Dan 11 | XteSC | STEP | Malaikatdi Daniel tep, aupu ton dukdongopra pepu. “Media mutu nimi deiyo ngebo, er si Dariusdi Raja kepra, Media mutu yuma taleamu taruda, keteng tamun tenpunge neitamai yumada, nedi er tara kepropsidi, ‘Er tep kaleknepanen, er puto ton keipkamemene’ tenen, Darius melimamsi.

Daniel 11

Mesir mutu nimi deiyo kemna cap, Siria mutu nimi deiyo kemna cap tep, seki upu

1 Malaikatdi Daniel tep, aupu ton dukdongopra pepu.

“Media mutu nimi deiyo ngebo, er si Dariusdi Raja kepra, Media mutu yuma taleamu taruda, keteng tamun tenpunge neitamai yumada, nedi er tara kepropsidi, ‘Er tep kaleknepanen, er puto ton keipkamemene’ tenen, Darius melimamsi. 2 Nedi kan tep pepkuken upuda, tek sisi nong kupkamrengepu pepkukene. Ada, ake. Yuk-yuk di yana, deiyo kepra, Persia mutu talenkameng dinin, weneri Raja ton capdi, Persia mutu talepmengedi, Raja kepra kunkamenge. Sun yuk-yuk dinin, weneri nengdi Persia mutu talepra dankunmanganen, amendada, Raja dumbari ngebo ton tekredi, aneng yo punupredi, Persia mutupu talenkamre.

Menmena taru Persia mutu talenkameng deiyo neng, sun weneri Raja nengda, yambul isomka neng kunkameng dinino, er adumbari tekra deipkameng Raja ngeboda, ila isomka weik ngebo kunkamre.

Angebo er talenkamra keca pio weik kupreya deiki di, amenda taruda, puto ton cap kuprepa, erdi, ‘Ukupkamepe,’ pepkamra upu deiki di, gonga keprepa, yuk mutu nesala dana-dana tara kunge nesala weika di, er upu gekepmengedi, sun cap, er cap, Yunani mutu talepkamre Raja tep, popbisipkamenge. 3 Ange kuproprepa, konum seng pepyopda, ila balila ngebo tenpu ton, amenda taru Raja kepredi, er ila puto deiki di, Yunani mutu cap, Yunani nesala cap, weika di talenkamre. Ukupre dingeda, er pe kange dipapu, ‘Ange kuptene,’ tenepretopu, angepu kupkamre ja.

4 Ukupra, nimi deiyo kepra dakupbankamreyanen, amenda taruda, er angebo konum depyopda, erdi talepmare mutu yumada, neitam di bokra, yuk-yuk wilipropmengedi, dumbari kepropkamenge. Ataruda, amenmena taru Raja keamu ngebo, erdi derinkameng nyapu, sundi amutu yuma tep, Raja kepra men talenkamenge. Ange gum dinin, yuk tali neng, sun derinkameng nyapudi, Raja kepra talenkamenge. Atalepkameng nengdi, nimi deiyo kepra, amutu talenkameng dinino, sunda, menmena tekamu ngebo, er ila puto adi amutu taleamutopu, sun amenda dumbari Raja nengdi men kupkamenge.

5 Ataruda, dapu mutu dutara, arah utara tara Mesir mutu talepkamre Rajada, puto ila di talepra kunkamre. Dinino, er aRaja er putoda, yambulpu kupkamre. Atep, er amutara, er jen talena neng, sun deiyo neng kankan di, tenpu jen talena deiyo ngebo ton, erda pio ila putoa di, tekredi menmena ngebo bisbisa kapredi, amutu yuma er dipapu talepra Raja kunkamre.

6 Ware kupra keteng tamun ton, konum kupyopda, dapu mutu tara, (arah utara tara) mutu talenkamre Raja cap, iknapi tara, (arah selatan tamna) talenkamre nimi deiyo ngebo Raja cap, sundi, ‘Nunda, antapra tonpa kupnemedi, podana gum dipapu, telep kupra kikiman kunkamneme,’ peprengedi, konum kuprengopda, dapu tara Raja, Mesir mutu Rajada, er ner mida, iknapi mutu, Siria mutu talenkamre Raja tep kareprepa, dopkamre.

Dinino, aner cap, aRaja cap, telep kupra tonpa kunada, pio weik taru neitamai di, men mapkamrenge. Amenda taruda, aMesir mutu ner cap, er akinge bo, Siria mutu Raja ngebo cap, tonda sun nyapu yuma cap, sun amutara pel melimna neng weikanun cap, sun yumada, yuk nengdi poptapmengedi, gawal dakamenge.

7 Ukupkameng dinino, ange konum kuproprepa, yambul amenda taruda, aMesir mutu depkamre ner, er tara ngebo ton, angebodi Raja kepredi tekyopda, menop taru Mesir mutu taleamu ngebo punupredi, er dipapu Mesir mutu talenkamre. Ukupreyopda, iknapi tamna, Siria mutu talepkamre Raja, er jen neng tep porbenkamenge. Porbenge taruda, erdi sun iknapi tara neng cap, sun jen talena neng capdi, ila lyom beilya wipdongopra kuramenge mutuda, bena wekmengedi, itara kunge neng, Siria mutu neng yuma tep popra bisbisa kapmengepa, aMesir mutu Raja ngebodi, Siria mutu yuma talenkamre.

