Daniel 3

Patung emas di betaminge cap, ila uku bu jenmaunge cap tep, pepu upu

1Uda, Babel mutu ila nimi deiyo ngebo Nebukadnezardi, tenpu patung ton emas keca di betapra deipu. Akeca er lyomda, dua puluh tujuh (27) meter, er palada, enam (6) meter deiki kunupra deipudi betapu. Akeca betapra deipu mutuda, Propinsi Babel mutu neitamai dinin, mutu si Dura mutu banai ketenepra deipu. 2– 3Ukupu dingeda, Babel mutu ila nimi ngebo Raja Nebukadnezardi, “Ukutarada, ne amutara mambul pel dorum neng yuma bulupkurume,” pepu. Ada, ‘Ila nimi deiyo neng yuma bulupra yankurume,’ pepu neng yumada ake.

Ada, Raja er yala neng cap, Gubenur neng yuma cap, Bupati neng yuma cap, Raja ngebo tep, ‘Ukupkurum, angepu kupkurum’ pena deiyo neng cap, Raja er co bo cap, bung keca cap derina deiyo neng cap, mali kupmengepa upu bongdina deiyo neng cap, wenemna deiyo keca, ila kael keami neng cap, tonda sun amutara deiyo neng yuma cap tep, upupupa yan bulupi. Bulupra yaiya deiyoda, nimi deiyo ngebo Nebukadnezardi, ila patung ketekeiamunge si ereipkamaiya tep, yuma bulupra yai. Yaidi apatung urasin damaipu ketenepra teki.

4Konum teki pangeda, ila nimi deiyo ngebo Raja, er melimna ngebo tenpu ila upu di pepu. “Ne kayapu mutu-mutu yuma dakumumdi, upu yuk-yuk pemumdi, yala yuk-yuk kumum nesala yumada, nun ila nimi deiyo ngebodi peipmaser upuda, moupra gekepkurume. 5Ukupkamepa tep, ataruda bung-bung pena keca, sun si terompet cap, suling cap, kecapi cap, uda bung-bung pena yuk yala-yala yuma cap, peten kemna tep, lelim weika di pengopda, nun yumadi, apatung keca tep gispal dopkamepe.

Ada sun yumadi, ila nimi deiyo ngebo Nebukadnezardi betapra deipu patung si eremna tep, urasin amupra tu deiki mapmepedi, apatung si erepkamepe. 6Tonda ware ngebo do, apepmap upu bouna di men gekepredi, apepmaptopu akeca tep gispal men dopre ngeboda, adipapu ateng kouprapmepedi, erda ila uku bu jenmarya neitamaipu dongopkamepe.

7Ange tep nengeda, bung-bung pena yala-yala yumadi, ila lelim pei pangeda, sun amutu-mutu yuma kunmai nesala cap, upu yuk-yuk penmai nesala cap, yala yuk-yuk kunmai nesala yuma capda, ila nimi deiyo ngebo Nebukadnezardi betapra deipu patung si eremna tep, urasin amupra tu deiki mapra, apatung si erepi.

Daniel cap, er kayapu weneri neng cap, sundi ila nimi deiyo ngebo er upu yaniptapi upu

8Ataruda, Babel mutu kurami neng dinin, ton tamna nengda, ‘Yahudi yala nengda, mali kununge’ tenen, kalekra dirami nengda, ataruda sun akunmai. 9Anengdi sun deiyo ngebo Raja Nebukadnezar, er gispal dona tep upepi. “Nun putaser ngeda, tupa gam pio kumemdi, talepkamserume,” pepi. 10Nun nai bo Raja kandi, ‘Ange ukupkurume,’ pepra deipmaserem upuda ake. ‘Nimi-nimi yumadi bung-bung pena yala-yala yuma pung pepmengepa, lelim gekepmengopda, sun yumadi, adipapu emas di betapra deipmasen patung, er gispal dona tep, urasin amupra tu deiki mapra, si erepra dopkamrume,’ pepra deipsemume.

