Dan 6 | XteSC | STEP | Babel mutu taleamu taruda, amutu yuma bokrapudi, Propinsi denge weik, 120 bokra deipu. Ukupudi, Propinsi keteneiputopu, Gubenur neng denge weik, 120 neng wepra deipupa, amutu-amutu yuk-yuk taleami.

Daniel 6

Daniel tomopidi, pio yu keca ila pus utopu, er sida singa pus kuramyai bena dongopi upu

1 Babel mutu taleamu taruda, amutu yuma bokrapudi, Propinsi denge weik, 120 bokra deipu. Ukupudi, Propinsi keteneiputopu, Gubenur neng denge weik, 120 neng wepra deipupa, amutu-amutu yuk-yuk taleami. 2 Tonda, sun Gubernur wepra deipu neng, 120 neng, sun kalengna tep, Rajadi weneri neng ton wepra deipu. Ada, ‘Ne talipu weptapmanepa, Gubenur nengdi pel beta men dopnenung’ tenen, Daniel cap, yuk neng butene neng cap, wepra deipupa, sun Gubenur neng pel doraminge yuma tep, kalengna deiyo neng kurami.

3 ‘Aketenepra deipu mutu talenkameng’ tenen, Gubernur wepra deipu neng cap, sun kalengna tep, wepra deipu neng yuma capda, akuramidi yambul telep kurami dinin, Daniel puda ila kael ngebo kuramu. Ada, Danieldi pel pio telep kupra doramunge cap, er pio dumsisi kuramunge cap deiki di, pio telep kuramupa, ila nimi deiyo ngebo, Raja Dariusdi kael keamu. Daniel pio telep kuramupa, nimi deiyo ngebodi, ‘Ne mutu ila kalengna deiyo ngebo kemna tep, Daniel wepra deipnepa kunkamre,’ tenepu.

4 Utenepupa, sun Gubenur neng cap, yuk kalengna deiyo neng cap yumadi, Daniel tep, ‘Er akupre taruda, ware mali kun keca ton kuptupa, eptepedi, kael keptepe do? Kael keptepyopda, nun deiyo ngebo tep, ware mali upu peptepepa, Daniel tep derepkamre do?’ tenen, kalengami. Pio diplelepra embarami dinin, er mali kun keca ton, pio men kuramupa men epi. Ada, Daniel er ila ngebo kemna tep doramu pelda, pio telep dipapu pukam kupra doramu. Mali pel ton men doramu.

5 Ukuramupa, sun anengdi pepi. “Nundi er mali kun keca ton, men epmepa tep nengeda, Danieldi si eremre Allahdi pedimemere upu tepapu, ‘Mali kurure,’ pepra deipkupe,” pepi. 6 Upepi dingeda sun yuma, Raja ngebo amutara ila deiyo neng cap, sun Gubenur neng cap, Raja tep, ‘Ukunkamrume, telepnge ake,’ pepra upu melipra pena deiyo neng cap, adipapu ila nimi deiyo ngebo Raja Darius, er damai bena pepi.

“Nun nai, nun putasere ngeda ake. Kandi nun talepsemum ngebo, kanda pio tep gam pio kunkamreme,” pepi. 7 “Apepmep ngeda, kandi pel yuk-yuk dona tep wepra deipsemum neng kunupe. Ada, Gubernur neng cap, Gubenur amutara neng cap, nun kalengna tep wepra deipmum neng cap, tonda deiyo yuknge talepi neng cap, nun yuma upu talepmepudi, pepmepunge pepkukepe. Nun deiyo ngebo kandi, ‘Amutu neng yuma angepu talepra kunkamenge’ tenen, mambul upu pepra deipkurume.

Ada, ue denge weik mapbaramepyane, komuni tiga puluh (30) tumi mapkamep taruda, nun yumadi kan sipu eremkamkepe. Ataru yumada, isok si do, yuk nimi si do, ton pio men eremkamepe. Atep ataru neitamaida, ware neng do yuma, yuk keca si erepmengopda, kandi peipmempa, tek sisi kan jen talen nengdi douprapmengedi, yu keca ila pus utopunge, er si singa pus kuramya damai, bena donokamenge. ‘Aupu ukupra pepmemdi, peraturan deipkamserem’ tenen, yana moropkepe,” pepi.

Upepra moropi pangeda, Raja gekepudi, ‘Angeda pio telepe cadi, ange kupkamane. Atep ataru yuma, yuk keca si eremna gum dipapu, ne sipu eremkamnenge,’ tenepudi, peraturan negara pepra deipu. 8 Raja Dariusdi upepupa, er amutara sun deiyo-deiyo nengdi tamupra pepi. “Nun deiyo ngebo, kan tep moropkepe. Asekurem suratda, kan si sekra, tanda tanggan kepmem deiki di, apepkamrem ngeda, ton cap tamupra men doropkamrema tep pepkepe. Ukupmempa, sun Media mutu neng cap, Persia mutu neng cap, mambul upu derirameng utopu kupkamre. Ada, kandi peipkuserem upu, men gum kupkamra tep pepkepe. Babel mutu neitamai kunup neng yumadi, angepu pio gekepra talenkamepe. Atep naio, ‘Ukupsetum’ tenen, yana moropkepe,” pepi.

