Dan 4 | XteSC | STEP | Babel mutu ila nimi deiyo ngebo, Raja Nebukadnezardi, ken u butene mapunge tep seku upuda ake. “Ne Raja Nebukadnezardi, ban-ban yuma kurumu nesala cap, kurumu nimi yala-yala yuma cap, tonda sun upu yuk-yuk perumu nesala, sun yuma cap tep, aupu pepsene. Ne putapnere ngeda, sun yuma telep dipapu pio weik kupbankamrume. Tonda, sun kunkamrum keca yuma, teleppu kunkamsera tep, telepe pepsene.

Daniel 4

Babel ila nimi deiyo ngebo Nebukadnezardi ken mapunge tep, pepu upu

1 Babel mutu ila nimi deiyo ngebo, Raja Nebukadnezardi, ken u butene mapunge tep seku upuda ake.

“Ne Raja Nebukadnezardi, ban-ban yuma kurumu nesala cap, kurumu nimi yala-yala yuma cap, tonda sun upu yuk-yuk perumu nesala, sun yuma cap tep, aupu pepsene. Ne putapnere ngeda, sun yuma telep dipapu pio weik kupbankamrume. Tonda, sun kunkamrum keca yuma, teleppu kunkamsera tep, telepe pepsene. 2 Apepkusen ngeda, akeca-keca yuma deiki tara, ila puto weik ngebo Allahdi, ne kori nimi pio men kepmantonge peipmanernge cap, tonda peten kemdinange cap, ne damai kupmanerpa epman ngeda, sun damai nukeipkusene.”

3 “Allahdi er peten kemdin keca kareser ngeda, ila mambule. Tonda, erdi nimi men kupmantonge kusere ngeda, ila mambule. Allah erda, nimi yuma deiyo ngebo pio tep, gam tupa kunkamre. Allahdi akeca-keca yuma talepra kuryada, pio tep akunkamre. Ataru-ataru yuma men gum kupkamre.

4 Ne Nebukadnezarda, ne pe atipu kange deipra pio telep kuramsi taruda, ne taleamsi keca yuma cap, pel doramsinge yuma capda, teleppu kuramneu. 5 Tenpu lukunda ton mapmasa deiki ken mapsipa, jenek kepupa epsinge tep, pio ila kange mun kupneupa, kwar dasi. 6 Ukupsi dingeda, nedi kene mapmasinge tep, nungdina ila kael neng, Babel mutu kuramya tep, ne amutara neng tep peipsipa, diman perbei. Ada, ‘Sun yuma yamumdi, ne ken mapman ngeda nonge yan lap pepneso,’ pepra deipsipa perbei.”

7 “Upupsipa, isok puto deiki kunupsek pena neng cap, keteng, war, kuru deiyo keca ila kael keami neng cap, amenda kupkamre keca lap pena neng cap, asuru kwa neng cap upupsipa, sun yuma ne damai yai neng yumada, ne ken mapmasinge, sun damai nukra deipsi. Nukra deipsidi sun tep, upepsi. ‘Ne ken deiki mapmasidi epmasi ngeda, ange epsi, ange ton epsi,’ pepra lapsi dinin, sun anengdi tenpu ngebo peda, aken mapmasinge nonge men jenek pepnei. 8 Men jenek pepnei pangeda, siryada Daniel er si ton Beltesazar, ne kori yaupa, ne ken mapmasinge, er damai lap pepsi. Daniel er si Beltesazarda, ne si eremne ubo keca si utopunge, er tep asi karepsi. Angebo Danielda, sambala leknge ^{▼▼Leknge pepkada, ada ‘Kurun sambala,’ tenena gume. Deiyoda, ‘Mali keca tenpunge peda men kurure’ tenen, ‘Lek’ pepke. Indonesia upu deiki di, ‘Suci’ penunge.} er deiki yaudi, er dipruai dinipupa, ila kael ngebo kurure.”

9 Angebo upupsipa yau pangeda, nedi er tep pepsi. “Beltesazar kanda nimi ila kael kemna deiyo ngebo kurume. Atep kanda ne kaele. Tek sisi sambala, tek sisingedi kan dipru neitamai pel dopkerepa, inimnange yuma jenek kupra lap perume. Inimnange ikin weik kuptua peda, kanda ikin men kupketue. Ange yuma lap pepsetume. Atep nengeda, ne ken mapsi kecada lap pepkenepa, kandi, ‘Nonge ake,’ pepra, jenek pepkunerume.”