11Ange utopu, ‘Ware ngebo do, akeca tep, si erepra gispal men dopre ngeboda, adipapu ateng koupra ila uku bu jenmarya kan-kanpu dongopkamrume,’ peiamsemume. 12Upepra deipsemum dinin, sun Yahudi yala neng weneri puda, nun nai bo Babel mutu yuma talepsemum ngebodi, ‘Ukupkamrume,’ peipmamum upu tep, ‘Dakwapye’ tenen, men gekepmange. Aneng sida, Sadrak, Mesak, Abednego cap sun yumada, kandi peipsemum upu yanipra tapmange. Ada sun anengda, kandi si eremrum ubo keca cap, tonda patung emas keteneipmum keca cap tep, ‘Akecada nun songe. Akeca si men ereipkup’ tenen, yaniptapmange.

13Upepipa, ila nimi deiyo ngebo Nebukadnezardi, aupu gekepu dingeda, aneng tep ila yu kupupa, “Aweneri neng Sadrak cap, Mesak cap, Abednego capda, ne damai duyarume,” pepu. Upepu pangeda, sun aweneri neng yuma tomopra, ila nimi deiyo ngebo er damai duyai. 14Duyai pangeda, ila nimi deiyo ngebo Nebukadnezardi pepu. “Ware keca deiyo tep kupmarum do?” pepra, asipetepu. “Uo, Sadrak cap, Mesak cap, Abednego cap, sun yumada ubo keca cap, ila patung emasnge betapra deipman nge cap, sun si eremna taruda, sun ton men gispal dopmarumdi, men si erepmarum ngeda, ware keca deiyo tep do?

15Ukutaruda, sundi akeca gispal dona tep, ketenepmarum do? Bung-bung pena yala-yala yumadi, ila lelim pepre pangeda, sun yumadi akeca gispal dona tep, konum keteneipmarum do? Keteneipmarumdi, akeca tep gispal doprumnyopda, telep pua. Dinin sundi, ‘Akeca nun men si ereipkupe,’ tenepmumdi, men gispal dopmumnyopda, sun ateng koupra ila uku bu jenmarya neitamai dongopkamsene. Uku bu jenmarya neitamai dongopkamsen taruda, ware ubo keca ton akuramtuadi, yan lyepropsetu do? Pio gume.” Nebukadnezardi Daniel cap, er kayapu sun weneri neng cap tep pepu.

16Uda, aupu pepu taruda, Sadrak, Mesak, Abednego cap, sundi ila nimi deiyo ngebo Nebukadnezar tep, tamupra pepi. “Nun nai bo Rajao, nun pedipapu men makupdatepe. Apepmaserem upuda, nun pedi men upu sekdatepe,” pepi. 17Upepi dingeda, aupu ton pepi. “Nun kaele, nun talepra si eremnup Allahda, nun cap kunupa tep, ila uku bu neitamai dongopsememya peda, Allahdi lyepra deipkamsere. Atep, nun nai bo kandi, ‘Ukupkune,’ tenepsememnyopda, telepe dakupseo,” pepi.

18“Dinino, nundi apepmakep upu, nun si eremnup ngebo, Allah men gekepserya peda, nun deiyo ngebo Raja kan pepmarem upuda, nundi gekeprap, ubo keca cap, patung emasnge betapra deipmumnge cap, men si eremkamepe.” Daniel cap, er kayapu neng weneri capdi pepi.

‘Daniel cap, er kayapu neng weneri cap, popkune’ tenen, kupu upu

19Upepi pangeda, ila nimi deiyo ngebo Nebukadnezar, yu weik kupupa, Sadrak, Mesak, Abednego cap tep, er urasin kamo yapi bi weik kupu. Ukupua tep, erdi er amutara neng tep, pepu. “Uku bu yambula di jere utopu gum dinin, ton cap tapakra uku sekmumpa, ila uku bu jeredi ila bupu kupkurure,” pepu. 20Upepu dingeda, erdi er jen talen neng, puto weik neng tep pepu. “Sundi Sadrak, Mesak, Abednego cap, puto di talepdongopra ateng koupmumdi, ila uku bu jenmaryai dongopkurume,” pepu.

21Upepu pangeda, aweneri neng ateng koupi. Ukupra koupi taruda, aneng sun opkale celana cap, giso gwetena cap, deiki kenengami lyom opkal cap, men kuriptapi. Akepmaitopu ateng koupra, ila uku bu jenmaua neitamai dongopi.

