Deu 11 | XteSC | STEP | Musadi sun Israel nesala yuma tep pepu. “Sun nai bo Allah Yahweh tepapu, sun adipapu kange pio derinkamrume. Tonda, Allah erdi, ‘Ange kunkamrume, angeda, pio men kunkamrume,’ pena upu cap, ‘Telep kunada ake, angepu kunkamrume,’ pena upu cap, aupu yuma pepra deiamseunge yumada, aupupu talepra tupa-tupa moupra talepmumdi kunkamrume. Pio men tamkamrume.

Deuteronomy 11

Musadi, “Allah erda, ila puto ngebo,” pepu upu

1 Musadi sun Israel nesala yuma tep pepu.

“Sun nai bo Allah Yahweh tepapu, sun adipapu kange pio derinkamrume. Tonda, Allah erdi, ‘Ange kunkamrume, angeda, pio men kunkamrume,’ pena upu cap, ‘Telep kunada ake, angepu kunkamrume,’ pena upu cap, aupu yuma pepra deiamseunge yumada, aupupu talepra tupa-tupa moupra talepmumdi kunkamrume. Pio men tamkamrume. 2 Uda, sun ataru kurum Israel nesalada, sundi deiamrum nyapu tep aupu men pepsene. Sun nyapuda, ange yuma men diramidi men kael keami. Dinino, sun konum wisi deipmarum neng yumada, konum diramumdi kael keamruma cadi, sun tep pepsene. Ada, ukutaruda, ware kun keca do, sun nai bo Allahdi, sun damai kuramupa kael keamrum ngeda, moupra tenenkamrume. Ada, erdi peteremamseunge cap, er ila puto deiki di pel doramunge cap, er puto weik buru deiki di meliamseunge yuma capda, tupa-tupa tenenkamrume. Sun nyapupuda, ange ton men kael keami dinin, sun wisi konum deiprum neng yumada, sundi konum epra kael keamrume. 3 Tonda, tali nimidi men kupmanto keca yala-yala yuma, Allahdi pio puto weik deiki di, mambul pel dopra kupyakaramu ngeda, tupa tenenkamrume. Angeda, sun pe asuru di konum diramrume. Ada, Mesir mutu taleamu ila nimi deiyo ngebo, Firaun cap, erdi taleamu nesala cap tep, Allahdi ila puto keca kupudi, sun nong deiki ikin weik keca deriramu. Ada nimi men kupmanto puto kun keca cap, tonda, ‘Uo, tek sisi Allah akurure, erda ila puto weik ngebo kurure, tenepkameng’ tenen, ila puto pel doamu ngeda capda, sun ton konum kael keamrume.

4 Utopu tonda, sun dinmarumai Allahdi, Mesir mutu jen talena neng cap, sundi yuk mutu neng porbana tep, kuda deiki bukra embarami kuda cap, ne tonda nimi mar porbana tep, kuda gipra tu deiki embaramu keca, er si kereta kuda ^{▼▼kereta kuda – Akeca gambar dina tep, Keluaran 14:6 dinkurume.} cap, sun nimi porembarami jen talena neng cap yuma tep, poamu. Tonda, sun ajen talena neng yumada, ila laut mokon er sida Laut Teberau, perami laut mokon damai yakaipa, amokon neitamai di wilipropudi, dikemne dukemne kepra tekudi, abisi neitamaida, Allahdi peipupa, ame cepropupa yakaipane poamu nge ton, eprume. Ada, sun Mesir nengdi, ‘Sun Israel nesala yuma popkup’ tenen, domyakanmasei nengda, Allah Yahwehdi aneng yumada poamu. Ange yuma peda, sun ton konum kael keamrume. 5 Tonda, ange utopu, sun peda akunmarum mutu kapul men yarum taruda, me gum tep, nimi men kunge mutu, ila katuai mutu tupa yakaramrum taruda, Allahdi sun damai pel dopra kuamu nge cap, wenepra peteramseu nge cap yumada, sun konum kael keamrume.

