Deu 18 | XteSC | STEP | Allah Yahwehdi, Harun tep pepu. Ne si eremna ati neitamai pel donkameng neng, imam-iman neng yumada, Lewi yala neng kununge. Tonda, sun imam-imam neng cap, sun tali dakunge Lewi yala neng yuma capda, nedi sun wa pen tu cap, yuk keca yuma cap men karenkamne. ‘Sundi akeca-keca talepra kunkameng’ tenen, nedi akeca yuma dopra, Lewi yala neng tep men karenkamne. Ange gum dinin, Israel nesala yumadi, ‘Nun mali kunup kecada, nun nai bo Allahdi akeca yuma tep kaukepseredi, gum kupra deipkamser’ tenen, gam keca duyangedi Lewi yala imam neng tep karepmengepa, imam nengdi ayapi keca popmengedi, uku dongorbankamenga neitamai di bokra, sun Lewi yala neng ton dopropkamenge. Akeca doronkamenga deiki di, gam kunkamenge.

Deuteronomy 18

Sun imam-imam neng cap, Lewi yala neng cap, sundi pel talepra donkaminge tep, pepu upu

1 Allah Yahwehdi, Harun tep pepu. Ne si eremna ati neitamai pel donkameng neng, imam-iman neng yumada, Lewi yala neng kununge. Tonda, sun imam-imam neng cap, sun tali dakunge Lewi yala neng yuma capda, nedi sun wa pen tu cap, yuk keca yuma cap men karenkamne. ‘Sundi akeca-keca talepra kunkameng’ tenen, nedi akeca yuma dopra, Lewi yala neng tep men karenkamne. Ange gum dinin, Israel nesala yumadi, ‘Nun mali kunup kecada, nun nai bo Allahdi akeca yuma tep kaukepseredi, gum kupra deipkamser’ tenen, gam keca duyangedi Lewi yala imam neng tep karepmengepa, imam nengdi ayapi keca popmengedi, uku dongorbankamenga neitamai di bokra, sun Lewi yala neng ton dopropkamenge. Akeca doronkamenga deiki di, gam kunkamenge.

2 Nedi yuk yala Israel nesala yuma tep, sun wa pen tu cap, yuk yala-yala keca yuma cap bokra karepkamne. Dinino, sun Lewi yala neng tep nengeda, akeca-keca yuma bokra men karenkamne. Ne Allah Yahweh dipapu, sun Lewi yala neng tep kalekra melimkamne. Sun putan keca yumada, ne deiki dipu doronkamenge. Ada, ne Allahdi, sun Lewi yala neng tep, ‘Ne dipapu sun putan keca ketenepra karenkamsene,’ pepra pediramsitopu kunkamenge.

3 Ware nesala do yuma, Israel nesalada yuk-yuk dinin, sun yumadi, ‘Nun mali kupe keca yuma Allahdi kaukemkamser’ tenen, sun peinung keca neitamaida, domba bisam cap, sapi bisam cap, kambing cap, ma cap, uda yuk yala keca yuma capda, sun imam-imam neng damaipu doupra kareryakankamenge. Adoupra yakankameng gam keca yuma neitamaida, imam-imam neng tep karepmengopda, sun imam-imam neng cap, Lewi yala neng capdi, kail damai tu cap, si bana damai tu cap, mundu telep kuramrenge cap, nong neitamai telep kuramre tu cap yumada, bol telep kupra douramrenge yuma cap, akeca doupra yangedi, sun imam-imam neng tep kareryakankamenge.

4 Tonda, sun Israel yala nesala yumadi, sun imam-imam neng cap, Lewi yala neng yuk neng yuma cap tep, gandum wa cap, anggur tapu du wa cap, zaitun co du mokon cap, menmena weni kinkamrum ngeda dopra, kareryakankamenge. Tonda, sun domba bisam potong ukupu toupmumnge cap yumada, sun imam-imam neng cap, yuk Lewi yala neng cap, sun damaipu kareryakankamrume. Akeca dopra jenkamenga deiki di gam kunkamenge. Atep, apepmasen keca dopra, sun Lewi yala imam-imam neng yuma tep bokra karenkamrume.

