Deu 16 | XteSC | STEP | Musadi Israel nesala tep pepu. Abib war damai konum kupre pangeda, awar neitamai di sun nai bo Allah Yahweh er gispal dona tep, ila Kaplemne Kailya kalemkamrume. Ange kunkamruma deiyoda ake. Ada, menop taru awar deikida, lukunda kepu taru neitamaida, Allah erdi sun tep Mesir mutu kuramrumpanen, sun weni nyapu men poptapu dinin, Mesir mutu neitamai di lyeprapseudi, sun Kanaan mutu yakana tep doupra yanamseua tepa. Atep nengeda, awar neitamaida, ila kaplemne kailya kalemkamrume.

Deuteronomy 16

Ila Kaplemne Kailya Kalemna tep, pepu upu

1 Musadi Israel nesala tep pepu. Abib war damai konum kupre pangeda, awar neitamai di sun nai bo Allah Yahweh er gispal dona tep, ila Kaplemne Kailya ^{▼▼Kaplemna kailya – Aupu deiyoda ake. Pumun taruda, Allahdi sun Israel nesala doupra, Mesir mutu neitamai di lyepra duyanamu taruda, Mesir mutu nesala yuma, sun weni nyapu poptapu dinin, Israel yala nesala, sun weni nyapu men popu. Allahdi peiamutopu, sun Israel nesaladi domba bisam mi popinge, er yapi doupra, sun ati buplan dana-dana tara cap, deiki tara cap, likra deipi. Ukupya tep, alukunda neitamai Allah er malaikatdi, ayapi epi dingeda, akati pumbon kunmai weni nyapu men poptapi. Tali kaplepra akati tapra kirikra ortara atipu bena, yapi men kapu ati pumbon kunmai weni nyapu tep porami. Nyapu pon malaikatda ayapi epidi, akati tep tali kaplepra ortara benmaiya tep, akailyada, Kaplemne Kailya perami.} kalemkamrume. Ange kunkamruma deiyoda ake. Ada, menop taru awar deikida, lukunda kepu taru neitamaida, Allah erdi sun tep Mesir mutu kuramrumpanen, sun weni nyapu men poptapu dinin, Mesir mutu neitamai di lyeprapseudi, sun Kanaan mutu yakana tep doupra yanamseua tepa. Atep nengeda, awar neitamaida, ila kaplemne kailya kalemkamrume. 2 Allahdi, ‘Ne si eremna tep nengeda, acapu ne si deipkamna cadi, sunda acapu ne si eremkamnerume,’ tenepredi, ketenepra deipkamser mutuda, acapu bena kailya kalepkamrume. Amutupu bemum dingeda, sun adipapu Allah si eremna tep, sundi kambing bisam do, domba bisam do, sapi bisam do, tenpu-tenpu doupra bemumdi, popra Kaplemna Kailya kalemkamrume. Ada, ‘Nunda Allah erdi Mesir mutu neitamai lukunda neitamai, nun tep lyepra doupra yanamseue,’ tenepmumdi, Kaplemne Kailya kalemumdi, er tepapu gispal donkamrume.

3 Kaplemna Kailya jena tumida, domba bisam weninge popra, er tu jenkamrum taruda, sun adipapu nena gum roti kwanengpu jenkamrume. Ada, ue yoneitam bari tumi neitamai yumada, anena gum roti kwaneng cap, adomba mi tu cap, angepu jenkamrume. Ange jenkamrumada, sun men taru Mesir mutu kuramrumane, adipapu “Uo, nunda, ikin weik kuramepupanen, Allah lyepseudi, bicauto kupra yanamepu,’ tenepmumdi, anena gum roti kwanengda, dopra jenkamrume. Ataru di dipra doryankamre taru neitamai, sun gam kunkamrum keteng tamun yumada, Kaplemna Kailya jenkamruma deiki, sun Mesir mutu ikin weik kuamrum ngeda, tupa-tupa pio tep tenenapu kunkamrume. Ada, ‘Kange mun kuramseupa, ikin kange doupra kuramepu,’ tenen, jenkamrume. 4 Kaplemna Kailya jenkamrum taru neitamaida, tenpu tumi di dipra, ue yoneitam bari kepkamre tumi yumada, dan mutu do yuma, sun kunkamrum mutu neitamai di tenpu ngebo peda, roti nena keca, er si ragi ton, sun ati pio men derinkamnunge. Tonda Kaplemna Kailya menmena gonga kemna lukunda tumi di sun popmamum yapi kecada, atu atumi lukunda dipapu jepra gawal dangkamrume. ‘Yambulanun ton bokra mawa deipmepedi, mapmepya berekyopda, ambutumi ipna jenkamape,’ tenena gume. Alukunda neitamaipu atu yuma jepra gawal dangkamrume.