9 Upepitopu, nimi deiyo ngebo Raja Dariusdi, “Yuk si yuma men ereipkamrume. Ange gum dinin, ne sipu ereipkamnerume,” pepra peraturan negara deipupa, sun seki surat deiki, er si sekra, tanda tanggan kepu.

10 Aupu pepra deipupa, Daniel gekepu. Gekepu dinin, adipapu tamupra er kuramu ati beudi, ataru-ataru yuma kuramutopu, er alau ati jendela paktapu. Ada, Yerusalem tara potokami jendelada, pakra deipudi, erdi tumi-tumi yuma Allah si eremamutopu, gutam tu diprap, Allah moropudi, Allah er si eremna tep, mut pepu. Ada, Allah upu mut pepra gudiramutopu, atumi peda utopu, Allah tepapu telepe pepra gudinmau. 11 Ukunmau taruda, Daniel tep, ‘War ton kupkamre do?’ tenen, kalengami nengdi epi ada, ataru tupa Allah er si erepra moronmau.

12 Epi dingeda, sun aneng adipapu, “Danielda yuk Allah si eremare,” pepra, nimi deiyo ngebo damai bena lap pepi. Ada, upepi, “Nun deiyo ngebo, kandi upepsemume. ‘Ne mutu kunge nesala yuma marbaramenganen, tiga puluh (30) tumi kepkamre taru neitamai yumada, ne sipu eremkamnenunge. Yuk keca si ton men eremkamnunge,’ pepra peipsemume. Ada, nundi kan tep pepkepupa, kandi telepe pepra, surat sekmumdi, asurat deiki kan si sekra tanda tanggan keiamum ngeda, tupa tenepmarem do? ‘Aupu pepmumnge men kupredi, yuk Allah si erepre ngeboda, dopra singa pus kunungai donokamne,’ peiamum do, men peiamum do?” Upepra yan pepi.

Upepipa, Raja ngebodi pepu. “Tek sisa ada, Media mutu neng cap, Persia mutu neng cap, ukungetopu nedi, ‘Ukunkamrume,’ pepra peraturan negara deipsi ngeda, tamupra men dopropmanto ngeda, konum pepra deipsi,” pepu. 13 Upepupa, sun anengdi nimi deiyo ngebo Darius tep pepi. “Pumun taru, Yehuda yala nesala popbisipmepudi, tomopra duyanamepudi, yan deiamepu neng kan-kan neitamai di, tenpu ngebo, er si Daniel akurure. Erda, nun amutara pel don ngebo kurur dinin, ware keca deiyo tep nun nai kandi pepra deipsemum ngeda, ‘Talinge’ tenen, men gekepkeudi, er si eremre Allah tepapu, tenpu tumida ue weneri taru di Allah mororurue,” yan pepi.

14 Upepipa, nimi deiyo ngebo agekepudi, ‘Uo’ tenen, Daniel tep bicau kupupa, ‘Ware keca deiyo tep, ne pepsi upuda tapudi, Allah tupa mororur do?’ tenepu. Tonda, ila ngebo teneptopu dingeda, ‘War peptenya deiki di, Danielda lyeproptene do?’ tenen, tupa tenenmaupane, sintara kepu. 15 Ukupupa, sun anengdi tamupra animi deiyo ngebo kori yaidi, “Nun nai kanda kael kepo. Media mutu neng cap, Persia mutu neng cap, sun kungetopu, kanda nimi deiyo ngebodi, ‘Ukupkamrume,’ pepra deipsemum ngeda, ‘Dakwapye’ tenen, tamupra men dorpoptume,” pepi.

16 Upepi pangeda, ataru dipapu nimi deiyo ngebo Dariusdi, ‘Ware kuptene guma tep,’ tenepudi, “Daniel tomopra ila yu singa pus kuramya damai dokotepso,” peipupa ukupi. Ukupi pangeda, nimi deiyo ngebodi tamupra Daniel tep pepu. “Kan si eremem Allah, ‘Erdipu lyepketue’ tenen, putapnere,” pepu.

17 Konum tomopi dingeda, singa pus kuramyai bena dokotepi pumbonda, ila gel pala dopra, buplan dekdongopi. Ila nimi deiyo ngebodi, peten kemna keca, agel pala deiki deipra, er si sekeipu. ^{▼▼si sekeipu – Agel deiki si seku ngeda, lilin uku sekmengepa, jeredi me sangamrenge, gelal sepredi pala kupyopda, adeiki gat keca er buru dengna kecada, tanda tanggan kemamengtopu darapdongopu.} Ange utopu, er amutara ila deiyo neng peda utopu kupi. Ukupya deiyoda, ‘Daniel dopra yu singa pus neitamai dokotepmap ngeda, yuk nengdi agel pala dangaptapra upula dopropnung’ tenen, kupi.

