Dan 9 | XteSC | STEP | Media mutu sisa ngebo Ahasyeweros, er mi Darius tep, erepra deipipa, erdi Babel mutu nesala cap, Babel mutu yuma cap taleamu. Ataru neitamai dinin, keteng tamun menmenange neitamaida, ne Danieldi, mambul keca kael kepsi.

Daniel 9

Danieldi Allah tep moropu upu

1 Media mutu sisa ngebo Ahasyeweros, er mi Darius tep, erepra deipipa, erdi Babel mutu nesala cap, Babel mutu yuma cap taleamu. Ataru neitamai dinin, keteng tamun menmenange neitamaida, ne Danieldi, mambul keca kael kepsi. 2 Babel mutu ila nimi deiyo ngebo, Dariusdi keteng tamun tenpunge deiki, Babel mutu yuma taleamu taruda, ne Danieldi Allah upu moupra nungmasidi kael kepsi. Ada, Allah er si Yahwehdi, er upu Yeremia kori peipupa, nabi Yeremiadi sekamu buku neitamai moupra nungmasidi epsi.

Ada, yu nengdi Yerusalem mutu nesala yuma popbisipidi, amutu ati yuma uruptapipa, ati walangapu dakupbaramnganen, Yerusalem mutuda, keteng tamun tujuh puluh tahun (70) konum kupre pangeda, amenda taru Yerusalem mutu ati, kange di punupra dopkamenge. Ange yumada, Allahdi er upu lap peramu ngebo Yeremia tep lap peramupa, Yeremiadi aupu sekra deipseu buku neitamai nungmasidi kael kepsi.

3 Ange yuma epsa tep, nedi Allah tep moropsi. Allah Yahweh ^{▼▼Yahweh – Ayat 3 neitamaida, Ibrani upu deiki di, ‘Yahweh Adonay’ seki. Allah er pe si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, ‘Yahweh’ kwamngai,’ tenenkamrume. Allah er si Yahweh penada, telepe pua. Tonda lap pena upu nomor 49 dirume. ‘Adonay’ deiyo ngeda, sun kael kemna tep, konum jenek kupra sekmepu.} erda akeca-keca yuma talepra, deiki tara erepra, pio puto weik deiyo ngebodi, ‘Ukupkamne,’ teneretopu kurura cadi, er tep moropsi. Ada, ‘Allah bicau tenepredi dipru kareprepa, nun Israel nesala tep lyepropkamser’ tenen, moropsi. Amoronmasi taruda, ikin kange dounmasa cadi, mali opkal keneksidi, ne jen jena gum di, si tepra kunmasidi, Allah tepapu, ‘Angeda kupserur’ tenen, “Lyepropsetume,” pepra moronmasidi, mambul kange dounmasa tep, sikke deiki bukmasi.

4 Ne nai bo Allah, er si Yahweh tep moronmasi ngeda ake.

Ne nai Allah, kanda akeca-keca yuma talepra, deiki tara erepra, pio puto weik deiyo ngebo kurume. Cadi, nun Israel nesala, nun mali kunup kecada, men inipkune. Nun malinge yumada, kan damai katuai lap pepra, lopra deipkenedi moropkene. Ada, tek sisi kanda Allah Yahweh, puto weik ngebo kurume. Tonda, kandi, “Ukupkamsene,” pepra pedina upu peiamsemum ngeda, men tamserume. Adipapu apedisememtopu, tek sisi kuserume. Atep nengeda, Allah kan tepapu teka tenekenung nesalada, kandi sun tep pio bicau tenepra melimrume. Amelimem nesalada kandi, “Angepu kunkamrume, angeda men kunkamrume,” peipmumpa, aupu moupra talepra kunung nesala tep melimrume.

