Daniel 2

Babel mutu deiyo ngebo Nebukadnezar kene mapu upu

1Babel mutu deiyo ngebo Nebukadnezarda, keteng tamun butene talepra kuramu taruda, tenpu lukunda neitamai di mapmankapudi, kene mapu. Mapu dingeda, er mambul kange doupudi, kange tenimtonapu kupupa, men mapmanto kupu. 2Ila ngebodi akeca kupupa, epu dingeda erdi, ‘Akupmar keca melipra lap pepkamneng’ tenen, er amutara pel don neng tep upeipu. “Akeca-keca yuma ila kael neng bulupra, ne damai yarume,” pepu. Erdi upupu nengda ake.

Ada, asuru kwa neng cap, nimi men kupmanto keca kael keami neng cap, keteng cap war cap, kuru cap, deiyo kael keami neng cap, tonda nimi widongona deiyo keca kael keami neng cap, sun yuma tep upupupa, er damai bulupra wengyai. 3Konum upepu pangeda, sun buprapidi er damai yana teki pangeda, er kene mapmau keca tep pepu. “Ne kene mapmandi, ne dipru buluk sakmanerpa, ‘Ware deiyo di do?’ tenen, mali kange doupra tenimtonapu kunmane,” pepu.

4Upepu pangeda, sun Kasdim mutu nengdi sun pe upu Aram upu deiki di, ila nimi deiyo ngebo tep asipetepi. “Teka nun nai bo, nun putapser ngeda, ‘Kanda pio gam kunkamrem’ tenen, putaserure. Kandi akupmar kecada, kan nyapu gekenmapai di nukmempa, ‘Ware keca deiyo di kupmaker do?’ tenen, moupra tenepetepmepedi, kael kepmepedi, lape pepkukepe,” pepi. Aupu pepi nengda, sun war cap, kuru cap deiyo kael keami nengdi pepi. 5Upepra asipi pangeda, ila nimi deiyo ngebodi tamupra sun keteng cap, war cap, kuru cap deiyo keca kael keami neng tep pepu. “Nedi sun tep konum pepmasunu. Ne kene mapman keca men lap pepnemum pangeda, sun nong yuma popra sekrapsenedi, sun ati yuma urupra tapkamsene.

6Dinin, sundi ne kene mapman keca tep, ‘Deiyoda ake,’ pepra, lap pepnemum pangeda, nedi gispal dopsenedi, kunumna telepnge karepkamsene. Ange tep nengeda, sundi ne kene mapman keca tep, moupra kael kepmumdi aken nongda, ne tep lap pepnerume,” pepu. 7Deiyo ngebodi upepu pangeda, Babel mutu akeca-keca yuma, ila kael keami nengdi tamupra pepi. “Naio, kandi kene mapmarem keca lap pepsemempa, nun kan pel don neng yuma gekepra kael kepmepedi, ‘Deiyoda atepa,’ pepra lap pepkukepe,” pepi.

8Upepipa, ila nimi deiyo ngebodi tamupra pepu. “Sundi tali asimterena utopu petamanerum ngeda, ne konum kael kepmasene. Ada, sun walwal cadi, sundi, ‘Go ton tupa karepsetue’ tenen, penmanerume. Tonda, nedi sun tep tali petamna utopu men pepsene. Ukuda pepmasen utopu kupkamasene. 9Sundi ne kene mapman keca tep, ‘Deiyo ake’ tenen, moupra men kael kepmum dipapu, tali peptapnemum pangeda, ‘Sun nong deiki ikin keca deipkamsene,’ pepmasen utopu, kupkamasene. Tonda, ne konum kael kepmasene.

Ada sundi, ‘Nun deiyo ngebo yu kange tenepmaserdi, pepmasere ngeda, tapsetu’ tenen, tali upu cap, mok upu cap deiki di, kamet utopu penmanerume. Dinino, ne kene mapman keca beta kael kepmumdi, lap pepnemum pangeda, ne peda, ‘E ange tep kupmanu,’ tenepkamane. Upepnemumnyopda, nedi sun tep, ‘Anengda ken mapmana nongda, kael kepra lap pepmanto neng kununge,’ tenepkusene,” Babel mutu nimi deiyo ngebodi pepu.