18 Ukupu dingeda, nimi deiyo ngebo Raja Darius tamupra, er pe atipu beu. Ukupu taruda, jen keca peda tenpu ton jena gume. Tonda, er pel don neng tep, “Atumida, ne pingping kemdina tep, esu pena utopu kecada, ton men penkamanerume. Ne damai yakana gume pepu.” Tonda, alukundada, pio men mapmanto kupmaudi, ugam-gamapu bukmau. 19 Ukupmaua cadi, nimi deiyo ngebo Raja ipna bereng dongon taru bukrapudi, ila yu singa pus kuramya damai sepdara dirbeu.

20 Konum dirbeu dingeda, kange mun kange doupra, “Daniel kanda, Allah er pel don ngebo kuruma cadi, Allah er gam ngebo puto deiki di konum lyepropmaker do?” pepra, ila upu deiki di bena pepu. 21 Upepupa, Danieldi tamupra pepu, “Ne deiyo ngebo, ‘Kanda pio tep gam kunkamreme’ tenen, putapnere,” pepupa, Darius gekepu.

22 Danieldi aupu ton pepu. “Ne si eremne Allahdi, er im deiki pel don neng malaikat doproipmanerpa, yu singa pus yuma, sun sipyal yan kepdongopra talepmangupa, sundi ne nong men jepmanenge. Ne teleppu kunmane. Angeda, ne si eremne Allahda er kaele. Ada, mali kun keca, er damai ton men kunune. Tonda, ne deiyo ngebo kan damai ton, mali men kunune. Atep Allahdi lyepropmanere,” pepu.

23 Upepupa gekepudi, nimi deiyo ngebo Dariusda, pio ila kange deipudi, er nyapu tep pepu. “Ukutara Daniel adipapu singa pus damai di doropso,” pepupa, er nong dopra yai. Ukupidi, ‘Daniel er nong bol deiki dila ton dopmar do?’ tenen, betapra dipetepu dinin, dila ton men dopmau. Ada, Daniel tek sisi Allah tep teka teneramnga tep teleppu kupu.

24 Daniel konum dopra deipi dingeda, nimi deiyo ngebodi, Daniel tep mali upu pepmai neng, sun akunmaiya tep pepu. “Sun aneng yuma tomopra yankurume,” pepupa, doupra yai taruda, sun pe cap sun nerapu, nyapu cap yuma, adipapu yu singa pus kuramya pumbon dokotepi. Adokotepi taruda, sun singa pus damai men dourbenapupapu, si aktapra kalekmaiya di, adipapu sun nonge cap, yo cap yuma, garupra gawal dakropi.

25 Ukupu pangeda, nimi deiyo ngebo Dariusdi, surat sekrapudi, nimi yala ban-ban yuma kurami neng cap, sun upu yuk-yuk perami neng cap yuma tep, doproipudi, “Telepe dipapu kunkamrume, pepmasenada, sun kunkamrumai telep pel dopmumpa, akeca-keca weik kupbankamsera tep, telepe pepsene,” pepu.

26 Tonda, Dariusdi aupu ton pepu. “Ne taleamsisipa, nesala ban-ban yuma kurum neng tep pepsene. Nun yumadi Danieldi si eremre Allah, er teppu, Allah er si eremepedi gudinkamepe. Erda gam kuna deiyo ngebo pio tupa kurura tep, pio akunkamre. Ukupredi er dipapu taleserepa, er amutara kunkamepe. Tonda, Allahdi talenkamser ngeda, pio men gum kupkamre. Deiyoda, Allahda ila puto ngebo kurura tep, erda men gum kupkamre.”

27 “Allah dipapu lyepropseredi makunkamsere. Ikin kupserenge lyepra kanam kemdiserure. Tonda, nimidi men kupmanto keca cap, peten kemdin keca cap, pel dodiserure. Ada, im deiki cap, tuai mutu cap yuma erdi kudiserure. Ada, tek sisi Daniel dopra yu singa pus kuramya pumbon tomopra dokotepsipane, Allahdi melipupa, singa pusdi er nong ton dila men doipipa epsi. Ange tep pepsene.” Dariusdi pepu.

28 Tonda, Daniel ukupka deiki di, Dariusdi Babel mutu taleamu taru yuma, Daniel ila ngebopu kuramudi teleppu kuramu. Ange utopu, Darius er yo pununa tep, Persia mutu nimi deiyo ngebo er si Kores, Babel mutu taleamu taru peda, Daniel ila nimi deiyo ngebo kuramutopu, tupa kuramu.