Dan 5 | XteSC | STEP | Tenpu taruda, Babel mutu ila nimi deiyo ngebo Nebukadnezar taleamupane, erdi deipu mi Belsyasar er yo punupu. Ukupudi Babel mutu ila nimi deiyo ngebo kuramu. Belsiasardi me jena tep ila taru kepupa, “Nimi denge weik seribu (1.000) neng buluprapmumdi, ne damai yarume,” pepu. Upepupa, er damai yai. Yai dingeda, anggur me kange yawaramne me pio weika di jenmai.

Daniel 5

Allahdi dela deiki sekeipunge tep, pepu upu

1 Tenpu taruda, Babel mutu ila nimi deiyo ngebo Nebukadnezar taleamupane, erdi deipu mi Belsyasar er yo punupu. Ukupudi Babel mutu ila nimi deiyo ngebo kuramu. Belsiasardi me jena tep ila taru kepupa, “Nimi denge weik seribu (1.000) neng buluprapmumdi, ne damai yarume,” pepu. Upepupa, er damai yai. Yai dingeda, anggur me kange yawaramne me pio weika di jenmai.

2 Ame jenmai taru dipapu, Belsiasardi peipupa, kunumna weik keca emas di ketenepra deiami mangkok cap, perak mangkok cap, Yerusalem mutu neitamai Israel nengdi, Allah er si eremami ati pumbon deiamipane, Belsiasar er nai bo Raja Nebukadnezardi doupra yanamu ngeda, Belsiasardi, “Ange yuma doupra duyaneso. Ada, ne Raja ngebo cap, ne amutara nimi deiyo neng cap, nun nerapu cap, nun kikiman kunmap nesala cap, akati pumbon deiami keca dopra duyarumupa, anggur me amau di gwepra jenkamepe,” pepu.

3 Upepupa, Israel nesaladi Allah er si eremna ati pumbon deiami keca, emas mangkok cap, perak mangkok cap, duyai. Akeca yana duyai pangeda, Raja Belsyasar cap, er amutara pel don neng ila neng cap, sun nerapu cap, sun yumada, ame mau di anggur me gwepra tonpa jenmai. 4 Sun yuma kange yawaramamre me, anggur me jenmai taru dipapu, mut peprapidi, sun isok-isok si eremna tep betapra deiami keca, gat keca emas cap, perak cap, tembaga cap, co cap, gil cap deiki di betaimami keca tep si eremai.

5 Ataru dipapu, dato-dato di nimi buru utopu deiki di, ila ngebo er bungamudi diramu dela taramaida, upna dirine kupmauaida, nimi buru di yan talepra seku ngeda, nimi deiyo ngebodi katuaipu epu. 6 Asengna keca epu dingeda, nimi deiyo ngebo dupdup pepudi kumkum kupu. Er urasin kamo yuk kupudi, er kange wang-wang peptopudi, dipru ikin kupudi, gutam dam cap, kail yo damai cap, buma teleng pepra moropsepu.

7 Ukupu pangeda, ila nimi deiyo ngebo upu puto di pepu. “Kasdim mutu neng, ada keteng, war, kuru ila kael kemna neng cap, amenda kupkamre keca lap pena deiyo neng cap, isok puto deiki kunupsek pen pel donung neng cap, upupmumpa ne damai bupra yankununge,” pepu. Upepupa, sun aneng yuma bulupra yai pangeda, nimi deiyo ngebodi, sun aneng yuma tep pepu. “Sundi asekmarnge nukmumdi, er nonge pepkamanerume. Ware ngebodi, ‘Deiyo atepa,’ tenepredi, ne kael kemna tep lap pepkamaner ngeboda, nedi er gispal dona tep, menenga keca pio telep opkal lyomnge cap, kweirya keca kum koudongonange garangna keca, emasnge cap karepkamne. Karepnedi, ila ngebo kemna tep, angebo erepra deipkamane. Ne nimi deiyo ngebo kunya utopu, ne amutara deiyo ngebo dutara weneri ngebo kunkamra tep, erepra deipkamne. Ada ne amutara dinin, ila ngebo weneri ngebo kunkamre,” pepu.

