Dan 8 | XteSC | STEP | Babel mutu nimi deiyo ngebo Raja Balsyazar talepra kuramu taru neitamaida, keteng tamun weneri deiki di, ne Danieldi ken mana utopu deiki epsi. Ange epsada, ue butene ngeda epsi. Menop taruda, yuknge ton epsi.

Daniel 8

Daniel ken mana utopu deiki di, jem domba bisam cap, jem kambing bisam cap, katuai kupupa, epudi pepu upu

1 Babel mutu nimi deiyo ngebo Raja Balsyazar talepra kuramu taru neitamaida, keteng tamun weneri deiki di, ne Danieldi ken mana utopu deiki epsi. Ange epsada, ue butene ngeda epsi. Menop taruda, yuknge ton epsi. 2 Ange ue butene taru ken mapsidi epsi ngeda ake. Ne kuna tep dopropsi mutuda, Persia mutu neitamai dinin, propinsi sida, Elam kunmasi. Aneitamaida, Susan mutupu katuai kupupa epsi. Ada, Susan mutu neitamai tekmasidi, ne tekmasi mekin er sida, Ulai mekin tekmasi.

3 Amekin tekmasidi dinmasi taruda, Ulai mekin pirman damaida, jem domba bisam ton, er giso deiki di, lyom takke ^{▼▼takke – Aupu deiyoda, ada jem sapi bisam do, jem kambing bisam do, sun giso deiki tara takke keca utopunge tep pepmepe. Ada Indonesia upu deiki di, ‘tanduk’ peramenge tepa.} keca, takke utopu ngeda, butene belepmaupa epsi. Dinino, takke tenpu ngeda, ila lyom kupu dinin, yuk takke ngeda, yambulpu kupupa epsi. Ton takke ngeda, yambul lyompu kupu ngeda, menmena belepupa epsi. Dinin, amenda taru belepu takke keca, ila lyom konum kupu ngeda, amenda belepra tekupa, epsi. 4 Ne tekra dinmasipa, agem domba bisamda, timur tara cap, barat tara cap, selatan tara cap, tonda utara tamna cap, sepdaro embanmau taruda, er giso genepra, giso deiki takke keca ereipudi, banmaupa epsi. Adomba sepdaro banmau taruda, yuk gam kun kecadi men yandupmanto kupi. Er puto weik kupmaua cadi, er urasin tarada, yuk gam kun keca yumada, tekmanto men kupi. Adomba er puto di, ‘Ukupkun, ange ton poptapkun’ tenepne ngeda, atenepnetopu kunmauadi, ‘Ne sipu ereipkune,’ tenepudi, sal nong-nong deiki banmaupa, yuk gam keca do, yuk nesala do yuma, er tenepmautopu ngeda, men lyepronmanto kupipa, ange ton epsi.

5 Nedi adomba tep, tupa dinapu kunmasidi, ‘Angeda ware deiyo tep kurur do?’ tenen, tupa tenepmasi taruda, jem kambing bisam ton, keteng dangban tara di belepudi, tuai mutu ban-ban yuma, tu deiki yanina gum dinin, yambul alau tara sepdaro yakanmaupa epsi. Ataruda, puto di sepra yakanmaua cadi, er yanda tu deiki yanipra men yakanmau. Tonda, agem kambing, er asuru dana-dana kupka neitamai di, takke keca tenpu ila lyomnge beilyamu ngeda epsi.

6 Gem kambing bisamda, jem domba bisam er damai ton, ame pirmanai yana tekmaupa epsi. Agem kambing bisam er yu weik kupupa, ‘Domba bisam popkun’ tenen, adomba bisam tekmau tarapu sepdaro yana, lukra donokmanto kupu. 7 Agem kambingdi, domba bisam ponmau ngeda, ne tupa tekmasidi moupra dinmasi. Gem kambing bisamda, pio yu kupmaua cadi, er giso takke di, me damai tekmau jem domba lukra popu. Popupa, agem domba, er giso deiki di beilyamu takke nge buteneda, lukda pepra saku. Ukupka cadi, agem domba bisamda, puto pio boun kupu cadi, tamupra men popbisipmanto kupu. Adomba erda, tu deiki saka dourbenmaupa, jem kambingdi yana, adomba er nong deiki yanipdongopra ponmau. Akambingdi, domba ponmau taruda, akambing er puto pio weik kupka cadi, nimi tenpu ngebo pe ton, adomba men melipra lyepmanto kupu.