10 Ken mapmasidi dinmasipa, tuai mutu neitamai di sipen co ton tekamo. Acoda ila lyom co tekamo. 11 Acoda, pio ila co ne amu. Ukuamudi er lyomda, im deiki bena belepra tekamupa, mutu sirik, im sirik nimi ban-ban yumadi dirami. 12 Ukuamudi, aco boda, pio sukup-sukup pepra bongoramudi, er duda pio weik mouramu. Ukuramupa, nimi yuma aco dupu jeramidi gam kurami. Tonda, aco tekamnga amngaida, katuai mutu kurami gam keca yumada, aco bamu kawai wengyakarami. Tonda, ma yala-yala yuma, aco teru deiki sun ati dorami. Tonda aco duda, bura tara gam kunge keca yumada, acapu jeryakarami.

13 Tonda amapmasidi, ken lulun dinmasipa, Allah er pel don ngebo malaikat, im deiki di kwerepupa epsi. Amalaikatda, diman upu pena ngebo cadi, moupra kalekra dina ngebo kuramupa epsi. 14 Kwerepudi, ila upu di yan pepu. “Acoda kwepmemdi, teru-teru yuma sesekra tapkamrume. Ukupmemdi bo yuma, kan buru di kupra tapkurume. Tonda du yumada, dakra bokeipkurume. Ukupmem dingeda, ma yuma aco teru deiki, ati donge nge cap, aco dam kunge bura gam kunge keca cap ayumada, enepromempa yukai bendopkamenge.

15 Dinino, aco gongapuda, tapmempa er tekamu tuai apu kupredi, er yaten pio atu pumbonpu akapkurure. Ukupre pangeda, gat tapu besi cap, tembaga cap di, betamengenge dopra, yan koupdongopkurume. Ukupra tapmempa, mutmuta di kepdongopkurure. Ukupredi mo puru, er nong deiki sangrepa, mutmuta cap, tali gam kuramre keca cap, sun tonpa gam kunkamenge. 16 Atekamu lyom coda, ila nimi deiyo ngebo kurure. Ataruda, nimi dourameng kangeda men doupkamre dinin, tali kurameng keca kange doupra kunkamre taru yumada, keteng tamun yoneitam bari mapkamre.

17 Apepmep ngeda, Allah er pel don neng malailat, nun dumsisi lek kunup neng yuma bupra, upu talepmepudi, pepmepunge pepmepe. Atep nengeda, nimi gam kunkameng nesala ban-ban yumadi, ‘Tek sisi Allah akeca-keca deiki tara kure ngebo dipapu, nun yuma talepkamsere’ tenen, kael kepkamenge. Tonda, Allah erdi teneretopu, tuai mutu ila nimi deiyo neng kemna tep, ‘Angebodi talepkamre’ tenen, wepra deiprepa talenunge. Tonda, Allahdi, ‘Angebo tali kankan ngebo kurure dinin, ereipkun,’ tenepredi, eremdirure. Nebukadnezardi pepu.

18 Upepudi, Daniel tep pepu. “Atep Beltesazar, neda Nebukadnezardi, ken mapmasidi epsi keca konum lap pepkene. Atep, kandi ukutaru ne ken mapman nge nongeda, lap pepneo. Ada, ne Babel mutu neitamai ila kael keamidi kunge neng yumada, jenek men lap pepnetenge. Dinino, sambala lek ngeda, kan dipru neitamai kukerura tep, ne ken mapsi keca, jenek kupra pepnetume. Atep lap pepneo,” Nebukadnezardi Daniel tep pepu.

Danieldi Nebukadnezar ken mapunge tep, lap pepu upu

19 Ange nukupa, Daniel er si Beltesazar, er ton konum gekepu. Gekepudi, apepmau ngeda, kange mun nge cadi, kware kupu. Ukupupa, animi deiyo ngebodi Beltesazar tep pepu. “Ne ken mapmasinge, nonge lap pena tep, kanda dipru buluksaka kware kuna gume,” pepu.

Upepupa, Beltesazardi tamupra pepu, “Naio. Uo, aken mapmaremnge, kan mar podan neng deiki kupkatunge tep, mapmatumtoda, ada telep dinin, kan pe tepapu ken maipdanmareme. Atep kange mun kupkamkere. 20 Aco epmum ngeda, pio ila co ne amu ukuamudi er lyomda im deiki bena belepra tekamupa, mutu sirik, im sirik nimi ban-ban yumadi dirami,” pepu.

