Deu 13 | XteSC | STEP | Musadi Israel nesala tep pepu. Mambul upu ton pepkusene. Kapul men kupu dinin, amenda kupkamre keca tep, lap pen neng ton, sun damai yangedi pepkamsenge. Yankameng dinin, sunda Allahdi dokotepu neng gume. Anengda, mok upu pena neng pua. Atep nengeda, amenda kupkamre keca tep lap pen neng, nabi do, ken deiki di kael kepmengedi lap pen neng do, ware nabi neng do yuma, moupra tenepmumdi kalekamrume. Ada anengdi, ‘Sun teka tenepkamneng’ tenen, ‘Nimi men kupmanto keca, mambul keca kupkamepe,’ pepmengedi, akeca tek sisi kupmengepa eprumnyopda, akapmarya peda, aneng tep teka tenena gume. Mambul keca kuptenga peda, anengda mok upu pen neng kununga cadi, sun penge upu teka tenena gume.

Deuteronomy 13

Amenda taru kupkamre keca tep, lap penkameng dinin, mok upu penge neng tep, pepu upu

1 Musadi Israel nesala tep pepu.

Mambul upu ton pepkusene. Kapul men kupu dinin, amenda kupkamre keca tep, lap pen neng ton, sun damai yangedi pepkamsenge. Yankameng dinin, sunda Allahdi dokotepu neng gume. Anengda, mok upu pena neng pua. Atep nengeda, amenda kupkamre keca tep lap pen neng, nabi do, ken deiki di kael kepmengedi lap pen neng do, ware nabi neng do yuma, moupra tenepmumdi kalekamrume. Ada anengdi, ‘Sun teka tenepkamneng’ tenen, ‘Nimi men kupmanto keca, mambul keca kupkamepe,’ pepmengedi, akeca tek sisi kupmengepa eprumnyopda, akapmarya peda, aneng tep teka tenena gume. Mambul keca kuptenga peda, anengda mok upu pen neng kununga cadi, sun penge upu teka tenena gume.

2 Amok nengdi sun tep, ‘Uda, sun men di men kael keamrum allah, yuk allah-allah si erepmepedi, dombankamepe,’ pepkamsenge. Upepsengedi, ‘Teka tenepkamseng’ tenen, nimi men kupmanto keca kupetepmengepa, nong kuptua peda, aneng tep teka men tenenkamrume. Amok neng tep pio men gekenkamrume.

3 Ayankameng mok pena nabi neng do, kene mapmengedi lap penge neng do, sun mok penge upu tep, teka tenepra pio men gekenkamrume. Deiyoda ake. Sun nai bo Allahdi, ‘Ne mawa nesaladi ne tep, sun kange dipru cap, sun kunge keca yuma cap deiki di, ne tep teka tenepmengedi, ne sipu pio eremkamneng do, gum do? Sun kange dipru ne deikipu derinung do, gum do?’ tenen, kurpetenkamsere. Allahdi kurpetenkamsera tep, sun nabi neng do, ken deiki di kael kepra amenda kupkamre keca lap penge neng do, sun damai yangyopda, teka tenena gume. Sun tep pepkamseng upu pio men gekenkamrume. Allahdi sun kurpetenkamsera cadi, sun dipru cap, nong yuma cap moupmumdi kunkamrume.

4 Tonda, sun nai bo Allah, er si Yahwehdi pesere upu yuma cap, Allah er pe nong cap tep, teka tenepra kunkamrume. Erpu melipra dombankamrume. Allah tep, ‘Erda ila mambule’ tenen, er sipu eremkamrume. Allahdi, ‘Ange kunkamrume,’ pepra pesere upu, moupra gekenkamrume. Er amutara kupmumdi, er pel tep pio donkamrume. Er teppu talepra dombankamrume. Musadi Israel nesala tep pepu.