8 Ange yuma ukupu pangeda, agem kambing bisamda, ‘Neda ila puto weik ngebo’ tenen, sal nong-nong pio weik kunmaua deiki di, er pe si weika di eremau. Dinino, akambing bisamda, er puto di talepra kupbanmauanen, ataru neitamaida, er giso deiki di, ila takke belepmau ngeda, copra saku. Acopra sakuai di, pio kamu yuk takke nge ton dumbari, er giso neitamai di belepra teki. Abelepra teki takke nge yumada, dana-dana yuk-yuk belepra tekidi, katuai kupipa epsi. Er giso deiki dinin, tenpu takke ngeda itara, ton ngeda utara, ton ngeda keteng yakan tara, ton ngeda keteng dangban tara belepudi, dana-dana tara kupupa epsi.

9 Adumbari giso takke belepka kan-kan di, tenpu ngeda, yambul giso takke ton belepra teku. Ayambul giso takkeda, er puto weik cadi, dapu tara ara, arah utara tamna cap, keteng yakan tara cap, tonda pio urasin telep mutu, Israel nesala mutu tara yumada, er dipapu, ‘Amutu yuma talepkun’ tenen, dinmau. 10 Agiso takkeda, er puto pio nepbanmaunen, er puto pio weik kupupa, im alau tarato welepra kupu. Ukupu taruda, erdi, ‘Ne puto weik kupnera cadi, im deiki tara, jen talena neng, ada im neitamai ingamre kuruda, sun damai bena popkune,’ tenepudi, ton tara ngeda, bena popu. Ukupudi, kuru im deiki ingamre ngeda, weikanun dopra, tuai mutu deiki dokotepudi, er yane di yanipdongopu.

11 Angepu gum dinin, erdi im deiki kunung jen talena neng yuma, sun ila deiyo ngebo tep, derepra malya pepudi, im deiki ila deiyo ngebo, er gispal dona tep, tumi-tumi yuma, tuai nesaladi, gam keca doupra, kareryakarami ngeda, ‘Angeda yapkurume,’ pepra, upu sekudi, gum kupra deipupa, sun imam-imam nengdi, akeca ton men karepmanto kupi. Tonda, im deiki kunge jen talena neng, sun ila deiyo ngebo tep, er si eremna tep doami ati yumada, mali weik keipu.

12 Ange yuma ukupka deiki di, Allah er si eremamidi, tuai mutu kurami nesalada, ton nengdi, sundi tek sisi kunange tapidi, gonga keap, pio malipu kuramidi, Allah er si eremna tep karerami ngeda, taprapidi, amali ngebo tep, er gispal dona cap, er si eremna cap tep, sundi yapi keca doupra karerbarami. Adeiki di, sundi Allah er tek sisi upuda, konum dopra, tu deikipu dokotepi. Ukupmaipanen, agiso takke kwamu ila mali deiyo ngebo, erdi pel doramu keca yumada nongpu kupudi, telep cap, puto weik cap, tapakra kepbaramu.

13 Ukupuopda, ne gekesipa, Allah er pel don ngebo, im deiki malaikat tenpudi, yuk malaikat tep, malye pepra, aupu pepra asipetepu. “Uo, akunmarpa epmepe ngeda, ware kuprap taru di, tupa kepbankamreyanen, konum kupra gawal dakamre do? Tonda, ware kuprap taru ton cap neitamai di, aputo weik mali deiyo ngebodi, Allah tep mali pepredi, tumi-tumi yuma, Allah er si eremna tep karerbanung ngeda, ‘Yapkurume,’ pepra upu sekredi, gum kupra derinkamre do? Erda ware kuprap taru ton, ila puto kepredi, akeca yuma bisbisa kapra, talepra tekamre do? Tonda, ware kupra taru ton cap, im deiki jen talena neng cap, sun jen talena deiyo ngebo cap, popra bisbisa kapredi yaninapu kunkamre do? Tonda, im deiki ila deiyo ngebo, er si eremna ati tep, pio mali kupra yanipdongopmare ngeda, ware kupra taru ton, mali keipkamre do?” pepra, asipetepu.

