Deuteronomy 14

“Depmenge nesala tep, ‘Uo,’ tenepmumdi, ange men kunkamrume,” pepu upu

1Musadi sun Israel nesala tep upepu. “Sundi er si eremrum Allah, ada Allah Yahwehda, erdi wepra deiamseudi, er mawa nesala, er nyapu sisa kupra deiamseue. Allah nyapu kuruma cadi, nimi depmare ngebo tep, ‘Uo nun kap depmara cadi, gispal donkamep’ tenen, engepmumdi, sun nong bol deiki dila dodina gume. Tonda sun aso deiki potong toupra delau kudidana gume. Ada, Allah er si men kael keamidi, er tep walwal nesaladi kurameng utopu men kunkamrume. 2Sunda, Allah Yahwehdi sun wepra deiamseudi, er mawa nesala kupra deipseupa, ukuruma cadi, Allah er nyapu sisa kurume. Tuai nesala mutu ban-ban yuma akuramengai kan-kan di, ‘Sunda, ne nyapu sisa kunkameng’ tenen, konum wepra keteneiamseu nesala kurume. Atep erdi sun tep, ‘Sunda ila mambule. Yuk nesala yumada, yambul telep kunung dinin, Israel nesalada, pio teleppu konum kweipsene,’ teneserure.” Musadi sun Israel neng tep pepu.

Allahdi gam kun keca tep, “Angeda men jenkamrume, angeda jenkamrume,” pepra deiamu upu

3Musadi sun Israel nesala tep upepu.

Allahdi, ‘Ayala gam kun kecada, ne song cadi, ‘Ange yumada mali gam keca kurure,’ tenenuna cadi, sun Israel nesala di ayala keca dopra jena gume,’ pepu ngeda, pio men jenkamrume. 4Dinino, sundi popra jenkamrum gam yala kecada, ake. Ada, yan dumbari kecada ake. Sapi bisam cap, domba bisam cap, kambing bisam cap, 5tonda, rusa bisam yala yuma cap, bura domba bisam cap, bura kambing cap, kijang cappu, ila mutu dup deiki kunge domba bisam capda, ange yuma popra jenkamrume. Ayala kecada telepe pua. 6Gam kurur yala keca yuma, ada yan dumbari kupredi, yan gala kwangrur keca cap, tonda sun jenada konum si deiki di jepmengepa, dakunmangepanen, amenda taru kange di ton cap ajen keca sun mundu pumbon di weleprepa, ka di ton cap jenunge. Agam kun keca yalada, sundi popr jena telepe pua. Ayala gam kurur kecada, sundi popra jenkamrume.

7Tonda, sundi men jenkamrum gam keca yalada ake. Ada, yan gala men kwangrur keca dinin, sun si di jena lyakra men jenung yala kecada men jenkamrume. Sun ayala kecada, sun jenada konum si deiki di jepmengepa, dakunmangepanen, amenda taru kange di ton cap ajen keca, sun mundu pumbon di weleprepa, ka di ton cap jenunge. Atep, unta bisam cap, kelinci cap, tonda mutu dup deiki gel kankan neitamai kuramre keca, er si marmot capda, Allah er kangeda, ‘Akecada mali keca kurure,’ tenerura cadi, angeda men jenkamrume. Ada, sun jenada sidi dopra jenung dinin, sun yan gala men kwangrure. Adeiki di, akecada mali keca kurure. 8Tonda bisam sisada, men jenkamrume. Ada, Allahdi, ‘Angeda mali keca kurure,’ tenerura tepa. Deiyoda, akecada yan gala kwangrur dinin, sun jenada konum si deiki di jepmengepa, dakunmangepanen, amenda taru kange di ton cap ajen keca sun mundu pumbon di men weleprepa, ka di ton cap men jenunge. Atep nengeda, bisam sisa tuda men jenkamrume. Ange utopu tonda, bisam sisa depmarenge, er bol men talenkamrume, ton men benkamrume.