10Upepu pangeda, sun war cap, kuru cap, deiyo keca kael keami nengdi, sun nimi deiyo ngebo tep tamupra pepi. “Naio kandi pepmaserem ngeda, tuai mutu ban-ban yumada, tenpu ngebo peda, kan pepmaserema utopu keca kael kepra lap pepmanto neng ton men kununge. Pumun taru dordi dipdongopra, ukutaru peda, ila nimi deiyo ngebo Raja puto cap, nimi deiyo talena weik cap peda, ton men kuramidi, kan apepmaseremtopu, ton men kurami. Ada, sun war kuru kael keami neng cap, nimi tep wina neng cap tep, yuk mutu Raja nengdi aupu utopu men perami. Dinino, kandi atarupu aupu pepmasereme.”

11“Nun nai bo kandi tenepra pepmarem ngeda, nun pio kange mun kupsere. Ada nun kangeda, kandi tenpu ngebo peda, kan moropmaserem keca kael kepmanto neng ton pio gume. Pio men dinup keca, Uboda dakurur keca, si eremnup keca dipapu, yana lape pepketenge dinin, akecada nun nimi damai men kununga cadi, men lape pepketenga cadi, nun nimi dipapu men lap pepketepe. Angeda men kupmanto,” pepi.

12Upepi pangeda, Babel mutu ila nimi deiyo ngebo aupu gekepudi, yu weik kupupa, er nong tei pepra tekudi, er amutara pel dorami neng tep pepu. “Babel mutu neitamai kunge ila deiyo keca kael keami neng yuma bulupra deipmumdi, aneng yuma popra gawal dakurume,” pepra deipu. 13Aupu pepupa gekepi dingeda, ‘Ila deiyo keca kael keami neng yumada popkup’ tenen, epra embei. Ataruda, ‘Daniel cap er kayapu weneri neng cap, sun yuma peda, ateng koupra popkamap’ tenen, epra embei.

Kene mapu keca deiyoda, ‘Danieldi lap pepkamre’ tenen, Allahdi katuai kupra deipu upu

14Ataru Danielda, ila kael kemna deiki, kael keamunge deiki di, Raja Nebukadnezar er amutara pel don ngebo, er si Ariok tep, upu bouna di yana pepu. “‘Babel mutu nesala porbenkun’ tenen, keteneipmarema tep nengeda, pio kange moupmem ja,” pepu. 15Danieldi Ariok tep pepu, “Ila nimi deiyo ngebodi ware keca deiyo tep, ‘Ila kael keami neng yuma popkurume,’ pepra puto di pepmaser do?” Upepupa, Ariokdi Daniel tep, amutu ila nimi deiyo ngebo pepmau upu yuma lape pepu.

16Aupu konum pepu pangeda, Danieldi, ‘Ila ngebodi ne tep go karepnerepa, er kene mapu keca lap pepnepa, er kene mapu keca tep, deiyoda ake tenepra, kael kepkur’ tenen, Babel mutu ila nimi deiyo ngebo Raja damai beudi, ‘Go ton karepnetume,’ pepra bena moropu.

17Danieldi bena moropu dingeda, tamupra er pe ati beu. Beu dingeda, Daniel er kayapu Hananya cap, Misael cap, Asarya cap tep, apepmaunge yuma tep lap pepupa, kael kepi. 18Danieldi pepu. “Nun yumadi Allah moropkupe. Nun nai bo Allah im deiki kure ngebo tep moropmepepa, erdi amutu ila nimi deiyo ngebo, ken mapmaudi dinmau ngeda, Allahdi nun dipru tamopseredi, nun kori jenek kupra deipserepa, Raja damai pepkamepe. Tonda, Allahdi sun Babel mutu deiyo neng tep, bicau tenena keca kareptupa, ‘Sundi nun men popkamseng’ tenen, moropkupe. Ukupmepya deiki di, sun Babel mutu war kuru deiyo keca ila kael keami neng cap, nun cap, kikiman men popkamsenga tep pepsene,” pepu.