5 Adopra kareryakankamrum ngeda, tali tep gume. Deiyoda, ne sun nai bo Allah Yahwehdi, sun Israel yala nesala yuma kuruma kan-kan neitamai di, Lewi yala neng konum wepra deiamsi. Ada, ne Allah Yahwehdi, ‘Lewi yala nengdi, ne si eremna ati pumbon talepra pel donkameng taru yumada, ne si deiki di pel dopra kunkamenge’ tenen, ayala nengpu wepra deiamsi. Angeda, sun Lewi yala nengpu ne Allah si eremna ati neitamai talepra kungedi, pel pio dopbankamenge. Atep, sun yuk yala Israel nesala yumadi, apepmasene keca dopra, sun Lewi yala neng tep kareryakankamrume.

6 Sun Lewi yala neng yumada, dan mutu do yuma, sun pe mutu tapmengedi, Israel nesala dabena kuramenge mutu neitamaida, sun Lewi yala neng peda, abena kungedi, nimi bo neng utopu kupra men kunkamenge. Akunkameng mutu neitamai yuma peda, ne si eremna pelpu donkamenge. Tonda, ‘Ne nyapu sisa Israel yala nesala kunkameng’ tenen, ne Allah Yahwehdi wepra deiamsi mutupu kungedi, apel yuma talepra donkamenge.

7 Sun pe mutu tapmengedi, yuk mutu bena kunkameng taru yumada, ne Allah Yahweh, ne si erepra kungedi pel donkamenge. Angeda telep pua. Ada, sun kayapu neng, yuk Lewi yala neng peda, ne si erepra, ne pelpu donkamenge. Ada telepe pua. Ada, sun Lewi yala imam-imam neng yumada, ne Allah damaipu kungedi, ne ati pumbon neitamai talepra ne pelpu donkamenge.

8 Atep nengeda, sun Lewi yala imam-imam nengdi, sun pe mutu tapmengedi, yuk mutu bena kunkameng taru yumada, sun jen keca weika di doronkamenge. Ada, pumun taru di amutu neitamai kuramenge Lewi yala nengdi, telep keca yala-yala yuma dororamengtopu, sun ukupu yankameng Lewi yala neng peda, atelep keca dorongedi kunkamenge. Angeda telepe. Sun imam-imam neng yumadi, sun doronada yuk-yuk gume. Sun keca doronada utoto pua. Israel nesaladi, apepmasen keca kareryakankameng taruda, sun imam-imam nengdi doronkameng ngeda utoto pua.

Ukupu yankameng imam nengda, sun pe mutu tapkoi taru, sun apu yapu talerami keca yuma kunupmengedi, co bo ton dopropkamenga peda, telep pua. Dinin, sundi yuk mutu konum bengopda, amutu kunge imam-imam nengdi, Israel yala nesala kareryakankameng keca neitamai di dororamengtopu, sun ukupu yankameng Lewi yala neng peda, akeca utotopu doronkamenge. Angeda telepe. Allah Yahwehdi pepu.

Yuk mutu nesaladi isok si erepmengedi, mem pel cap, yuk mali kun keca cap kuramengtopu, ‘Akeca talepra pio men kunkamrume,’ pepra deipu upu

9 Uda, sun nai bo Allah Yahwehdi, sun tep keteneiamseu mutu, Kanaan mutu karepserepa doropmumdi, amutu neitamai bena kunkamrum taru yumada, sun amutu neitamai kunge nesaladi, mali kun kecapu talepra kungetopu, pio men kunkamrume. Ada sun amutu nesala men di talepra, mali-mali kuramenge keca epmumdi, akeca tep, ‘Uo, sun amutu kunge nesaladi mali kuramenge keca, nun peda akeca ton kael keptepe,’ tenenada pio meme. Ne Allah tep, teka men tenenung nesaladi, tali keca petupra deipmengedi, amali mem kecapu talepra kuramenge ngeda, tonda yuk mali mem keca kuramenge ngeda, sun Israel nesaladi ton, bena talepra pio men kunkamrume. Angeda meme pepsene.

