Deu 15 | XteSC | STEP | Ataru-ataru yumada, keteng tamun yoneitam bari konum kupre pangeda, sun kayapu nengdi, sun telep keca keana tep, moropmengepa kareamumnge yumada, ‘Angeda tamupra karepkamserume,’ peamum ngeda, adipapu tamkamrume. Ada, sun kayapu neng tep, ‘Gume, ne telep keca keana tep dopropmum ngeda, dakwapye. Angeda kandi ne tep tamupra men karenkamnerume. Kan dipapu dopropkamrume,’ pepkamrume. Adeiki di, sun kayapu nengdi, sun telep keca doroami ngeda, daepra telep kudinkamrume.

Deuteronomy 15

Keteng tamun yoneitamnge kepre taru kuna tep, pepu upu

1 Ataru-ataru yumada, keteng tamun yoneitam bari konum kupre pangeda, sun kayapu nengdi, sun telep keca keana tep, moropmengepa kareamumnge yumada, ‘Angeda tamupra karepkamserume,’ peamum ngeda, adipapu tamkamrume. Ada, sun kayapu neng tep, ‘Gume, ne telep keca keana tep dopropmum ngeda, dakwapye. Angeda kandi ne tep tamupra men karenkamnerume. Kan dipapu dopropkamrume,’ pepkamrume. Adeiki di, sun kayapu nengdi, sun telep keca doroami ngeda, daepra telep kudinkamrume. 2 Ange kuna tep nengeda ukunkamrume. Sun Israel nesala yumadi, sun kayapu yuk Israel nengdi do, sun damai kunge nengdi do, anengdi sun telep keca do, sun co bo do, keana taru tep moropipa konum keana tep kareamrum ngeda, daepra telep kudinkamrume. Ada, sundi sun keca keana dopropi neng tep, upepkamrume. ‘Gume, sundi doproprum kecada, ‘Tamupra karenkamne,’ tenena gume. Ange yumada, dakwapye. Keana tep doproprum kecada, sun pe dipapu dopropmumdi, pio tep talenkamrume. Nun tep tamupra karena gume.’ Upepmum dingeda, ange yuma daeproprumdi telep kupra derinkamrume. Deiyoda, Allah Yahwehdi, ‘Ne mawa nesalada, sun kayapu nengdi keana tep mororami ngeda, daepmengedi, teleppu kweipkamenge. Kange di tamupra men doronkamenge,’ pepra, konum peiamseu. Atep, sun keca keana tep dopromi neng tep, ‘Ton cap tamupraprumdi karepneo,’ pepra, men moronkamrume.

3 Atep nengeda, sun Israel nesala, sun yuk Israel neng tep nengeda, sun keana taru tep mororamidi, dororami kecada, tamupra dorona gume. Dinino, yuk mutu nesala, nimi bo nengdi sun Israel neng co bo do, yuk telep keca do, ton keana tep kareamrum ngeda, aneng tep, ‘Tamupra karepkamserume,’ pepra, moronkamrume. Dinino, sun pe Israel neng dipapu ke doroamsenge ngeda, ‘Adipapu tamupra karepneo,’ pepra men moronkamrume. Ange yuma daeprumudi kaukemkamrume.

4 Tonda, Allah er kangeda, ‘Sun Israel nesala kunkamengai neitamaida, bung keca pio men pio kankan nesalada, men kunkamnunge,’ tenerure. Deiyoda, sun nai bo Allah Yahwehdi, sun tep pio telep kweipkamsere. Ada, sun putan keca yala-yala yuma, weika di karenkamsere. Er dipapu sun Israel nesala tep, telep kupra derinkamsere. Ukupserepa, amutu neitamaida, pio telep kupra kunkamruma cadi, sun bung keca men talenkamnung nesalada, sun dipapu talerum keca neitamai di bokra, akankan neng makuna tep tali karenkamrume. Akunkamruma deiki di, sun Israel yala nesala kunkamrum mutu neitamaida, pio kankan neng ton men kunkamnunge. 5 Atep nengeda, atumi ne Musadi, sun damai, ‘Ange-ange kunkamrume,’ pepra deipsen upuda, moupra betapra kael kepmumdi, angepu talepra kupmumnyopda, tonda sun nai bo Allah Yahweh, er tepapu talepmumyopda, erdi sun tep, pio telep kweipserepa, pio telep kupra kunkamrume.

6 Ange pepmasentopu konum kupmumnyopda, sun nai bo Allah Yahwehdi, sun tep pedina upu deiki di, ‘Ukupra karenkamsene, pio telep kweipkamsene,’ pepra deiamseutopu kupra karenkamsere. Ukuserepa, sundi yuk karen mutu kunkameng nesala yuma tep nengeda, telep keca cap, kunumna weik keca cap, co bo cap, keana taru tep kareamumpane, amenda taruda sun anengdi tamupra karenkamsenge. Dinin, sun Israel nesaladi, yuk mutu neng sun co bo do, sun yuk telep keca do, akeca tep, ‘Uo, ki karepmaserumpane, amenda taru tamupra karepkamsepe,’ pepra, men moronkamrume, tonda men doronkamrume. Tonda, sundi yuk mutu nesala kunung mutu cap, amutu neitamai kunkameng nesala cap tep, ila nimi deiyo kepra, talenkamrume. Dinino, yuk mutu nesaladi tamupra, sun Israel nesala tep, ila nimi deiyo kepra men talenkamsenge.