8 Ange konum kupreyopda, aMesir mutu Raja ngebodi, er adipapu er pe mutu, Mesir mutu tamupra bena kunkamre. Er pe mutu tamupra benkore taruda, sun iknapi tara nesala, sun si eremamenge isok tep, sun urasin utopu petupra deiaminge peda dalupra, er pe mutu tamupra dubenkamre. Tonda, sun Siria mutu nesaladi, ‘Nun deiyo keca ake’ tenen, tali keca dinin, isok si eremami keca urasin atonun, kunumna weik telep keca emas cap, perak capdi, betapra deiamidi, isok si eremami keca yumada, aMesir mutu Raja ngebo cap, er jen talena neng capdi, akeca yuma doupra, sun pe mutu, Mesir mutu dubenkamenge.

Ukupmengopda, ware kuprap keteng tamun yumada, utara mutu, Mesir mutu talepra kunkamre Raja cap, er tara neng capdi, tali kange doupra dakunkamenganen, iknapi tara nesala, ada Siria mutu Raja-Raja neng cap, sun mutu nesala cap tep, sun tara kupbankameng deiyo-deiyo neng tep, ‘Dakwapye, sun tali dakunkamenge’ tenen, men mar porbankamre.

9 Dabena kurammengepanen, amenda taruda, iknapi tamna, (arah selatan) Siria mutu talepra kuramre Rajadi, ton cap dapu tara, (arah utara), Mesir mutu talepra kurur Raja tep, mar porbenkamre. Ukupkameng dinino, Siria mutu nengdi, Mesir mutu nesala popra men bisbisa kapmengopda, iknapi tamna Raja cap, er jen talena neng capdi, tamupra sun pe mutu, Siria mutu tamupra benkamenge. 10 Siria mutu tamupra benkameng dinin, ukupmengopda, itamna tara, (arah selatan tara), Siria mutu kunge nesala taleramre deiyo ngebo, aRajadi deiamre nyapu, sundi tamupra, ‘Gume ukutaruda, nundi iknapi dam tara, arah selatan tara, Israel nesala kunge mutu taleramre Raja tep, porbenkup’ tenen, ketenepmengedi, sun nyapu jen talena neng peda, pio weika di ketenepra deipkamenge.

Ataru neitamai di, Raja Sirya cap, er jen talena neng yuma capdi, gonga kepra porbenkameng ngeda, me ila di opra baramretopu kupra, sun Israel nesala kunge mutu neitamai puto adi, tali lupra Israel yala neng porbenkamenge. Ukupmengedi, ue butene taru deiki benkamenge ngeda, Israel nesaladi, ila lyom beilya wipdongopra deiami mutuda, damai bengedi, ‘Popbisipkamep’ tenen, piripetepkamenge.

11 Uda, Siria mutu Raja cap, er jen talena neng capdi, ukupmengopda, iknapi dam tara (arah selatan) tara mutu, Mesir mutu talepra kuramre Rajada, ange yuma gekepredi, yu kuprepa, sun yuma mar pondanmangaipu, dapu mutu damai benkamre. Er pe mutu, Mesir mutu di, dapu mutu bere dingeda, sun yuma mar pondamangaipu beryopda, aRaja ngebo gonga kepmarepa, er jen talena neng weik, amutu bulupmange neng yuma capdi, Siria mutu taleamre Raja cap, er jen talena neng cap tep, bena popbisipkamenge.

Ataruda, Siria mutu nimi deiyo Rajadi, er jen talena neng pio weika di bulupra deipkamre dinin, Mesir mutu taleamre Raja cap, er jen talena neng capdi, Siria mutu jen talen neng yuma tep popmengedi, bisbisa kapkamenge.

12 Ukupmengopda, Mesir mutu taleamre Raja, er podandam jen talena nengdi, Siria tara jen talena neng weik konum popmarepa, depmange nge tep, er dipru erepredi, ‘Neda ila puto weik ngebo kununa cadi, ne jen talena nengdi, nimi weik konum popmangdi, gawal dakmange’ tenen, sal nong-nong kapredi, kunkamre. ARaja ngebo, er jen talena nengdi, nimi pio weik popmengepa depkameng dinino, amenda taruda, ange utopu tupa men kupkamenge. Atep nengeda, aRaja erdi nimi deiyo ngebo kepra, Mesir mut talenkamre taruda, go yambul dipu talenkamre. Keteng tamun weikanun ton tupa puto weik men kunkamre. Dapu mutu dam tara kunge nesalada, er amutarapu tupa men kunkamenge.

13 Deiyoda ake. Uda, amenda taruda, dapu tamna (arah utara) nimi deiyo ngebo, Siria mutu Raja kepra talenkamre ngebodi, ue butene porbana tep nengeda, jen talena neng, pio weikanunton ketenepra derinkamre. Menmena taru wepra deiamu jen nengda, denge yambul weikanun deiamu dinin, ataru wepra derinkamre jen talena neng, sun gungda, denge pio-pio weik keteneipkamre.

Er jen talen neng, pio weika di bulupra deiprepa, dakuramenganen, amenda taru keteng tamun ware kuprap taru ton, konum kepreyopda, Siria mutu Raja cap, er jen talen neng pio weik cap, ‘Mesir mutu tamna nesala popbisipkamep’ tenen, ketenepi. Tonda aRaja cap, er jen talena neng yuma capdi, nimi pon keca peda, pio weik, ange-ange yuma doupra, er mutu di tapra, arah selatan tamna bengedi, ‘Mesir mutu tamna nesala popbisipkamep’ tenen, mar porbenkamenge.