6 Tonda Ruben yala nengdi deipi ngebo, er si Eliab, erdi deiamu nyapu sun si Datan cap, Abiram cap tep, Allahdi sun damai kuamu ngeda, sundi tupa tenimkamrume. Ada, sun anengda mali kupreipa, Allahdi sun tep wenepunge eprume. Ada, sun yuma dinmarumai di, sun butene neng cap, sundi dopropi nerapu cap, sundi derirami nyapu cap, sun tara kepmaidi, sun dombarami nesala cap, sun ati kikiman kurami nesala cap, sun tenda bol ati ^{▼▼tenda bol ati – Akeca gambar dina tep, Bilangan 11:10 dinkurume.} doaminge cap, tonda sundi talepra peirami gam keca yuma cap, ayumada, tu dikra dana-dana kepropupa, apumbon sakipa, tu di tamupra nipdongoamu ngeda, sun ataru tupa gam kurum nesaladi, ange yuma konum epra kael keamrume. 7 Ange yuma diramruma cadi, teka, sun pe asuru di, konum jenek kupra dinmarumpa, nimidi men kupmanto keca yuma, Allahdi pel dopra kuamu ngeda, konum eamrumdi, kael keamrume.” Musadi sun Israel nesala yuma tep pepu.

“Kange deipra bouna di kunge neng damaida, telep keca yakarure. Bouna di men kunge neng damaida, mali kecapu yakarure,” pepu upu

8 Musadi sun Israel nesala tep, aupu ton dukdongopra pepu.

“Atep, Allahdi peipneupa, nedi sun tep, ‘Angeda ukunkamrume, angeda pio men kunkamrume,’ pen upu yumada, atumi di peipsen ngeda, teka tenepmumdi, moupra talepra kunkamrume. Ukupmumya deiki di, sun puto kupserepa, Yordan me goupra, ortara mutu bena wekrumudi bisbisa kapkamrume. Allahdi, ‘Sun tep amutu karepsenepa, talepra kunkamrume,’ peamseu mutupu, orbena wekmumdi talepra kunkamrume. 9 Tonda, atumi di peipmasen upu moupra taleprumudi, pio men tapmumnyopda, Allahdi sun gam kuna tep, go weikanun ton karepkamsere. Ada, sun ormutu neitamai wekra bemumdi kunkamrum mutuda, keteng tamun ton cap weika di mapmumdi kunkamrume. Amutuda, Allahdi sun apu yapu tep, pedina upu peiamnga deiki di peipu. ‘Sundi deipmumpa, dadeipdanen bankameng nesala yumada, pio telep tu mutu karepkamsene. Tonda, ukupmanto upu tep nengeda, amutuda bisam moum teyung cap, mong mokon cap, pio weik kure mutu dopropkamrume. Ada, amutu neitamaida, ware telep keca do, yala-yala yuma, pio telep keca weik akurura tep pepsene. Amutu karepkamsene,’ peiamu. Atep nengeda, ukutaru amutupu bena wekamrume.

10 Sundi bena dopropmumdi, talepra kunkamrum mutuda, pio telep kurure. Men taru kuramrum mutu, Mesir mutu utopu men kurure. Angeda gume. Mesir mutu bemum taruda, puto dipapu pel dopra, wa pepmumdi, malilya yala keca tep, yal keca kouramrume. Ukuramrumdi, ‘Mo weik mutu gum tep, me ton yatupa telep kupra bongopkamre’ tenen, sun yan di, yambul me bisi palipra deriramrume. 11 Dinino, sun bena dopropmumdi kunkamrum mutuda, ange utopu men kurure. Amutuda, ila mutu buma belepra buku mutu neitamaipu kunkamrume. Tonda, mutu pikilpu kunkamrume. Amutu yumada, mo im deiki dipu, weika di cepra sangredi, tu deikida pio telep boun tu kunkamsere. 12 Sun si eremrum Allah, sun nai bo Allah Yahwehdi, ‘Amutu yuma pio re’ tenen, amutu yumada pio melipra kalengkamsere. Tonda, sun nai bo Allah Yahweh, er dipapu keteng tamun, keteng tamun yuma, menmena tenpu keteng tamun gonga kemna tumi di dipra, dinmaryanen, keteng tamun gawal dangne taru yuma peda, tamna gum dipapu, pio diseredi kalekra melimkamsere.