5 – 6 Tonda, sun periramrum keca Kaplemna Kailya tep kalepra jena tep, doupra yanmamum ngeda, sun nai bo Allah Yahweh, erdi, ‘Aca dipapu akeca popra jenkamnunge,’ pepra deipmareai dipapu, yana poprumudi, jenkamrume. Dinino, men pepra deipmareai di, atu kecada duyana popra men jenkamrume. Ada, sun kunkamruma tep karepseu mutu neitamai dinin, sun ati arum doamrumai yuma neitamai di, akeca men jenkamrume. Ange kunada, Allah Yahwehdi, ‘Acapu ne si deipkamna cadi, aca dipapu Kaplemna Kailya keca duyakankamenge,’ pepra deipkamraipu, agam keca ponkamrume. Tonda, keteng ben dakre taru dipu agam keca ponkamrume. Ada, sun Mesir mutu kuramrumanen, tapra yanamrum taru, aketeng kepreyapu, Kaplemne Kailya tep jenkamrum gam keca peda ponkamrume.

7 Atu keca yuma, mau gapmum dingeda, sun nai Bo Allah Yahweh erdi wepra deipudi keteneipkaipu, doupra yana jenkamrume. Ukupra jenmamumpane, ipmareyanen berekrepapu, atumipu kepre pangeda, sun adipapu sun ati yuk-yuk tamupra bankamrume. 8 Ngangtan bari tumi tupa akapmare tumi neitamai yumada, nena gume roti kwaneng jenkamrume. Ada, yoneitam bari tumi menmena gonga kemna tumi kupmamumya utopupu kunkamrume. Ada, nena gum roti kwanengpu jenkamrume. Ukupbaramumyanen, sirya yoneitam bari tumi konum kepyopda, sun yuma bupra wekmumdi, Allah er si eremkamrume. Ayoneitam bari tumida, sundi yuk tali pel ton men donkamrume. Allah er si eremna tep, beipye peingnapu kunkamrume.

Wa peamruma kipkomum taru kalemna tep, pepu upu

9 Uda, sun gandum wa pepra kouamumyanen, konum wisipyopda, bena gonga kepra sekra kipkomum tumi, atumi di gonga keprumudi, yoneitam mingku nukra baramumyanen, yoneitam bari kepre minggu konum yaryopda, akonuma. 10 Yoneitam bari minggu konum nukraprumupa, yoneitam baringe konum yaryopda, gandum weninge kina tep kalya kalepmumdi, sun nai bo Allah Yahweh tep, ‘Telepe,’ pepra, er tep gispal donkamrume. Agispal dopkumum tumipu, Allah karena tep, sun pe kange dipu, ‘Angeda karepkupe,’ tenepmarumnge ketenepra deiamum ngeda, doupra yamumdi, yana karenkamrume. Ada, Allah Yahweh erdi sun tep telep kupra kareamserya utopu kupra, weika di yana karenkamrume. 11 Atep, sun nai bo Allah Yahwehdi, erdi ketenepra deiamreyaipu, pio telep kange deipra kumumdi, akeca jenkamrume. Ada, sun cap, sun nyapu cap, sun ner nyapu cap, sun pel dona neng cap, nerapu cap, tonda sun ati arum neitamai kunkameng Lewi yala neng cap, yuk mutu di tengyakan nimi bo neng cap, tonda solu nerapu cap, sun nin cap, nai cap konum depipa, tapi nyapu cap, wein nesala cap, sun yumadi kange teleppu doupra kuprumudi, pingpinga di tonpa kunkamrume. 12 Akeca pel donkamrum taru yumada, men lumdongonkamrume. Tenpu ngeda, sun Mesir mutu neitamai kuramrum taruda, ikin pel dimamseipa, doramrumpa ikin weik kuramrum ngeda, lumdongona gume. Tupa tenenkamrume. Tonda, nedi sun yuma tep, ‘Angeda kunkamrume, angeda pio men kunkamrume,’ pepra, deipsisi upu yumada, moupra talepmumdi kunkamrume. Musadi sun Israel nesala tep pepu.