5 Dinino, nun mali kunup nesalada, Allah kandi nun tep, “Ange kuna gume,” peipsemum dinin, angepu tamupra kunupe. Tonda, kandi, “Angeda kunkamrume, angeda men kunkamrume,” pepsemum upu yanitamepedi, kaukemnapu kunupe. Ukupeya deiki di, kan peiamsemumnge yumada, konum tapmepu. 6 Angepu gum dinin, Allah kan upu lap pena deiyo neng, kan amutara pel don neng, sun nabi-nabi nengdi, nun damai kan peramum upu lap peramsei. Ada, kan si deiki di, sun nabi-nabi nengdi, nun nimi deiyo neng Raja neng damai cap, sun amutara yuk deiyo-deiyo neng sun damai cap, tonda nun co puna neng damai cap, tonda amutu neitamai kurami nesala yuma cap, nun tali akuramnup nesala cap tep, pediramsemum upuda, moupra men gekepyakanupe.

7 Atep, ne nai Allah, ^{▼▼Allah – Acada, Ibrani upu di, ‘Adonay’ pepra sekya cadi, nundi aupu ‘Adonay’ deiyo ngeda, jenek kupra sekmupu.} akeca-keca yuma talepra, deiki tara erepra, pio puto weik deiyo ngebo kurume. Kanda, tek sisi ngebo, pio dumsisipu kumemdi, nun damai telep ngepu kupra, dumsisi pelpu doserume. Dinino, nun pedi nun pe tepapu, mali kupra deipdapedi, pio mali weik kunupa cadi, ali dangnato kunupe.

Ada, nun yuma, Yehuda yala nesala cap, Yerusalem mutu neitamai kunup nesala cap, Israel nesala yuma cap, ali dangnato kunupe. Tonda nun yala nengdi, kan damai mali weik kuramepupane, kandi nun yala bokra deipmumpa, yuk karen mutu dakunung nesala cap, damai mutu kunup nesala cap yumada, mali kunupnge tep, ali dangnato kunupe.

8 Teka ne nai Allah, kanda Yahweh kurume. Kan damai ali dangne ngeda, nun deiyo neng yuma cap, nun talepsei neng yuma cap, nun co puna neng cap, nun yumadi kan tenena gum keca kupedi, kan damai mali kunupa cadi, nun ali weik kuserure. 9 Ukupepapu, nun nai Allah, kan sipu eremnupe. Allah kanda, akeca-keca yuma talepra, deiki tara erepra, pio puto weik deiyo ngebo kuruma cadi, nun mali kuna tep nengeda, kandi tali lupra wenepra poptapsetum dinin, kandi tek sisi nun tep bicau tupa teneseruma cadi, dipru karepkerepa, nun tep kaukemserume. Tek sisi nunda, pio ila mali kupedi, kan peiamsemum upu yaninup neng dinin, bicau tenepra melimserume.

10 Nun nai Allah, kan peiamsemum upu gekepra men kunupe. Uo, nun nai Allah Yahweh, kandi, ‘Angeda kunkamrume. Angeda men kunkamrume,’ pepra deipsemumpa, kan amutara pel don neng, kan upu lap pena neng, sun nabi-nabi nengdi, nun damai lap peramseipane, nundi ange yuma gekepra men kurameputopu, tupa men kunupe. 11 Nun Israel yala nesala yumada, kandi, ‘Ange kunkamrume, angeda men kunkamrume,’ pepra, deiamsemum ngeda, betapra gekepmepedi, moupra men talenupe. ‘Allah peipseu upu, nun song’ tenen, kan tep amnyo karekra, tali kaukemtamnupe. Adeiki di nun nai Allah, kan damai mali kudikenupe.

Ada, kan amutara pel don ngebo Musa, er kori peiamumpa, sekamseu upu abuku neitamai jenek peramum upuda, ‘Allah ne upu yanimum pangeda, nedi ila kange mun keca sun nong deiki derinkamsene. Tonda, ila di wenepsenedi, widongonkamsene,’ peiamsemum ngeda, ukutaru nun deiki konum yakarure. Ada tali tep gume. Nundi pio mali kuramepupane, kandi nun tep, ‘Malipu kunkameng’ tenen, wipdongopsemume. Awipdongopsemuma deiyoda, nun mali kuramepua tepa.