5 Musadi upepudi aupu ton pepu. “Amenda kupkamre keca lap penge neng, nabi neng do, ken deiki kael kepra lap penge neng do, yuk tali keca si tep, ‘Nun nai bo,’ pepra, ‘Akeca si eremkamepe,’ pepmenge nengda, aneng tomopmumdi, adipapu poptapkamrume. Deiyoda ake. Anengda, Allahdi peipu upu yana men penunge. Sundi, ‘Sun nai Allah Yahweh tapra, yuk tali keca si eremkamrume,’ pepra peteremnunga tep, anengda portamkamrume pepsene. Tonda, upenunge. Allah er si Yahwehdi, ‘Angeda kunkamrume, angeda men kunkamrume,’ pepra deiamseu upu tep, ‘Sun gekena gum di yanitamkamrume,’ pepra, mali upu penunga tep, aneng tomopmumdi ponkamrume.

Uda, sun kaele, Mesir mutu tupa nimi bo nengto kuramrum taru, ikin pel weik sun nong deiki deriramipa, ikin weik kupra engeramrum dinin, sun nai bo Allah er si Yahwehdi, loptapra lyepseu. Lyepseudi, atelep mutu duyaseua cadi, er tep pio men tapkamrume. Sun mali nengdi, mok pepkamseng neng poptapkamruma deiki di, sun Israel nesala kan-kan, pio mali keca gum kupra deipmumdi gawal dakmumnyopda, sun mali neng si kiliptapkamrume.” Musadi Israel nesala tep pepu.

“Sun ati kikiman kunge nesaladi, ‘Allah tapra yuk keca si eremkamepe,’ pengepa poptapkamrume,” pepu upu

6 Musadi Israel nesala tep aupu ton dukdongopra pepu.

Arup pepmasentopu, upu ton pepkusene. Ada, sun weit bo do, sun du bo do, sun nerapu do, sun dipru neng, sun kayapu neng sisa, tenpu kurur ngebo dinin, anengdi, ‘Nun cap, nun apu yapu cap, men kael keamupu keca, yuk allah-allah si erepkamepe,’ pepmengedi, inipra mok upu pepsenge pangeda, sun gekena pio gume. Ange utopu sun nyapu do, sun ner nyapu do, sun pedi dopdarum nerapu do, sun nenge yapu do, sun kabo sisa do, ware neng do yuma, sun bouna di dimpepra kuramumnyai yangedi, aupupu yana pepsengopda, pio men gekenkamrume.

7 Ange utopu, ware neng do yuma, yuk allah-allah si, sun kunkamrumai damainge do, karen mutu kurenge do, dan cei do, tuai mutu yuk-yuk mutu sirik-sirik kurenge do, ‘Akeca si eremkamepe,’ yana pepsenge pangeda, sun pio men gekenkamrume. 8 Aupu utopu penge neng yumada, gekena gume. Tonda, ‘Uo ne kap’ tenen, ‘Dakwapye er upu gekenkamne,’ tenena gume. Tonda, ‘Uo, angeboda popkamenga cadi, ne kabo sisa kurure. Ton dingeda, ne weit bo sisa kurure. Tonda, ne du bo sisa kurure,’ tenepra men inimkamrume. Tonda, ‘Yuk nengdi aneng popkung’ tenen, sun makuna tep mok upu men penkamrume. Aneng tep bicau tenepra, ‘Dakwapye’ tenen, men tapkamrume. Amok upu neng yumada, tali lupra poptapkamrume.

9 Amali upu penge neng makuna gume. ‘Yuk keca si eremkupe,’ pepra, mali upu penge neng tep nengeda, adipapu poptapkamrume. Sun buru di, angebo tep, adipapu menmena gel dopra popmumdi, gonga kepmumnyopda, yuk Israel nesala cap tapakmengedi, amok upu penge nesala tep, gel dopra ponkamenge. 10 Sundi anesala tep, gel dopra popkamrume. Deiyoda, sundi, ‘Allah tapra yuk tali keca si erepmepedi, yuk bisi dombankamepe,’ pepra, mok pepsenunga tep pepsene. Tonda, pumun taru sun Mesir mutu nimi bo neng utopu kuramrumpane, ikin pel sun nong deiki deriramipane, kange mun kange doupra kuramrumpa, sun nai bo Allah, er si Yahwehdi lyepra loptapseudi, atelep mutu damai duyanamseue. Atep, sun nai Yahweh tep men tapkamrume. Amali nengpuda poptapkamrume.

