Daniel 7

Dumbari keca ton, Daniel damai jenek kepupa epu upu

1Babel mutu ila nimi deiyo ngebo, Belsyasar taleamu taru dinin, keteng tamun tenpunge deiki, Danieldi mapmanka kene mapudi, ken lur-lur deiki epu ngeda, nong men kapu dinin, er kange neitamaida, Allahdi er kael kemna tep karepupa, betapra tenepu. Er tenepudi, ken lur-lur deiki epunge deiyoda, yambulanun sekra deipu.

2Danieldi seku ngeda ake. “Ne Daniel lukunda mapmanka, kene mapsidi, epsi ngeda ake. Ila kum ton utara cap, itara cap, tonda ortara cap, atara cap, im deiki di yau kumda, ila mokon deiamngai yan pupupa, amokon ila di longteng-longteng pepu. 3Longteng-longteng pepu taruda, yambulanun ila gam keca utopu keca, dumbari ila-ila ngepu, amokon amutara di belepi. Agam keca dumbari, sun urasin utopu gume. Sun urasin yuk-yuk kuramupa, epsi.”

4“Menmena belepunge er kamoda, ila yu pus utopu keca, er si singa, angeda singa utopu kuamu dinin, er pole beilyamu ada, bukel ma utopu kuamu. Ukuamu dinin, ne tupa dinmasipane, dato-dato di er pol yuma gum kupu. Er pol gum kupu tarada, nimi kuramengtopu, yane butene di yanipra tekudi, nimi kange douramengtopu kupu.

5Gam keca butenenge, amokon amutara belepra jenek kepupa, epsi ngeda ake. Er nong kamoda, ila yua bisam utopu dinin, er urasinda bura kam utopu kupu. Angeda, er si beruang peramengetopu kupka tep, er potongda, lyom kupupa epsi. Epsi ngeda, er yan dum deiki dipapu yanipra tekmau. Ukupmau taruda, er sipyal dam ik yo, yo weneri si arekra doupmaupa epsi. Nimi upu utopunge ton, akeca tep upu pepupa, gekepsi ngeda ake. ‘Kan tekmemdi, tenepmamumtopu tu keca weika di jenmayo,’ penmaupa gekepsi.”

6“Abutene belepmau ngepu dinmasipane, gam keca yuknge ton, weneringe belepu. Angeda, ila yu pus utopunge dinin, er potongda miringe belepu. Er sida, macan tutul peramenge utopu kuamu. Abelepunge er bali tarada, ma pol utopunge dumbari kuamu. Tonda er giso peda, dumbaripu kuamu. Ukuamunge belepu. Abelepu keca tep, ‘Nimi ban-ban yuma talepkamre’ tenen, puto deiyo keca karepu.

7Akeca yuma tupa pio dinmasipane, amenda taru gam keca dumbaringe ton belepu. Ange er putoda, pio weik cadi, ila kware kupneudi, moropsepneu. Ada, er sida gat keca besi utopu kuamnga cadi, er jena tep, nimi popra jenmaudi sesekropada, yanedi yaniptapu. Menmena belepmai gam keca wenerida, sun kamo yuke. Amenda belepunge, dumbari ngeda, er kamoda yuk kupupa epsi. Akeca er giso takkeda, udangole di (10) kuamupa epsi.”

8“Neda er giso takke kawamunge tepapu, pio dinmasidi, ‘Angeda ware keca deiyo tep kurur do?’ tenenmasi taruda, dato-dato di agiso takke 10 kan-kan di, yambul giso takke tenpu ton belepu. Ayambul giso takke belepu pangeda, menmena kapmau giso takke wenerida, yuma luksaku. Ukupu taruda, yambul giso takke belepu ngeda, nimi asuru utopu kupu. Er sipyal di upu pepu ngeda, sal nong-nong upu pepupa, gekepsi.”

9“Ukunmau keca apu tupa dinmasipa, ila nimi deiyo neng bungne keca, pio telepnge ton yan kapupa, epsi. Tupa dinmasi taruda, pumun taru dordi, Gam Kuramnganen, Pio Tupa Gam Kunkamra Deiyo Ngebo yaudi, abungna keca deipmaiya neitamai di, tenpunge deiki yan buku. Ayan buku ngeboda, er kenekmau opkal cap, er potong capda, pio lek keca kururamretopu kupu. Ada, ngari ma potong pio lek kururamretopu kupu. Er ila nimi deiyo neng bungne keca deiki, bukmauaida, uku bu utopu keca lapmeng-lapmeng penmaupa epsi. Tonda, er yana buku keca amutarada, er pedi embaramre keca, roda ton kuamu. Aroda yan siri-sirida, uku bu lapmeng-lapmeng penmaupa epsi.