12 Atep nengeda, Allah kandi nun nimi deiyo neng cap, nun Israel yala nesala yuma cap tep, “Ne upu yanipmumnyopda, tek sisi wenepsenedi, kange mun keca weika di karenkamsene,” pepra, pedina upu deiki peiamsemume. Aupu peipsemumtopu, mali kuramepupane, ila ikin keca pio weik kareramsemume. Ada, Allah kandi Yerusalem mutu neitamai kunung nesala yuma tep, ila kange mun wenemna wenemsemuma deiki di, mali nengdi Yerusalem mutu nesala popbisipidi, amutu ati cap, amutu keca yuma cap, urupra sikke buktami ngeda, tuai mutu ban-ban yuma kunung nesala neitamaida, akuamumnge utopu ton men kupmume.

13 Angeda, Musa sekamu buku neitamai di, “Sunda malipu tupa kupmumnyopda, tek sisi ila kange mun keca doropkamrume,” peiamumpa sekamu. Aupu peiamsemumtopu ukutaruda, Allah kandi nun wenemna tep ikin keca nun deiki derinmasereme. Ukunmaserempapu, nundi nun nai bo Allah, kan Yahweh tep, ‘Teka angeda, nun pe mali kuramepua menenga di, ikin keca dopropmape,’ tenena gum di, tamupra kan damai malipu kupra deipmakepu. Ada nundi, ‘Nun mali kunup keca yumada, tapmepedi, Allah er tek sisi upupu talenkamepe,’ men tenepmepu. Tonda, Allah kandi, ‘Angeda kunkamrume, angeda men kunkamrume,’ peipsemum ngeda, moupra men talepmepu.

14 Amali kuramepua deiki di, nun nai Allah kandi, nun tep wenepmasereme. Ada kandi, ‘Sun anesala damai ila ikin keca dopropmengedi, kange mun kunkamre’ tenen, keteneiamsemum keca, konum nun deiki yanmaserpa dopropmape. ‘Aneng wenepkamne do, gum do?’ tenena gum dipapu, wenemamsemume. Deiyoda, ake. Nun nai Allah Yahweh, kandi pel domem ngeda, tek sisi dumsisingepu pel doserume. Dinin, nundi kan upupuda, pio moupra men gekenupe. Danieldi Allah tep pepu. Upepudi, aupu ton dukdongopra pepu.

15 “Ange tep nengeda, nun nai Allah, kanda akeca-keca yuma talepra, deiki tara erepra, pio puto weik deiyo ngebo kuruma cadi, kan sipu eremnupe. Kandi kan nyapu Israel nesala, Mesir mutu neitamai kurami taruda, ikin weik kuramipane, kan buru puto deiki di doupra yanamsemume. Ada, ‘Sundi ne puto kael kepkamneng’ tenen, kuamume. Kandi ila mambul pel doramuma deiki di, nesala weika di, kan sipu eremnunge. Kan sida pio men lupronkamenge, tenenapu kunkamenge. Dinino, ataru nunda tupa mali kupedi, kan si yanikenupe. Ada, nundi kan peiamsemumtopu men kunupa deiki, kan damai mali kunupe.

16 Uo, nun nai Allah, kandi akeca-keca yuma talepra, deiki tara erepra, pio puto weik deiyo ngebo kurume. Dinino, nunda malipu kuramepu dinin, Allah kandi menop taru di dipra, ataru peda tupa dumsisi pelpu dorume. Dumsisipu kuruma ngeda, tupa tenenapu kunupe. Teleppu kuramrumtopu, ne nai Allah, ukutaru kan yu kupkere ngeda, taptume. Ada, ukutaru pe, dortaru peda, ila kange mun keca, nun Yerusalem mutu nesala deiki derinkamserum ngeda tapsetumdi, kange di ton cap men karenkamserume. Yerusalem mutuda, kandi weipmuma cadi, kan mutu sisa utopu kurure.

Yerusalem mutu buma deikida, pio telep kupra deipmumpa, lek mutu ^{▼▼Lek mutu pepkada, ‘Amutu pio teleppu kurure’ tenen, pepke.} utopu kurure. Atep, ‘Amutu wenemna keca ton men karenkamserum’ tenen, moropkene naio. Uo, nun nai Allah, Yerusalem mutuda, kandi weipmum mutu dinin, nun cap, nun co puna neng cap, nun yumadi mali kunupa deiki, sun yuk mutu nesala yumadi, Yerusalem mutu tep mali upu penunge. Nun kunupai dana-dana kunung nesala yumadi, kan nyapu Yerusalem mutu kunung neng cap, Yerusalem mutu cap tep, mali pengedi, ‘Sunda mali kununge,’ pepra nyek-nyek pesenunge,” Danieldi Allah tep pepra moropu.