Co di dodina ati, Bura Ati Kailya tumi tep, pepu upu

13 Musadi sun Israel nesala tep pepu. Gandum du wena tep taingne keca di taikra, du wena cap, tonda anggur du taiprumudi, anggur me purupra derina cap tep, apel konum kupmumnyopda, sun adipapu co bata di keana tep, dodina ati bura tara doamumdi, ange tep Bura Ati Kailya kalemkamrume. Ada, ue yoneitam bari tumi neitamai yumada, aco bata di donkamrum dodin ati pumbonpu mapmumdi, akailya ton kalemkamrume. 14 Akailya kalepra jenkamrum taru neitamai yumada, sun cap, sun nyapu cap, sun ner nyapu cap, sun pel dona neng cap, pel don nerapu cap, tonda sun ati arum neitamai kunkameng Lewi yala neng cap, yuk mutu di tengyakan nimi bo neng cap, tonda solu nerapu cap, sun nin cap, nai cap konum depipa, tapi nyapu cap, wein nesala cap, sun yumadi kange teleppu doupra kuprumudi, pingpinga di tonpa kunkamrume. Sun yumadi kikiman akailya kalepra jenkamrume. 15 Tonda, ue yoneitam bari tumi yumada, akailya kalepra jemumdi, sun nai bo Allah Yahweh tepapu gispal donkamrume. Ada, taliai di men kunkamrum dinin, Allah erdi ketenepra deipkamrai dipapu, aca dipu Bura Ati Kailya kalepra jenkamrume. Ukuprumu pangeda, sun nai bo Allah Yahweh, er dipapu, sun wa pepra kounkamrum keca pe, sundi pel donkamrumnge yala-yala yuma peda, pio telep kweipserepa, nong weika di karenkamserure. Ukupsere pangeda, sun yumadi kange deiprumudi, er tepapu gudinkamrume.

16 Tonda, sun Israel nimi yumada, Allah Yahweh tepapu gispal doryakankamnunge. Ada, Allah erdi, ‘Ange kunkamenge’ tenen, ketenepra deiamreyai dipu, tenpu keteng tamun neitamai dinin, ue weneri deiki di, sun Israel nimi yuma, ada keteng tamun 20 dinin dipra deiki tara konum nemi neng, bulupra yangedi, er si eremkamnunge. Allah er si enemna tep bulupkameng taruda ake. Ada, Kaplemna Kailya Kalemna taru cap, wa pepra kouamenge keca yuma tep, kailya kalepkameng taru cap, tonda co bata di bura ati dopmengedi, Bura Ati Kailya kalepkameng taru cap, ange ue weneri deiki di, bulupmengedi Allah er si eremkamnunge. Ataruda, amutu kunung nimi yumada, tali tep men yakankameng dinin, Allah tep karena kecada, yuk-yuk doupra kareryakankamnunge. 17 Adoupra kareryankameng kecada, Allah erdi sun yuk-yuk tep, telep kweipudi, akeca-keca weika di yamupra kareamutopu kupra, telep karena keca doupra yakankamnunge. Musadi sun Israel nesala tep pepu.