10Ataruda, er yan bukmaua damai di, ila me embaramretopu, uku jeramu me pukra embeu. Ukupupa, im deiki nimi denge pio weik, men nukmanto beribu-ribuan cap, berjuta-jutaan neng cap yumadi, er tepapu kange deipidi gudinmai. Sun yumadi, ‘Erdi tenepra pepseretopu kunkamepe’ tenen, er damai ketenepra gekenmai. Atarupu, sun im deiki kunge nesala, pio men nukmanto nesala ton, er damai yan wekra ongomgenem pepmai dipapu, tuai nesala yuma dinin, sun yuk-yuk kurami keca sekeiamu buku yan deipidi, ‘Nimi upu bokeipkup’ tenen, abuku yan tepra deipi.”

11“Ukupi taruda, ne tupa apu dinmasi. Ukunmasipa, arup taru dinmasi yambul giso takke belepmau keca di, er upuda, sal nong-nong upu tupa penmaupa gekenmasi. Mali upu pepra, sal nong-nong tupa kunmaupa, er nong poptapi. Popra tapidi, er nong yuma dopra, ila uku jenmaua neitamai dongopipa, er nong jepra gawal dakropu. 12Ukupu taruda, sun yuk-yuk belepmai gam kurami keca weneri yumada, ila deiyo neng kunkamenga tep, ila puto kuamunge yumada, gum kupupa, talipu kurami. Sun ila puto deiyo keca gum kupu dinin, sun aweneri gam keca yuma tep, sun gam kun taruda, ‘Ukupra yambulanun ton gam kunkamrume,’ pepra peiamutopu, go karepupa, yambulanun ton tupa gam kurami.”

13“Alukunda neitamai peda, ne ken mapmasidi, ken lur-lur deiki dinmasi. Ukunmasi taruda, Nimi Mi Utopu Ngebo, nimi urasin utopu kupunge belepupa, ange ton epsi. Tonda er angebo yakau taruda, dua bum di kepra, ongopdongopmaua deiki yakaupa epsi. Nimi Mi Utopu Ngebo yakanmau ngeda, er pumun taru di, Gam Kuramnganen, Pio Tupa Gam Kunkamra Deiyo Ngebo, er kori bana tep, sun im deiki kunge nesaladi mepra banmaipa, Nimi Mi Utopu Ngebo, sun amnyo tara banmau.

14Ukupupa, pumun taru dordi, Gam Kuramnganen, Pio Tupa Gam Kunkamra Deiyo Ngebo, abukmau ngebodi, er Nimi Mi Utopu Ngebo tep, ila mambul keca weik karepu. Er tep karepu ngeda, ake. Ada, ‘Er ila puto di akeca-keca yuma talenkamre’ tenen, deiyonge cap, ila dirine cap karepu. Tonda, nimi ban-ban yuma cap, amenda kupkamrenge yuma cap, ‘Er dipapu teneretopu kunkamre’ tenen, deiyo keca ton karepu.

Tonda, akarepnya deiki di, nimi yala-yala yuma cap, upu yuk-yuk penung neng yuma cap, tonda mutu ban-ban yuma kunung nesala yuma capdi, ‘Er sipu eremkameng’ tenen, adeiyo keca ton dopra, Nimi Mi Utopu Ngebo tep karepu. Tonda, er angebo ila puto di talenkamrenge cap, talepra pio kunkamrenge cap yumada, nimi yuk nengdi, pio men gum kupra deipkamenge. Erdi ange yuma talenkamrada, apio kunkamre.” Danieldi pepu.

Danieldi ken deiki mapudi, epu keca nonge kupunge tep, lap pepu upu

15Danieldi pepu. “Ken deiki mapsidi dinmasipa, kupunge yuma tep, epsidi, ‘Angeda ware kupkamra tep kupner do?’ tenen, ne dipru kange boktopneupa, kange mun kange doupra kunmasidi, pio tenimtonapu kunmasi. 16Ukupneupa, nedi ortamna tekmau im deiki ngebo damai besidi, akupmaupa epmasinge yuma tep, ‘Akeca dinmasinge yumada, ware keca deiyo tep kurur do? Akeca yuma nongeda, jenek pepneo,’ pepra, bena moropsi. Aben moropsipa, er angebodi ange yuma nonge tep lap pepneu.”