17 Danieldi aupu ton moropu. “Atep nun nai Allah, kan sipu eremkenupe. Neda, kan amutara pel don ngebo Danieldi, kan Allah tep, ‘Melipseo,’ pepra, moropken ngeda, gekepnememdi melipserume. Ada, kan mawa mutu Yerusalem neitamai, ati arum dopra kuramepupane, yuk nesala beidi, nun ati yuma konum urupra tapsei ngeda, tamupra telep kupra deipserume. Ange ukupra deipsemempa, yuk mutu nesala yumadi akupmemnge epmengedi, ‘Tek sisi Allahda erpu kurure,’ tenepmengedi, kan sipu kael kepkamkenge. Allah kanda akeca-keca yuma talepra, deiki tara erepra, pio puto weik deiyo ngebo kurume. Dinino, kandi Yerusalem kange di ton cap telep kupra men deipsemem pangeda, ‘Yuk mutu nengdi, ton cap mali pekenunge’ tenen, moropkene naio.

18 Tonda, nun nai Allah, kandi nun moropkepnge gekepseo. Nun nai Allah, nun ati dopra kuramepu mutu, yuk nengdi bena uruptapseipa, kange mun kangepu doupra kunup ngeda, kandi epsememdi melipseo. Ada, Yerusalem mutuda kandi, ‘Amutu neitamaida, ne si deipnepa, amutu neitamaida, ne si eremkamnenge,’ peiamsemum mutu tep moropkene naio. Tonda, nundi kan tep moropkep ngeda, nun kange dipapu, ‘Nunda dumsisi kunup neng cadi, moropmepyopda, tek sisi Allah gekenkamsere’ tenen, men moropkepe. Ange gum dinin, nun kunupnge tep, tali lupra wenepra poptapsetum dinin, kandi epsememdi, bicau tenepra, nun tep melimserume. Kandi bicau teneseruma tep, ‘Allah er telep kurya deiki di melipkamser’ tenen, morokenupe,” pepra, Danieldi Allah tep moropu. Tonda, aupu ton moropu.

19 “Nun nai Allah kanda akeca-keca yuma talepra, deiki tara erepra, pio puto weik deiyo ngebo kurume. Nun nai Allah, kandi nun moropkepe upuda gekepseo. Tonda, nun mali kunup ngeda, kaukepsememdi lyepropseo. Tonda, nun nai Allah, nundi moropkepe ngeda, gekepsememdi, ‘Aneng cap, Yerusalem mutu capda lyepropkune,’ tenepseo, naio. Amoropkep ngeda, pio sik pirina gume. Adipapu melipseo naio.

Deiyoda, yuk nesala yumadi, ‘Allah erda nimi lyemna ngebo kurure’ tenen, konum kael kepkeiye. Tonda, Yerusalem mutu neitamaida, kan si deipsemume. Tonda, kan nyapu Yerusalem mutu kunung nesala yumada, kan mawa nesala pua. Atep nengeda, kandi lyepropsemempa, ‘Nimi yumadi kan sipu eremkamkenge’ tenen, moropkepe naio.” Danieldi Allah tep moropu.

Malaikat Gabrieldi Daniel tep, amenda taru kupkamunge tep, yan lape pepu upu

20 Ne mali kuramsinge cap, Israel nesala yuma sun mali kuraminge yuma cap tep, ‘Allah Yahwehdi kaukepseredi, lyepropkamser’ tenen, moronmasi. Tonda, Allah wepra deipudi, pio telep kupra deipu mutu, Yerusalem mutuda, mali nengdi uruptapsei ngeda, ‘Allahdi kange di ton cap telep kupra punupra deipkamser’ tenen, moronmasi. Ange yuma tupa moronmasi taruda, malaikat er si Gabrieldi ne kori yau.