14 Upepra asipetepupa, yuk im deiki malaikatdi tamupra pepu. “Gume, tumi-tumi yuma, ipna cap, lukunda cap dakupbaramrepanen, denge pio weik, dua ribu tiga ratus (2.300) ^{▼▼(2.300) – Aupuda, Ibrani upu deiki anomor seki ngeda, ikin kurura cadi, yambul walwal atonun kunupe. Atep, ton Alkitab buku neitamaida, sundi 1.150 tumi seki. Ton yuk Allah upu buku neitamaida, nun sekmeputopu 2.300 tumi seki.} tumi ton, tupa kepbankamre.

Tonda, ataru neitamai yumada, nimidi Allah er si eremna cap, er gispal dona tep, karerameng ngeda, keteng komuni cap, lukunda cap kareryakanung ngeda, amali kuna deiyo ngebodi, upu sekrepa, nimidi akeca dopra ton cap men kareryakankamenge. Dinino, apepman taru konum kupyopda, Allahdi er si eremna atida, kange di tamupra telep kweipkamre,” pepupa gekepsi.

Malaikat Gabrieldi, Daniel ken lunlun di epmaunge lap peryaua tep, seki upu

15 Ataruda, ne Danieldi akeca yuma ukunmaupanen, epmasi ngeda, ‘Uo, ange yumada, er nong betapra kael keptene’ tenen, pirinmasidi, tupa tenenapu kunmasi. Ukunmasi taruda, men tenepmasi dinin, dato-dato di, nimi kamu utopu kupmau ngebo ton, ne urasin tara yana tekmaupa epsi. 16 Angeboda, malaikat dinin, nimi urasin utopunge yana, ne urasin tara tengyau taruda, gekenmasipa, Ulai me goupra, ortara di, nimi upu ton peipupa, ange gekepsi. Ada, “Kanda Gabrielo, kandi angebo er ken deiki epmaunge yumada, ‘Betapra kael keptu’ tenen, er damai bememdi, aken deiki epmau keca yuma, er nong neitamainge lap pepkurume,” pepupa gekepsi.

17 Upepupa, Malaikat Gabrielda, ne nong meneng damai sisa tengyau. Ukupu taruda, ne pio kware kupneupa, adipapu loka tu deiki dourbesi. Ukupsipa, amalaikat Gabrieldi ne tep pepneu, “Kanda nimidi deipkei ngebo kurum dinino, ne pepkuken kecada, moupra kael kepo. Ken lunlun deiki di kunmaupa, epmarum keca yumada, amenda taru, tuai mutu yuma siria gawal dakamre taru kupkamrenge tep, aken deiki di epmamume,” pepra lap pepneu. 18 Malaikat Gabriel erdi, aupu tupa penmau taruda, ne udungna weik kupmaneupa, tu deiki loka dourbenmasidi, keana taru di mapmasi. Dinino, amalaikat Gabrieldi, ne melimna tep, ne nong talepra bukeipneupa, ne tamupra buksi. Buksipa, erdi ne tep upepneu.

19 “Nedi kan tep upu ton lape pepkukene. Ada, amenda taru, sirya dangne taruda, kandi arup epmaumum keca yuma tep, Allah er yu kuprepa, kupkamrenge tep, lap pepkukene. Kan ken lunlun deiki kunmaupa, epmamum ngeda, Allahdi, ‘Ataru ake,’ teneamutopu, amenda sirya gawal dangne taru kupkamrenge tep epmamume,” pepneu. 20 Ada, kan dinmamumpa, jem domba bisam giso deiki di, takke keca butene beilyamu ngeda, ukupmantonge epmamume. Dinino, atakke keca buteneda, er nongda, Persia mutu nimi deiyo ngebodi talepkamrenge cap, tonda Media mutu nimi deiyo ngebodi talepkamrenge tep epmamume,” pepneu.

21 Tonda, jem kambing bisam, er nong bol deiki potong weik kwamupa, epmamum ngeda, ukupmantonge tep epmamume. Ange er nongda, Yunani mutu talepra nimi deiyo ngebo kunkamrenge tep epmaume. Akambing er asuru dan-dana neitamai di, tenpu takke nge pio belepra tekmaupa, epmamum ngeda, er deiyoda ake. Ada, menmena nimi deiyo kepra, Raja kepkamredi, Yunani mutu talepkamre ngebo tepa.