14 Ange yuma ukupre taru neitamaida, nimi pio weika di, arah selatan tara, Mesir mutu talepkamre Rajadi, talenkamre nesala kankan di, ton nengdi, ‘Angeboda, nun song cadi, er tep yaniptapkamepe,’ tenepmengedi, er penkamre upu tep, tupa men gekenkamenge. Ukupmengedi, er cap, sun cap, upu deiki di pangdanapu kunkamenge. Ange utopu ton, Daniel, kan pe mutu nesala kankan di, ton Israel mutu nesaladi, pio balila kepmengedi, ‘Gume, Mesir mutu Raja tep, tapmepedi, er upu ton yanitamnapu kunkamepe,’ tenepmengedi, piripetepkamenge.

Ukupkamenga deiyoda, ake. Ada ayu tenepkameng nesala kankan di, ton deiyo ngebodi, ken mana utopu keca epkamra deiki di, konum katuai kuprepa, epredi, yuk neng tep lap pepkamre. Lap peprepa, teka tenepkameng dinin, sundi, aMesir mutu deiyo ngebo Raja tep, popra bisipmanto men kunkamenge.

Ukupkamenga utopu, Danielo, sun Israel yala nesala kankan di, ton neng dingeda, ‘Gume, angeda telepe pua. Atep, nun pedi, nun taleserur nimi deiyo ngebo, Mesir mutu Raja ngebodi, ikin keca nun nong deiki deriserurada, gum kupra deipkamep ja. Nundi er tep, tapkamepe. Angebo tapmepyopda, nundi, Mesir mutu taleserur deiyo ngebo tep, popra bisbisa kaptepe,’ tenepmengedi, Mesir mutu nesala popetepkameng dinin, men kupmanto kupkamenge. Ukupra piripetepra kupkameng dinino, sun Mesir mutu nesaladi, Israel tara nesala tep, popra bisipkamenge. Israel tara nesaladi, ‘Ukupkamepe,’ tenemi ngeda, nong men kupkamre. Talipu kupetepkamenge.

15 Ange yuma konum kupyopda, amenda taruda, dapu tara, Siria mutu talerur nimi deiyo Rajadi, er jen talena neng weika di ketenepyopda, sun Mesir mutu nesala, sun kunkameng mutu neitamai yana popbisipkamenge. Dapu tara di tapra, iknapi dam tara neitamai yaryopda, sun Israel yala nesaladi, Mesir mutu nesala kunkameng mutu neitamaida, tenpu ila ati arum damai yana popmengedi, bisipkamenge.

Uda, menop taru, Mesir mutu neitamai dinin, akati arum domi nengdi, ‘Gume, yuk karen mutu neng, nun pona tep neng yangedi, nun mutu tali lupra men wekra popkamseng’ tenen, ila lyom gel di, gel beilya ongopgenepra, wipdongopra keteneipidi, sun ila ati arum dana-dana tara yuma wipra deiami.

Ange yuma konum ukurami dinin, amenda taru, Siria mutu deiyo ngebo Rajada, Mesir mutu ila ati arum damai yaryopda, erdi peprepa, er jen talena nengdi, tu weika di palipmengedi, deipra baramenganen, alyom gel beilya damai konum deiki tara deipwelepmengopda, atu deiki yanipra welepmengedi, alyom beilya deiki tara kaplepra, aila ati arum wekamenge. Wekmengedi, akati arum kunge nesala yuma tep, popra bisbisa kapkamengedi. Siria mutu Rajadi, akati arum domi ngeda dalupra dopropkamre.

Ataruda, sun iknapi dam tara nesala, Mesir mutu talepra kunkamre Raja cap, er jen neng cap yumadi, ‘Akati arum neitamai kunge nesala damai bena melipkamep’ tenen, Mesir mutu neitamai di tapra, Israel nesala kunkameng mutu bengedi, Siria mutu neng tep popetepkameng dinin, Mesir mutu Raja ngebodi, nimi pona ila kael neng, wepra deipkamre neng peda, puto men kupkamenga cadi, men kupmanto kupkamenge. Atep, sundi, Siria tara kunkameng Israel yala nesala, sun jen talena neng tep, men bisbisa kapra popkamenge. Akati arum ila ngeda, sun Siria tara jen nengdi, popbisipmengedi, gawal dakamenge.

16 Atep, ataruda, dapu mutu tara nimi deiyo ngebo, arah utara tamna, Siria mutu talenkamre Rajada, yuk tara neng yumadi, er tep men popbisipkamenge. Er cap, er jen talen neng cap, sun dipapu sun yuk mutu nesala yuma popmengedi, sun kuramenge mutu yumada, dalupra doropmengedi, Raja Siria tenepretopu kupra, tali lupra kupbankamre ja. Ukupkamra tep nengeda, sun Israel nesala, urasin pio telep mutu neitamai kurumai yumada, angebodi dalupra dopropredi, er dipapu talenkamre. Tenpu mutu peda men tapkamre, amutu-amutu yuma talenkamre ja.

17 Ukupre taruda, angebo Siria mutu talenkamre Rajadi, er jen talena neng weik ketenepra deipredi, arah selatan, iknapi dam tara, Mesir mutu talepkamre Raja, er damai benkamre. Dinino, er dipru neitamai di, ‘Ne pepkamne upuda, mawa dipu pepkamne,’ tenepredi, Mesir mutu talenkamre Raja tep, ukupra perbenkamre. ‘Dyo, kan cap, kan talerum Mesir mutu kunge nesala cap, nun Siria tara kunup nesala cap, nimi podana gum dipapu, telep kupra kikiman kunkamtepe’ tenenmana tep, sun cap, nun capdi, podana gum tep upu, pedina upu deiki di pepdanmeko,’ pepkamre.