19Upepupa, gekepidi, Allah moropi pangeda, alukunda neitamai dipapu, Allahdi Daniel tep, ken lunlun deiki di karepupa, ainimna upu yuma jenek kepupa, Danieldi kael kepu. Kael kepu dingeda, Allahda im deiki kure ngebo tep, Danieldi gispal dopu.

20Danieldi Allah tep gispal dopudi aupu pepu.
“Allah kanda pio tep kunkamrem ngebo, telepe pepra si erepkene. Kanda ila kael kemna keca nong neitamainge kael kemna cap, ila puto capda, kanpu kurume.
21Allah kan dipapu ataruda, ‘Ukupkamre’ tenen, ketenemdiserume. Tonda, ‘Ataruda akeca li kupkamre’ tenen, ketenemdiserume.
Kan dipapu pumun taru, deiki tara erepra kuramenge nengda, kwerepra amu keipmemdi, sun yo pununa tep, ukupu neng wepra erepra derirum ngeboda, kan pua.
Tonda, ila kael kemna deiyo keca cap, nong neitamai kael kemna keca karerum ngeboda, Allah kanpu kurume.” Danieldi pepu.
22Upepudi aupu ton pepu. “Allah kandi pio inimna keca cap, nong neitamainge capda, jenek kemdiserume.
Tonda, kunungna neitamai kure keca yumada, kan kael ngebo kurume. Kanda, ila dirin weik ngebo kurume.
23Atep nengeda, nun nai Allah, kanda nun apu yapudi, gispal dopra si eremamkei. Tonda, kandi puto cap, ila kael kemna deiyo keca cap, karepmanerema tep, telepe pepkene.
Nundi moropmakep kecada, kandi konum jenek kupra deipmanereme.
Ada, ila nimi deiyo ngebo ken mapmaunge nongda, konum jenek kupra deipmanerempa, kael kepmana tep, telepe pepkene,” Danieldi pepu.

Babel mutu ila nimi deiyo ngebodi kene mapunge tep, Danieldi jenek pepu upu

24Upepu dingeda, Daniel adipapu ila nimi deiyo ngebo, er amngai pel doromu ngebo Ariok damai beu. Ada, ‘Babel mutu ila di kael keami neng yuma popkamne’ tenen, konum ketenepra kuramu ngebo er kori beu. Beu dingeda, Danieldi pepu. “Kandi, ‘Babel mutu kael keami neng yuma popkaman’ tenen, keteneipmaremada tapkurume. Neda, ila nimi deiyo ngebo er damai benedi, er kene mapudi dipru ikin kupu ngeda, ‘Adeiyo tepa,’ pepra, bena lap pepkuna tep, pepkene,” pepu. 25Upepu pangeda, Ariokdi Daniel doupra, ila nimi deiyo ngebo Nebukadnezar kori debeu. Berei dingeda, aupu pepu. “Gume kene mapmum kecada, ‘Nonge ake,’ pepra lap pepmanto ngeboda, Yehuda yala nesala doupra, amutu duyanamipa kunge nesala kan-kan di, tenpu ngebo konum epmandi doupra, kan damai yane,” Ariokdi pepu.

26Angebodi upepu pangeda, Babel mutu nimi deiyo ngebodi Daniel tep asipetepu. “Kanda Daniel ton sida Beltesazar, kandi kael kepmum ngeda, ne kene mapsi ngeda lap pepnemempa, gekepnedi nonge kael keptene do?” pepra asipetepu. 27Upepu pangeda, Danieldi tamupra nimi deiyo ngebo tep pepu. “Ne nai kandi, ‘Inimna keca lap pepnetume,’ pepmaneremada, ware kupra lap pepketene do? Asuru kwa neng do, war keteng kuru deiyo keca ila kael keami neng do, nimi tep wina neng do, nimi men kupmanto keca pel donung neng do, sun yumadi ange men lap pepketenge.

