Deu 1 | XteSC | STEP | Abuku neitamai sekeiamu upuda, Musadi Israel nesala tep pepu. Erdi pepu taruda, sun yuma Yordan me dinin, keteng welepra yakaramre tara tupa kunmai. Yordan me goupra, ortara keteng dangbaramre tara kapul benmai. Sun kurami mutuda, me gumai cadi, nimi weik men kurami. Sunpu ke taru tep dakurami. Akatuai mutu kurami taru neitamaida, Musadi aupu pepu. Amutuda, Yordan me damai dinin, keteng yakan tara, mutu si Suf mutu damai kunmai. Suf mutuda, yuk yala neng mutu si ton, Paran mutu cap, Tofel mutu cap, Laban mutu cap, Hazerot mutu cap, Di-Sahab mutu cap, aneitamai sun Israel nesala kurami.

Deuteronomy 1

Yordan me goupra, keteng weleramre tara kapul benmai taruda, Musadi Israel nesala tep, pepu upu

1 Abuku neitamai sekeiamu upuda, Musadi Israel nesala tep pepu. Erdi pepu taruda, sun yuma Yordan me dinin, keteng welepra yakaramre tara tupa kunmai. Yordan me goupra, ortara keteng dangbaramre tara kapul benmai. Sun kurami mutuda, me gumai cadi, nimi weik men kurami. Sunpu ke taru tep dakurami. Akatuai mutu kurami taru neitamaida, Musadi aupu pepu. Amutuda, Yordan me damai dinin, keteng yakan tara, mutu si Suf mutu damai kunmai. Suf mutuda, yuk yala neng mutu si ton, Paran mutu cap, Tofel mutu cap, Laban mutu cap, Hazerot mutu cap, Di-Sahab mutu cap, aneitamai sun Israel nesala kurami. 2 Uda, Horeb mutu di, Kades-Barnea mutu bisi bana tep nengeda, ue denge kum dam di dutara, sebelas (11) tumi deiki di mapnedi embarami. Ada, Sier mutu neitamai barami bisi tep pepne.

3 Tonda, Israel nesaladi Mesir mutu tapra, Mesir mutu neitamai di barami taru di nukra, keteng tamun denge weik dumbari, ada empat puluh (40) tahun konum kupu pangeda, Musadi Israel nesala tep, abuku neitamai seku upu pepu. Tonda, aketeng tamun dinin, warda kum dam di dutara, sebelas (11) war deiki dinin, tumida tanggal satu, tumi tenpu deiki di aupu pepu. Ada, Musadi Israel nesala tep pepu upuda, Allah er si Yahwehdi, “Israel neng tep, upenkamrume,” peiamupa, Musa gekeramudi, upu akaputopu, sun Israel neng tep lap pepu.

4 Musadi aupu pepu taruda, ake. Ada, Amori nesala, sun ila nimi deiyo ngebo Raja Sihonda, er ila ati kuramngaida, mutu si Hesbon mutu kuramu. Dinino, Musadi angebo tep, konum bisbisa kapra popu taruda, aupu pepka tep pepne. Ange utopu, Musadi, Basan mutu nesala sun ila deiyo ngebo, Raja Og tep, konum bisbisa kapra popu taru, aupu pepu. Raja Ogda, er taleamudi ila ati dopkai mutu sida, Astarot mutu perami. Amutuda, Ederei mutu damai kupu. Amutu kurami nesala yumada, Musadi popra gawal daku dingeda aupu pepu.

5 Ange tep nengeda, Yordan me ortara keteng yakan tara neitamai dinin, mutu si Moab mutu neitamai Musadi aupu pepu. Musadi aupu pepu ada, Allahdi Musa tep, ‘Ukupkamrume, angeda ton men kunkamrume,’ pepra deiamu upu cap, peteremamu upu cap yuma, katuai di lap pepu.

Allahdi, “Horeb mutu tapra ortara mutu benkurume,” pepra deipu upu

6 Musadi Israel nesala tep aupu pepu. Nun nai bo Allah, er si Yahwehdi, Horeb mutu, tonda mutu si Sinai mutu di upepseu. “Uda konuma, sunda Sinai mutu damai kuramrum taruda, keteng tamun denge weik cadi, akonuma. 7 Ukuda amutu tapra, yuk mutu si Amori mutu benkamrume. Atep sun opkal tenda ati uruprapmumdi, doupra bemumdi, Amori yala nesala taleami tara neitamai yuma cap, sun talerami tara damai mutu yuma cap, sun pedi talerbenkamrume. Amutu yuma karepsenepa, sun pe mutupu kunkamsere.