22 Tonda, menmena taru, kambing bisam giso deiki di, takke nge tenpu belepra tekmaunge, copra sakupa, adeiki di yuk takke nge dumbari ton belepra tengyangupa epmum ngeda, menmena taru tenpu ngebodi, Yunani mutu yuma talenkamre dinin, amenda taruda, amutu neitamai, yuk-yuk bokra, dumbari neng ton belepmengedi, nimi deiyo kepra amutu bokra, dumbari keprepa, amutu-amutu talepkamenge tepa. Dinino, sun adumbari nimi deiyo kepra, tuai mutu cap, nimi cap, talepra kunkameng ngeda, menmena ngebo, jem kambing utopu ngeboda, er ila puto kupkamrenge utopu, sun adumbari deiyo nengdi ange utopu men kupkamenge. Menmena ngebo ila puto weik kupkamre dinin, sun amenda taru dumbari nimi deiyo kepra Raja nengda, sun putoda yambulpu kunkamenge.

23 Adumbari nengdi, nimi deiyo kepra, Yunani mutu taleramenganen, sun talenkameng mutu neitamai kunkameng nesalada, pio mali kun keca weik talepra kupbankamenge. Dinino, amenda amali kunange, sirya gawal dangkamre taru damai kupyopda, yuk ngebo ton tekamre. Ada, adumbari mutu neitamai, tenpu mutu talepra kunkamre ngebo, erda pio ila balila cap, yu weik cap kure ngebodi, nimi deiyo kepredi tekamre. Erda, mok upu pena ila kael ngebo kunkamra cadi, mok upu weik penkamre.

24 Animi deiyo ngebo Rajada, ila puto ngebodi talepkamre dinino, er puto kupkamre ngeda, er pe dipapu, puto weik men kunkamre. Tonda, angebodi, nimi weik popredi, tonda akeca-keca weik ton urupra daktapkamredi, gawal dakamrepa, gum kupkamre. Ukuprepa, nimi epmengedi, nesala yuma kwar weik kunkamre. Tonda, angebodi, ‘Ukupkamne,’ tenepre keca yumada, tek sisi kupkamre ja. Atep, erdi kunkamrenge yumada, tek sisi kunkamre. Tonda, er mali weik kupkamrenge deiki di, yuk puto kunge neng denge weik cap, tonda Allah er nyapu sisa denge yambul weik cap, popra gum kudinkamre.

25 Angeboda, er ila kael deiki di, ‘Ne upupu gekepnetenge’ tenen, mawa di mok upu penkamra deiki di, nimi weika di, er upu tep, ‘E tek penmasere,’ tenepmengedi, teka tenenkamenge. Atep, er kunkamre keca yumada, nongpu kepbankamre. Animi deiyo ngebo, puto weik, mali weik kunkamre Raja, erda sal nong-nong kapreya deiki di, dipru eremna ngebo kunkankamre. Tonda, erdi, “Angeda ukupkamane,” peprepa, er upu gekepkameng neng, teka tenepmengedi, ‘Nunda teleppu kunkamepe,’ tenepkameng dinin, men kael kepmangepapu, erdi nimi weik ponkamre.

Ange utopu, amali ila puto Raja ngebodi, Allah er pe tep, kware tenena gum di, yaniptapredi, ‘Allah er kure keca yuma tep, bisbisa kapnedi, gum kudinkamne’ tenen, piripetepkamre. Piripetepkamre dinino, amenda taruda, animi deiyo ngebo Rajada, Allah er pe ila puto deiki di, angebo wenepredi, poptapra gum kupra deipkamre. 26 Allah er si eremna tep, gam keca popra yangedi, ipna taru pe, keteng komuni taru pe, Allah er si eremenge nge tep, arup taru ken mapmauma deiki lap pepkeupa epmum ngeda, tek sisi amenda dortaru nong kupkamre. Dinino, aepmumnge yumada, amenda dortaru kupkamrenge tep, ataru neitamaida, aupuda, nimi yuk neng gekenmangai ton, kapul men lap pepkamrume.

27 Ataruda, ne Danielda, ne nong puto gum kupneudi, ware kuprap tumi ton, pu weik jeramneu. Ukuamneupa, ukuramsiyanen, kange di tamupra buksi dingeda, nimi deiyo ngebo Rajadi, ne tep, ‘Apel dopneo,’ pepra, kareamneu ngepu donmasi. Dinino, ken deiki mapmasipa, akunmaupa, ne asuru di emsinge tep, ‘Uo, akecada. Er nongda dano? Ware kupkamre do?’ tenen, kware kupneupa, tenimtonapu kuramsidi, pio moupra, ‘Deiyo atepa’ tenen, men kael kepmanto kepsi.