Utenepredi, Mesir mutu Raja damai perbenkamre. Dinino, Siria mutu nimi deiyo ngebo, er dipru neitamai di, ‘Gume, tek sisi ngeda, Mesir mutu nesala talenung tara yumada, ne dipapu dalupra doropkamne. Atep, ne ner mi dopra, Mesir mutu nimi deiyo ngebo karepnepa, dopropyopda, ne ner midi, ne tep lap penkamre upu deiki di, melipkamnere. Ukupre pangeda, nedi Mesir mutu nesala damai bena popbisipkamne,’ tenenkamre. Utenepre dingeda, ange yuma piripetepkamre dinino, ange yuma nong men kupkamre. Atep, erdi, ‘Mesir mutu yuma dalupra doropkamne,’ teneramre ngeda, nong men kupkamre.

18 Ange konum kupeteprepa, nong men kupyopda, Siria mutu Rajadi, Mesir mutu tapra, ortamna mutu, ila laut mokon, er si Laut Mediterania, aila mokon pirman tara kunkameng nesala tep, sun damai bena popetepkamre. Ortamna beredi, er cap, er jen neng capdi, amutu-amutu kunkameng nesala weika di, popbisipmengedi, sun mutu dalupra dopropkamenge. Ukupkamre dinino, yuk mutu neitamai di, tenpu nimi deiyo ngebo ton tekredi, amutu deiyo kepra talepredi, er cap, er jen talena neng capdi, Siria mutu Raja tep, popbisipkamenge.

Ukupkamenga deiki di, aSiriya mutu Rajadi, ‘Neda pio puto weik ngebo kunune’ tenen, sal nong-nong kunkamrenge cap, pio malinge tenenkamrenge yuma capda, gum kupra deipkamenge. Tek sisi ngeda, Siria deiyo ngebo salnong-nong kemna cap, dipru eremdana cap teneramrenge yumada, kange di tamupra, er ateneramre ngebo, er nong deikipu kupkamre ja.

19 Ukupyopda, Siria mutu Rajadi, Laut pirman tara mutu yuma tapra, er pe mutu, dapu tara (arah utara) tamupra benkamre. Erdi, ‘Ne pe mutu tamupra bena kunkamne. Ne pedi ila gel ati cap, lyom gel beilya cap, wipdongoamsi ngepu, amutu pu tamupra benedi, amutupu kunkamne,’ tenepredi benkamre. Dinino, amenda taru yuk mutu nengdi, Siria mutu deiyo ngeboda popbisipkamenge. Ukupmengepa, er angeboda, nimi ton angebo tupa men epkamenge. Nimidi popmengepa, erda dim pepra kupkamra tepa.

20 Menop taru Siria mutu taleamu Raja ngebo deprepa, er yo punupkamre Rajada, er amutara pel dona neng sun tep, “Ne talenun mutu neitamai yuma kunge nesala tep, pio yu deiki di, aupu perbenkamrume. Ada, ‘Sunda pajak co bo karena tep keca yumada, amutu talere ngebo tep, weika di bulupra deriryakankamserume,’ pepmumpa, ne tep karepnenge pangeda, ne talenkamne kunumna weik kecada, pio weik ton cap kupbankamnere,” pepra deiprepa, ukunkamenge.

Angeboda, er go yambulnun ton dipapu talenmarepanen, amenda taruda depmarepa, gum kupkamre ja. Dinino, ada yuk nengdi er tep yu kuprepa, podan taru neitamai di, er popmengepa men depkamre. Ange gum dinin, angebo depkamre ngeda, talipu depkamre ja. Jenekai di men popkamenge.

Amalaikat ngebo dipapu, ne Daniel tep, aupu ton pepneupa gekepsi.

“Utara tamna mutu talepkamre Rajada, pio mali kuna ngebodi talepkamre,” pepu upu

21 Amalaikat dipapu aupu ton upepneu.

Amenda taruda, adepmare ngebo yo pununa tep, yuk ngebodi Raja kepra Siria mutu talenkamre. Angeboda, er nai yapuda, Raja neng men kuramya cadi, amutu deiyo nengdi, ‘Erda nun mutu talenkamser’ tenen, er tep men wepra erepya cadi, tek sisi erda Raja men kepmanto ngebo kunkamre. Ukunkamre dinin, amutu nesala men tenepmengedi, tali mangkau kange doupra kunkameng taru neitamaida, erdi dato-dato di, tekredi, pio mali weik kuna deiki di, amutu talena tep, deiyo kepredi talepkamre. Erda, Siria mutu taleryankamre taruda, amutu nesaladi men teneamenge tarupu yaredi, nanap kemna tep, mok upu cap, dipru gidon upu cap, yana peprekamra deiki di, Raja kepredi, amutu talenkamre.

22 Erdi amutu talenkamre taru neitamai di, er jen talena nengda, puto weik deiki di mar porbenkameng taruda, yuk mutu jen talena neng yuma tep, popra gawal dangkamenge. Tonda, Allah er si eremna ati pumbon pel dona deiyo ngebo, imam neng sun deiyo ngebo capda, Rajadi peiprepa, er tara nengdi angebo ton poptapkamenge. Ukupkamra deiki di, er tep nengeda, ‘Angeboda, nun pio songe,’ tenepmenge neng yumada, er cap, er jen talen neng capdi, popmengedi, gum kupra deipkamenge.

23 Tonda aRaja ngeboda, erdi talenkamre mutu neitamaida, nesala pio weika di men kunkamenge. Yambulapu kunkameng dinin, er ila kael di, minina upu cap, mok upu cap, mawa di penkamre upu cap deiki di, yuk mutu nimi deiyo neng, yuk Raja-Raja neng tep, ‘Gume, sun cap, nun capda, telep kupra kikiman kupedi, melimdankamepe,’ pepra, mok upu dinin, pedina upu deiki di peipkamra deiki di, sun amutu-amutu nesala yumadi, ‘Dyo nunda kikiman melipdankamepe,’ pepra, pedina upu pepdankamenge. Upepkamenga peda, er angebo, er dipapu apepkamenge ngeda, adipapu yaniptapkamre. Ukupkamra deiki di, nimi denge pio weika di men talenkamre dinin, er puto weik kuprepa, er angebo dipapu, yuk mutu-mutu weik ton talenkamre.