28Dinino, Allah im deiki kure ngebodi inimna keca yumada, er dipapu talepra kuredi, jenek kemdiserura tep, inimna keca cap, amenda taru kupkamre keca cap tep, er dipapu jenek pepketu. Ukutaruda, ila ngebo Nebukadnezar, kan kael kepkurume. Allahdi ken mana keca karepkeua deiki di, amenda dorkupkamker keca tep, konum lape peipkeue. Atep nengeda, ken mapmumnge cap, tonda ‘Ken do, sisi do?’ tenena deiki epmumnge cap, nongda nedi lape pepkukene.” Danieldi pepu.

29Danieldi ila nimi deiyo ngebo Raja Nebukadnezar tep upepu. “Naio kan mapmamumai di ken mapmamumdi, ken deiki dinmamum ngeda, ada dortaru kupkamrenge tep epmume. Inimna keca nong neitamai jenek lap pena deiyo ngebo Allahdi, dorkupkamrenge tep, kan damai karepkeu dinin, betapra men kael kepmume. 30Neda kan pel don ngebodi. Ainimna upu tep lape pepkukene. Ada, neda ila kael ngebo gume. ‘Neda ila kael ngebo kunune, sun yuk neng yumada, yambul kael neng kununge,’ tenena deiki di men pepkukene. Dinino, ‘Kandi kene mapmumnge nong kael kemna cap, tonda kan dipru neitamai tenerumnge cap, betapra kael kepkurum’ tenen, akeca-keca yuma lap pena deiyo ngebo, Allahdi peipneu ngeda, jenek pepkukene,” Danieldi Nebukadnezar tep pepu.

Danieldi Nebukadnezar ken mapmaua nong lap pepu upu

31Danieldi Nebukadnezar tep pepu. “Ukutaruda, kan ken deiki di kupmaupa epmum kecada, lap pepkukene. Ada tenpu keca ton, nimidi nimi urasin utopu petupra derinung keca, er sida patung epmume. Apatungda, pio kamo telep cap, dirine weik cap, kupra dumsisi erepra tekmau. Erepra tekmaudi bol deiki melang-melang penmaupa, epmuma deiki di kware kupkeue. 32Apatung er giso tarada, gat kunumna weik keca, emas pio telepnge di betami. Tonda, er taram damai cap, buru banai capda, perak di betami. Er mumunai cap, kaelai capda, gat keca er si tembaga di betami.

33Er gutam tamna di dipra, yober yo dam tamna yumada, gat keca besi di betami. Yan asuru di dipra yantang tamna yumada, gat keca besi cap, kerah tu uku di damipa, gat kuamunge cap, tapakra betami. Ange yumada, kandi epmume.
34Uda ne deiyo ngebo, kandi dinmamum taruda, mutu yange gel tenpu nimidi dumna gum dipu, er pedi neitamai dikda pepra, apatung yan tamna besi cap, kerah tu cap, tapakra betaminge kwerepudi, taikra yawa poptapu.
35Ataru dipapu apatung yuma sakapudi, abetami keca, gat keca emas cap, perak cap, kerah tu gatnge cap di, betami keca yumada, dakrap uruptapu.
Uruptapupa, kumanya yaudi, uruptapu keca yumada, pung pepupa, birikra bendopu. Tu kipra yamurtamameng utopu kupudi, sikke buktapu.
Ataruda, dou mapredi, gelal semre beras bol kasbala koptapmengepa, kumanya yaredi doupra baramretopu, ila kumanya puto yaudi, akeca yuma dopra bendopu.
Tenpunge peda ton men tapu. Dinino, apatung popu gelpuda, ila mutu bungamretopu kupudi, mutu ban-ban yuma eleprou.” Danieldi pepu.