Angeda, me gum mutu katuai mutu cap, ila mutu kwamu tara yuma cap, Yordan me duman buku mutu buma cap, adinen ortara banai tara cap, utara me gum mutu Negeb mutu cap, dapu tara ila laut mokon pirman tara cap, Kanaan yala neng tara cap, itara mutu si Libanon mutu cap, Efrat mutu cap adinen, ortara ila di embaramre me sida, Efrat me duman cap, amutu ortara, atara neitamai kurur mutu yuma, bemumdi amutu yuma talepra kunkamrume. Nedi amutu konum karepsena tepa.”

8 Tenipetepso. Amutu-amutu yumada, nedi konum karepmasena tep pepsene. Allah, ne si Yahwehdi ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf ‘YHWH’ angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} sun apu yapu Abraham cap, Isak cap, Yakub cap tep, ‘Amenda taru, amutu yuma karepkamsene,’ pepra deipsa tep pepne. Tonda, upepsi. ‘Sundi deipmumpa, sun nyapudi dadeipdanen baramenganen, deipkameng nyapu tep, amutu yuma karepkamsene,’ pepra deipsi. Atep, nedi, ‘Sunda amutu bena kunkamrume,’ pepra peiamsi mutupu, “Ukutaru sun bena talepra kunkamrume,” pepsene. Allahdi Musa tep pepupa, Musadi Israel nesala tep lap pepu.

Musadi, nimi upu lepsisikra bongdina deiyo neng wepra deipu upu

9 Musadi sun Israel nesala tep upepu. “Nun Sinai mutu dam kunmapu taruda, nedi sun gekenai aupu peiamsisi. Aupuda ake. Ne tenpu ngebo dipapu sun yuma tep, upu lepsisikra bongdina pel dona deiyo ngebo kunada, men kuptene. Ila ikin pel cadi, ne kange mun kunerure. Atep nengeda, ne dipapu sun yuma tep, deiyo kepra talepsetenedi, pel men dopmanto kunmanere,” pepsisi. 10 “Atep nengeda, sun nai bo Allah Yahwehdi sun tep, konum melimseredi, weika di tapakra karepbaserepa, sunda nimi denge pio weik konum kupbaramrume. Ukutaruda, sunda nimi pio denge weik kurume. Tek sisi pio tapakbaserepa, kuru im deiki weik ingamretopu konum kurume. 11 Tonda, ‘Allahdi ukupra melimkamser’ tenen, Allah morosenune. Ada, sun co puna neng si eremami ngebo, Allah Yahwehdi, sun tep tupa pio melimseredi, tapangserepa, sunda nesala denge pio weik ton cap kupbankamsere. Ada, denge pio weik nesala akunmaruma utopu, ton cap tapakra seribu kali lipat ton, tapakra nesala pio weika di ton cap tapakra deipkamsere. Ukupra keipsere pangeda, Allahdi sun tep menop taru di pedina upu deiki di, ‘Ukweipsenepa, sun yumada telepepu kunkamrume,’ pepra peiamseutopu kepra kunkamrume. ‘Allahdi ukupkamser’ tenen, moropsenune.

12 Dinino, ne tenpu ngebo dipapu, sundi yu kuprepa pepdarumudi, ikin kupmasetunge yumada, ware kupra melipsetenedi, ne dipapu upu lepsisingna pel dopra gawal daktene do? Angeda, ikin weik kunerura tep, men kuptene pepsene. 13 Atep nengeda, sun Israel nesala yala yuk-yuk akurumtopu, ‘Anengda, deiyo kepra talepsengedi, nun melipra upu bongdina deiyo neng kunkamseng’ tenen, sun deiyo kemna tep, nimi deiyo neng ton wepra deipkurume. Aketenepra deipkumum nengda, kael kemna kecada ila di kael keami neng ton wepkamrume. Tonda, men di pel telep kupra dorpeteramenge neng, sunda moupra tenepetepmengedi telep kupra pel dorameng neng ton wepkamrume. Tonda, ‘Deiyo kecada dan cei kurur do?’ tenen, betapra tenepmengedi, pel telep kupra dorameng neng ton wepra deipkamrume. Sun kurumya neitamai di, autopu kunge neng yuk-yuk ketenepra deipmumpa, nedi sun anengpu wepra deipnepa, sun aneng dipapu sun Israel nesala yuma talepsengedi, kunkamenge. Sun amutarapu kurumudi, sun penge upu gekenkamrume. Menop taru di aupu peipsisipa gekeprume. 14 Upeipsi pangeda, sun yuma teka tenepra gekeprumdi, “Dyo, kandi, ‘Ukupra nimi deiyo neng wepra deipkurume,’ pepra lap pepmaserumtopu telepe tenepmepe. Atep, ukunkamepe,” pepra pepnerume.