21 “Ukuamudi aco bo douramngada, pio sukup-sukup peramudi, er duda pio weik mouramu. Ukuramupa nimi cap, bura tara gam kun keca cap yuma, aco dupu jeramidi gam kurami. Tonda, aco tekamnga amngaida, katuai mutu kurami gam keca yumada, aco bamu kawai wengyakarami. Tonda, ma yala-yala yuma, aco teru deiki sun ati dorami. 22 Ne ila deiyo ngebo, kanda ken mapmuma deiki aila co nongeda, kan pe ca. Ken mapmuma deiki ila co lyom kupupa, nesala ban-ban yumadi, diramya utopu nongeda, kan tenpu ila ngebo kumemdi, kan talemem kecada, im sirik mutu sirik kurure.”

23 “Tonda ne deiyo ngebo, kandi dinmamumpa, malaikat im deiki di kwerepra yau ngebo, ila upu di pepkeu. Amalaikatdi upepu. ‘Acoda kwepmemdi, aco gongapuda tapmempa, er tekamu tuai apu kupredi, er yaten pio atu pumbon akupkurure. Ukupre pangeda, gat tapu besi cap, tembaga cap di, betaminge dopra, yan koupdongopkurume. Ukupra tapmempa, mutmuta di kepdongokurure. Ukupredi mo puru, er nong deiki sangrepa mutmuta cap, tali gam kuramre keca cap, sun tonpa gam kunkamenge. Keteng tamunda, yoneitam bari deiki (7 tahun) kupkamre.’ Malaikatdi upeipkeue,” Danieldi pepu.

24 Aupu pepu dingeda, Danieldi Nebukadnezar tep, aupu ton pepu.

Aken lulun mapmumdi, epmumnge nongeda pepkune. Ada, ne deiyo ngebo, kan pe tepapu Allah akeca-keca deiki tara, ila puto kuredi, im deiki kure ngebodi peipkeupa epmume. 25 Allahdi peprepa ukupkamkere. Ada, Naio, kanda nimi kungai di enepra bura tara donokengepa kunkamreme. Ukupkengepa, tali gam kuramre keca cap, sun cap, tonpa gam kunkamrume. Ataruda, sapi bisam mutmuta jeramengtopu, kan peda angepu jenkamrume.

Ukupra kunkamrem taru yumada, keteng tamun yoneitam bari (7) mapkamreme. Ukupkamrema deiki di, ‘Tek sisi Allah akeca-keca deiki tara kure ngebo dipapu, nimi yuma talepkamsere. Tonda, Allah erdi teneretopu, tuai mutu ila nimi deiyo neng kemna tep, angebodi talepkamre’ tenen, wepra deiprepa talenunge. Allahdi ikin keca deipkamkera deiyoda, arup pepmaken keca, ‘Kael kepkamre’ tenen, kupkamakere.

26 Tonda malaikatdi, “Co kwepmumdi, gonga tapmumpa, tuai apu kupkurure,” pepu ngeda, ake. Ne deiyo ngebo, kan konum keteng tamun yoneitam bari mapmemdi, ‘Tek sisi ila puto ngeboda, Allah erpu kuredi, mutu ban-ban yuma talerure,’ tenepmem pangeda, kange di tamupra melipkerepa, kan adipapu nimi deiyo ngebo kepra kunkamrema tep, epmume. 27 Atep nengeda, Ne deiyo ngebo, kandi ne pepne upu gekepneo. Ukupmemdi, nimi kankan kunge neng tep, sun damai telep kupra pel dopmemdi, sun tep neitam wilipra derinkamreme. Ange kupmem pangeda, Allahdi kan tep pio kange derinkamker dinin, nedi peipkesi upu lupromemdi, ange men kupmemnyopda, tamupra kange mun kupkamkere. Danieldi ila deiyo ngebo Nebukadnezar tep pepu.

Nebukadnezardi ken mapunge nong kepka tep, Allah si erepu upu

28 Danieldi lap pepunge yumada, ila nimi deiyo ngebo Raja Nebukadnezar tep kupu. 29 Amol dam di utara war (12) konum kupu pangeda, Nebukadnezardi er kuramu ati damai, Babel mutu domi alau ati welepra dipembanmau. 30 Ukunmaudi pepu. “Babel mutu ila adum dopi ngeda, ne puto deiki di dopsie. Ukupsipa ne si cap, ne puto cap tepapu, pio si eremnenunge. Nimi ban-ban yumadi ne tep, ‘Erda ila mambul ngebo,’ penenunge.” Ila nimi deiyo ngebo Nebukadnezardi pepu.