36Upepudi aupu ton pepu. “Ange ukupunge, er nongda, ne nai bo kan kene mapmum keca deiyoda, jenek pepkukene. 37Ne nai bo Raja, kanda pio telep nimi deiyo ngebo kurume. Yuk nimi deiyo neng utopu gume. Yuk nimi deiyo neng dakunung dinin, kanda sun yuma talepra deiki tara kurume. Allah im deiki ketekepra deipudi, ikure ngebodi, ne nai kan tep, ‘Amutu yuma talepredi, ila puto cap, ila mambul kuna cap, kamo pio telep kuna cap, kunkamre’ tenen, wepra deipkeupa telep kurume.

38Ukupra deipkeua deiki di, kandi tuai mutu kapu keca yuma cap, nimi denge yuma cap, ma bura tara, gam kure keca yuma cap, akeca-keca yuma cap talepra kurume. Apatung giso emas di betami ngeda, ada ukupmanto tepa. Dinin, er nong tek sisi ngeda, kan tepa.” Danieldi pepu.

39Upepu dingeda, aupu ton pepu. “Dinino nun nai bo, kan talepra kumem mutu yumada, sirya konum gum kupyopda, yuk mutu ila nimi deiyo ngebo ton tekamre dinin, erdi talepra kunkamrenge yumada, yambul weiknge pua. Kanyepuda ila weiknge. Amenda taruda, ila nimi deiyo ngebo weneri ngebo ton tekamre. Aila ngebo, er kamo cap, puto capda, tembaga utopu kupkamre. Er dipapu mutu ban-ban yuma talepra kunkamre. 40Ange konum kupre pangeda, ka di ila nimi deiyo ngebo ton cap dukdongopra dumbari ngebo yankamre ngeda, er putoda ila puto weik gat keca besi utopu kupkamre. Gat besi keca di, akeca-keca yuma taikredi, yawa popra tamaretopu, aila deiyo ngebo, dumbari ngebodi, yuk ila nimi deiyo neng yuma tep, popra bisbisa kapkamre. Yuk mutu-mutu yuma, sun ila nimi deiyo neng tep sikna mi buktapkamre. Ada gat keca besi utopunge, aila nimi deiyo dumbari ngebodi ukupkamra tep pepkene.” Danieldi pepu.

41Upepudi aupu ton pepu. “Tonda ne nai bo kandi dinmamumpa, apatung er yan cap, buru capda, ila gat keca kupu. Ton tarada kerah tu kupmau. Ton tarada, gat keca besi kupmaupa epmume. Aepmum keca nongda ake. Ada, aila nimi deiyo ngebodi talenkamrenge yumada, neitamai di bokra wilipkamre. Angeda, ne nai bo kandi dinmamumpa kunmau kecada, gat keca besi cap, kerah tu cap, tapakra kupupa, epmumtopu kupkamre. Er putoda, besi utopu kupkamre dinin, ton tarada, kerah tu cap tapaki cadi, atamnada puto bounpu kupkamre. 42Ukupupa epmum ngeda, yan dam tarada, yan duda gat keca besi cap, kerah tu cap, tapakra betami utopu, aila nimi deiyo ngebodi talenkamrenge yumada, ton tara puto weik, ton tara puto boun kupkamre.

43Ange utopu ne nai bo, kandi dinmamumpa, gat keca besi cap, kerah tu cap, tapakrap kupmaupa, epmum keca deiyoda ake. Ada, aila nimi deiyo ngebo talenkamre nesalada, tenpu yalapu men talenkamre dinin, nimi yala-yala weik tapakra deipredi, talenkamre. Ukunkamenga tep, tenpu kange doupra men kunkamenge. Ada, gat keca besi cap, kerah tu cap, tapakrap tenpuai deiptereptenge dinin, komopsangamretopu, aneng peda ukunkamenge.” Danieldi pepu.