Telep dumsisi kuna tep nengeda, nimi upu bongdina deiyo neng wepkamenga tep, pepu upu

18 Sun Israel yala nesala yuma tep, ‘Sun amutu neitamai kunkameng’ tenen, Allahdi karepseupa, ati arum dopra kurum mutu yumada, akuruma utopu, akati arum neitamai di, sun upu lepsisikra bongdina deiyo neng ton, yuk-yuk wepra deipkurume. Tonda, Israel nesala sun kunkamruma neitamai di, mali kuprumpa, adeiyo nengdi, aupu gekepmengedi, lepsisikra bongdina telep dumsisi upu pepsengedi, kange di telep kweipkamsenge. Atep, ‘Nimi upu lepsisikra bongdina deiyo neng melipra upu bongdinkamseng’ tenen, adeiyo neng ton wepra deipkamrume. 19 Sun awepra deipkamrum nengdi, ‘Angeda tek sisi malinge. Angeda, tek sisi telepnge,’ tenepmengedi, upu bokeipkamsenge. Sundi, ‘Angebo ne kap kurura cadi, dakwapye,’ men tenenkamenge. Sun pe kange dipapu, ‘Angeda ukupkupe,’ tenepmengetopu kupra, upu lepsisikra men bokeipkamsenge. Tonda, ‘Ton ngebo tepapu ikin keca men deipkupe’ tenen, erdi co bo karepyopda, erdi mali kupu keca men kaukepkamenge. Tonda, bul karepmenge ngeda, men doronkamnunge. Deiyoda, abul keca karepmenge pangeda, ila kael kemredi, dumsisi telep kuna ngepu kuramre ngebo peda, tamupra malingepu kupkamrure. Malinge tep, men wenemrure. Telep kunange tep, wenemrura cadi, asuru pun neng utopu kununge. Adeiki di mali pel donunge. Dumsisinge ton men pel donunge. Atep nengeda, bul keca dopropmanto nengda men wepra derinkamrume.

20 Sundi ataru-ataru yumada, adipapu pio dumsisi teleppu kunkamrume. Nimi upu bongdina taruda, ware neng do yuma, sundi kuramengtopu, gekeprumudi, upu lepsisikra bongdinkamrume. Ton tara neng tep, ‘Ne kap,’ tenen, ‘Telep kweipkupe,’ tenena dinin, ton tara neng tep nengeda, ‘Nun songe cadi, ikin kecapu karepkupe,’ tenena gume. Sun upu gekeprumudi, tek sisi kupra upu bongdinkamrume. Ukurum pangeda, Allahdi sun tep karepseu mutu neitamai bena kunkamrume taruda, keteng tamun weikanun ton, go karepserepa, keteng tamun weik ton gam kunkamrume. Tonda, ataru neitamaida, Allahdi, ‘Karepkamsene,’ peamseu mutuda, tek sisi doproprumudi, acapu taleprumudi, telep kupra kunkamrume. 21 Tonda, sundi sun nai bo Allah Yahweh, er si eremnai tep, mesba dopra keteneipkamrumaida, yuk tali keca si eremna tep, lyom co er si Asyera co ^{▼▼Asyera co – Asyera coda, ila lyom co tengamnga cadi, sun Kanaan tara neitamai kurami nesaladi aco kweprapidi petuprapidi, ‘Nun nai bo ake’ tenen, abetaipinge ingamidi, tali keca cap, isok-isok cap, sun si eremami. Atep ngeda Allahda pio song teneramu.} dopra petupra, betaiprumudi, amesba damai men tekra derinkamrume. Akecada pio mem keca tepa. 22 Tonda, tali yuk-yuk keca do, yuk mutu nengdi, ‘Akecada nun nai bo allah,’ tenerameng ngeda, akeca si eremna tep, ayomnya co ton men ikra derinkamrume. Deiyoda, sun nai bo Allah Yahweh, erda autopu keca si eremna tep nengeda, ‘Ne dabale weike. Angeda ne pio songe,’ tenerure. Musadi sun Israel nesala tep pepu.