9Me pumbon kurameng yala keca yumada, sundi dopra jenkamrum ngeda ake. Pul utopu keca beleredi takke kurur mekina yala-yala yumada tomopra jena telepe. Tonda, er bol deiki yumada, galange utopu keca kurura tepa. Atep, sundi akecada tomopmumdi, dopra jenkamrume. 10Dinino, me pumbon kunung keca yala yumada, pul utopu keca men beleredi, takke men kurur keca cap, tonda bol deikida, galange men kure yala keca cap yumada, sun tomoprumudi, men popra jenkamrume. Ada, Allahdi, ‘Angeda mali keca kurure,’ tenerura tep, angeda men jenkamrume.

11Ma yala-yala yuma akurur ngeda, weik tara popra jeptum dinin, Allahdi, ‘Ama yalada mali kurure,’ tenerur yalada, men popra jenkamrume. Mali kuna gum mada, sundi popra jenkamrume. 12– 13– 14– 15– 16– 17– 18Dinino, sundi men popra jenkamruma ma yala yumada ake. Ton ngeda, er si Rajawali cap, tonda burung Elang cap penung mada, tonda ama utopu yala-yala ma yumada, men popra jenkamrume. Tonda, burung Nazar ma cap, Kout ma cap, Mul Damnge ma yala yuma cap, tonda Unta ma er nong tu bepra embarur ma cap, Sololong ma cap, tonda Gagak ma cap, Camar ma cap, Belekok ma cap, autopu ma yalada men popra jenkamrume.

19Tonda, yambul po yala keca yuma, sun pol deiki di embanung dinin, tu deiki embanung keca yala yumada, sundi men dopra jenkamrume. Ada, mali kuna kecapu kurura tepa. 20Dinino, yambul yala keca yuma, pol deiki di embanung keca dinin, tu deiki men embanung keca yala yumada, mali men kununga tep, sundi dopra jenkamrume. Angeda, Allahdi, ‘Apol deiki embanung ngeda, mali men kurure’ peiamseu ngeda, sundi jena telepe pua.

21Tonda, ware yala keca do yuma, tali er pe dipapu depmare gam kecada, men dopra jenkamrume. Dinino, tali er pe dipapu depmare gam keca akapyopda, sundi ange dopra, sun kankan yana kunkameng nimi bo nengda, autopu kupmare ngeda, karepmumpa, sun nimi bo nengdi ange dopra jena telepe. Agum dingeda, adepmare ngeda, sundi dopra sun cap kuramrum nimi bo neng damai kunumnada telepe. Sunda Allah Yahwehdi, ‘Anesalada, ne mawa neng kunkamenge’ tenen, konum anupseudi, er nyapu sisa keipseu neng cadi, ato mali kecada, men dopra jenkamrume. Tonda, ner domba bisam do, ner kambing bisam do, sun moum teyung dopra, me mau pumbon dikdongopmumnyopda, abisamdi deipmenge nyapu dopra men gapkamrume. Tonda men jenkamrume.

Musadi sun Israel nesala tep pepu.

“Allah er gispal dona tep, sun kin keca neitamai di, bokropmumdi, ukupra-ukupra kareryakamrume,” pepu upu

22Musadi, sun Israel nesala tep pepu.

Uda, aketeng tamun, aketeng tamun yuma, sundi wa pepra kounkamrum keca, konum wisipyopda, yal keca ton deipre pangeda, akeca yala yuma neitamai di, wilipra doropmumdi, adipapu doupra, Allah er gispal dona tep, kareryakankamrume. Ada wa pepra koupmumpa, tu deiki di bongopredi, nong kemkamre keca yuma tepa. 23Sun nai bo Allah Yahwehdi, ‘Acada ne si deipkamne’ tenen, er si eremna ati wepra deipkamraida, akati damaida, er urasin dam tarapu, er pedi, ketenepra deipreyaipu, sun yumadi Allah er karena tep keca neitamai di, wilipra duyakankamrumnge yuma, acapu yana derinkamrume. Ada gandum do, anggur me do, minyak zaitun mokon do, ange yuma neitamai di bokraprumudi, Allah tep kareryakankamrume. Tonda sapi bisam do, kambing bisam do, domba bisam do, ayala bisam yumada, sun mi ukupu menmena deipkamre ngeda, ayuma doupra yamumdi, Allah tep kareryakankamrume. Akeca yuma jena tep, Allah er karena tep ketenepra deipkamruraipu, acapu yana jenkamrume. Ukupmumya deiki di, sundi tupa-tupa tenenkamrume. Ada, ‘Uo, nun nai bo Allah Yahweh, erda ila mambule’ tenen, kware kupserepa, er si eremna tep nengeda, kael kemkamrume.