24 Angebo er ila kael deiki di, nanap keptapredi, sun mutu tu pio telepai kunung nesala, sun isomka kunge nesala yumada, sun damai bena popredi, amutu tuda dalupra doropkamre. Sunda, mangkau kange doupmengedi, ‘Dyo dim pepra, telep dipapu kunkamepa’ tenen, kunkameng taru neitamai dipu, anesala popredi, sun mutu neitamai pio telep tuai yumada, dalupra dopropkamre.

Erdi ange yuma ukupkamre ngeda, men taru er nai yapu cap, er co puna neng capdi, ange utopu pio men kuraminge dinin, er dipapu amali kunange tali lupra kupkamre. Ukupyopda, erdi mar popbisipredi, amutu nesala menop taru talerami kecada, dalupra doropkamre. Dopropkamre bung keca yala-yala yumada, erdi bokrapredi, er tamna kepmange nesalapu karepkamre.

Tonda, er podana tep neng, yuk mutu nengdi, sun ila ati arum dana-dana tara, gel beilya ongopdongopra wiamidi kalengamengai cap, yuk puto weik mutu cap yuma tep nengeda, erdi, ‘Amutu yuma porbenyopda, sun mutu dalupra dopropkamne’ tenen, upu talepredi, keteneipkamre. ‘Yuk mutu nesala ton, mar porbenkaman’ tenen, ketenepkamre dinino, er go ton gum kupkamra tep, keteng tamun weika di ton, amutu yuma men talenkamre. Go yambulanun ton konum kupyopda, er peda deprepa, dim pepkamre ja.

25 Dinino, erdi amutu-amutu tupa talenkamre taru neitamaida, angebo adipapu balila deipra, erdi, ‘Iknapi dam tara, arah selatan Mesir mutu yuma talepra, Raja kepra kure ngebo tep nengeda, nedi porbenkamna tep, keteneipkune’ tenen, er jen talena neng ton weik ketenepra deipkamre. Mesir mutu nesala porbenpetepkamre dinino, arah selatan tara Mesir mutu talepkamre Rajada, aRaja er jen talena neng denge pio weika di ketenepkamre. Er jen talena nengda, puto pio weik neng konum ketenepra deipkamreya tep, Siria mutu talenkamre Rajadi, ‘Mesir mutu porbenkaman’ tenen, ketenepra deipkamre dinin, men kupmanto kupkamre.

Men kupmanto kupkamra deiyoda ake. Ada, yuk puto nengdi, mok upu ton talepdangedi, peptapkamenga deiki di, Siria mutu talenkamre Rajadi, ‘Ukupkamne,’ tenepu keca yumada, nong pio men kupkamre. Erdi tenepkamre ngeda, nong men kupkamre.

26 Angepu gum dinin, Siria mutu ila deiyo ngebo Raja, er amutara pel dona deiyo-deiyo neng cap, er cap, er ati pumbon pio telep jen keca dopra kikiman jenung dinin, adeiyo-deiyo neng cap, yuk neng cap, sun kikiman upu talepmengedi, sun yumadi, ‘Angebo poptapkamepe’ tenen, er pona tep upu talenkamenge. ARaja ngebo cap, sun cap kikiman kunung dinin, amenda taruda, aneng dipapu, ‘Uo, amutu talesere Raja ngeboda, nun song cadi, poptapkamepe,’ tenenkamenge. Ukupmengedi, upu talenkamenge. Tonda, er pe jen talena nengda, yuk mutu nengdi yana, pio weika di popkamenge. Er tamna nesala peda, weika di popmengepa, depkamenge.

27 Ataru neitamai di, aRaja neng butenedi, ‘Amutu tu yumada, nun butene dipapu taleptenemye,’ tenenkamenga cadi, sun buteneda, tenpu meja damai bukrengedi, jen keca kikiman jeprengedi, upu talenkamrenge. Gekena telep upu pedankamreng dinino, tek sisi sun kange dipru neitamaida, yu tenepdanmarenge dipapu kunkamrenge. Tonda, “Ukupkamneme,” pepra, mok upupu peptapdankamrenge. Dinino, sun butenedi, ‘Ukupteneneme, ukupteneme,’ tenepra keteneipkamreng keca yumada, nong men kepredi, ange yuma gum kupkamre.

Ange nong men kepkamra deiyoda ake. Ada, Allahdi, ‘Angeda ataru kuptue, angeda yuk taru ton kupkamre. Sun aneng buteneda, gum kupkamrenge’ tenen, konum keteneiamu taruda, damai konum kupkamrea tep, sundi, ‘Ukupteneneme,’ tenepra keteneipkamreng keca yumada, nong pio men kepredi, ange yuma gum kupkamre.

28 Ange tep nengeda, Siria mutu talepra Raja kunkamre ngebo cap, er jen talena neng yuma cap, Mesir mutu tapra, sun pe mutu tamupra benkamenge. Tamupra benkameng taruda, yuk-yuk mutu nesala tep, mar pomengedi, dalupra dopropkameng bung keca yuma cap, doupra benkamenge.