13 Atep sunda, atumi di, ‘Angeda kunkamrume, angeda pio men kunkamrume,’ pena upu yuma, Allahdi peipmaneupa, nedi pepmasen ngeda, gekepra moupra talepmumdi kunkamrume. Tonda, sun si eremrum Allah, sun nai bo Allah Yahweh tepapu, kange derina cap, gispal dopra er si eremna cap kupmumdi, sun kange dipru yuma, er deikipu derinkamrume. 14 Nedi apepmasentopu tek sisi ukupmumnyopda, Allahdi sun wa pepra yal keca kounkamrum taru cap, kouamumya kinkamrum taru cap, li taru gonga kemnange cap, amenda gawal dangna taru cap tep, mo kareprepa tu telep kunkamre. Ukupyopda, sundi kounkamrum keca gandum do, anggur du do, minyak zaitun du do, ange-ange yuma kouamumpane, konum wisipyopda, dakra kinmarumyadi, weika di derinkamrume. Teleppu kunkamrume. 15 Ange utopu sun gam kun keca domba bisam do, sapi do, kambing do, sundi peirum keca jena tep, mutmuta pio weika di karenkamsere. Tonda, jen keca yala-yala yumada, sun tep ketenepra derinmaseryanen, amenda akeca yuma kipra jepmumnyopda, ton men putapkamsere.

16 Ukupra kunkamrum dinin, sunda sun dipru kange neitamai tenenange tep nengeda, pio moupra kunkamrume. Ada, sun nai Allah cap, er upu cap tapmumdi, mok upupu teka tenepmumnyopda, adeiki di, yuk tali keca tep si erepra gispal domumnyopda, ikin weik kupkamsere. Sun kunkamrum keca yumada, nong men kunkamsere. 17 Angeda tali tep men pepsene. Ukupmantoda, Allah tapmumdi, ne pepsen upu sundi men talepmumdi yanipmumnyopda, Allah er yu kuprepa, sun tep wenepseredi, ikin keca weik sun damai deipkamsere. Ada, sun kunkamrum mutu tu neitamaida, mo ton men karenkamsere. Ukupserepa, sun koun keca yumada, du telep kupra men mounkamsere. Ayumada kolupropkamsere. Adeiki di, sun yumada go metekanunpu gam kunmarumya adipapu depropkamrume. Ada, Allah Yahwehdi pio telep mutu karepmaser dinin, mali kuprumupa wenepseryopda, sun telep mutu kunmamum dipapu, akeca-keca yuma, jena gum dipu tali depropkamrume.

18 Ange tep nengeda, pio moupra kunkamrume. Nedi, ‘Ange kunkamrume, angeda pio men kunkamrume,’ pepra deiamsue upupu, sun kange dipru neitamaida moupra tenepmumdi, angepu kalengdamumdi, talepra pio kunkamrume. Aupu tupa tenena tep nengeda, aupu sekra getapra keteneipmumdi, sun aso deiki ^{▼▼aso deiki – Akeca gambar dina tep, Keluaran 13:9 dinkurume.} tapu di koupra deipkamrume. Tonda, sun buru deiki tapu di koupra deipkamrume. 19 Ukupmum dingeda, aupu yuma dopra, sun nyapu tep tupa-tupa peteremnapu kunkamrume. Ada, sun ati tali bukra akunkamum taru pe, bura tara neitamai bisi daembankamum taru pe, sun beipye peingna taru pe, tonda bukropmumdi sun pel donmamum taru pe, tupa nungdinapu kunkamrume.

