Daniel 1

Yehuda yala kaber nengda, Babel mutu ila nimi deiyo ngebo Nebukadnezar damai doupra deribeipa kurami upu

1Uda, Yehuda yala nesala sun ila nimi deiyo ngebo Yoyakim kuramu. Yoyakimdi keteng tamu weneri deiki di, Yehuda yala nesala talepra kuramu taru neitamaida, Babel mutu ila nimi deiyo ngebo, er si Nebukadnezar, er gonga kemna Yerusalem mutu yan wareki. 2Tonda Allahdi peipupa, Yoyakim Yehuda yala nesala, sun ila nimi deiyo ngebo talepra kuramu mutu yuma, yana warekidi popbisipi. Popbisipi dingeda, Allah upu ati pumbon deiami bung keca weik yana dopropi. Ukupi dingeda, Allah er si eremna ati deiami keca weik tara ton cap, nimi cap doupdarapidi, Babel mutu dubeidi, amutu neitamai dinin, mutu si Sinear mutu neitamai, Nebukadnezar isok si eremamu ati pumbon bena deipi. Deipi atida, aisok er mambul keca deriramu ati deipi.

3Ukupi dingeda, ila nimi deiyo ngebo Nebukadnezardi, er amutara pel don ngebo Aspenas tep, “Ukupkurume,” pepu upuda ake. “Kandi Israel nesala tomopra duyana deipmap neng kan-kan di, Yehuda mutu taleamu ila nimi deiyo ngebo Raja, er tamna neng ton, bememdi wepra, ne kori duyankurume. Tonda, Israel nesala talepra kurami nengdi derirami neng kan-kan cap, nimi ton dopra, ne kori duyankurume,” pepu.

4Upepudi aupu ton pepu. “Sun aduyankurum nengda, sun nong podongomna gum nengpu wepra duyankurume. Anengda, sun kamo dipetepmemdi, apepkuken ngepu wepra duyankurume. Ada, pio kamo telep neng cap, ila sekolah weika di kael kepi neng cap, pepmenge nge gekepmengedi, moupra kael kepmanto neng cap, akeca-keca yuma kuramidi konum kael keami neng cap, tonda ila nimi deiyo ngebo, er kure ati pumbon pel dopmanto neng cap, wepra duyankurume. Ukupmem dingeda, Aspenas kandi Babel mutu upu pena cap, sengna keca cap, sekmepunge nungna keca, kael kepkamenga tep, moupra peterepkurume,” pepu.

5Ange konum pepu dingeda, ila nimi deiyo ngebo Rajadi, “Sun aneng tumi-tumi yuma jenkamenga tep pangeda, anggur me cap, yuk jen keca capda, ne bung jeramep utopu jenapu, sun peda keteneipkurume. Tonda keteng tamun weneri deiki di, konum peterepmumpa kael kepmengopda, nati pel dona tep, doupra yamumpa, ne ila ati neitamai pel donkamnenge.” Babel mutu deiyo ngebodi Aspenas tep pepu.

6Tonda, Yehuda yala kaber neng kuramya kan-kanda, Daniel cap, er kayapu Hananya cap, Misael cap, Asarya cap kurami. 7Ataruda, ila nimi deiyo ngebo, er amutara kuramu ngebo Aspenasdi, aneng sun si yuma punupra si dopu. Asida ake. Danielda er ukupu si tep, Beltesazar pepu. Hananyada, er ukupu si tep, Sadrak pepu. Misaelda, er ukupu si tep, Mesak pepu. Asaryada, er ukupu si tep, Abednego pepu.

8Danieldi pio moupra tenepudi, ‘Nimi deiyo ngebo Raja cap, er bung cap, sun jenung jen kecada, neda men jenkamne. Ada, ajen keca jepnya deiki di, ne nong mali kupra deipnerepa, Allahdi kange men deipnerure,’ tenepu. ‘Ne mali men kupra deipdankun’ tenen, Aspenas tep, ‘Yuk jena ton duyanetume,’ pepra bena moropu. 9Allah melipka deiki di, Aspenasdi Daniel tep, bicau tenepudi, Daniel moropu ngeda, ‘Telepe’ pepu dinin, “Menmena ne deiyo ngebo tep pepnepa, ‘Telepe’ pepneryopda, melipketene,” pepu.