8 Raja Belsyasardi aupu pepu dinin, aila kael neng yuma peda, er tep “Deiyoda ake-ake,” pen ngebo tenpu pe ton men kupi. Asurat sengna keca epra nuknedi, “Deiyoda atepa,” pepra, ila deiyo ngebo tep, lap pepmanto neng ton men kurami. 9 Ukupi pangeda, nimi deiyo ngebo Belsyasardi, ‘Uo,’ tenen, er dipru kange pio teneptopudi, mali kange doupra wang-wang pepupa, kange mun kange doupu. Tonda, er amutara pel yuk-yuk talepra dorami nenge peda, kange wang-wang pepu.

10 Ila ngebo Raja Belsyasar cap, er amutara deiyo neng cap, ila di mali penmaipane, nimi deiyo ngebo Raja Belsyasar, er nerda, ila kailya kalepra jerami ati bungbeu. Wekra bukudi, anerdi er akengebo Raja tep upepu. “Naio, kanda pio gam kunkamrem ngebo cadi, kan epmaremnge tep, tenimtonapu kunmaremdi, mali kange douna gume. Dim peprapu bouna di kunkamrume,” pepu.

11 Upepudi aupu ton pepu. “Ada mesum tep men pepkene. Ne nai bo, kan bungna damai kurur ngebo tenpu ton, Allahdi angebo sambala puto weika di karerepa kurur ngebo ton akurure. Angeboda, mali kuna gum ngebo, dumsisipu kurur ngebo akurure. Angeboda, kan nai bo Raja Nebukadnezar, nimi deiyo ngebo kuramu taru di ereiamupa, kuramu ngebo tupa akurura cadi, er angeboda, er ila kael keamu keca cap, nong neitamai kure keca kael kemna capda, Allah er ila kael kuretopu kure ngebo akurure.

Babel mutu kurami ila kael kemna neng yuma, sun deiyo ngebo kemna tep, kan nai bodi angebo wepra deiamupa, angebo tupa akurure. Er amutara kurami nengda ake. Ada, isok puto deiki di kunupsek pena neng cap, keteng, war, kuru ila kael keami neng cap, amenda kupkamre keca lap pena neng cap yuma, angebo er amutara kuramipa, erda akael neng sun deiyo ngebo akuramutopu, tupa amutu kurure.”

12 “Angeboda, pio men kupmanto keca kael ngebo kurure. Ada, Allah Sambala er puto karepka deiki di, nonge neitamai ila kael kemnange cap, ken mapmangenge nonge jenek pena ngebo cap, inimna keca lap pena ngebo cap, tonda, nimi kange mun kange doupmange nge yuma tep, dumsisingdina ngebo kurure. Angebo er sida, Daniel perami dinin, kan nai bodi er tep, ukupu si dopuada, Beltesazar ^{▼▼Beltesazar si sipepu ngeda, amutu ila nimi deiyo ngebo er si yambulanun utopu Belsyasar, kurure. Dinino, Beltesazar, ada Daniel tep pepu. Belsyasarda, ada amutu deiyo ngebo tep asi perami.} pepupa penunge. Ukutaruda, kandi angebo upupmempa yaredi, asekupa epmumnge nonge jenek pepkukere.” Aupu yumada, Raja Belsiasar er nerdi pepupa, Raja gekepu.

Asekeipmau sengna keca tep, Danieldi, “Deiyo ake,” pepra lap pepu upu

13 Raja ngebo, er nerdi aupu konum pepu pangeda, Daniel doprapidi, adipapu ila ngebo Raja Belsiasar damai duyai. Duyai pangeda, ila nimi deiyo ngebo Belsiasardi Daniel tep asipetepu. “Ne kabo kanda Daniel, ne nai bodi Yehuda yala nesala kan-kan kuramumpane, doupdaro amutu duyanamkeu do?” pepra asipetepu. 14 Uda Belsiasarda, isok si eremamu ngebo kuramnga cadi, erdi pepu. “Nedi gekekenepa, ‘Erda Isok sambala puto weik dinipupa kurur ngebo,’ pekengepa gekenune. ‘Adeiki di ila kael kemna deiyonge cap, nong neitamai ila kael kemnange cap, weik kurur ngebo,’ pekengepa gekekenune,” pepu.

15 Upepudi aupu ton pepu. “Akeca-keca yuma ila kael nengdi, dela taramai asekeipu keca tep, yana nukpetepi dinin, ‘Deiyoda atep sekeipkeu,’ pepra, men jenek pepnei. Atep, sunda jenek pepmanto neng men kununge. 16 Dinino, ukutaru gekenmanupa kan tep, ‘Erda akeca yuma kael ngebo cadi, inimna keca jenek pepmanto ngebo akurure. Tonda, nimi kange mun kupmarenge lap pena ngebo akurure,’ pekenunge.

