Dan 12 | XteSC | STEP | Danieldi upepu, “Malaikatdi aupu pepneu dingeda, aupu ton dukdongopra pepneu.” “Siria mutu taleamu ngebo konum depyopda, ataru neitamaida, Allah er pel don ngebo malaikat, er si Mikael, jenek kepkamre ja. Mikaelda, sun Israel yala nesala tep melipra kalengrure. Ataruda, Daniel kan pe mutu nesala, sun Israel nesala kalengamre dinin, ataru neitamaida, ila kange mun taru ton yankamre. Angeda, pumun taruda ila kange mun keca ton yakaramu dinin, ange yumada yambul ikin pua. Asirik taru yankamre ngeda, ila ikin weik kupkamre. Menop taru kurami nesaladi dipra, ataru kunung nesala peda, ange utopu ikin keca ton yanamupa, men doroaminge yankamre. Dinino, kan mutu nesala, Israel nesala kankan neitamai di, nimi weik ton Allahdi lyepropkamre ja. Ada, ware nesala do yuma, sun si Allah gam deiyo ngebo, er buku neitamai si sekra deiamre nesala yumada, lyepropkamre.

Daniel 12

Amenda sirya gawal dangne taru kupkamra tep, seku upu

1 Danieldi upepu, “Malaikatdi aupu pepneu dingeda, aupu ton dukdongopra pepneu.”

“Siria mutu taleamu ngebo konum depyopda, ataru neitamaida, Allah er pel don ngebo malaikat, er si Mikael, jenek kepkamre ja. Mikaelda, sun Israel yala nesala tep melipra kalengrure. Ataruda, Daniel kan pe mutu nesala, sun Israel nesala kalengamre dinin, ataru neitamaida, ila kange mun taru ton yankamre. Angeda, pumun taruda ila kange mun keca ton yakaramu dinin, ange yumada yambul ikin pua.

Asirik taru yankamre ngeda, ila ikin weik kupkamre. Menop taru kurami nesaladi dipra, ataru kunung nesala peda, ange utopu ikin keca ton yanamupa, men doroaminge yankamre. Dinino, kan mutu nesala, Israel nesala kankan neitamai di, nimi weik ton Allahdi lyepropkamre ja. Ada, ware nesala do yuma, sun si Allah gam deiyo ngebo, er buku neitamai si sekra deiamre nesala yumada, lyepropkamre.

2 Tonda, ataru neitamai dipapu, nimi weika di konum deamenge neng peda, tamupra gam bukamenge. Ada deamipa, tu paliami nesalada, tu neitamai di gam bukamenge. Gam bukmengedi, ton tara nesalada, pio bol kopta gam kuna deiyo keca doropmengedi, kange di tamupra bukmengedi, gam kepman pio teleppu kunkamenge. Dinino, ton tara nesalada, ila kange mun keca dopropmengedi, ali kunkamenge. Sunda, ila kange mun keca dopropmengedi, uku jen ban kwerepmengedi, mali pepra ngolongmengedi, engenapu pio kunkamenge.

3 Tuai mutu kurami taru neitamai, ila kael kemna deiyonge deiki di kael keamidi, dumsisipu kurami nesalada, sun deikida, im dirine kuramretopu kupra, sun ila dirin deikipu kunkamenge. Tonda, tuai mutu kurami taruda, ton nengdi yuk nesala tep, “Telep kuna ngeda ace, mali kuna ngeda ace,” pepra, konum peteremamipa, sun upu gekeramidi, dumsisi kuna ngepu talepra, kurami nesala weik kurami. Adumsisi keca peterami nesalada, kuru im deiki di laprepa, dirin kuramre utopu neng kungedi, pio gampu kunkamenge.” Malaikatdi ne Daniel tep upepneu.

4 Upepneu dingeda, amalaikatdi ne tep, aupu ton cap upepneu, “Danielo, Allah upu peiprepa sekmarem bukuda, ‘Yuk nengdi epnung’ tenen, ataru dipu singipdongopkurume. Ukupmemdi, ‘Yuk nengdi abuku pakra epnung’ tenen, abuku deikida, peten kemna tep, co pedi deipra denepdongopkamrume. Ukuamempane, siria gawal dangne taru dipapu, ange yumada kupkamre. Akeca-keca yuma, siria gawal dangne taru kepkure pangeda, nimi weika di, ‘Ange kael keptepe, ange ton kael keptepe’ tenen, dana-dana tara mutu yuma, menmena embanapu kupkamenge. Ukupkamenga deiki di, kael kemnange peda pio weik kupbankamre ja.” Malaikatdi upepneu.