15 Atep nengeda, sun cap kurum neng neitamai di, nimi deiyo keca talepra kepmanto neng, telep neng konum wepra deipmamum nengda, nedi sun awepra deipmarum nengpu doropnedi wepra deipnepa, sundi sun talepsengepa kunkamrume. Sundi konum wepra deiprum nengda, kael kemna kecada ila di kael keami neng, tonda men di pel dorpeterami neng, tonda moupra tenepetepmengedi, pio telep kupra pel doramenge neng keteneipmarum nengpu dopra deipsisi. Anengdipu, sun nimi deiyo talepmengedi, sun Israel nesala deiki tara kupmengedi, talenkamsenge. Sun anengdi, gung yuk-yuk dinin, sun Israel nesala denge weik akunmarumtopu neitamai di, seribu neng ton bokra yuk-yuk deipmengedi talepkamenge. Tonda, sun neitamai di ton deiyo nengdi, sun kankan di, seratus neng ton bokra yuk-yuk deipmengedi talepkamenge. Ange utopu tonda lima puluh neng ton, bokra yuk-yuk deipmengedi talepkamenge. Tonda yuk deiyo nengdi sepuluh neng ton bokra yuk-yuk deipmengedi talepkamenge. Tonda, yuk deiyo neng ton wepra deipnepa, sun yala yuk-yuk akumumya utopu, sun deiyo talepra kuna neng ton wepra deipnepa, sundi talepsengepa kunkamrume.

16 Sun upu bongdina deiyo neng cap, upu lepsisikra derina deiyo neng cap dopra deipsisi taruda, nedi sun aneng tep pel karepsidi, upepsi. “Sunda apel domumdi ukunkamrume. Ada, sun kunkamruma nesala neitamaida, moupra kalengkamrume. Adeiki di, sun mutu nesala pedanmangedi, podanmangepa epmum dingeda, sun anesala yuma tep, sun anengdi lap penkameng upu moupra gekeprumudi, pio telep kupra dumsisipu upu lepsisingkamrume. Moupra dinkamrume, tonda telep kupra upu bongdinkamrume. Ton tara neng tep, ‘Ne kap’ tenepmumdi, ton tara neng tep, ‘Ne songe,’ men tenepkamrume. Anesala yuma tep, dipru wilimdona gume. Ada, sun Israel nesala sisa do, yuk mutu di tengyakan neng dinin, sun Israel nesala kan-kan kuramenge neng do, sun yuma tep nengeda, dumsisipu upu bongdinkamrume.

17 Sundi ton tara nengpu, telep kweipra, ton tara neng tep mali kemdina gume. Sun adipu dumsisingepu kunkamrume. Aneng yumada, ila neng pe, metek neng pe utotopu, amali kupmengetopu upu lepsisikra bongdinkamrume. Metek neng yuk, ila neng yuk, tenepra, sun upu yuk-yuk men bongdinkamrume. Tonda, Ware neng do yumada, sundi sun tep kware men tenenkamrume. Ada, aupu bongdinkamrumnge yumada, upu penkamrum dinin, tek sisi ila deiyo ngeboda, Allah erdi karenkamserngepu pepra upu bongdinkamrume. Dinino, amali kupmange keca tep, upu lepsisikra petepmumdi, ‘Uo, ware peptepe do?’ tenepmumdi, pio men kupmanto kupmumnyopda, sun dipapu ne damai asimyakankamnerume. Akeca ne damai duyamumnyopda, nedi ange lepsisikra telep kudinkamne, pepsisi.

18 Atep nengeda, ataru dipapu, sundi yuk yalange yuma kuna tep nengeda, nedi sun tep, “Ukupra-ukupra kunkamrume,” pepra deipsisipa, gekepmumdi sundi angepu talepra kupbaramumdi, atara peda tupa ukurume. Musadi sun Israel nesala, yala-yala yuk-yuk akuramitopu, aneng tep pepu.