10 Sun amutu neitamai kunge nesaladi, mali kupra kunge kecada pepkusene. Sun amutu kunge nesaladi, isok si eremna tep kungedi, sun nyapu yumada, sal nyapu cap, ner nyapu cap yuma popra, uku dongorbanunge. Sun amutu neitamai kunge nesaladi mali kuramengtopu, sun Israel nesala pio men kunkamrume. Tonda, sundi nimi deramenge nesala, sun sambala cap, kikiman upu talepra kurameng nesala cap, kikiman dukdongopra pio men kunkamrume.

Tonda, sun amutu nesaladi, nimi ker don meri talepidi, nimi tep, ‘Nun song’ tenepra kunung nesala cap, kikiman upu talepra men kunkamrume. Tonda, sun amutu nengdi mem kecapu talepmengedi, ‘Amenda taru kupkamre ngeda, epmepedi kael kepra lap penkamep’ tenen, mem pel doramenge ngeda, sun Israel nesaladi pio men kunkamrume. Amenda taru kunkamrumai yumada, amutu neitamai kunge nesaladi, pio mali kurameng keca, sundi talepra pio men kunkamrume.

11 Amutu neitamai kunge nesala, sun kan-kan neitamai di, nimi ton ker dona tep, ila di kael kemenge nesala cap, kikiman dukdongopra kuna pio gume. Ange utopu, nimi denung nesala sambala cap, upu talena tep deiyo keca talepra pel doramenge ngeda, sun ton talepra men kunkamrume. Tonda, amem keca pel donge neng tep, ‘Uo, nun ton peterepsetenge’ tenen, asimpetena gume. Amem keca yumada, sundi kikiman dukdongopra kuna pio gume.

12 Apepmasen keca talepra pel donge nesala yumada, ne Allah Yahwehdi, ‘Ne song’ tenen, tamnune. Amem keca yala-yala yumada, pio mali keca tep pepsene. Ange tep nengeda, ware nesala do yuma, sundi apepmasen mali kun keca kupbanung nesala yumada, ne sun nai bo Allah Yahwehdi, anesala enepra amutu neitamai di dokotepkamne. Sunda ne nyapu sisa Israel nesala cap, amali keca talepra kunge nesala cap, kikiman dukdongopra pio men kunkamrume. Deiyoda, ne Allahdi, amali keca talepra kunge nesala yuma tep nengeda, ‘Anesalada ne pio songe,’ tenenuna tep pepsene.

13 Atep, ne sun nai bo Allah Yahweh kununa cadi, sundi ne damai kunkamrum taru yumada, mali kun keca tenpunge peda, talepra pio men kunkamrume. Ne sun nai bo Allah cap dipru dukdongopra kumumdi, pio dumsisi kun nesalapu kunkamrume. Allahdi Israel nesala yuma tep pepu.

Allahdi er upu lap pena tep nabi ngebo, tenpu wepra deipkamra tep, pepu upu

14 Musadi Israel nesala tep pepu. “Sun wekra upu talepmumdi kunkamrum mutu kunge nesalada, pio mali weik kununge. Sundi, asuru kwa neng cap, derameng nesala sambala tep, kikiman upu talena neng cap, ‘Amenda taru kupkamre keca kael keptepe’ tenen, mem pel talepra don neng cap, nimi ker dona neng cap, pio weik kununge. Amenda taru bena kunkamrum mutu neitamai kunge nesaladi ukunung dinino, sun Israel yala nesaladi, ange utopu pio men kunkamrume.

Nedi amutu yuma karepsenyopda, sundi, amali kunge nesala yuma enepra dokotepkamrume. Sun nai bo Allah, er si Yahweh, erdi sun tep weiamseu ngebodi, ‘Ne mawa nesaladi amem keca yala-yala yuma talepra, pio men kunkamenge. Ange yumada meme,’ teneramseudi, konum peamseu. ‘Akeca yumada, pio ton men talepra kunkamenge,’ teneserure.