5 Menmena taru upu lap peipneu malaikatdi, aupu konum pepra sekpepkopda, ne Danieldi, dipetepsipa, nimi butene neng ton epsi. Tenpu ngeboda, amutu embaramu me, atara pirman tekmaupa epsi. Ton ngeboda, ame damai dinin, ortara pirman tekmaupa epsi. 6 Ame damai atara tekmau ngebodi, tenpu ngebo ton, me pudam tara tekmau ngebo tep, upepu. “Ware taru di, aila kange mun keca kunmarpa epmap nge yumada, jenek kupkamre do?” pepra, asipetepu.

7 Asipetepupa, ton ngeboda, urasin telep opkal, er si lenan opkal kenekmau ngebo, erda ame pudam tara tekmau ngebodi, er buru butene im deiki tara erepra deipudi, upu ton pepu. Ataru ne gekesipa pepu ngeda ake. “Gam deiyo ngebo Allah, pio gam kunkamre ngebo, er si deiki di, tek sisi upu pepkene. Ange epmapenge yumada, tek sisi nong kupkamre ja. Akunmarnge yumada, keteng tamun tiga setengah tahun deiki di kupkamre. Allah er nyapu tep, yu nengdi, sun deiki ikin keca dopra deriramengepanen, podanapu kuramenganen, siria konum kupmengopda, adinmarempa, ila kange mun keca kunmar ngeda, atarupu kupra gawal dakamre,” pepupa gekepsi.

8 Apepunge yumada, tek sisi ne amol deiki di konum gekepsi dinino, aupu nong neitamai deiyo ngeda, ‘E ange deiyo tep penmanere’ tenen, men tenepsidi, betapra men kael kepsi. Atep, nedi tamupra pepsi. “Naio ange yumada, ange yuma kupbaramrepa, siria gawal dakamre taruda, ware keca kuprepa epkamep do?” pepra asipetepsi. 9 Asipetepsipa, angebodi tamupra, ne tep upepneu, “Gume Danielo, kanda, ‘Ange kael keptene’ tenena gume. Aupu nong jenek kupkamre ngeda, men lap pepketene. Deiyoda, aupuda konum singipdongopmana cadi, men kael keptume. Siria gawal dakamre taru dipapu, jenek kupra aupu deiyonge ton, nong katuai kupkamre. Ukutaru neitamaida, men kael kepkamrume. Atep, kan ataru dipu benkurume.

10 Ton tara nesala weika di, sun kurpetena keca kupreya deiki di, mengne kupra teleppu kweipdankamenge. Sunda, pio lengnapu telep kupkamenge. Dinino, yuk nesalada, sunda mali kun kecapu talepra kungedi, malingepu talepra kunkamenge. Atep nengeda, amali kun kecapu kunkameng nesalada, aupu deiyonge betapra men kael kepkamenge. Dinino, ‘Teka’ tenen, ila kael kemna deiyo keca kael keamengedi, dumsisipu kunge nesalada, sun dipapu, akunkamre ngeda, ‘Deiyo ake’ tenen, kael kepkamenge.

11 Dinino, tenpu keca ton lap pepketene. Ada, Allah er si eremna tep, yapi keca popra, tumi-tumi yuma kareryakanung ngeda, mali nengdi akeca yuma gum kupra deipkameng taru cap, tonda pio mali nengdi, ila mali kun keca dopra, Allah er si eremna ati pumbon di, katawai deipkameng taru capda, akeca butene konum kupmenge taru di dipra, ortamnada, denge weik seribu dua ratus sembilan puluh (1.290) tumi ton cap kupbankamre.”

12 “Tonda, Allah erdi pepra deipu upu tep, teka tenepmengedi, tamna gum dipapu, angepu moupra talepmengedi, denge weik, seribu tiga ratus tiga puluh lima (1.335) tumi neitamai di, pio dumsisipu kupkameng nesala tep nengeda, Allahdi sun tep, pio kange deipra kunkamre. Sunda, ‘Ange yuma, dan taru kupkamre do?’ tenen, sun yumadi kalekra dinkameng nesala tep nengeda, Allahdi pio kange deipra kunkamre.

13 Atep ukutaru Daniel kanda, aupupu tamna gum di, aupu pio talepra kuramemyanen, amenda taruda, kan adipapu depkamreme. Dinino, amenda mutu siria gawal dakamre taruda, kanda tamupra gam bukmempa, Allahdi kan tep, menenga telep keca ton karepkerepa, doropkamreme.”

Amalaikatdi ne Daniel tep, ukupra lap pepneu.