume. Ada sun konum kaele, Allahdi, “Ne nyapu tep, akeca karenkamsene,” pepra konum pediramseutopu, pel telep kupra doramum pangeda, amendada menenga keca tek sisi im deiki dipu karenkamsere.

Angeda konum kael kemruma cadi, pio pe deipra pel donkamrume. Sun ila Deiyo Ngebo Yesus Kristus er pel doruma tep pepsene. 25 Ware nesala do yuma, sun tupa mali kungepa, sun mali kunge keca tep, Allahdi upu bokeipseredi, wenepkamsere. Erdi, ‘Aneng ake, aneng ake’ tenen, dipru wilimdina gum dipapu, tek sisi mali kunga utopu, wenepkamsere.