17Alape pepneunge nongeda ake. “Aila dumbari gam kun keca belepmaupa epmumnge deiyoda, ake. Ada amenda taru, ila nimi deiyo neng dumbari belepmengedi, amutu-amutu yuma talepra kunkamenga tep epmume. Sun anengdi yuk-yuk dinin, nimi deiyo kepra tuai mutu yuma ke teppu talenkamenge. 18Ukunkameng dinin, Ila Eremna Kure Deiyo Ngebo Allahdi, akeca-keca yuma deiki tara kuredi, erdi wepra deiamupa, er nyapu sisa tep nengeda, ‘Sundi ne talenun keca yuma pio talenkamenge’ tenen, nimi deiyo keca karepkamre. Karepre pangeda, er nyapudi adeiyo keca dopra talengedi kunkamengada, pio tep, sun gam kunkameng ngeda, men gum kunkamenge,” pepneu. Aupuda, im deiki kunmau ngebodi ne Daniel tep, upepra lap pepneu.

19Upepneupa kael kepsi dinin, ne Danieldi ton cap angebo tep asipetepsi. Ada, ila gam keca belepmainge dinin, dumbaringe belepkada, sun weneringe utopunge men kupka cadi, er kamo yuk kupmaupa, ila kware kupneunge tep nengeda, ‘Ange ton kael keptene’ tenen, putapneue. Ada, er kunmaunge kamo epsi ada, pio kange mun kupneu. Er kunmau ngeda, ake. Akeca er jena tep nengeda, nimi weika di tomopra, ila puto deiki di popra jenmau. Akeca er buru galada, ila gat keca, er si tembaga utopu kuamu. Tonda, er si takkeda, gat keca besi utopu kuamu. Ukuamnga deiki di, er jen kamaua tep, popra jenmau kecada, sesekra yaniptapu. Ukupmaua tep nengeda, nedi, ‘Agam kurur kecada, er deiyoda, war keca tep do?’ tenen, asipetepsi.

20‘Angeda ne kael keptene’ tenen, putapneue. Tonda, akeca er giso deiki di, dangol di utara (10) giso takke kwamu. Akuamu dinin, aneitamai di yambul giso takke ton belepra tengyaupa, men di akapmau giso takke wenerida, lukra saku. Tonda, yambul giso takke belepu ngeda, er asuru cap kwamu. Tonda, er sipyal deiki di, sal nong-nong upupu penmau. Agiso takkeda yambul dinin, er kamo ila puto kupudi, yuk belepmainge yumada, sun puto yambulpu kupu. Tonda, akeca er asuru ton kuamu. Tonda, er sipyal deiki di, ila sal nong-nong upu weika di penmau. Atep nengeda, akupupa epsi ngeda, “Deiyo war keca tep kupupa epsi do?” pepra asipetepsi.

21Ataruda nedi akunmaunge tepapu pio dinapu kunmasi. Ukunmasi taruda, ayambul giso takke belepmau deiyo ngebodi, Allah er wepra deiamu nyapu tep, agam kupu keca di aneng tep, ‘Popbisipra gawal dakun’ tenen, ponapu kunmaupa, epsi.

22Agam keca di Allah er nyapu tupa ponmaupane, siryada pumun taru di Gam Kuramnganen, Pio Tupa Gam Kunkamra Deiyo Ngebo yau. Yaudi, Ila Eremna Deiyo Ngebo Allah, akeca-keca yuma deiki tara kurur ngebo, erdi wepra deiamupa, er nyapu nesala tep, ‘Ne nyapu, sunpuda pio tek sisi kunkamenge’ tenen, nimi upu bokra deipu. Upepka deiki di, dumbari gam kuramu keca tep poptapu. Amali deiyo ngebo poptapupa, ataru di dipra doryankamu taruda, Ila Eremna Deiyo Ngebo er nyapu akeca-keca yuma talepra ila nimi deiyo nesala kuramidi, Allah talenkamrenge yuma talepra kuramipa, epsi.

23Akupupa epsinge yuma tep nengeda, adamai tekmau im deiki ngebodi, ne tep lap pepneu. “Akupupa epmumnge yumada, ‘Kan kael kepkurem’ tenen, lap pepkukene. Akeca nongeda, ake. Ila gam keca sirik taru dumbaringe belepupa epmumnge, er nongeda ake. Weneri nengdi belepra ila nimi deiyo neng kepra tuai mutu yuma taleamenganen, amenda taruda, dum ngebo yan belepra tekredi, tuai mutu kunge nesala yuma, sun deiyo ngebo kepredi talenkamra tep, kandi epmume.

