Deu 10 | XteSC | STEP | Musadi Israel nesala tep lap pepu. “Ataru Allah er si Yahwehdi ne tep pepneu. ‘Ukutaruda kandi gel pala butene keteneipkurume. Ada men taru gel butene keteneipmumdi, ne damai duyamumtopu kupkurume. Tonda, co bon potokrapmemdi bekin dopmemdi, Sinai mutu kange di ton cap, ne kunmanai weleryankurume.’ Allahdi ne Musa tep pepneu.

Deuteronomy 10

Musadi Allah pedina upu butene taru dopropunge tep, pepu upu

1 Musadi Israel nesala tep lap pepu. “Ataru Allah er si Yahwehdi ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} ne tep pepneu. ‘Ukutaruda kandi gel pala butene keteneipkurume. Ada men taru gel butene keteneipmumdi, ne damai duyamumtopu kupkurume. Tonda, co bon potokrapmemdi bekin dopmemdi, Sinai mutu kange di ton cap, ne kunmanai weleryankurume.’ Allahdi ne Musa tep pepneu. 2 Allahdi upepneudi aupu ton dukdongopra pepneu. ‘Agel deiki sekeipkamken upuda, men di sekeipkesidi, karepsipa, kandi olokrap tapmumngepu, aupupu sekamkene. Seknedi kan tep karepnepa, kan dopropmemnyopda, nedi pediramsidi, gel pala deiki sekamsi upu doprapmemdi, aco bekin er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Peti Perjanjian kael kemna tep, Keluaran 39:35 dinkurume.} pumbonpu kipra deipkamreme.’ Allahdi upepnue,” Musadi pepu.

3 Upepudi aupu ton pepu. “Atep nengeda, nedi co si akasia co lase dopra, bekin dopsidi, gel pala butene petupra keteneipsi. Agel buteneda, men di ketekepra duyasi dinin, olokrapsinge utopu, ka di ton ukupunge ketenepsi. Ukupsidi, agel pala butene dopra, Sinai mutu deiki tamupra welepsi. 4 Mutu deiki welepsidi, gel pala karepsipa, menop taru Allahdi sekeipu upupu, erdi, ‘Angeda kunkamrume, angeda men kunkamrume,’ pedisere upu yuma apala gel deiki di, upu deiyo takol bari (10) sekra karepneue. Tonda sun kaele, aupuda sundi Sinai mutu amutara bulupra dinmarumpa, mutu deiki ila uku bu jenmaua kan-kan, Allahdi peipseu upu tep pepsene. Allahdi aupupu sekra karepneue.

5 Agel pala butene karepneu pangeda, Sinai mutu deiki di tamupra kwerepsidi, Allah pedina upu gel pala butene deiki sekeiamu ngeda, nedi co lase bekin, er sida Peti Perjanjian pumbon dongopra deipsi. Deipsipane, agel buteneda aco lase pumbon tupa akurure. Akupsinge yumada, Allahdi, ‘Ukupkamrume,’ pepra peipneutopu kupsi.” Musadi pepu.

Israel nesala mutu-mutu embaraminge tep, pepu upu

6 Ataru neitamaida, Israel neng mutu yuk-yuk embarami. Menmenada sundi Jakan ^{▼▼Jakan – Amut sida, Indonesia Alkitab neitamai ‘Yakan mutu’ seki.} mutu nesala taleami mutu tapra banmaiyane, mutu si Mosera mutu yai. Sun tapra bei mutuda, pumun taru nimidi, ‘Mo ceprepa, tu pumbon mokon deipkamser’ tenen, tu pumbon ton paliamipa, sumur-sumur weik deipi. Amutu neng sun si Jakan nesala, akeca talerami. Amutu tapra amutu di, Mosera mutu bei. Amutu kurami taruda, Harun depupa, tu palipidi, er yo pununa tep, er mi Eleasarpu, er pel dopra doramu. Er pelda, Allah cap, nimi cap, antamdina deiyo ngebo, tonda Allah gispal dona tep gam keca popra karena pel doramudi, er nai yo punuamu. 7 Amutu tapra bei dingeda, yuk mutu si Gudgod mutu bei. Amutu tapra adine, yuk mutu si Yotbata mutu bei. Amutuda me weike, tali embaramu me weik akuramu.

