Deu 17 | XteSC | STEP | Sun nai Allah Yahweh, er si eremna tep, karena ngeda, pio telep domba bisam cap, sapi bisam cappu karenkamrume. Nong bol mali ngeda karena meme. Angeda Allahdi, ‘Angeda ne pio songe,’ tenepra tapkamsere.

Deuteronomy 17

Mali kwamre gam kun keca dopra, Allah er si eremna tep, karena meme

1 Sun nai Allah Yahweh, er si eremna tep, karena ngeda, pio telep domba bisam cap, sapi bisam cappu karenkamrume. Nong bol mali ngeda karena meme. Angeda Allahdi, ‘Angeda ne pio songe,’ tenepra tapkamsere.

“Yuk tali keca tep, ‘Nun nai bo ake’ tenen, si eremnada pio meme,” pepu upu

2 Sun kunkamrum mutu neitamai di, nimi do, nerapu do, Allahdi, ‘Angeda ne pio songe, angeda pio men kunkamrume,’ pepra deiamu upu, sundi yaniptapmengedi, yuk nengdi epra kael kepmengedi lap pepmengepa, sundi moupra gekepkamrume. 3 Tonda, sun angebo cap, aner capdi, tuai mutu tali kukre keca do, isok do, ato tali keca, ‘Nun nai bo ake’ tenen, si eremengopda, ange peda pio mali kun keca. Ange utopu, ne Allah gispal dona tep gum dinin, sundi gutam tu dipra gispal donung keca, keteng do, war do, kuru do, akeca tep si erepmengedi, ‘Nun nai bo ake’ tenen, atali keca tep gispal dopra, si erepmangepa, yuk nengdi ange epra kael kepmengedi, sun deiyo neng tep lap pepmengepa, moupra gekepkamrume. Deiyoda, akun keca yuma tep, nun nai Allahdi, “Meme,” konum peiamseu. 4 Atep nengeda, nimi do, nerapu do, tali kun keca tep si erepmengepa, yuk nengdi epra lap pepsenge pangeda, sun deiyo nengdi, ‘Sundi ange tep tek sisi kupmang do?’ tenen, moupra kalekra dipetepmumdi, amali kuna deiyo ngeda, tek sisi sun Israel mutu neitamai di kupmange pangeda, akupmange nesala tomopkamrume. 5 Yuk tali keca tep si erepmange deiki di, pio mali kupmare ner do, nimi do, anengda doupra sun mutu ati arum kuramumyai di doprapmumdi, akati arum bura bana tep, bisi buplanai, bena deipmumyopda, anengda sun wenemna tep, sun Israel nesala yumadi, gel yarepra popmumpa, denkamnunge.

6 Uda, amali keca kupmange neng, ikin deipra pona tep nengeda, tenpu ngebo dipapu, ‘Sun mali kupmangada, ne dipu epsi,’ pepreya deiki gum dinin, tek sisi nimi butene nengto, tonda weneri nengto, aneng yumadi epmengedi, ‘Tali keca si eremnunge,’ lap pepmenga tep nengeda, amali kupmange neng adipapu ponkamrume. Dinino, ton cap pepne. Tenpu ngebo dipu epmaredi, lap pepre ngeda, adeiki dipu, sun anesala men ponkamrume. Ada, ‘Tek sisi amali kun keca kupmang do, gum do’ tenen, tenimtona kupseryopda, aneng tamkamrume, pona gume. 7 Tonda, tek sisi kupmangepa, nimi weika di epmenge dingeda, sun menmena epmang nengdi, gel dopra amali kupmange neng popmengepane, amenda tarada, sun amutu kurum Israel nesala yumadi, gel dopra ponkamrume. Ange kupmumya deiki di, amali keca kupmange neng cap, sundi mali kupmange keca capda, gum kupra derinkamrume. Sun Israel nesala kunkamrumaida, ato mali kun keca pio men kunkamra tepa.