21 Allah moronmasi dipapu dinmasipa, malaikat Gabriel, yaue. Gabrielda, Allah er upu peiprepa, aupu doupra kai lap perembana deiyo ngebo kurure. Gabrielda, arup taru ken mapmasa deiki epmasi ngeboda, er Gabriel pua. Ne tupa Allah moronmasi taru, Gabriel lakra menmena yakaupa, epsi. Er yau ketengda, sintara nimidi Allah er si eremna tep, yapi keca popra, uku dongorameng ketengpu, yakaupa epsi.

22 Ataruda, malaikat Gabriel adipapu, ne damai yaudi, “Danielo, ne kan kori yanmanada, deiyo ake. Ada, amenda taru kupkamre ngeda, lap pepkenepa, kandi aupu nong neitamainge, ‘Deiyo ake’ tenen, kael kepkamreme. Amenda taru kupkamre ngeda, nonge jenek pepkenepa, kandi betapra kael kepkurema tep, lap peryanmakene. 23 Kandi Allah tep, gonga kepra moropmamum taruda, Allah adipapu konum gekepmakera cadi, erdi kupkamre ngeda, kan tep lap peryakene. Deiyoda, Allahdi kan tep, ila di kange deipkeua tepa. Atep nengeda, nedi pepkuken upuda, kan moupra gekenkunerume. Nedi kan ken mapmumnge lap pepkenepa, er nonge kael kepkureme,” malaikat Gabrieldi Daniel tep pepu. Gabrieldi pepu upuda ake.

24 Allahdi sun Israel nesala tep, tujuh puluh kali tujuh (490) taru ^{▼▼taru – Ibrani upu deiki seki ngeda, ‘Deiyonge dan do?’ tenen, ikin kuserura tep, nun yuma yambul walwal kuserure. Aupu seki ngeda, ka di ton cap, ayat 25 cap, ayat 26 cap neitamai ton sekipa akurure. Ton kael nengda, aupu deiyo tep, ‘minggu’ penunge. Ton kael nengda, ‘tahun’ penunge, ton kael nengdi, ‘taru’ penunge.} ton, go tapakra karepkamsere. Akarepkamrenge deiyoda, ake. Ada, Allah er mawa nesala, Israel nesala cap, tonda Yerusalem mutu neitamai kunge nesala capdi, ‘Sun mali kunge keca yuma tapkameng’ tenen, go karepkamsere.

Ada, sun mali-mali kungedi, Allah er upu yanipra tamnung ngeda tapmengedi, ‘Kange di tamupra Allah damai yankameng’ tenen, go karepkamsere. Ukupmengopda, Allah er mawa mutu Yerusalemda, mali kudongoramenge nge yuma, gum kupra deipredi, telep kupra deipkamre. Ataruda, sun mali kuramenge keca yuma, gum kupra deipkamsere. Ukupra lyepropserdi, pio dumsisi kunangepu karenkamsere. Adumsisi kunada, pio men gum kupkamre.

Tonda, Allahdi kareramupa nimidi, ken deiki diramenge keca cap, Allah er upu lap pena neng, nabi-nabi nengdi, amenda taru kupkamunge cap, kupkamrenge cap, lap penung upu cap, nong katuai kupkamre. Tonda, Allah er Pio Telep Lengna Ati ^{▼▼Lengna Ati – Ibrani upu deiki seki ngeda, ‘Deiyonge dan do?’ tenen, ikin kuserura tep, nun yuma yambul walwal kuserure. Aupu seki ngeda, deiyo butene kurure. Ibrani upu kael neng, ton nengda, aupu deiyoda, ‘Pio Telep Lengna Ati dopkamenge,’ penunge. Ibrani upu kael neng, yuk nengda, ‘Pio telep kure ngebo ereipkamenge,’ penunge.} keteneipmengedi, telep kupra dopkamenge.