Ange tep nengeda, kandi adela taramai sekeipunge nukmemdi, ‘Deiyoda atepa,’ pepra lap pepnemempa, kael kepkune. Ange lap pepnemem pangeda, kan gispal dona tep, ila neng kenengameng lyom opkal telepnge cap, emas keca kum koudongon keca cap, karepkamakene. Karepkenedi, ila ngebo kemna tep, kan erepra deipkamakene. Ne nimi deiyo ngebo kunya utopu, ne amutara ngebo kunkamrema tep, erepra deipkamkene. Ada ne amutara dinin, ila ngebo weneri ngebo kunkamreme,” ila deiyo ngebo Raja Belsiasardi Daniel tep pepu.

17 Upepkopda, Danieldi tamupra pepu. “Ne nai bo Raja kandi, ‘Ne kunumna keca karepnetu’ tenen, men putanmanere. Akecada, kan damaipu akapmarepane, yuk neng karena telepe. Ukutaruda, nedi asengna keca nuknedi, lap pepnepa, ne nai bo Raja kan tep, ‘Deiyo ake,’ tenen, kael kepkurema tepapu lap pepkukene. 18 Tonda, Allah akeca-keca yuma talepra, deiki tara ila puto eremna deiyo ngebodi, kan nai bo Nebukadnezar tep, ‘Ila nimi deiyo ngebo kunkamre’ tenen, ereiamemeu. Ereiamudi, kan nai bo Nebukadnezar tep, nimi deiyo neng yuma akuramya deiki tara deiamemeupa kuramu. Tonda, kan nai bo sida, yuk mutu neng yumadi kael keami. Tonda, er tepapu si erepra gispal doramidi gudirami.”

19 “Ukuamnga tep, nimi yala-yala yuma cap, upu yuk-yuk perami nesala yuma cap diramidi, er tep ila kware kuramupa, yo moropsemamu. Ada tali tep gume. Erdi, ‘Popkun’ tenepne nengda, ataru dipapu popra tamamu. Tonda, ‘Men popkune,’ tenepne nengda, men poramu. Tonda, ‘Lyepropkun,’ tenepne nengda, lyemdoramu. ‘Ereipkun,’ tenepne nengda, eremdiramu. ‘Amutara kupra deipkun,’ tenepne nengda, amutara kemdiramu.”

20 “Dinino, er kange dipru erepra, gel giso deipra, balila kupudi gemepka deiki di, ila neng bungameng kursi deiki di gopra, amutara kepu. Ukupu taruda, er tep si eremaminge cap, er taleamu keca cap, ayumada, Allahdi dopdaropupa, pio gum kupu. 21 Er angeboda, nimi tenerameng kange utopu men kupupa, nimi yumadi er tep eneproipa, bura tara beu. Nesaladi tenerameng kange utopu gum dinin, tali bura gam kuramre keca, sapi bisam do, keledai bisam do, akeca kange utopu kange dakudi, tali paramre keca jepembaramu. Ukuramnganen, katuai mutupu mapmanpa, er nong yuma mo puru paleramretopu kuramupa, nimidi dirami.

Ukuramnganen, siryada, erdi tamupra tenepu. Ada, Allah erdi akeca-keca yuma talepra, deiki tara ila puto kure ngebodi, er tenepredi, ‘Ware ngebo do, angeboda ila nimi deiyo ngebo kunkamre,’ teneretopu, erepra derirure. Tonda Allahda, tuai mutu ila nimi deiyo neng yuma talepra kunung neng yuma, sun deiki tara kure ngeboda, ‘Allah er pua’ tenen, moupra kael kepu. Kan nai bo Nebukadnezar kael keamupa, Allahdi ka di ton cap, kan nai bo telep kupra deipu.

22 Dinin naio, kanda Nebukadnezar er mi Belsyasarda, kan nai bo ikin weik kuramunge yumada, kael keamum dinin, moupra tenena gum dipapu, kan dipru boun men kumumdi, dipru eremnapu tupa kurume. 23 Kanda Allah im deiki kurur ngebo dinmakuaidi, balila kupra dipru erepmamumdi, Allah tep, ‘Ne song’ tenen, yanitamamume. Ukuramumdi, Allah er si eremna ati pumbon, deiamipa doupra yanami keca, emas di ketekepra deiami me mauda, kandi peipmumpa, kan tara deiyo neng cap, kan nerapu cap, kan tara nesala cap, sun yumada, amau di anggur me gwepra jenmarume.