Nimi upu bongdina tep, pepu upu

8 Tonda, ukupmantoda, sun upu deiyo talena nengdi, amutu neitamai kunge nesaladi, mali kun keca talepra kupmengopda, nimi upu ton lepsisikra bokeipkamrume. Dinino, aupu gekepkamrum taruda, ‘Uo, nun yambul walwal kupsere. Wangwang pepsera cadi, ware kupkamep do, tek sisi kupmang do, gum do?’ tenen, tenimtona kupsereyopda, yapkamrume. Ada, ton ngebodi, ton ngebo tep poptapyop do, gum do? Tonda, nong bol deikipu popdangepa dila dona do, gum do? Tonda, nimi tek sisi popmangenge cap, mankau di popmangenge cap, tonda, yuk ngebo taleamne keca tep, upu pepra yap-yap penange cap, ange-ange yuma tep, sun upu deiyo talena nengdi men gawal dakmanto kupmenge ngeda, sun adipapu sun nai bo Allah Yahwehdi, ‘Ne si eremna mutuda ake,’ pepra, erdi ketenepra deipuaipu bankamrume. 9 Bemum dingeda, Allah er si eremna ati pumbon pel dona neng, sun Lewi yala neng, imam-imam pel don neng cap, tonda upu lepsisikra bongdina deiyo neng, ada (Hakim) neng cap, sun damaipu bena, ange yumada lap perbankamrume. Ukupmum pangeda, sun dipapu, ‘Angeda ukupmarume’ tenen, pepkamsenge. Ukupmengedi, upu bongdina deiyo neng, sun hakim nengdi pepmenge ngeda, sun imam-imam nengdi lap peryankamsenge.

10 Imam-imam neng cap, upu lepsisikra bongdina deiyo neng, hakim neng cap, sundi, ‘Angeda ukuprap nge kupkamrume,’ pepmenge pangeda, sundi moupra, sun pepmange nge yuma tep, kael kepra kupkamrume. Ada, sun nai bo Allah Yahwehdi, ‘Ne si eremna mutuda ake,’ pepra, erdi ketenepra deipuaipu, gekerbankamrume. Adeiyo nengdi, ‘Ukupra kunkamrume,’ pepmengopda, sundi moupra, sun pepmange nge yuma tep, kael kepra kupkamrume. Tenpunge peda tamna gume. 11 Sun imam-imam neng cap, hakim upu lepsisikra bongdina deiyo neng cap, sundi, ‘Angeda ukupmanga cadi, sun wenemna tep, ukupkamrume,’ pepmenge nge yumada, ‘Teka’ tenen, moupra angepu kupkamrume. Tonda, sundi ‘Angeda ukunkamnunge,’ pepmenge nge yumada, yambul nge pe, ton tamna gume. Pio talepra kunkamrume. ‘Ange kupkup do, ange tapra yuknge kupkamap do?’ tenena gume. Sun upu lepsisikra pena deiyo nengdi pepmenge ngepu kupkamrume.

12 Tonda, sun nai bo Allah Yahweh, er si eremna ati pumbon pel dona neng, sun imam-imam neng cap, hakim upu lepsisikra bongdina deiyo neng cap, wepra deipmarepa, sun anengdi, ‘Angeda ukunkamenge,’ pepra, pepmange nge tep, ware ngebo do yuma, sun upu bisbisa kapra yaniptapre ngeboda, adipapu wenepra portamkamrume. Ada, ange kupmumya deiki di, sun Israel nesala kunkamruma neitamaida, amali kun keca kupmare ngebo cap, erdi mali kupmare ngeda cap, gum kupra derinkamrume. 13 Apepmasentopu konum kupmumpa, amutu kunkameng nesaladi, gekepmengopda, konuma, amutu neitamai kunge nesala yumada, akupmumnge gekepra kael kepmengedi, sun kwar kupkamre. Ukuprepa, amenda taruda, amali keca ton tamupra men kunkamenge.