20 Tonda, sun ati buplan dana-dana tara deiprum co deiki aupu sekra derinkamrume. Tonda, sun ati arum wengna ban bisi, ila beilya buplan dengdongomna deiki ton, aupu sekra derinkamrume. Akeca yuma deiki di ton, ‘Aupu lumdongona gum dipapu, tupa tenenkamep’ tenen, sengdinkamrume. 21 Ange kupkamrum ngeda, tali tep gume. Deiyoda, aupu tupa tenemumnyopda, Allahdi sun cap, sun nyapu cap tep, keteng tamun go weik karepserepa, amutu neitamai di, keteng tamun weik gam kunkamrume. Ada, sun nai bo Allah Yahwehdi, sun apu yapu tep, ‘Ukupu telepe mutu ton karepkamsene,’ pepra, pedina upu deiki peiamseu mutu, sun ataru kurum nesala, ormutu bemumdi, pio tep teleppu kunkamrume. Ada, tuai mutu amutara, im tupa deiki tara akunkamre utopu, sun peda tupa, pio tep amutu neitamaipu talepra kunkamrume.

22 Atep atumida, nedi, ‘Angeda kunkamrume, angeda pio men kunkamrume,’ pena upu yuma, sun damai pepmasen upu yumada, moupra talenkamrume. Ada, Allahdi peipmaneupa, nedi pepmasen ngeda, gekepra moupra talepmumdi kunkamrume. Tonda, sun si eremrum Allah, sun nai bo Allah Yahweh tepapu, kange derina cap, gispal dopra er si eremna cap, er tepapu talena cap kupmumdi, sun kange dipru yuma, er deikipu derinkamrume. Nedi apepmasentopu tek sisi ukupmumnyopda, Allahdi melipra kalengkamsere. 23 Ukumumnyopda, Allah Yahwehdi ortara wengkamrum mutu kunge nesala yumada, er puto deiki di sun damai di enepronkamre. Ukuprepa, nimi weik kungedi, ila puto neng kunge mutu yumada, enepronkamre. Sunda ila puto weik kunung dinin, sun Israel nesalal yambul puto, boun nesalapu kurum dinin, Allah melimkamserya deiki di, amutu bena popbisiprumudi, dalupra doropmumdi, amutu yuma talepra kunkamrume. 24 Ortara mutu wekra bemumdi, sun yan ortara yanipra benamum mutu yumada, sundi bisbisa kaprumudi, amutu yuma talepra kunkamrum mutu pua. Ada, sun talenkamrum mutu wilimdonaida, dutamnada (ara selatan) utamna tep nengeda, ila pala mutu katuai tara di dipra, benamumyanen, deiki tara sirik sengnada, (ara utara) karen mutu itamna Libanon mutu kururaida, aca damai bena sekropkamrume. Tonda, keteng yakan tamna mutu tu wilimdonai tep ngeda ila embaramre me, Efrat me dam di dipra, benamrumyanen, utamna (ara selatan) mutu tu wilimdonaida, sirikda keteng dangban tamna ila laut mokon, er si Laut Tengah deipua, aca di aneitamai di bena wilipra doropmumdi, amutu-amutu yuma talepra kunkamrume. 25 Tonda, amutu kunung nesala yuma tep nengeda, menop taru sun nai bo Allah Yahwehdi sun tep, pedina upu deiki di peiamseutopu kupkamre ja. Ada, Allahdi, ‘Sun amutu kunung nesalada, nedi kwar keca karepnepa, sundi tamupra sun Israel nesala tep kwar weik kunkamre. Kware kuprepa, sun anesala yumadi, ‘Uo, sun Israel nesaladi ware kupkamseng do, poptapsengedi, gawal dangkamseng do?’ tenen, sun tep ila kwar kupkamre ja.’ Allahdi aupu peamseu utopu kuprepa, sun ormutu kunge nesaladi, sun Israel nesala tep kwardangkamsenge. Adeiki di, amutu nengdi sun kunkamrum keca tep, ton men yana sekdongopkamsenge. Sundi men bisbisa kapsetenge. Ukupkamenga deiyoda, Allahdi nun tep, ‘Tek sisi ukupra kupkamsene,’ pepra pedina upu peiamseua tep pepsene.” Musadi pepu.