8 Amutu neitamai bei taruda, Allah er si Yahwehdi Lewi yala neng tep wepra deipu. Ada Allah pedina upu co lase bekin, er sida Peti Perjanjian pumbon deiamu ngeda, anengdi doupra embankamya tep, aneng wepra deipu. Tonda Lewi yala nengdi, Allah er si eremna ati bena wekmengedi, er pel dopkaminge cap, tonda, ‘Allahdi Israel nesala tep, telep kweipkamsere,’ penkaminge cap, tonda, Allah er si eremkaminge cap tep, Allahdi Lewi neng wepra deipupa, ukutaru tupa sundi deipipa dadeipdanen yakarami Lewi yala nengda, tupa apel talepra donunge.

9 Ange tep nengeda, Allahdi Lewi yala neng tep, sun talepra kunkami mutu ton men karepu. Atep, sun nai yapudi tu ton men karepdanen barami, tonda ataru peda men karedanunge. Israel nesala kan-kan dinin, sun kayapu yuk-yuk yala nengdi, tu weik dopropitopu, Lewi yala neng men dopropi. Deiyoda, Allah er pelpu dopkamenga deiki di, sun putan keca dopropkamenga tepa. Allah er dipu, sun putapsere keca karenkamre. Yuk neng dopropkamengtopu, sun men dopropkamenge. Ada, Allah er si Yahwehdi, sun apu bo Lewi tep peiamutopu kunkamenge.

10 Musadi Israel nesala tep pepu. “Ne Sinai mutu deiki tupa kunmasi taruda, menmena taru utopu, ue denge weik dumbari, 40 tumi cap, 40 lukunda cap kuramsidi, sun makuna tep pepsi upu, Allah er si Yahwehdi gekepneu. Gekepneudi, sun tep men poptapu. Er kange yuk tenepu. 11 Ukupudi, ne tep aupu pepneu. ‘Ne Allahdi sun apu yapu tep, ‘Atelep mutu karepsenepa talepkamrume,’ peiamsitopu, ukutaruda Musa kandi Israel nesala doupra bana tep keteneipkurume. Kandi menmena bemempa, sundi apepmaken mutu, telep mutu wekra talepmengedi, amutu neitamaipu kunkamenge.’ Allah er si Yahwehdi upepneu,” Musadi Israel nesala tep pepu.

Allahdi Israel neng tep, ‘Ukunkamrume,’ pepra deipu upu

12 Musadi Israel nesala tep pepu.

Uda, Israel nesala bouna di kurumudi, aupu tenepra moupra kunkamrume. Ne kayapu, Allah er si Yahwehdi sun tep, ‘Ukunkamrume,’ pepra derisere upuda ake. Ada, sundi Allah er si Yahweh tep, ‘Erda pio mambule,’ tenepra gispal donkamrume. Ukupra kupmum pangeda, Allahdi, ‘Ukunkamrume. Telep bisi ace,’ pesere upu gekepra, abisipu bankamrume. Tonda, er tep sun kange dipru cap, sun nong cap, er deikipu derinkamrume. Ukupmumdi, Allah er si eremna ati wekra, er upu gekeprumudi, aupu talepra dombankamrume. Ada, sun kange dipru cap, sun nong cap, sun kunkamrumnge yuma cap, Allah tep karenkamrume. Er pelpu domumdi, er amutarapu bungkamrume.

13 Allahdi, ‘Angeda kunkamrume, angeda men kunkamrume,’ pepra pedisere upu yuma, atumi deiki pepsene upu yuma, moupra gekepmumdi kunkamrume. Ukupmum pangeda, Allahdi akeca-keca yuma telep kweipserepa, teleppu kunkamrume. Atep atumi di dipra, doryankamre taru yuma, teleppu kupbankamrume. 14 Sun nai bo Allah er si Yahwehdi, im deiki tara pe, im deiki neitamai kure keca yuma peda, erpu talerure. Ange utopu tuai tara pe, tu deiki kure keca yuma peda, erdi ketekepra deipudi talepra kurure. Sun nai bo Allah, er si Yahwehdi akeca-keca yuma peda, er dipapu talepra kurure.