7 Tonda, sun nai bo Allah Yahwehdi sun tep karepkamser mutu bena kunkamrum taruda, sun amutu kuramrum neng, sun kabo tenpu ton, bung keca talena gum dipapu kan-kanpu kuramre pangeda, sun adipapu er angebo tep, sun kuramum keca neitamaida, bokra er tep karenkamrume. Sundi, ‘Nun talenup kecada, bokra men karepkupe,’ tenepmumdi, dipru kika kuna gume. Sun adipapu bokra, kankan nesala tep melipra karenkamrume. 8 Dinino, sun dipru amutara keprapmumdi, sun kabo er putanmaretopu kupra, sundi ki karena tep kecada, ware kuprap do, er angebo putaretopu, er makuna tep, sun keca bokraprumudi, dopra karenkamrume. 9 Tonda, sundi, ‘Angeda men karepkupe,’ tenepra tapmumdi, tamupra er angebo tep, mok upu deiki di, ‘Gume, ki doroamenge keca daemna tep, keteng tamun yoneitam ngeda, nundi keana tep karepmepe keca daepra tapkamep keteng tamun konum dam kepmara tep, sun putapre kecada, men karepketepye,’ men penkamrume. Autopu mali kange tenepmamum ngeda, kaukepmumpa adipapu sun dipruai men wengkamsere. Sundi sun kayapu kankan neng tep, men dopra karepmamumpa, er ikin kuprepa, angebodi sun nai Allah tep, ‘Uo, ne putanmaneupa, nakabo tep moropmanu ngeda, men karepmanere,’ pepra, Allah moropre pangeda, sun damai mali kudidankamserura tepa.

10 Ange men kunkamrum dinin, er angebo putaretopu, er tep, weika di karenkamrume. Sun kange tenimtona gum di, kange telep deiki di dipapu, weika di kareprume. Deiyoda, sundi yuk tali kankan neng tep karepmum pangeda, sun nai Allah Yahwehdi sun tep, sun kunkamrum pel yala-yala yuma cap, sundi ‘Ukuptepe’ tenen, piripetepkamrum keca yuma capda, yamupra weika di karenkamsere. 11 Aupu yumada, tali tep men pepsene. Deiyoda ake. Sun Israel nesala kunkamrum mutu neitamai yumada, kankan nesala ton kunkamenge. Akeca-keca yuma men talenung nesala ton sun mutu neitamai akunkamenge. Atep nengeda, akankan nesala sun kunkamrum mutu neitamai pio akunkamenga cadi, nedi sun tep, apepra deipsen upuda, sun adipapu talepmumdi, sun kayapu neng tep dipru amutara kepra, sun keca neitamai di bokra, akankan neng cap, akeca-keca putan nesala cap tep karenkamrume,’ peipsene. Musadi sun Israel nesala tep pepu.

Pel dona tep, co bo deiki di kunupra derinung nesala tep, pepu upu

12 Musadi sun Israel nesala tep pepu. Ukupmantoda, sun pe Israel nesalapu dinin, nimi do, nerapu do, sun pel dona tep, co bo deiki di kunuamrum ngebo, sun ati pel donada keteng tamun nangtan baripu pel donkamserure dinin, keteng tamun yoneitamnge konum kupre pangeda, talipu tapmumpa, apel dona ngebo tali dakunkamrure. Angeboda pio men talenkamrume. 13 Tonda, apel melimna tep kunupra dopropmumpa, pel doramreyanen, keteng tamun yoneitam baringe tapmumpa benkoryopda, talipu tapmumpa buru banangapu men bankamrure. 14 Ange gum dinin, sun kange telep deiki dipapu, sun taleamum keca ton bokra akankan ngebo tep karenkamrume. Ada, sun domba bisam cap, kambing bisam cap, gandum du do, tonda anggur du taikmumdi, anggur me gwepkamrumnge do, sun damai akapsere ngeda, er tepapu bokra karenkamrume. Ada, Allah Yahwehdi, sun tep weika di yamupra karesere keca, sun damai akapseretopu dopra, sun pel dona ngebo tep karenkamrume.