Ukupmarumdi, sun si eremrum ubo keca, emas cap, perak cap, tembaga cap, yuk gat keca co cap, gel cap ketenepra deiami keca, isok urasin utopu kecada, sun si pepra erepmarumdi, mut penmarum taruda, Allah dinmasere tenepmarume. Sundi isok si eremrum ubo kecada, asuru di ton men dinunge.

Tonda, amul di men gekepra kael kemnunge. Allah dipapu denange peda, gam kunange peda, er dipapu, ‘Ukunkameng’ tenen, ketenepra deipu ngebo kurur dinin, ataruda kandi Allah tep, ‘Telepe,’ pepra, gispal men dopmamume. Tonda, Allah dipapu kan gam kunkamremnge yumada, ketenepra derikerure. Akukere keca yumada, kandi moupra men kael kemamuma tep pepkene.

24 Ukupmuma tep nengeda, Allah er buru dokotepmaudi, aupu pepra ati dela taramai sekeipmakeu. 25 Atep dela taramai deiki Aramaik upu deiki sekeipmau sengna kecada, nukeipkukene. Ada,

MENE, MENE TEKEL PARSIN sekeipkeu.

26 Asekeipmaker keca nongeda, adano. MEN ^{▼▼Men Aramarik upu deiki di seku ngeda, aupu deiyoda, ‘kunumterena’ tonda ‘nomor’ kurure.} sekra deipmau ngeda, deiyo ake. Ada, kandi ila nimi deiyo ngebo kumemdi, amutu talenkamrem taru yumada, Allahdi konum nukeipmakere. Tonda, sirya gawal dakamkere taru peda, konum keteneipkeue.

27 Tonda, TEKEL ^{▼▼Tekel Aramarik upu deiki di seku ngeda, aupu deiyoda, ‘ikine’ tonda ‘akeca er ikinda, kilo ake’ kurure.} pepra sekeipmau ngeda, deiyo ake. Ada, kan ila nimi deiyo ngebo Raja kumemdi, pel domemnge yumada, ‘Ikin do, kanam do?’ tenen, konum deripetepudi dipetepkada, kanam kupkeudi, suktalepkeua tep, kange men deipmakere.

28 Tonda, PARSIN ^{▼▼Parsin Aramarik upu deiki di seku ngeda, aupu deiyoda, ‘bongna’ tonda ‘wilina’ kurure.} pepra sekeipmau ngeda, deiyo ake. Ada kan talepra kumem mutu yumada, Allahdi dopropkeredi, ange yuma neitamai di bokrap, sun Persia mutu neng cap, Media mutu neng cap tep, karepkamre.” Danieldi aupu yuma nimi deiyo ngebo Belsiasar tep nonge lap pepu.

29 Upepu pangeda, Belsyasar adipapu menmena, er amutara pel don neng tep peipupa, sundi Daniel tep, ila neng kenengameng lyom opkal pio telepnge cap, emas di betami garangna keca cap karepipa, erdi dopra kepu. Tonda, Belsiasardi, ila ngebo kemna tep, Daniel erepra deipudi pepu. “Ada, ne nimi deiyo ngebo kunya utopu, ‘Ne amutara ngebo kunkamre’ tenen, erepra deipkene. Ada ne amutara dinin, ila nimi deiyo ngebo weneri ngeda kunkamrema tep pepkene,” Belsyasardi Daniel tep pepu.

30 Belsyasardi aupu yuma pepra sengpepkopda, alukunda neitamai dipapu, Babel mutu ila nimi deiyo ngebo Raja Belsyasarda, yuk nengdi yan popipa depu. Adepu taru dipapu, Media mutu ila nimi deiyo ngebo, er sida Darius, erdi Babel mutu yuma yana talepudi, gonga kepra Raja keamu. 31 Babel mutu ila nimi deiyo ngebo Belsyasar konum popi pangeda, er yo pununa tep, Media mutu ngebo er si Dariusdi, ila nimi deiyo ngebo gonga kepra, Raja keamudi kuramu. Ataruda, Darius er mapbaramu ngeda, keteng tamun denge weik, enam puluh dua tahun (62) deiki amutu talepra kuramu.