26 Musadi upepu dingeda, aupu ton dukdongopra pepu.

“Atumida, sun Israel nesala gekenmanerum nesala yuma tep, mambul upu jenek kupra pepsene. Sun pe dipapu, ‘Ange malinge kupmepyoda, wimna keca doropkamepe. Dinin, ange ton telepngepu kupmepyoda, telep kuna keca doropkamepe,’ pena ngeda, pepkusena cadi, sun pe dipapu, ‘Ange kupkup do, ange kupkup do?’ tenen, wepkurume. 27 Atumi nedi sun tep, ‘Telep kuna ngepu wepkurume,’ pepmasen ngeda ake. Sundi er si eremrum Allah Yahwehdi, sun tep, ‘Ange kunkamrume, angeda pio men kunkamrume,’ pepra deiamneu upu dopra sun tep atumi deiki di konum pepmasen upupu, angepu moupra talepmumnyopda, Allahdi sun tep pio telep kudinkamsere. 28 Ange utopu dinin, mali wepmanto ngeda, sun si eremrum Allah, sun nai bo Allah Yahwehdi pepra deipseu upu, men moupra talepmum dinin, ange taprumudi, tali keca tep, aisok keca si men kael keamrum keca, yuk mutu nengdi si eremenge keca tep, ‘Angeda, nun deiyo ngebo,’ pepra, atali keca tep si eremumnyopda, adeiki di Allahdi, sun damai wipdongopserepa, ikin keca sun damai yarepa, kange mun kunkamsere. Tonda, wipdongopserya deiki di mali kecapu doronkamrume. Aupuda konum pepmasene.” Musadi sun Israel nesala tep pepu.

29 Upepu dingeda, aupu ton dukdongopra pepu. “Sun nai bo Allah Yahwehdi, sun tep, ‘Amutu karepkamsene,’ peamseu mutu konum doupra beserepa, amutu neitamai kumum taruda, sundi amutu yumada dalupra dopropkamrum taruda, ukupkamrume. Ada, Gerizim mutu deiki welepmumdi, ‘Nun nai Allahdi telep kweipkamser’ tenen, moronkamrume. Tonda ange utopu, mali upu pepra wimdingona tep nengeda, Ebal mutu duppu welepra bemumdi, ‘Nunda mali kupmepyopda, nun nai Allahdi wenepra wipdongopkamsere,’ pepra imutu bena moronkamrume. 30 (Uda, amutu buteneda, Yordan me duman pirman dinin, Yordan me goupra orketeng dangban tara bukrei. Ada, sun Kanaan yala neng, sun kunung mutu dinin, orketeng dangban tara bukrei mutu tepa. Tonda, amutuda ila ati arum sida, Gilgal mutu dam tara, adinin, yambul ortara ila tarbantin co palpal, aila co tekamua, aco dinin yambul ortarada, ati arum ton, er si More, akati dam tara amutu butene bukrei.

31 Uda, telep pena upu cap, malinge wimdingna upu cap pepkamruma deiyoda, tali tep gume. Ada, ‘Sun nai Allahdi peiamseu upu tupa tenenkamruma,’ tenena tepa. Atep, sunda adipapu keteneipkurume. Menmena, sun adipapu, Yordan me goupra orketeng dangban tara wekra benkamarume. Amutu bemumnyopda, sun nai Allah Yahwehdi, ‘Amutu karepkamsene,’ peiamseu mutu neitamai konum bemumdi, bena dalupra doropmumnyopda, amutupu talepra pio tep kunkamrume. 32 Amutu neitamai bena kunkamrum taru yumada, sun nai bo Allahdi ne tep peipneupa, nedi sun tep atumi deiki di lap pepmasen ngeda, pio moupra talenkamrume. Ada, Allahdi, ‘Ange kunkamrume, angeda, pio men kunkamrume,’ pena upu cap, ‘Telep kunada ukupra kunkamrume,’ pena upu cap yumada, moupra talepmumdi, pio kunkamrume.” Musadi sun Israel nesala ayuma tep pepu.