44Upepu dingeda, aupu ton dukdongopra pepu. “Ataruda, aila deiyo ngebodi mutu ban-ban yuma talenkamre dinin, ataru neitamaida, Allah akeca-keca yuma pio talepra im deiki kure ngebodi, yuk Ila Deiyo Ngebo erepra deipkamre. Angebodi talenkamrenge yumada, er KeRajaan perameng ngeda, pio akapkamre. Er tep nengeda, yuk mutu nesala yumadi talepra, er popra bisbisa men kaptenge. Tonda, erdi talenkamre mutu cap, nesala cap, yuk deiyo nengdi men taleptenge. Aila Deiyo Ngebodi, yuk ila nimi deiyo neng cap, yuk mutu yuma cap, bisbisa kapkamre. Dinino, yuk mutu nengdi er tep, men bisbisa kapkamenge. Erda pio tep, tupa kunkamra tepa.”

45“Naio kandi men taru di kupmaupa epmamum ngeda, nongda jenek pepkene. Ada, ila mutu yangne gel neitamai dikrapudi, dan-dana kepu ngeda, nimi buru deiki di men kupi. Aila gel bongopra saku dingeda, gat keca besi cap, tembaga cap, kerah tu cap, perak cap, emas cap deiki di betami patung yan taikra yawa poptapu. Akupu kecada, Allah er ila puto ngebodi kan tep, ‘Kael kepkamre’ tenen, lap pepkeu. Ada kan ila nimi deiyo ngebo kupkamker keca tep, lap pepkeu. Atep nengeda, kan ken mapmamumdi epmum keca cap, nedi, ‘Nonge ake,’ pepmaken upu capda, pio teka tenepra kael kepkurume. Ada pio tek sisi upupu pepmakena tepa.” Danieldi Babel mutu ila nimi ngebo Nebukadnezar tep pepu.

Ila nimi deiyo ngebodi Daniel tep menenga keca karepu upu

46Danieldi aupu yuma konum pepu pangeda, ila nimi deiyo ngebo Nebukadnezardi, Daniel gispal dona tep, gutam tu dipra genepdongopu. Ukupu dingeda, er amutara pel don neng tep upu peipupa, sundi Daniel tep gispal dopidi, nintong telep pen keca cap, menenga telep keca yuknge cap, dopra yaidi, Daniel tep karepi. 47Karepi dingeda, ila nimi deiyo ngebo Rajadi Daniel tep pepu. “Tek sisi pepne. Kandi si eremrum Allahda, erda akeca-keca yuma deiki tara kuredi, akeca yuma talerure. Erda Allah tenpu kurure. Er dipapu ila nimi deiyo neng yuma talerepa, sunda er amutara kununge. Allah er tenpu inimna keca yuma, jenek kemdina deiyo ngebo kurure. Erda, kan tep katauai kepra peipmakeutopu, kandi konum jenek lap pepmanereme.” Nebukadnezardi Daniel tep pepu.

48Ila nimi deiyo ngebodi Daniel tep, upepra si ereipu dingeda, er tep kange deipudi, er kange pingping keca weika di karepu. Karepu dingeda, ‘Babel mutu yuma ila nimi deiyo ngebo, Gubernur utopu talepra kunkamre’ tenen, erepra deipu. Ada Nebukadnezardi, Daniel tep erepra deipu. Tonda Nebukadnezardi, ‘Danielda, Babel mutu ila kael keami neng yumada, sun deiyo ngebo kunkamre’ tenen, Daniel tep wepra ereipu.

49Ukupu pangeda, Danieldi Babel mutu ila nimi deiyo ngebo tep moropu. “Naio, kan amutara pel dona tep, ‘Babel mutu yuma talepmengedi, melipra pel donkamkeng’ tenen, ne kayapu Sadrak cap, Mesak cap, Abednego cap, sun ton nimi deiyo neng kemna tep erepra deiptume,” pepra moropu. Ange moroputopu, Nebukadnezar gekepudi, aneng weneri ton wepra deipupa, er amutara pel talepra doramidi, ila neng kurami. Daniel er tenpuda, Babel mutu ila nimi deiyo ngebo kuramu ati, ila ati pumbon mambul pel talepra, Babel ila nimi deiyo ngebo Nebukadnezar er damai kuramu.