Tonda, aRaja er kangeda, ‘Allah er si eremenge ati pumbon pel doredi, imam-imam neng, sun deiyo ngeboda, poptapnedi pio gum kupra deipkamne,’ tenepre kangeda, tupa akapmarepapu, er pe mutu tamupra benkamre. Tonda, erdi, ‘Ukupkamne,’ tenepre keca yumada, Israel mutu neitamai di, ange tupa teneretopu, kurpetenkamre. Dinin, Mesir mutu tapra bere taruda, Israel nesala tep tenenkamrenge yumada, tupa akapmarepapu, er pe mutu tamupra benkamre.

29 Dabena dakuramreyanen, ware kuprap taru ton dakuramengepanen, menop taru Allahdi, ‘Ataru ake,’ konum teneamutopu, ataru kunum kupyopda, Siria mutu taleramre Rajada, kange di tamupra, arah selatan tara Mesir mutu talepra kuramre Raja tep, ‘Angebo poptapnedi, er mutu dalupra dopropkamne,’ tenepredi, tamupra Mesir mutu mar poryankamre. Ukupkamre dinino, menmena taru kwamre ngeda, urasin yuk, amenda taru kupkamre ngeda, urasin yuk kupkamre. Menmena taru Mesir mutu poryanamu taruda, nimi weik poptamamudi, sun keca weika di dalupra dopramunge utopu, abutene taruda, men kupkamre.

30 Siria mutu taleramre Rajadi, Mesir mutu men popra gawak dakamra deiyoda, ake. Ada, Sitim mutu ^{▼▼Sitim mutu – Sitim mutuda, ada pumun taru perami si tep seki. Amutuda, Roma mutu kurur dinin, menop taru neitamai perami sida, ‘Sitim’ mutu pepra seki. Dinino, amutuda tek sisi Roma mutu kurure.} nengda, Siprus mutu di mokon deiki umpena bukra yangedi, er Siria mutu Raja tep, yana popmengepa, er kware weik kupkamre. Kware weik kupyopda, Mesir mutu tapredi, tamupra bendopkamre. Dinino, erda ila yu kupre pangeda, Israel nesala kunkameng mutu tamupra benkamre.

Ukupre dingeda, er yu tep, ‘Allah er si eremnung ati pumbon pel dona deiyo ngebo, imam-imam neng sun ila deiyo ngeboda, adipapu poptapra, gum kupra deipkamne,’ teneamunge tupa tenepredi, Yerusalem mutu tamupra benkamre. Tonda, Allah tep teka tenena gum neng, amutu neitamai kunkameng nengdi, aRaja tep pepkameng upu gekepredi, ‘Sunda telepe,’ tenepredi, sundi penge upu gekepredi, aneng tep melipra kunkamre.

31 ARaja ngebodi ukuamreanen, Allah er si eremna ati, pio lengna atida, mali kupra derina tep, erdi jen talena neng weik doroipkamre. Allah er si eremna tep, Israel nengdi, yapi keca doupra yangepa, tumi-tumi yuma, imam nengdi akeca popmengedi, uku dongomnungaida, sun ajen talena nengdi, ange yuma gum kupra deipkamenge.

Ukupmengepa, aRaja ngebodi, Allah er si eremna ati pumbonda, pio ila mali kun keca dopra deipkamre. Ukupkamra tep nengeda, Allah erdi, ‘Uo, ukutaruda, ne mawa nesala, Israel nesala cap, ne pe capda, akatida ton cap men wektepe. Akatida, ne konum tapne,’ tenepredi, akati tep dabal kuprepa, tapkamre. Akati tapyopda, walang yopu kupkamre.

32 Raja erdi mok upu weik pepkamra deiki di, nimi weika di, Allah er si tupa men eremengedi, konum tapra, tali kange doupra kunkamnung neng tep, naproprepa, angebo er upu gekepmengedi, er tarapu kepropmengedi, er tep melimkamenge. Dinino, tek sisi Allah er tepapu tupa talepra kunkameng nesaladi, amok upu penkamre Raja tep, men gekenkamenge.

Ange gum dinin, balila deipmengedi, ‘Angeboda nun songe. Er upu men gekenkamepe’ tenen, er penkamre upu tep, yanitamnapu kunkamenge.

33 Ataru neitamaida, sun ila kael kemna keca deiyonge konum kael keamenge nengdi, amutu teka tenenge nesala peterepkamenga deiki di, teleppu kunkamenge. Ukupkameng dinino, ware kuprap taru ton, sun mali nengdi, akael keami neng cap podanmankap, ware kuprap ila kael neng ton popmengopda, depkamenge.

Ton tara ila kael neng tomopmengedi, popra, uku dongopmengepa, uku di jepkamre. Sun mali weik kunkameng nengdi, ila kael keami nengda, sun bung keca yuma upula dopropkamenge. Tonda, ton tara ila kael nengda, weika di tomopra, wenemna ati dongopkamenge.

34 Sun mali kun keca talepra kunge nesaladi, ila kael neng, Allah tep teka tupa tenenge neng tep, yana popkameng taruda, yuk neng ton, Allah er nyapu sisa tep, yambulanun ton yana melipkamenge. Dinino, amelipkameng neng kankan neitamai, nimi weik tarada, aneng sun dipru dumsisipu men kunkamenge. Mawa dipapu Allah er tara nesala kikiman kunkameng dinin, tek sisi ngeda, sun mali-malipu kunge neng, sun tara nesalapu kununge.

35 Uda, ataru neitamaida, sun ila kaele kepra kunkameng neng kankan, ton tamna nengda, mali nengdi aneng tep, poptapmengepa depkamenge. Dinino, Allah er tep, tek sisi tenepidi, er tara nesala kununga tep, adepkamenga deiki di, Allahdi anesala telep kweipkamre. Allahdi anesala tep, pio lengna nesala utopu kupra, teleppu kweipkamre.