15 Tonda, ange ton tupa tenenkamrume. Men taruda, sun Mesir mutu neitamai kuramrum taru, ikin weik kuramseinge ton moupra tenenkamrume. Ada, sun Mesir mutu neitamai kuramrum taruda, ila ikin pel dimamseipa, kange mun kange douramrume. Ukuramrumpane, sun nai bo Allah Yahwehdi lyepra doupra yanamseue. Atep, Mesir nengdi sun tep ukuramseiya utopu, sun peda sun pel melimna neng tep men kunkamrume. Sun tali pel don nengda, yoneitam bari keteng tamun kupre pangeda, aneng loptaprumpa, tali benkamenge. Ukupra kunkamrume,’ pepra, atumi di aupu deipsene. 16 Dinino, er apel melima ngebodi, ‘Gume, ne men benkune,’ pepredi, sun tepapu kange deipseredi, ‘Sun cappu kikiman kunkamepe,’ tenepseryopda, telepe pua. 17 Sun adipu er angebo doupra, sun kuramrum ati buplan dam dubemumdi, bon potongna keca di, er amol bon potongkamrume. Ukupmumpa, er angeboda pio tep, sun ati neitamai pel melipra dona ngebopu kunkamrure. Ange utopu, sun ati pel melimna nerdi, angepu pepreya peda, er amol bol bon potokmumpa, sun ati pio pel melipra dona ner kunkamrure.

18 Ukupmantoda, sundi co bo deiki kunuamrum pel melimna neng, apel melipra doramserepanen, keteng tamun ngantan baringe neitamai tapmumpa, beryopda, sundi, ‘Uo, ware keca deiyo tep tapmepa benkur do? Kunumna weik keca deiki di angebo kunuamepu dinin, ukuda tali benkure,’ men tenenkamrume. Ada, keteng tamun ngangtan bari yumada, sun pelpu tali melipra doamserya tepa. Tonda, ukupmanto sun ati keana tep melipra donmasengepa, kunumna kareramrum neng tep, weika di kareramrum utopu, pel men doramserure. Er angeboda, er kunupmum taru di dipra, pel talipu doramreyanen, keteng tamun ngantan bari deiki di, co bo ton er tep men kareamrume. Atep, er angeboda tali tapmumpa bankamrure. Ne Musadi sun tep pepsen upuda, moupra talepmumdi kumum pangeda, sun nai bo Allah Yahweh, erdi sun damai kuredi, sun kupbankamrum keca yuma, telep kweipserepa weika di dopropbankamrume. Musadi Israel nesala tep pepu.

Sun pein keca weni deiprenge kuna tep, pepu upu

19 Musadi sun Israel nesala tep pepu. Sapi bisam mi cap, kambing bisam mi cap, tonda domba bisam mi cap yumada, gemnge ukupu weni deipmare ngeda, sun adipapu douprapmumdi, Allah Yahweh er gispal dona tep kareryakankamrume. Adoupra kareryankorum sapi bisamda, sun wa tu palina tep pel doamu ngeda, men kareryankamrume. Sapi mi pel dona gumnge, ukupu nenmarengepu, doupra yakankamrume. Tonda, domba bisam peda, potong men toupmamum ngepu, Allah er karena tep doupra kareyakankamrume. 20 Aketeng tamun, aketeng tamun yumada, sun weni keca yala-yala yuma, adipapu Allah Yahweh er damaipu kareryarumdi, atu bokra tupa akapkamre ngeda, sun cap, sun nyapsilip capdi, ange kikiman jenkamrume. Ada, sun nai bo Allah Yahwehdi, ‘Ne gispal dona cap, ne si eremna cap karena tep nengeda, aceipu atu keca kareryakankamnerume. Tonda atu keca jena tep nengeda, acapu jenkamrume,’ pepra keteneiamreyaipu, yamumdi jen jenkamrume.

21 Dinino, sun nai Allah Yahweh tep karenkamrum gam keca, weni deipmare ngeda peda, nong mali kuamrengeda karerbana pio gume. Ada, bol mali kuamrenge cap, yo gakamrenge cap, aruru puamrenge cap, tonda nong deiki mali keca metekapu kuamrenge yumada, Allah tep men doupra kareryakankamrume. 22 Sun nimida, mali keca pio men taleamengedi, dumsisi teleppu kurameng neng pe, tonda mali keca bepmangepa, Allahdi, ‘Anengda ne damai men yatenge,’ peramre neng peda, sun pe doamrum ati arum neitamai tupa akuapmamum taruda, rusa bisam do, kijang bisam do, popmengedi akeca tu tali lupra jenkamnunge. Ange utopu, abisam butene tali lupra jeramruma utopu, sun peirum gam keca weninge deipre ngeda, bol mali kurenge cap, asuru mali kurenge capda, poprumudi, tali lupra jenkamrume. Dinino, ato gam kun keca tuda, Allah tep men karenkamrume. 23 Dinino, agam keca popmarum ngeda, er yapipuda tali men jenkamrume. Ange gum dinin, akeca popmum taruda, er yapida doropra, tu deiki diktapmumpa, tali me diktamamrum utopu kupra, tamkamrume. Akecada er yapi men jenkamrume. Musadi Israel nesala tep pepu.