Colossians 4

1Sun pel deiyo nengda, sun amutara kupra, mesumpu pel melipra donge nesala ▼
▼mesumpu pel melipra donge nesala – Co bo deiki kunumamipa, pel dorami nesala kael kemna tep, pasal 3:11 cap, tonda, lap pena upuda, nomor 36 dirume.
 tep, sun pel dongetopu sun pel pununa tep, menenga keca karenkamrume. Tonda sun putapretopu, telep kupra karenkamrume. Ukunkamruma deiyoda, sun konum kael keprumdi tenerume. Ada, sun peda, sun Deiyo Ngebo im deiki kurya di asipserepa, sun kun keca lap penkamruma tep pepsene. 2Sun Kolose nesala yumada, tamna gum di, pio pe deipra, Allah moronapu kunkamrume. Ukunkamrum taru yumada, ‘Mankau di mali kupnup’ tenen, pio kange moupra kalengdankamrume. Tonda, Allah tep, pio “Telepe,” penkamrume.

3Ange utopu, sundi ne tep, pio Allah moronkamnerume. Ada, ‘Allah men di iniamu dinin, ukutaru jenek pesere upu, Allahdi go kareprepa, Paulusdi Kristus er nimi lyemna upu, mambul upu peteremkamre’ tenen, ‘Allah moronkamnerume’ tenen, pepsene. Kristus er upu peteremamsa tep, ateng koupra wenemna ati dongopneipa, akunune. 4Tonda, ‘Allahdi teneamemeutopu, Paulus adipapu telep kupra Kristus er mambul upu peteremre taru yuma, jenek kupra pio lelepra peteremkamre’ tenen, Allah moronkamnerume. Allahdi, ‘Ukunkamre,’ tenen, tenepneutopu, Kristus er upu jenek kupra petereptenyopda, telep kutene.

5Sun yumadi, Yesus kapul teka men tenenge nesala yuma tep, ‘Nun kupe keca cap, penup upu cap, epra gekepmengedi, teka tenenkameng’ tenen, ila kael di dumsisipu kunkamrume. Go kapsere taru yumada, dabal-dabal kuna gum di, Yesus er upu lap peprumdi, pio telep kupra kunkamrume. 6Sun cap, teka tenena gum nesala yuma cap, upu talenkamrum taru yumada, upu pio telep-telep kupra penkamrume. Ukupmanto ngeda, jen keca jenup taruda, ua garam cap tapakmepyopda, pio telep tau kuretopu, sun upu sisingrum taruda, Allahdi bicau teneseredi, er kange dipu melimserenge ton jenek lap perumyopda, yuk neng gekengedi, ‘Uo angeda telepe’ tenen, kange deipkamenge.

Ada anengdi, ‘Uo, aupuda mambule, atep teka teneptepe, tenenkameng’ tenen, sundi penkamrum upu yumada, telep-teleppu penkamrume. Ukupmum pangeda, adeiki di sun teka tenena gum nengdi, sun Kolose nesala teka tenemum keca tep, “Sun teka teneprum ngeda lape pepseo,” pepra, yuk-yuk asipetepkamsenge. Asipsengopda, sun moupra tenipetemumdi, ‘Angeboda er gekepmanto upuda, ukupra pepkamne. Tonda angeboda, er gekepmanto upuda, ukupra pepkamne,’ tenepra kael keprumdi, telep kupra lap penkamrume.

7Ne kuramneu keca cap, ukutaru kunere keca cap, ne kune keca cap yuma tep, ne kabo sisa Tikikusdi, sun Kolose nesala tep lap peryankamsere. Tikikusda, Yesus teka tenena ngebo kurura cadi, ne weit utopu ngebo kuredi, tamna gum di, Yesus er upu peteremrure. Tonda, ne tep pio pe deipra, telep kupra melimnerure. Er cap, ne cap, nun Deiyo Ngebo Yesus er pel kikiman pel donume. 8Nedi Tikikus dopra, sun damai dokotepkamsenada, deiyo lap pepkusene. Ada, ‘Nun kusere keca, erdi sun tep lap pepserepa, kael kepkamrume. Tonda, erdi sun ikin kurumya neitamai di, dipru kwa dipkamsere’ tenen, Tikikus dopra sun damai dokotepkamsene.

9Tikikus sun damai yankamre taruda, ne bicau tenenun ngebo, sun mutu Kolose mutu ngebo tenpu, er sida, Onesimus cap, sun butene yankamrenge. Onesimusda, Yesus teka tenepu cadi, ne weit utopu kuredi, erdi, “Ukupkamne,” peretopu tamna gum di, tek sisi kurure. Sun butene di, ne amutu kunere keca yuma tep, lap peryankamserenge.