10Upepudi, Raja Nebukadnezar, er amutara pel don ngebo Aspenasdi Daniel tep pepu. “Ne deiyo ngebo Raja tep, kware kunerure. Ada, erdi sun jen keca tep nengeda, ‘Ajen kecapu jenkamenge. Yuk jen kecapu men jenkamenge,’ pepra deipu. Kandi moropmanerem ngeda, melipketene dinin, yuk keca jepmempa, kan urasin mali kupkeredi, kan kayapu sun nong telep kupyopda, ange nimi deiyo ngebo Raja epredi, ne tep yu kuprepa, ‘Ne popnerur’ tenen, pepkene,” pepu.

11Upepu pangeda, Danieldi Aspenas er melimna tep ereipu ngebo tep pepu. Angeboda Daniel cap, Hananya cap, Misael cap, Asarya cap kalengna tep wepra deipu ngebo tepa. 12Danieldi sun kalengna ngebo tep pepu. “Nun nong kamoda, ‘Telep do, mali do?’ tenen, dipetepkamserum taruda, ue tenpu taru di dipdongopra, mapbaramepyane, takol dam di dutara (10) tumi konum kupyopda, ka di ton cap dipetepkamserume. Dinin, ataru neitamaida, malilya cap, me cappu karenkamserume.

13Takol dam di utara (10) tumi konum kupre pangeda, Rajadi keteneipu jena jenge kaber neng cap, nun cap, kamo dipetepkamserume. Adeiki di, ‘Dan neng kamo telep do, dan neng kamo mali do?’ tenen, dipetepsememdi, pepkamserume. Aepsememnyepu, ‘Angeda telep cadi, apu kunkamrume,’ pepkamserume. Nun yumada, Raja er amutara melimna nengpu kupedi, er tenepre kecapu gekepra kunkamepe.” Danieldi pepu. 14Upepupa, sun kalengna ngebodi, “Apepmanerem ngeda, telepe,” peprapudi, Danieldi moropmautopu, takol dam di utara (10) tumi deiki di, go karepudi diramu.

15Go karenmaupane, (10) tumi konum kupu pangeda, sun nong galemna telep kupudi, pio puto weik kuramu. Dinin, Raja er jen keca jerami kaber nengda, sun nong galemnada yambulpu kupu. 16Ukupua tep, sun kalengna ngebodi, ange epra kael kepu dingeda, sun Daniel cap, er kayapu neng weneri cap tep, ila nimi deiyo ngebo Rajadi peramupa, er nyapsilipdi keteneiami jen kecada, men kareramudi, malilya cap, me cappu kareramupa, angepu jerami.

17Tonda, adumbari kaber neng tep, Allahdi kange deipudi, ila kael kemna deiyo keca cap, Babel mutu upu deiki sekaminge nungnange cap, karepupa kael kemami. Daniel tep nengeda, kene mana deiyo keca karepupa, ken deiki di kupman keca jenek pena ngebo kuramu.

18Uda Babel mutu ila nimi deiyo ngebo Nebukadnezardi, “Keteng tamun weneri deiki di kael kepkamenge,” peiamutopu konum kupu pangeda, ataruda Aspenasdi, sun akaber neng yuma dopra, Raja er bungna damai duyau. 19Ukupu pangeda, ila deiyo ngebodi aneng yuma cap, upu sisikidi, asipetepupa, tamupra pepi pangeda, utenepu. ‘Sun aneng kan-kan neitamaida, Daniel cap, Hananya cap, Misael cap, Asarya cap, weika di kael keami dinin, sun yuk kaber nengda, yambulanunpu kael keami,’ tenepu. Utenepka tep, Daniel cap, er kayapu neng weneri cap, wepra deipupa, ila nimi deiyo ngebo er ati pel gonga kepi.

20Ataru neitamai yumada, ila nimi deiyo ngebo Rajadi, ikin keca dopropne taruda, angeda sun aneng tep asipnepa, sundi ange yuma jenek perami. Ange deiki epra kael kemamu ngeda, er mutu neitamai kurami nengda, asuru kwa neng cap, tali neng men kupmanto keca kurami neng capdi, yambul telep kupra lap perami dinin, Daniel cap, er kayapu weneri neng cap, sunpuda ila kael keamidi, tek sisingepu lap perami. Ue takol bari deiki (10) tamoptopra kael kemna neng kurami. Akurami ngeda, Allahdi sun ila kael kemnange kareramnga deiki di, ila kael keamya tepa. Dinin, Babel mutu kael nengda, yambula dipu kael keami.

21Danielda pio tupa, nimi deiyo ngebo Nebukadnezar, er ati pel doramupane, Persia mutu taleamu ila nimi deiyo ngebo Raja Kores yaudi, Babel mutu taleamu ngebo cap, er mutu nesala yuma cap, popbisipudi dalupra talepu.