Tonda, sun mali nengdi poptapkameng ila kael nengda, Allahdi aneng, sun menop taru mali kuraminge yumada, kaukepredi, pio daepkamre. Sun mali nengdi, Allah er nyapu popkameng dinin, Allah er tara nesala kununga cadi, ange yumada, sun puto kemdina cap, kurpetena cap tep kupkamre. Ikin keca yarepa, kurpetena ngeda, amenda siria gawal dakamre tarupu, Allahdi ange yuma gum kupra deipredi, er tara nesala kange di ton cap telep deipkamre. Tonda, Allahdi, ‘Ikin keca weik kunkamrenge cap, akeca-keca yuma gum kupra deipkamnenge yuma capda, ataru neitamaipu kapul men kupkamre,’ konum tenemu. Akeca-keca gum kupra deipkamre taruda, kapula. Angeda, menop taru Allahdi, ‘Atarupu ange yuma gum kupra deipkamne ja,’ konum teneamudi, keteneiamutopu kupkamre.

36 Dinino, akeca-keca kapul gum kupra deipkamre taru neitamaida, Siria tamna mutu talepkamre Rajada, er pe kange di tenepkamretopu, angepu kupbankamre ja. Tonda, er dipru eremna deiki di, sal nong-nong kunkamredi, upenkamre. “Gume, ne puda, pio deiki tara kure ngebo kunune. Nimidi si eremenge keca dewa-dewa ^{▼▼dewa-dewa – Aupu deiyoda, ake. Aupu dewa-dewa peramengada, isok si eremna keca tep penunge.} cap, nimidi, ‘Nun nai bo ake’ tenen, si eremenge tali keca yuma cap, tonda akeca-keca yuma, deiki tara erepra kurur ngebo, Allah Yahweh capda, ne amutarapu kurure. Nimidi si eremenge keca yumada, mambule gume. Ne puda, ila mambul ngebo kunune. Ne tenpuda, ila puto deiyo ngebo kunune,” pepkamre. Utenepdaredi, er pe sipu ila di eremkamre. Tonda, erdi Allah Yahweh tep, pio mali-mali upu weika di penkamre.

Uda, amutu deiyo ngebo, Raja Siriada, erdi ange kupkamrada, Allahdi, ‘Angebo ukupkamre,’ konum teneamutopu cadi, ange kupbaramrepanen, Allahdi, ‘Ataru konuma,’ teneamutopu konum kupyopda, aRaja ngebo, mali weik kuramnga tep nengeda, Allahdi angebo er deiki, ila ikin keca deipkamre. Adeiki di, Allah er yu teneamu ngeda, gawal dakamre. Allahdi konum teneamu keca yumada, tek sisi nong kupkamre!

37 Dinino, akeca-keca kapul men gum kupkamre taruda, aRaja ngebo, er pe si ereipkamre ngebo, Siria mutu nimi deiyo ngeboda, er co puna neng cap, er nai yapu capdi, si eremami keca yuma peda, ‘Sunda mambule,’ tenena gum di, akeca peda, sun si men eremkamre. Ange yuma tep, yanitamnapu kunkamre. Angetopu, nerapudi si eremamenge isok ^{▼▼isok – Aupu deiyoda, ake. Ada, pumun taru amutu neitamaida, Allah tep tek tenena gum nerapudi, tenpu isok, er sida Tamus, er si eremami. Ada, sun nerapudi, ‘Gume, aisok si eremepepa, erdi nyapu weik karenkamsere,’ tenerami. Ibrani upu deiki di, ‘Tamus’ perami. Yunani upu deiki di, aisok er si ‘Adonis’ perami. Tonda, Yeheskiel 8:14 dinkurume.} peda, ‘Erda mambule pio gume,’ tenena deiki di, atali isok er si peda, men eremkamre. ARaja ngebodi, akeca-keca yumada, si ton men eremkamre. Erpe tepapu, ‘Neda ila mambul ngebo, Allah kunune,’ tenedankamredi, sal nong-nongpu kemkamre. Atep, erdi, er pe sipu eremdankamre.

38 Er aRajada, tamupra er co puna nengdi, si men eremami kecapu, akecapu si eremkamre. Asi eremkamre isokda ake. Ada, nimidi ila lyom gel di, ongopdongopra wirameng lyom gel beilya neitamai, ila ati arumai yuma tep, ‘Aisok er dipapu, nun tep kalekra melimserepa, yuk mutu yu nengdi, men yana popsetenge’ tenen, si eremnung isok sipu, er aRaja peda aisok sipu eremkamre. Erdi aisok si eremna cap, gispal dona cap tep, kunumna weik keca pio karenkamre. Ada, emas cap, perak cap, yuk kamo telep kunumna weik gel cap, ange yuma doupra yaredi, aisok gispal dona tep, tupa-tupa karenkamre. Atep, er co puna neng si men eremami isok tep, si eremredi, telep keca karenkamre.

39 ARaja ngeboda, erdi ila ati arum dopredi, ila lyom gel beilya wipdongopra kunkamenge mutuda, ‘Yuk mutu nengdi, ne damai yana, mar poryankamnenung’ tenen, yuk-yuk mutu neng tep, ‘Sunda ne damai yana melipkamnerume,’ pepra moropkamre. Ada, ware mutu nesala do yuma, tali isok si eremenge nesala tep, ‘Sun ton, ne melimna tep nengeda, ne damai melipra yankamrume,’ pepra moronkamre. Moropyopda, anesala weika di, er damai yana melimkamenge.