25 Apepken ngeda, kandi sekmemdi, moupra kael kepkurume. Allahdi peiprepa, deiyo nengdi, “Yerusalem mutu neitamai, Allah er si eremna ati kange di tamupra dopkamenge,” pepra, deipmenge taru di gonga kepra, adinen nukmengedi, Allahdi wepra deiprepa, sun talenkamser ila deiyo ngebo ton, yankamre taru daneitamai taruda, tujuh kali tujuh (49) taru kepkamre. ^{▼▼taru – Ibrani upu deiki seki ngeda, ton kael nengda, aupu deiyo tep, ‘minggu’ penunge. Ton kael nengda, ‘tahun’ penunge, ton kael nengdi, ‘taru’ penunge.} Ukuramengepane, ataru konum kupre pangeda, Allahdi wepra deipkamre nimi deiyo ngebo yan talenkamsere. Ukupredi, ton cap tapakra go karepkamsere ngeda, enam puluh dua kali tujuh taru ton (434) kepkamre.

Ataruda, tujuh kali enam puluh dua (434) taru neitamaida, Yerusalem mutu ati cap, amutu embana tep bisi yuma cap, Yerusalem mutu ongopgenepra, dana-dana tara yuma got palinkamenge cap, ange yuma pel dopmengedi, betamkamenge. Ange yuma domengedi betapkameng dinin, apel donkameng taru neitamai yumada, ila kange mun deiki di kunkamenge.

26 Allahdi wepra deipkamre ngebodi talenkamser dinin, go ton tapakra, enam puluh dua kali tujuh taru ton (434) gawal dakra konum kupre pangeda, er atalepkamser ngeboda, er mali kuna gum dipapu popkamenge. Popmengopda, er keca yuma gum kuprepa, nimi yumadi, ‘Uo, erda talipu kuramu. Erdi, ‘Ukunkamne,’ teneramu ngeda, nong men kupu,’ tenenkamenge.

Ukupmenge taruda, yuk ngebo ton yankamre. Angebo nimi talena deiyo ngebo, ila puto ngebo ton yaredi, Yerusalem mutu cap, Allah er si eremenge ati, Yerusalem doamenge nge cap yuma, urupra daktapkamre. Ataruda Allahdi, ‘Angebo er kure keca yuma gawal dangne taru ake, ataru konum gum kupkure,’ teneputopu, ataruda ila me puto di menmena oramre utopu, menmena angebo, er kure keca yuma gum kupkamre. Ataru di dipra, doryankamre taru neitamai yumada, mar podana cap, ila kange mun keca yala-yala yuma capda, pio weik kunkamre. Ukupra kunmarepane, Allah teneputopu gawal dangne taru kupkamre ja.

27 Amali kunkamre ngebo, ila nimi deiyo kepra talenkamre ngebodi, nesala weike bupra wekmangai di, “Ne upu gekepnerumnyopda, nedi sun tep, ukupra kunkamsene,” pepra, sun damai pedina upu pepre pangeda, nimi weika di, ‘Telepe, kan upu gekenkamkepe,’ pepra, er tara kepronkamenge. Ada, yoneitam bari taru ^{▼▼taru – Ibrani upu deiki seki ngeda, ton kael nengda, aupu deiyo tep, ‘minggu’ penunge. Ton kael nengda, ‘tahun’ penunge, ton kael nengdi ‘taru’ enunge.} neitamai di kunkamenge. Atalepkamre taru neitamaida, er angebodi, “Sun mali kun keca yo pununa tep, ‘Allahdi kaukepkamser’ tenen, Allah tep yapi keca popra kareryakarumnge cap, tonda Allah er gispal dona tep karyakarumnge cap yumada, yapkurume. Ange men kunkamrume,” pepra, upu sekamre.

Ukupre dingeda, er angebodi Allah er si eremna ati arum deiki tarada, pio ila mali keca deipkamre. Akecada, mali kuna deiyo keca dopra, Allah er si eremna ati arum deiki deipkamra deiki di, akati pio mali kupkamre. Tonda, akecada acapu deipre pangeda, dakuramrepane, Allahdi, ‘Apio mali ngeboda, wenepra popnedi, gum kupra deipkamne,’ teneramu taru konum kupyopda, ila wenemna keca kareprepa, angebo gum kupra deipkamre.

Ange yumada, malaikat Gabrieldi pepupa, Danieldi gekepudi sekra deipu.