24Ukupmantoda, sun nai bo Allahdi sun tep pio telep kweipserepa, sun talerum keca weika di karepseryopda, ukupkamrume. Allahdi, “Ne si eremna tep, ne si acapu deipkamne,’ tenen, ketenepra deipkamreyaida, acapu karerbenkamrume. Dinino, sun kunkamruma damai gum dinin, pio karenai keteneipreyopda, sundi wa pepra kouamum keca neitamai di wilipra doropmumdi doupra, ‘Allah tep karerbenkamane,’ tenepmum dinin, karen mutu bana tep nengeda, men benmanto kupkamseryopda, telepe pua. 25Ukupsere pangeda, sundi awa pepra kouamum keca yuma tamupra dopropmumdi, yuk neng dorona tep co bopu kunumkamrume. Ukupra akunupmum ngeda, sun adipapu aco bo doupra koupdongopmumdi, sun buru neitamai di talenkamrume. Amenda taru, sun nai bo Allahdi, ‘Aca ton karepnetume,’ pepredi ketenepra deiamreyaipu, aco bo doupra, Allah er karena tep amutupu dubankamrume. 26Akunupmum co boda, ka di tamupra sun putapsere kecapu kunumkamrume. Ada, sapi bisam do, domba bisam do, kambing bisam do, tonda anggur mokon do, anggur me yu kuramrenge do, ayumada, aco bo di dopra kunuprumdi, sun adipapu doupra, sun nai Allah Yahweh er damai dubemumnyopda, sun pe cap, sun nerapu cap, nyapu cap, sun yuma jepmumdi, kange telepa di kunkamrume. 27Tonda, sun kunkamrum mutu cap, ati arum cap neitamaida, sun Lewi yala neng men lumdongonkamrume. Lewi yala neng cap kunkamrume. Sun ayala nengda, sun yuk Israel yala nesala kunkamruma utopu, sun Lewi yala neng peda wa tu talepra men kunkamnunge. Atep nengeda, sundi ayala nengda tapmumpa, bung keca talena gum dipapu, tali kankan nesalapu men kunkamnunge. Sundi aneng tep teneprumudi, sun keca neitamai di bokra karenkamrume.

28Atep nengeda, aketeng tamun, aketeng tamun yuma, weneringe kepreya deikida, sundi Lewi yala neng karena tep, sun wa pepra kouamum kecada neitamai di wilipra, sun kurum mutu dinin, sun ati arum neitamai di ketenepra derinkamrume. 29Aketenepra deipkamrum jena yumada, Lewi yala neng karena tep deipkamrume. Ada, Allahdi sun Lewi yala nesala tep nengeda, sun talepra wa pena tu ton men ketenepra karepkamra tepa. Atep, aketenepra deipkamrum jena yala-yala yumada, sun mutu neitamai kunkameng Lewi yala neng cap, yuk mutu di tengyakan nimi bo neng cap, tonda solu nesala cap, sun nin cap, nai cap konum depipa, tapi nyapu cap, wein nesala cap tep, sundi mawa derinkamrum jen keca neitamai di bokra anesala tep karenkamrume. Aketenepra deipmum pangeda, sun anesala yangedi, sun putaretopu yana dopropmenge dingeda, sun weika di jenkamnunge. Sun Israel nesaladi ange yuma kupmumnyopda, sun nai bo Allah Yahwehdi sun pel donkamruma yala yumada, telepepu kupra derinkamsere. Erdi teleppu kweipkamsere.