Tonda, ware mutu nesala do yuma, er damai yana melipkameng nesala tep nengeda, sundi, aRaja tep, ‘Telepe, kan tarapu kepropmepedi, kan sipu eremkamepe,’ pepra, er tep, gispal dopkameng nesala tep, erdi sun tep, telep keca weika di karenkamre. Ada, aRaja ngebodi, sun aneng tep, bung keca weika di karenkamre. Tonda, er amutarapu dinin, anesala kankan, sun deiyo neng ton erepra deipre dingeda, ‘Ne amutara dinin, sundi yuk mutu nesala tep, talepmengedi, nimi deiyo-deiyo neng kunkameng’ tenen, aneng erepra deipkamre. Tonda, sun menenga keca kunumna tep nengeda, er talenkamre wa tu ton bokra, adeiyo-deiyo neng tep karenkamre.

Sirya gawal dangne taru kupkamre keca tep, seku upu

40 Ukupra kunkamre dinin, Allahdi, ‘Sirya tamna Rajada, er amutu-amutu taleramre taru konuma. Akeca-keca yuma gum kupra deipnedi, gawal dakamne,’ konum menop taru di teneamu taru konum kupyopda, Allahdi go kareprepa, iknapi tara, arah selatan tamna mutu, Mesir mutu taleamre Raja cap, er jen talena neng capdi, dapu tamna, arah utara tamna mutu talepra kuramre ngebo, Raja Siria ngebo tep, mar porbenkamenge.

Ukupkameng taruda, Siria mutu talepkamre Rajadi, pio yu kuprepa, tamupra iknapi tamna mutu, Raja Mesir mutu taleramre ngebo cap, er jen neng cap tep, pio puto di mar poryankamenge. Siria mutu nengdi, Mesir mutu neng tep, poryankameng taruda, mar podana taru tu deiki emban keca, er si kereta kuda, tonda er si, kereta perang cap, tonda kuda bisam bali tara bukmengedi, nimi porbarameng jen neng cap, tonda nimi porbana tep, laut mokon deiki embana keca, sun kapal laut perang cap deiki di, nimi pio weik bukra bengedi, Mesir mutu talerur Raja tep poryankamenge.

Sundi nimi poryankamenge ngeda, tali lupra yana bisbisa kapmengedi, atamna ton, kirikra ortamna ton embankamenge. Ukupmantoda, ila mungna mukredi, bupatek embaramretopu kupra yangedi, dana-dana tamna mutu-mutu yuma neitamai di, nimi weik ponkamenge. Ukupmantonge ton, ila me oupredi embaramretopu, nimi weika di mar poryankamenge. Ukupmengedi, amutu-amutu yumada, doropmengedi, arapropkamenge.

41 Raja Siria mutu taleramre ngebo cap, er jen talena neng capdi, Israel nesala sun mutu neitamai bengedi, nimida, nungna gum, denge pio weika di, puluhan ribu neng ton, poptapmengepa depkamenge. Dinino, Edom mutu neng yambulanun cap, Moab mutu nesala yambulanun cap, tonda Amon mutu nesala yambulanun cap, gam tupa kunkameng nengda, men popra gawal dakamenge. Amutu si sekmap nesala, sundi talepra kunkameng mutuda, Siria mutu Rajadi, men popra gawal dakamre. Sun amutu nesalada, telep dipu tupa gam kunkamenge.

42 Siria mutu taleamre Rajadi, er dipapu yuk mutu-mutu weik ton cap, tapakra popbisipredi, sun mutu tu ton dalupra doropredi, talepra kunkamre. Tonda, Mesir mutu neitamai kunge nesala peda, men lyepdankamenge. Mesir mutu talepra kunkamre Raja peda, Siria mutu Rajadi, poptapredi, amutu peda dalupra doropkamre. 43 Siria mutu Rajadi, Mesir mutu nesala taleramenge kunumna weik keca, emas cap, perak cap, tonda yuk urasin pio telep keca yuma capda, dalupra doropkamre. Ukupkamre taruda, Sudan mutu neng cap, Libia mutu neng capdi, er tamna kepropmengedi, melipkamemenge. Er upu gekepmengedi, er amutarapu melipra kunkamenge.

44 Ukupkamre dinino, ataru neitamaida, keteng yakan tara, timur tara mutu kunkameng nesala cap, arah utara, dapu tamna mutu kunkameng nesala capdi, kwar kuptu tenena upu, er damai pepmengepa gekepredi, ‘Uo ware kupkamne do?’ tenen, lukdana kwar kupredi, pio yu weik kuprepa, balila deipra beredi, yuk-yuk mutu neitamai ton kunge nesala tep, mar porberedi, nimi weik popredi, gum kupra derinkamre.

45 Ukupkamre taruda, iknapi tamna taleramre ngebo, Siria mutu taleramre Rajada, erdi, nimi weika di konum popbisipre dingeda, er keana taru kuna tep, lyom opkal di dodina tenda atida, ketenepra deipkamre. Ada, keteng dangbaramre tara, ila laut mokon er si Laut Mediterania ortamna, atamna keteng yakan tarada, Allah er mawa mutu, er si eremna tep ati doami mutu, Yerusalem mutuda, akwamngai dinin, daneitamai mutuda, acapu er dodin tenda ati ketenepra deipkamre.

Dinino ataruda, Siria mutu taleramre nimi deiyo ngebo Rajada, er aca dipu depkamre. Ukupkamra deiyoda, yuk mutu nesala yumada, sundi er tep men yana melipkamenge. Yuk nengdi er poptapmengepa, depkamre.

Uda, Malaikat ngebodi ne Daniel tep upepneupa, gekepsi di seksi.