Nimi deiyo neng, sun Raja kepmenge nengdi talepra kunange tep, pepu upu

14 Allah Yahwehdi, ‘Atelep mutu karenkamsene,’ pepra pedina upu deiki di peipseu mutu, konum wekmumdi talepra, amutu neitamai kumum taruda, ne kaele, amenda taruda sundi, ‘Gume, amutu dana-dana tara kunge nesala, sun ila nimi deiyo kepra, Raja kunge nengdi talepra kungetopu, ‘Nun pe ton kuptepya tep, Raja ngebo wepra deipkupe,’ tenenkamrume. 15 Ukupra tenepmum pangeda, sun nai Allahdi ato ngebo ton wepra deipkamsetue. Sundi, ‘Tek sisi angeboda, nun nimi deiyo ngebo kepsetudi, Raja kunkamsere’ tenen, kael kepkamrum ngebopu wepra derinkamrume. Angeboda, Allahdi wepra deiamre ngebopu wepra derinkamrume. Tonda, awepra deipkumum nengda, sun amutu sisa nengpu erepra derinkamrume. Yuk mutu nimi bo neng utopu nengda wepra derina pio gume. Sun Israel nesala kankan neitamai dipu wepra derinkamrume. 16 Tonda, sundi wepra deipkamrum Raja nimi deiyo ngeboda, ‘Kuda bisam weika di dopra keptene’ tenen, men kupkamtue. Angeda malipua. Tonda angetopu, sun Raja deiyo ngebodi, ‘Mesir mutu tamupra bepedi, kuda bisam weikanun ton dorona tep, kunumbenkamepe,’ men peptue. Deiyoda, Allah Yahwehdi, “Ne nyapuda, Mesir mutu tamupra men yankamnunge,” peamnga tep, aupu pepsene.

17 Tonda, sun ila nimi deiyo Raja kepra deipkamrum ngeboda, ner weika di dona gume. Tonda angetopu, kunumna weik keca emas cap, perak cap, weika di men dopropkamre. Ange teneramre ngeboda, wepra derina gume. Deiyoda, ange putana cap, dorona cap kupreya deiki di, ‘Sun nai Allah er si yanipredi taprur’ tenena tep pepsene. Yuk tali keca putapreya deiki di Allah taprura tepa.

18 Raja wepra deipkamrum ngeboda, adipapu Allahdi, “Angeda kunkamrume, angeda pio men kunkamrume,” peipupa imam-imam Lewi yala nengdi dopra, sekra deipi ngeda, nedi aupu pepsene upu yumada, sekrapmengedi karepmengepa, er damaipu derinkamre. Angeda pio tupa tenepredi talenkamrure. 19 Aupu sekra karepmenge bukuda, aRaja er damaipu derinkamrure. Tonda, er gam kunkamre taru yumada, aupuda tumi-tumi yuma nungnapu kunkamrure. Ange kupreya deiki di, erdi si eremrur Allah Yahweh tep, kwar kuprepa, er sipu erepra, ‘Erda ila mambule, pio telepe’ tenen, Allah erdi, ‘Ange kunkamrume, angeda pio men kunkamrume,’ pepra deiamseu upu tep, pio moupra talepredi kunkamrure.

20 Abuku neitamai seki ngeda, erdi tumi-tumi yuma moupra nukredi kure pangeda, er kayapu neng Israel nesala damai, ‘Nepuda pio telep ngebo, yuk nesalada ne iriamu tarapu kununge,’ tenepredi, er dipru erepra sal nong-nong deiki men kunkamre. Tonda, Raja nimi deiyo ngebodi, Allahdi, ‘Ange kunkamrume, angeda pio men kunkamrume,’ pepra deiamseu upu ton, pio men yanipkamre. Ukupreya deiki di, er cap, erdi deiprepa dadeipdanen bankameng neng cap, sun kankan neitamai di, sun Israel nesala yuma tep, ila nimi deiyo neng kupmengedi, Raja kepra, sundi talepmengepa pio kupbankamenge.