Amori yala nesala kurami mutu urasin mipra embana nengda, dua belas neng ton wepra deipu upu

19 Musadi sun Israel nesala tep pepu. “Nun nai bo Allah Yahweh erdi, “Ukupkamrume,” pepra deipseutopu, nunda Sinai mutu di tapra, me pio gumai tep, nimi ton men kurami mutu, katuai mutu neitamaipu bisi benamepu. Sun ton amutu yuma diramrume. Amutu neitamai di embaramupka deiyoda, sun Amori yala nengdi talepra kurami mutu dam tara benamepu. Ataru nunda adipu Kades-Barnea mutu bepudi, bena kuramepu. 20 Ataruda, nedi sun tep, pepsisi. “Ukutaru sunda Amori yala neng kunge mutu dam tara konum yanmarume. Tonda amutu yumada, nun co puna neng taleamupa, sundi er si eremami ngebo, Allah Yahwehdi nun tep, ‘Atelep mutu karepkamsene,’ peamseu mutuda, orkapmar adano. 21 Sun asuru di epso! Atep nengeda, sun adipu amutu bemumdi bena kunkamrume. Ada, nun nai Allah Yahwehdi nun tep, ‘Amutu bena bisbisa kaprumudi, amutu taleprumudi acapu kunkamrume,’ pepra konum peiamseu atep, ‘Ware kupkop do?’ tenen, tenimtona cap, kwar kuna cap men kupkurume. Sun adipapu amutu benkamrume,” peamsesi.

22 Ukupra upeamsisi pangeda, sun yumadi tamupra ne damai yarumdi, upepra yana moropnerume. ‘Telep ngeda, nimi ware kuprap neng do, ton menmena wepra deipmepepa, sun aneng bengedi, Allahdi, ‘Amutu karepkamsene,” pepra, deiamseu mutu yumada, urasin cap, ormutu akwamre keca cap, bena dipetepmengedi, amutu ati arum dopra kunungai bana tep nengeda, ‘Dan bisi betepe do?’ tenen, ‘Abisi betepye, tonda amutu bana tep nengeda, ukuptepedi bena wektepe’ tenen, kael kepmengopda, sun aneng tamupra nun damai yangedi, ‘Abisi benkamepe,’ pepsetengepa, amutuda betepya,’ peamnerume. 23 Upepra sundi yana moropnerum ngeda, nedi tamupra, ‘Dyo, apeprum upuda, telepe. Apeprumtopu kupkupe,’ peamsisi. Adeiki di, nimi yalada dua belas akuramrumtopu, nedi 12 neng ton wepra deiamsi. Ada, sun yala yuk-yuk akuramrumtopu, sun kan-kan neitamai di dua belas neng tenpu-tenpu wepra deiamsi.

24 Ukupmepudi, sun awepra deipmepu nengda, sun adipapu Amori yala nesala kuramyai dinin, imutu dam tara bisi dirbenapidi, Eskol me duman bei. Aca bei dingeda, amutu-amutu yuma embeidi dipembenanami. 25 Konum dipetepi dingeda, sun aneng tamupra nun damai yankoi taruda, Amori yala nesala kurami mutu neitamai kuramu co du ton doupra yanami. Sun aneng yai dingeda, amutu neitamai kuramunge yumada, nun gekenai di yana lap peiamsei. Ada, nun nai bo Allahdi nun tep, ‘Amutu tu telep mutu karepkamsene,’ peamseu mutuda, konum epmape. Tek sisi amutuda pio telep mutu kurure,” pepra yana lap peamsei.

26 Dinino, Allah erdi kareamseu mutuda, adipapu men bena wekamrume. Sundi, “Gume, nundi amutu nesalada ila puto neng cadi, nundi sun tep men bisbisa kaptepe. Atep, ormutu men wekamepe,” pepra taprume. Sun nai bo Allah Yahwehdi peamseu ngeda, sundi men gekeprumdi, yapra bisbisa kaprumya deiki di er tep yaniprume. 27 Sundi upeamrume, “Gume, nun nai Allahdi nun tep, ‘Anesalada ne songe,’ teneserura tep, adeiki di, nunda Mesir mutu kuramepupane, doupra yanamseue. Ukupseua deiyoda, erdi nun dopra, ormutu kunge neng, sun Amori yala nesala deiki deipseupa, ukutaruda nun yuma popkamsenge. Popsengopda, gawal dakamseng ja tepa,” peamnerume.