11 Ne konum pepmasentopu, tek sisi kupmumnyopda, sun Israel nesala tep, yuk neng yumadi, ange gekepmengedi, kware weik kunkamenge. Ukupmengopda, sun mali kunge keca, ‘Ton cap men kunkamepe,’ tenen, kael kepra kunkamenge. Musadi Israel nesala yuma tep pepu. 12 Tonda, ukupmanto Allahdi kan kuna tep karepkeupa, ati arum dopra kumem mutu neitamai di autopu upu ton penmangepa gekepkamreme, 13 Ada kan kunkamrem mutu neitamai di, ware kuprap neng ton belepra tekmengedi, mok upu pepmengedi napropmengepa, akati arum dopra kuramenge nesala yuma, sun aneng upu gekepmengedi, mali kuna bisipu melipra dombenkamenge. Sun anengdi pepkameng upuda ake. “Sun yuma, yakaso. Yakamumpa, sun si kael kemna gum allah, ‘Er sipu eremkupe,’ pepra, napropkamenge. Tonda, sun anesala yumada, aupu gekepmangdi, ‘Sun anesala yumada, dombenmange,’ pepra pepmengepa, gekepkamreme.

14 Upepmengepa gekepmemnyopda, ‘Dan cei di angeda kunmang do?’ tenen, moupra dipetep embenkurume. Tonda amutu kuramenge neng tep, moupra asipetep embenkurume. Ukupmemdi apepmange nge, moupra kael kepmemdi, ‘Angeda, tek sisi ne kunun mutu neitamai di amali kuna kecada kupmange’ tenen, kael kepkurume. 15 Kael kepmem dingeda, akati arum dopra kuramenge nesala yuma cap, sundi talepra peiramenge gam keca yala-yala yuma capda, adipapu popra gum kudinkamrume. Tonda, akati arum dopra, kuramenge nesala yuma peda, popra gum kupra derinkamrume. 16 Amutu neitamai ati arum dopra, kuramenge nesala, sun taleamenge keca yumada, adipapu bupra, nimi yuma dinaipu yan katuai kepra, bulupra derinkamrume. Ange yuma yana bulupra, tenpuai deipmum dingeda, sun amutu ati arum dopra, kuramenge nesala cap, sun talepra kuramenge keca yuma cap, sun adipu dopropra, Allah er si eremna tep, akeca yumada uku dongopmumpa, uku di jepra gawal dangdonkamrure. Tonda akati arum doramengaida, ati tamupra men donkamrume. Tapmumpa, ati walangpu yopu kupkamrure.

17 Amali keca yumada, sundi ton, ‘Nun mawa dopra bena deipkupe,’ men tenenkamrume, dinin, akeca yumada adipapu gum kupra derinkamrume. Ukupmum pangeda, Allahdi sun tep yu tenepmasere ngeda, yuma kaukemkamsere. Kaukepseredi tamupra sun tep, Allahdi bicau tenenkamsere. Erdi sun tep bicau kupre pangeda, sun yala nesala yumada, ton cap tapakra deipserepa, weik kupbankamsere. Ada, Allah er pedi sun co puna neng tep, ‘Ukupkamsene,’ pepra, pedina upu peiamutopu kunkamsere.

18 Ada Allah Yahwehdi, sun tep, “Angeda kunkamrume, angeda pio men kunkamrume,” pepra, deiamseu upupu atumi peda, nedi sun damai lap pepsene. Atep sundi angepu moupra talepmumdi, Allah er teneretopu kupmumnyopda, sun yala nesala tapakra weika di kupbankamsere,” Musadi pepu.