Tonda agam kuramre keca weneri belepipa, sun kamo yuk-yuk kepipa epmumnge deiyo ake. Sundi nimi deiyo kepra, tuai mutu yuma talepkamenge. Ukupra talenmangepane, dumbari ngeda kamo yukpu kupredi, ila nimi deiyo ngebo, dum ngebo tekredi, sun weneri nimi deiyo neng yumada, popbisipredi bisbisa kapkamre. Erdi aneng yumada, er amutara deipkamre. Ukupredi er dipapu ban-ban yuma kunge nesala yuma pe, tuai mutu ban-ban yuma peda, popbisipredi yanitamkamre.”

24“Tonda giso deiki di giso takke dangole di utara (10) belumupa epmumnge, er nongda ake. Dum ngebo, er talenkamra kan-kan neitamai di, ila nimi deiyo neng, Raja neng ton dangole di uneng (10) belepmengedi, dumbari ngebo, er talere mutu yuma talenkamenge. Ukuramengepane, amenda taruda, ila nimi deiyo ngebo ton belepra tekredi talepkamre. Er angebo talepkamra kamoda, pumun taru di taleami neng utopu gume. Er angebodi, er kamo yuk kuprepa, sun ila nimi deiyo neng weneri ngeda, popra bisbisa kapredi, yanipra amu kepkamre. Ukupredi, sun taleami kecada, er dipapu talenkamre.

25Ukupkamre taruda, er angebodi, Ila Eremna Deiyo Ngebo Allah, akeca-keca yuma deiki tara kurur ngebo Allah tep, mali upu penkamre. Mali upu peredi, Allah er wepra deiamu neng tep, pio ikin keca, sun nong deiki tupa derinkamre. Ukupredi, Allahdi, ‘Ange kunkamrume, angeda men kunkamrume,’ pepra deiamu mem upu tep nengeda, amali ngebodi yanitamkamre. Tonda Allahdi, ‘Ne tenemsi taru ake,’ pepra, er si eremna tep peiamupa, er nyapudi er si eremkameng keteng tamun cap, ware cap, tumi capda, ‘Gum kupra deipkamne’ tenen, piripetepkamre.

Ukupra kunkamre taru neitamaida, Allahdi, er nyapu dopra, amali ila deiyo ngebo tep karepkamre. Ada, pio tep gume dinin, ke taru tep, Allah er nyapu pirirterena tep, angebo er amutara deipkamre. Ataruda, keteng tamu weneri cap, tenpunge neitamai cap deiki di (satu setengah tahun), amali deiyo ngebodi, Allah er nyapu talenkamre.”

26“Allah teneretopu ukunkamre dinin, amenda taruda, Allah cap, er im deiki pel don nesala malaikat yuma cap, upu talepmengedi, ila nimi deiyo kepudi, ila puto deiki di, tuai mutu nesala talenkamre ngeboda, er talepkamrenge yuma dopropmengedi, pio gum kupra deipkamenge. Er cap, er puto yuma cap, pio gum kupra deipkamenge. 27Ukupkameng taruda, tuai mutu ban-ban yuma, ila nimi deiyo kepra talenung neng yuma cap, sun si eremna tep gispal donung nge cap, sun puto adi tuai mutu keca talenung nge cap yumada, im deiki nesala dopropmengedi, Ila Eremna Deiyo Ngebo, akeca-keca talepra, ila puto kurur Allahda, er nyapu amutara deipkamenge.

Ukupmenge pangeda, Allah er ila puto deiki dipapu, akeca-keca yuma talenkamre. Ukupkamre taruda, pio tep, men gum kupkamre. Allah akeca-keca deiki tara kuredi, Ila Eremna Deiyo Ngebo puto di talenkamrenge yumada, pio akunkamre. Men gum kupkamre. Yuk deiyo-deiyo neng yumada, er amutarapu kungedi, er sipu erepra gispal donkamenge. Er pere upu yuma moupra gekepmengedi, angepu kunkamenge. Im deiki ngebodi, ne Daniel tep upepneu,” Danieldi pepu.

“Ada, akeca-keca yuma epmasi taru, meneng dam tekmau ngebo damai besidi, ‘Akeca yuma nonge lap pepneo,’ pepra moropsipa, lap pepneupa gekepsi,” Danieldi pepu.

28“Aupu yumada, ne Daniel ken mapsidi, dinmasipa kunmaunge epsinge cap, angebodi lap pepneunge cap tep, kange mun kupneu. Ukupneua cadi, agekepsi upuda, nedi nimi yuk neng damai gekena tep, men lape pepsi. Ange epsinge cap, gekepsinge cap yumada, konum lape pepne. Akonuma,” Danieldi pepu.