28 Atep nengeda, ukutaruda, dan mutu betepepa, telep kunkamep do? Sun Amori yala nesala kunge mutu neitamaida, ware deiyo tep, nunda ormutu bena wektepe do? Uda, ‘Amutu bena kunkamep’ tenen, amutu urasin dirbana tep, wepra deiamepupa, dirbenami neng tamupra yaidi pepseiada ake. Sundi, ‘Gume, sun amutu kunung nesala, sun Amori nesalada, nong ila-ila neng kunung dinin, nunda nong yambul nengpu kunupe. Sun amutu nengda, pio puto weik neng kunung dinin, nunda puto metek nengpu kunupe. Nunda, sun ila puto weik kununga utopu neng men kunupe. Tonda, sun ati arum dopra kunung mutuda, ila ati arum kurure. Tonda akati-akati arum dana-dana tara yumada ila pala gel dopramidi, taplakra deipidi, ila lyom beilya wipdongopra ongongenepra deiamidi, im neitamai utopu welepra deipidi, abeilya neitamaipu sun ati arum dopra aneitamaipu kununga cadi, akati-akati men wekronmanto kurure. Tonda, anesala sun nong peda, nena weik neng ^{▼▼nena weik neng – Yuk Allah upu buku neitamaida, anesala sun si utopunge ton seki. Ton upu deiki di, ‘Enak neng’ seki. Ton upu deiki di, ‘Anaik neng’, tonda, ‘Anaikdi deiamu nyapu,’ pepra seki. Dinino, aupu deiyoda, ‘Amutu nesalada, sun nongda ila lyom weik kurami’ tenen, seki.}, nong ila lyom neng kununge. Ange yuma tep nengeda, ormutu men wekra betepye,’ pepra, yana lap pepseiya deiki di, nun kwar weik kuserure,” peamnerume. Musadi pepu.

29 Upepu dingeda, aupu ton dukdongopra pepu. Dinino, nedi sun tep upeamsisi. “Sun amutu kunung nesala yuma tep, tenimtona cap, pio kwar dangna cap men kunkamrume. Angeda gume,” peamsesi. 30 “Sun nai Allah Yahwehdi sun tep melipra dubankamsere. Erdi mepra barepa, nunda er amnyo tarapu melipra bankamepe. Er pe ila puto deiki di, ormutu kunge Amori nesala tep, popredi, gawal dangkamsere. Tonda, sun tep er ila puto deiki di moupra kalekseredi dubankamsere. Ada, sun Mesir mutu neitamai ikin weik dakuramrumpa, Allah Yahweh er ila puto di, pel dopseudi doupra yanamseupa, sun pe asuru di eamrumtopu, ataru peda utopu kupkamsere. 31 Ange utopu, me gumai cadi nimi ton pio men kunungai, ila katuai mutu kuamunge peda, daneitamai di ton, tali embaramum taru peda, sundi Allah kuramudi pel doramu keca ton konum epra kaele keamrume. Sundi diramrumpa, Allah Yahweh erdi kwamu ngeda wareto kwamseupa eamrum do? Akatuai mutu bisi yakaramrum taruda, sun si eremrum Allah Yahweh, er dipapu doupra yakaramseupa, pio telep dipapu yakaramrumanen, akunmarum mutu yanamrume. Atep tenipetepso. Erdi sun tep kwamseu ngeda, ake. Ukupmantoda, tenpu ngebodi, erdi deiamre mi puto boun kupre pangeda, er nai bodi er mi tep iripdongopra doua embaramretopu, Allahdi sun tep ukupra duyakaramseupa, sun yumadi eamrume. 32 Dinino nedi, ‘Lumdongona gume, Allahdi sun damai ukuamseu, ukuamseu,’ pepra, konum pepsisipane, sundi pio men gekeprumdi, sun nai bo Allah Yahweh er si eremrum dinin, er pe tep, pio moupra teka men teneprume. 33 Allah Yahweh, er dipapu, sun bisi yakaramrum taruda, Allah er dipu mepra yakaramudi, erdi dipra embenamudi, ‘Telepaida, acapu sun tenda bol dodina atida dopkurume,’ pepseuaipu doramrume. Tonda, kunukne taru lukunda neitam taruda, Allah erdi sun melimna tep, uku bo utopu kupra teknedi, diripnepa, adirin di yakaramrume. Tonda, keteng komuni taru neitamaida, katuai mutu bisi bana tep nengeda, ila lyom dua utopu kupra teknedi lelipdongopnepa, adua amutara baramrume. Ukupra kuramseua deiki di, sunda, ‘E, nun betepe bisida ake,’ tenepra embaramrume.