15 Sun nai bo Allah, ila mambul ngebo kurur dinin, sun tep weiamseue. Tuai mutu neitamaida, nimi yala-yala weik dakunung dinin, Allahdi sun apu yapu tep, bicau tenepra weiamudi melimamupa, dadeipdanen yakaramnanen, sun ukutaru kupyakarum nesala peda, ‘Ne nyapu pio kunkamenge’ tenen, wediseredi melimserure. Yuk nesala ton men weiamu, sun pua. Atumi peda erdi sun tep, ange tupa teneserure. 16 Ange tep nengeda, sun dipru neitamaida, ‘Allah erpu talenkamepe’ tenen, kunkamrume. Sun dipru erepra balila kuramrum ngeda taprume. Ukupmumnyopda, sun dipru neitamai di, dumsisipu kumumdi bouna di kunkamrume. Gemena gume.

17 Ada tali tep gume. Deiyoda ake. Sun nai bo Allah, er sida Yahweh, er tenpu kurure. Yuk Allah ton men kurure. Akeca-keca yuma cap, nimi yuma cap, akeca-keca yuma capda, pio er Allah utopu men kununge. Allahda, akeca-keca yuma talepra kurepa, akeca-keca pe, yuk nimi deiyo neng peda, er amutarapu kununge. Allahda ila puto deiyo ngebo kuredi, nimi yuma pe, akeca-keca yuma peda bisbisa kapra, deiki tara kurure. Nimi yumadi er tep, ‘Uo erda pio mambule,’ tenenunge.

Tonda, nimi urasin men diredi, dipru men wilimrure. Tonda, nimi urasin diredi, ‘Bung kecapu karepnengyopda, doproptene,’ men tenerure. Er kange dipru dumsisi ngebo tepapu kange deriredi, upu bongdirure. Allahda mali kun keca tenpunge peda men kurura cadi, pio dumsisipu kuredi, lek ^{▼▼‘Lek ngebo ‘Lek ngebo kurure,’ penupada, ada ‘bol kurun ngebo kurure,’ tenena tep men sengnupe. Aupu deiyoda, ‘Angeboda, mali kuna cap, mali tenena cap, pio gum dipapu, pio telep kupra dumsisipu kurura’ tenen, penupe. Indonesia upu deiki di, ‘Orang suci,’ penunge.} ngebo kurure.

18 Allah erda lyan nyapu cap, solu nerapu cap tep, telep kupra dumsisipu melimrure. Ange utopu, Israel mutu neitamai kunung dinin, yuk yala nimi bo neng tep sun putaprepa, jen keca cap, opkale cap, bicau tenepra karerure. 19 Uda, ange tep nengeda, sun ton utopu kunkamrume. Ada, Mesir mutu neitamai kuramrum taruda, nimi bo neng utopu kuramruma tep, ukutaruda nimi bo neng yangedi, sun pe mutu neitamai kunkameng nesalada, yuk yala nesala kunge nesalada, ‘Nun kayapu’ tenen, bicau tenepra, aneng tep makunkamrume.

20 Ukuprap sun kunkamrum taru yumada, sun nai bo Allah tep, ‘Erda pio mambule’ tenen, er sipu eremkamrume. Allah tep, er amutara kurumudi, er pel donkamrume. Er teppu, kware tenepra, erpu talepra kurumudi, sun kange dipru er deikipu derinkamrume. Sun pedina upu penkamrum taruda, Allah er sipu penkamrume. Atep, sun bouna di er amutara kunkamrume.

21 Sun nai bo Allah tep, ‘Telepe,’ pepra, er sipu eremkamrume. Allahdi sun tep, ila puto deiki di, nimi men kupmanto keca cap, mambul keca cap, makupra pel doramseunge yumada, pumun taru di diramume. Ukutaru tupa kurepa, sun asuru di dirume. Atep, ‘Telepe,’ pepra Allah tep kange deipra mut penkamrume. 22 Sun apu yapu dengeda, yoneitam bari nengpu, nimi 70 pua kuramidi, Mesir mutu bena wekami dinin, sun nai Allah weika di meliamseua deiki di, ukutaru Israel nesala, sun nimi dengeda, kuru im deiki men nukmanto ingamretopu, sunda denge pio weik kurume. Ange yumada Allah er ja.

Musadi Israel nesala tep pepu.