10Ateng koupra wenemna ati dongopseipa, ne cap kikiman kunum ngebo, Aristarkusdi sun Kolose mutu kurum nesala tep, “Telepe,” peipmasere. Tonda Barnabas, er neiki mam Markusdi sun tep, “Telepe,” peipmasere. Uda, Markus tep, upu konum peipsisa cadi, tek sisi erdi sun damai yaryopda, sundi er tep, buru karepra, “Telepe,” pepra melimkamrume. 11Tonda, nun Deiyo Ngebo Yesus gum dinin, ne kabo er si Yesus, tonda angebopu dinin, er si butenenge ton Yustus perameng ngebo, erdi sun Kolose nesala tep, “Telepe,” peipmasere. Ne cap kikiman pel donup nesalada, ton cap akunmang dinin, aneng weneri si sipepmasen nengda, Yahudi yala nesala kununge. Yuk nesala Allah teka teneptengepa, Allahdi sun dipruai talepra kutupa, ‘Er nyapu kutenge’ tenen, pel kikiman donup nengda, yuk yala neng ton cap akunmang dinin, sun aweneri nengpuda, Yahudi yala neng kununge. Ukungedi, ne dipru kwa dipra melimnenunge.

12Tonda, sun mutu, Kolose mutu ngebo, Epafrasdi, “Telepe,” peipmasere. Erdi Yesus Kristus amuai kuredi, Yesus er pel dopra kurure. Epafrasdi sun tep, pio pe deipra, Allah moronapu kuserure. Erdi moroserur kecada, pepkune. Ada Allahdi er nyapu yuma tep, ‘Ukunkamenge, ukunkamenge,’ tenesere keca yumada, ‘Akecada pio tek sisi keca cadi, Kolose nengdi angepu talepra pio dimpeprappu kunkameng’ tenen, Allah moroserure. Tonda erdi, ‘Tenimtona gum di, teka tenepmengepa, sun dipru pio wisipkamre’ tenen, erdi sun Kolose neng tep, Allah moroserure.

13Epafrasdi sun tep pio pe deipra, Allah moroserurada, tali tep men pepsene. Ne asuru di dinuna cadi, tek sisi pepsene. Ada, sun Kolose mutu nesala cap, uda Laodikia mutu nesala cap, Hierapolis mutu neng cap tep, pel doredi, ‘Sun yumada, teleppu kunkameng’ tenen, mambul kange doupra, Allah moroserure. 14Tonda, nun kabo sisa, nimi kwetena ngebo dokter Lukas cap, tonda nun kabo Demas capdi, sun Kolose mutu neng tep, “Telepe,” peipserunge. 15Laodikia mutu kungedi, Yesus teka tenena nesala cap, amutu kure ner tenpu, er sida Nimfa cap, uda Yesus teka tenena neng, Nimfa er ati pum bulupmengedi, Allah upu gekenung nesala cap, sun yuma tep, “Paulusdi telepe peipmasere,” peipkamrume. Ne Paulusdi sun Kolose mutu nesala tep pepsene.

16Asurat sekeipmasenada, sun Kolose mutu kurum nesala konum epra pepmumyopda, ‘Sun Yesus teka tenepra Laodikia mutu kunge nesala yuma bulupmengedi, gekepkameng’ tenen, asurat dopra, sun damai dubenkamrume. Ange utopu, nedi Laodikia mutu nesala tep sekeipsi suratda, sun Kolose nesala ton dopropmumdi, sun peda gekena tep, katuai peprumpa, Kolose mutu kurumdi, Yesus tep, teka tenena neng yumadi gekenkamrume.

17Aupu sekra deipkusenada, nun kabo Arkipus er gekena tep, aupu dopra er damai perbenkurume. Aupuda ake. “Arkipus kanda, ‘Apel dopkamre’ tenen, Allahdi wepra deipkeu ngeda, ‘Tek sisi pel dopmanyanen, gawal dakamne’ tenen, kange moupra pel donkamrume. Kan cap, Yesus cap dipru dukdongopra kureruma cadi, Paulusdi kan tep, ‘Ukunkamrume,’ pepra peipmakere.” Aupuda, asurat dopropkamrum nengdi, ne kabo Arkipus tep peipkamrume. Ne Paulusdi pepsene.

18Uda, telepe, Ne Paulusdi, sun yuma tep, “Telepe,” pepsene. Sun yumadi, ‘Tek sisi Paulus er buru di asurat sekra doproipseue, tenepkamrum’ tenen, ne buru dipapu asurat sekeipsene. Ateng koupra wenemna ati dongopneipa, tupa akununa tep, sunda lumdongona gum di, Allah pio moronkamnerume. ‘Nun Deiyo Ngebo Yesus Kristusdi sun yuma tep, er kange dipapu bicau teneseredi, pio melimkamser’ tenen, nedi sun Kolose mutu nesala yuma tep Allah morosenune.

Telepe, ne Paulusdi akonum pepsene.

Acapu deipne.
Copyright information for XteSC