Menop taru Israel nesaladi mali kuraminge tep, Allah Yahwehdi wenemamua tep, pepu upu

34 Musadi sun Israel nesala tep pepu. “Allahdi sun tenepra penmarumnge gekepseudi, er tep teka men teneprumdi, er upu yanipmarumnge kael kepu dingeda, ila yu kupupa, ‘Sun anesala wenemna tep nengeda, ukupkamsene,’ pepra, ikin upu ton nun deiki deipseue. ‘Aupuda tek sisi sun anesala tep pepne,’ peamseu. 35 Allahdi peipu upuda ake. ‘Uda, ataru kunmarum Israel nesalada, sun mali kun kecapu talepra kurum nesala cadi, sun kankan neitamai di, tenpu ngebo peda, nedi sun co puna neng tep pediramsi keca dopropkamrume. Nedi sun co puna neng tep, ‘Atelep mutu tu Kanaan tara karepsenepa, ormutu neitamai di telep kupra kunkamrume,’ pepra, pedina upu deiki di peamsi mutuda, ataru gam kurum deiyo nengda, amutu men bena wekamrume,’ peamseu.

36 Sun Israel nesala du neng yuma tep, pepsene. Dinino, tenpu ngebo er nai bo si Yefune, erdi deiamu mi, er si Kalep, er tenpupu, atelep mutu bena wekamre. Atep nengeda, Kalep cap, erdi deiprepa deipdanen bankameng nesala capda, nedi amutu karepnepa, bena kunkamenge. Ada er Kalepdi ormutu urasin dirbenamu taru neitamai, erdi yanipudi, diramu mutu-mutu yumada, er cap, er nyapsilip cap tep karepkamne ja. Ukupkamna deiyoda ake. Ada, nedi pepra deipsi upuda, er Kalepdi, ‘Gume, Allahdi tek sisi upu pepra deipseue’ tenen, aupupu moupra talepudi, apeipsitopu kupu. Ukupudi, ‘Teka Amori mutu wekmepedi, ortara kunge nesala tep bisbisa kuptepe,’ tenepudi, teka tenepneua tepa. Atep nengeda, nedi sun tep, ‘Amutu bemumdi, amutu urasin cap, kure keca cap, bena dipetepkamrume,’ peiamsisipa, dirbenami mutuda, angebo Kalep er tepapu karepnepa, er cap, erdi deiprepa dadeipdanen bankameng nesala cap, amutu bena wekmengedi, dakunkamenge. Allahdi peiamu. 37 Tonda, sundi ange mali weik kuamrumpa, Allah Yahweh erdi sun tep yu teneramu dinin, ne pe tep ngeda yu teneamneue. Utenepneudi, ‘Musa kan peda, nedi, ‘Amutu karepkamsene,’ pepra pedina upu deiki di deiamsi mutuda, men bena wekamreme,’ peamneu. 38 Dinino kan melimna ngebopu, erdi amutu bena wekamre ja. Atep, moupra dipru kwa dimna upu pepkurume. Ada, nimi si Nun, erdi deiamu mi Yosua, erdi gonga kepredi, ‘Israel nesala tep, amutu karepkamsene,’ pepra, deiamsi mutuda, er dipapu Israel nesala doupra duberedi, amutu bena wekmengedi, bisbisa kapra dopropkamenge,’ peamneu.

39 Tonda, aupu peipneu dingeda, Allah Yahwehdi nun yuma tep upepra deiamsue. Ada, ‘Sundi deiprum nyapuda, sun kange kapul men deiamnga cadi, sunda, ‘Mali kuna kecada ake. Telep kuna ngeda ake’ tenen, kapul men kael kepmange. Ametek nyapu yumada, sun ton mali men kunmaiya tep, atelep mutuda anyapu tep karepnepa, bena wekamenge. Ametek nyapu tep nengeda, menop taru sun Israel nesaladi, ‘Uo, nun podandam nengdi, nun tep popbisipsengopda, nun metek nyapu dalopra doropkamsenge,’ teneramrume. Dinino, ayambul nyapuda, sundi atelep mutu karepnepa, bena wekmengedi, amutu talepra telep kupra kunkamenge. Allahdi peiamseu. 40 Dinino sun Israel yala nesala, sun du neng yumada, ka di tamupra, ortara di yakanmarum bisipu benkurume. Ada, me pio gumai tep, nimi men kunge mutu, katuai mutu tara bisi di kepra, ila laut mokon er si Terberau, alaut mokon deipra sekdongopu mutu, atara bana tep bisi tamupra benkamrume.