31 Apenmau upu kapul men gawal dakupapu, im deiki di nimi upu utopu upu yan pepu. “Nimi deiyo ngebo Nebukadnezar, kan moupra gekepo. Amutu talepmum ngeda, ila puto ngebodi dopropkamre. Ukupkamker ngeda, konum tenepka tep, upu men sekmanto. Tek sisi kupkamkere,” pepu. 32 “Kanda nimi kungai di enepra, bura tara donokengepa kunkamreme. Ukupkenge pangeda, tali gam kuramre keca cap, sun tonpa gam kunkamrume. Ataruda, sapi bisam mutmuta jeramengtopu, kan peda angepu jenkamrume. Ukupra kunkamrem taru yumada, keteng tamun yoneitam bari (7) mapkamreme.

Ukupkamrema deiki di, tek sisi Allah, akeca-keca deiki tara kure ngebo dipapu, nimi yuma talepkamsere. Tonda, Allah erdi teneretopu, tuai mutu ila nimi deiyo neng kemna tep, ‘Angebodi talepkamre’ tenen, wepra deiprepa talenunge. Allahdi ikin keca deipkamkera deiyoda, arup pepmaken keca, ‘Kael kepkamre’ tenen, kupkamakere,” pepu.

33 Ataru dipapu apeputopu kupu. Nebukadnezar tep, nesala yumadi eneproipa, sapi bisam kan-kan beupa, sun tonpa mutmuta jerami. Ukurami taruda, mo puru di er nong deiki sangamupa, er giso potong lyomda, mul damnge ma deiamu potong kuramre utopu kuamu. Tonda, er buru galada, mul damnge ma yan gala utopu kwamu.

34 Apeiamutopu, keteng tamun yoneitam bari konum mapu dingeda, Nebukadnezardi Allah tep moropupa, er kangeda, nimi kange douramenga utopunge, tamupra karepupa doupu. Doupudi, Allah tep moropudi upepu.

“Uo, ne nai Allah, kandi telep kael kemnange karepmanereme. Ukupmanerema tep, nedi kan gam pio kunkamrem ngebo, kan sipu erepkenedi, kan tepapu gudinkamkene. Ne nai Allah, kanda ila nimi deiyo ngebo Raja kumemdi, talepmum keca yumada, pio tep tupa akapkamre. Kan peda pio tep kunkamreme. Ange yumada, pio men gum kupkamre.

35 Nimi tuai mutu kunup nesala yumada, ila mambul neng ton men kunupe. Gume, kan puto utopu neng ton gume. Allah kan dipapu, kan pel don neng malailat talepmumnge pe, tonda nesala tuai mutu yuma talepmumnge peda, kan tenememtopu kurume. Atep nengeda, ware ngebodi ton, kan puto yanipketu do? Tonda, ware ngebodi wenemna utopu, kan kupmemnge tep, ‘Kanda ware keca deiyo tep kupmarem do?’ pepra, asipetepketudi wenepketu do? Pio gume.” Nebukadnezardi pepu.

36 Upepudi aupu ton pepu. “Ne nimi kange dourameng utopu kange karepneupa, doupsi taruda, ila nimi deiyo ngebo keamsipa, gudiramneiya deiyonge cap, tonda ne ila nimi deiyo ngebo keamsipa, mambul ngebo tenen, si eremamneiya deiyo keca cap, Allahdi tamupra karepneu. Karepneu pangeda, ne amutara ila neng pel doramnei neng cap, melipra ‘Ukupkurum, ukupkurum,’ pepra peramnei neng cap, adeiyo yuk-yuk tara talerami neng cap, anengdi, ‘Angebo tamupra doropkamep’ tenen, ne tep eramnei. Eramneiyane, konum epnei dingeda, sundi ne tep, ‘Ila nimi deiyo ngebo Raja kunkamsere’ tenen, tamupra erepra deipnei. Ukupneipa, pumun taruda, yambulto deiyo ngebo kuramsi dinin, ukutaruda, pio ila eremna deiyo ngebo kunune.”

37 “Ange tep nengeda, ukutaruda ne Nebukadnezardi, im deiki kure ila nimi deiyo ngebo Rajada, Allah er tenpu. Er sipu eremnedi gudinkamne. Ada mesum tep gume. Er pel dorenge yuma cap, er kure keca yuma cap, pio tek sisi dumsisingepu kurura tepa. Tonda, nimi dipru ereipmengedi, gemenung nesala tep nengeda, Allah erdi amu kemdirure,” Nebukadnezardi pepu.