22Ange tep nengeda, ila deiyo ngebo er upu puto di, “Ukupso,” pepmau tep, ukuda weika di sekmaipa, bupu pio weika di kunmaua cadi, Sadrak, Mesak, Abednego cap tomopra, ‘Auku bu jenmauai dongombenkup’ tenen, dubei nengda, bupu di depi. 23Atarupu dinin, sun aweneri neng, Sadrak, Mesak, Abednego cap, atapu koupdongopmai utopu, itara di dokotepipa sakapidi, ila uku bu jenmaua neitamai dourbei.

24Ukupi taruda, dato-dato di, ila nimi deiyo ngebo Nebukadnezar epudi lukdau. Lukdau dingeda, menmena bukroudi, er pel don neng tep ila upu di pepu. “Gume weneri nengpu ateng koupra, ila uku bu kan-kan dongopmapu neng apu do?” pepu. Upepu pangeda, sundi tamupra ila nimi deiyo ngebo tep pepi, “Naio tek pepmareme,” pepi. 25Upepipa, ila nimi deiyo ngebodi, “Weneri nengpu dongopmape,” upepmasi dinin, “Ila uku bu jenmaua neitamaida, dinmanpa, nimi dumbari embandanmangpa, epmane. Adumbari neng yumada, sun tapu koup dongopmapu ngeda gum kupmare. Tonda, sun nong bol deikida, uku dila pe, ton pio men kupmare. Dumbari ngeboda, ubo keca utopu dinin, er kamoda, malaikat utopu kunmarpa epmane,” pepu.

26Ataru Nebukadnezar, ila uku bu jenmaua buplan damai teku. Teku dingeda, erdi aupu pepu. “Sadrak, Mesak, Abednego cap, sunda Allah eremna ngebo, er pel don neng kuruma cadi, ila uku bu jenmara kan-kan neitamai di gupra yamumdi, embandaso,” pepu. Upepu pangeda, Sadrak, Mesak, Abednego cap, ila uku bu jenmauai di gupro yai.

27Upepupa, aneng gupra yai pangeda, angebo er amutara Gubenur neng yuma cap, Bupati neng yuma cap, Raja ngebo tep, ‘Ukupkurum, angepu kupkurum’ pena deiyo neng cap, er pel don neng pegawai neng yuma bulupra yaidi, ongopdongopra aweneri neng tep dinmai. Dinmaipa, aweneri neng sun nong pe, giso potong pe, sun deiki lyom okpal kenekmainge pe ayumada, tenpu ton uku men jepu. Opkale peda, yuk utopu ton men kupu. Uku nintong peda, ton men pepu.

28Ukupu pangeda, Raja Nebukadnezardi pepu. “Sadrak, Mesak, Abednego cap, sundi si eremnung Allah tep, telepe pepra gispal dopne. Sundi si eremnung Allahdi, er malaikat dokotepmarpa, er pel don neng Sadrak, Mesak, Abednego cap lyepmara tep, kael kepne. Sunda ne pepsi upu yanipneidi, sun tenepmaiada, ‘Nun popsetenga peda, telepe pua. Ada nun si eremnup Allahdi lyepropkamsera tepa,’ tenepi. Utenepiya tep, ne upu yaniptapra, sun Allah tepapu pio teka tenepi.

29Ange tep nengeda, nedi pepnepa, mutu ban-ban yuma dakungedi, upu yuk-yuk penge nesala yuma cap, tonda ware yala nesala do yuma peda, Sadrak, Mesak, Abednego cap, sundi si eremnung Allah tep, mali upu peprumnyopda, nedi peipnepa, ne amutara jen nengdi, sundi mali upu pepkamrum nesala tep popsengedi, nongeda sesekra tapkamsenge. Tonda, sun ati urupra tapkamsenge. Ada, yuk nengdi si eremnunge keca di, aweneri neng wenemna tep, uku bu neitamai donokmanpa, lyepropmar utopu Allah ton, pio men kurure. Atep nengeda, nun yumadi, sun si eremnung Allah, er si tep, mali upu pio men penkamepe,” Babel mutu ila nimi deiyo ngebo Nebukadnezardi pepu.

30Aupu yuma konum pepu dingeda, Sadrak, Mesak, Abednego cap, ‘Namutara, Babel mutu neitamai mambul pel talepra, ila nimi deiyo neng kunkameng’ tenen, aweneri neng erepra deipu.