Aupu yumada, Allahdi peiamupa, Musadi sun Israel yala nesala yuma tep, lap peipu. 41 Musadi aupu pepu dingeda, aupu ton cap dukdongopra pepu.

Uda, nedi aupu peipsisipa, sun Israel nesala yumadi, ne damai tamupra upeamnerume. “Uo, nun nai Musao. Tek sisi nunda Allah Yahweh er upu yanipmap deiki di, er damai mali kupmape. Dinino, ataruda nun kange yuk tenepmepe. Ada, nun nai Allah erdi pepra deipseutopu kuprapmepedi, ormutu Kanaan tara neitamai, sun Amori mutu kunge nesala tep, sunda nun podandam neng cadi, anesala tep porbenkupe. Atep nun yuk-yuk ketenepra deipmepedi, ‘Anesala yumada, adipapu bena popra gawal dakupe,’ tenepmepe. Tonda, kwar men kupkusere,” pepra upeiamnerume. Ada, sundi, ‘Gume, mutu deiki tara di kepra bepedi, sun Amori yala nesala warekra popkamapada, ikin men kupkamsere, kanampu kupserepa, anesala popbisipkamepe’ tenen, ‘Nunda konum ketenepmepe,’ pepra peiamnerumdi, sun nimi podan keca, alat perang yala-yala yumada, keteneiprume.

42 Sundi upepra yan moropnerumdi, nimi podan keca keteneiprum dinin, nun nai Allah Yahwehdi, ne damai yana peiamneu ngeda ake. “Kandi sun anesala tep, ‘Daporbeso,’ pepmempa, men benkununge. Deiyoda, nedi sun anesala men melipkamana tepa. Nedi sun anesala men melipne pangeda, ‘Sun podandam nengdi anesala yumada, popra gawal daknung’ tenen, pepne,’ pepra, Allahdi upepra deiamneue. 43 Allahdi upeipneua cadi, ne Musadi sun Israel nesala yuma tep upeamsisi dinin, sun dipru eremna deiki di, ne upu men gekeramnerume. Sunda, Allah Yahweh erdi tek sisi pediramseu upuda, pio moupra men gekerumdi, ange peda yanipra tamrume. Ada, Allahdi, ‘Sunda ormutu nesala damai bena popeteprumnyopda, anengdi sun tep popsengedi, gawal dakamsenge. Atep ormutu mar porbana gume,’ pepra deriramseu upu tep, nedi ton peramsisi dinin, sundi balila deipraprumdi, ‘Mutu dam tarada, adipapu mar porbenkupe,’ teneamrume.

44 Sundi ukupruma deiki di, sun Amori yala nengda, amutu dam tara neitamai kuramya cadi, aneng pakra yaidi, sun yuma popra gawal dakamsei. Amori nesala sun dengeda, pio weik kuramye. Ukupmantoda, mong wengamreyai weika di kurameng utopu kuramye. Tonda, sun anengdi epra domembeseipa, Sin mutu di tapra, karenai Horma mutu damai ton domembenamsei. Domembaramseiyanen, ortara mutu, Edom mutu dam dipu bena sun yuma tep popbisiamsei. 45 Ukupra popbisipseipa, sun adipapu tamupra yanamrumdi, Allah Yahweh tep, ‘Uo, nun nai Allah Yahweh, kandi nun tep bicau tenepsememdi, melipseo,’ pepra, moroamrumdi, engeramrum dinin, Allah Yahweh, erdi sun upu gekepra kau keptamseu. Sundi mororamrum upuda, pio men gekepseu.

Keteng tamun, keteng tamun yuma katuai mutupu kuraminge tep, pepu upu

46 Sun Amori yala nesaladi, sun Israel nesala tep, popbisipsei pangeda, nun yuma Kades mutu bena kuramepu. Amutup neitamaipu keteng tamun denge weik acapu kuramepu. Musadi pepu.