15 Ange gum dinin, sun nai bo Allah Yahwehdi, pumun taru ne Musa weiamneu utopu, nun nai bo Allah Yahwehdi, nun Israel nesala kan-kan di, ne utopu ngebo tenpu ton wepra deipkamsere. Ada Allah er pere upu gekepredi, sun tep lap penkamre deiyo ngebo wepra deipkamsere. Ukutaru ne Musa kunetopu, amenda taru angeboda, Allah er upu lap pena deiyo ngebo kunkamsere. Angebo konum wepra deipseryopda, angebo penkamre upu pio gekepra kunkamrume.”

16 “Allahdi angebo wepra deipkamserada, tali tep gume. Deiyoda, ake. Men di Sinai mutu bulupra wekrum taru di, Allah tep moroprumdi, ‘Uo, nun nai Allah Yahweh, er pedi pere upuda, nun kware weik kuserura cadi, nun damai ton er pedipapu men penkamserure. Tonda Sinai mutu deiki, Allahdi keteneipu uku bu jeramupa diramepu utopu ngeda, nun kware tep ton cap pio men dinkamepe. Nun kware weik tepa. Er upu tupa gekepmepedi, auku bu ton tupa epmepyopda, nun depnup’ tenen, peramrume. Aupu peramruma tep, Allahdi er upu lap pena deiyo ngebo ton wepra karepkamsere,” Musadi sun Israel yala nesala tep pepu.

17 Musa upepudi aupu ton dukdongopra pepu. Allah Yahwehdi Sinai mutu deiki antapnemu taruda, aupu ton pepneu. Ada, sundi aupu peramrum taruda, Allah er si Yahwehdi upepneu. “Sun Israel nesaladi moropmaneng upuda telepe. 18 Musa kan wepra deiamkesitopu, sun Israel nesala kan-kan di, ne upu lap pena deiyo ngebo, tenpu ngebo ton wepra deipnedi, ne upu er damai pepra deipnepa, aupu yuma dopra, Israel nesala tep lap perbankamre,” Allahdi pepu.

19 Upepudi, aupu ton pepu. “Ne upu lap pena deiyo ngebo weipnepa, ne si deiki cap, ne puto deiki capdi pepserepa, erdi penkamre upu men gekeramenge nesala yumada, nedi sun tep wenepkamne.

20 Dinino, ne upu lap pena deiyo ngebo dinin, nedi ‘Upenkamrume,’ pepra, men deiamne upu, aneng sun pe kange dipu, ‘Allahdi upepneu,’ pepra, ne si deiki di mok upu penkameng nengda, adipapu sundi poptapkamrume. Ange utopu, ware neng do yuma, nedi men wepra deipsi neng dinin, isok er si do, yuk-yuk keca do, sun si eremenge keca deiki di, ‘Ukunkamrume, ukunkamrume,’ pepmenge nengda, adipapu poptapkamrume. Sunda nedi men wepra deipsi nengdi, mok upu penunga tepa.” Allahdi upepneu, Musadi pepu.

21 Musadi upepu dingeda, aupu ton pepu. “Yuk taruda, sun dipru neitamaida, ‘Allah Yahwehdi tek sisi weiamu ngebodi, Allahdi peipseu upu dopra lap penmaser do, gum do?’ tenen, kange tenimtonapu kupseryopda, sun kunkamrum keca lape pepkusene. Adeiki di kael kepkamrume. 22 Ware neng do yuma, ‘Allahdi upepneua tep, mambul keca kupkamre ngeda ake, ake,’ pepra lap penung dinin, sun penge keca nong men kupyopda, konuma. Adeiki di kael kepkamrume. Anengda, sun penge keca nong men kupmara tep, Allahdi er pel dona tep, aneng men wepra deipu.

Sundi penge keca nong men kurura cadi, sunda tali mok neng pua. Sun pe kange tenena deiki dipapu upu pesenunge. Allah er si deiki, ‘Ukupkamre,’ penung neng dinin, sun penge upu nong men kupyopda, anengda Allah Yahwehdi tek sisi men dokotepseua tep, ato neng tep nengeda, kware men kunkamrume. ‘Allahdi peipu upu men penunge. Sun pedipapu tenepra penunge,’ tenenkamrume. Ato nengda potamkamrume. Allahdi upepneu,” Musadi Israel nesala yuma tep pepu.