Deuteronomy 19

“Yu kange tenena gum dipapu nimi popmengopda, ‘Sun tara nengdi kwangdakra popsenung’ tenen, yukai bena telep kunkamenge,” pepu upu

1Musadi sun Israel nesala tep pepu. Sun nai bo Allah Yahwehdi, sun tep karepkamser mutu neitamai men di kurami nesala yumada, amutu neitamai di enepra dokotepkamre. Ton nengda popra gawal dakamre. Ukupyopda, Allahdi amutu dopra, sun Israel nesala tep karepkamsere. Ada amutu kurami nesaladi, sun men di dopra kurami ati cap, sundi talepra kurami mutu wa tu yuma capda, sun tep karepserepa, sun dipapu amutupu dopropmumdi, talepra kunkamrume.

2Sun nai bo Allah Yahwehdi, amutu karepserepa, amutu neitamai pio akunkamruma tep, sun amutu neitamai kurami nesaladi domi ati arum dipeteprumdi, ati arum (kota) weneri wepkamrume. 3Akati arum (kota) weneri dopra kuraminge wepkamrum ngeda, amutu yuma bokra weneri keipmumdi, yuk-yuk talepra kunkamrume. Ada sun nai bo Allah Yahwehdi, ‘Sun Israel yala nesala tep karepkamne’ tenen, ketenepra deiamseu mutu karepserepa, talepra teleppu kunkamrume.

Tonda, sundi amutu yuma bokra, weneri kepra deipmumdi, amutu neitamai embana tep, telep karayong bisi yapra deipkamrume. Ada tali tep gume. Deiyoda, ware ngebodi do yuma, yu kange tenena gum dipapu, yuk neng popmengopda, ‘Uo, sun tara nengdi, ne wenemna tep kwangdakra popnenung’ tenen, sepdaro aweneri ati arum (kota) damai benkamenge.

Ukupmumnyopda, nimi sun mangkau di yuk neng popmengopda, sun podan neng yangedi, adipapu menmena yana men popkamenge. Nimidi mankau kange doupra, yuk neng popmengopda, sun pe mutu taprapmengedi, sepdaro aweneri ati arum (kota) neitamai konum bengopda, teleppu kunkamenge. Ada, sun podan neng yangedi, adipapu men popkamenga tep, kware gum dipapu teleppu kunkamenge.

4Angeda tek sisi podana tep lap pepsene. Ada nimi tenpu ngebodi, yuk neng tep portamrur ngeboda, dina di men portamrure. Tonda aneng tep, yu teneramya deiki di men portamrur dinin, er kayapu neng tep, ‘Popkamne,’ tenena gum deiki dipapu, tali poptapredi erdi, ‘Uo ne popmanu ngebo, er kayapu nengdi ne tep kwangdakra popnenung,’ tenepre dingeda, sepdara ton tara mutu bena kunkamre. Ada, sundi aweneri ati arum (3 kota) wepra deipkamrum mutu bena kure dingeda, pio telep kupra gam kunkamre.

5Ukupmantoda, nimi butene co kwemna tep, ya doupra bura mutu barurunge. Bura mutu bena co kwemarengepane, akapak ya yalal puto di luksaka baredi, er kabo poprepa derure. Er kabo poprepa depyopda, er kwar tep, adipapu sepdaro yuk mutu barure. Ada, sundi wepra keteneipkamrum ati arum weneri (3 kota) dinin, meneng damai atipu sepdaro benkamre. Beredi amutu neitamai bena, telep kupra kunkamre.

6Akati arum neitamaida, yuk neng yumadi angebo damai yana men poptenge. Er kabodi tenepra, yuk karen mutu barya deiyoda, ‘Ne kabo er tara neng cap, er nerapu, nyapu cap, sun yumadi ne tep, yu kuprepa tamupra kwangdakra popnenung’ tenen, yuk karen mutu sepra barure. Angebo, nimi popmare ngeboda, sundi er wenemna tep dombena men poptapkamrume. Er kabo popmare ngeda, yu kange doupra dina di men popmare. Tonda, angebodi, ‘Ne kabo popkun’ tenen, men keteneipmar dinin, mangkau di popmare.

7Ange tep nengeda, nimidi er kabo tep, dina gum cap, yu tenena gum cap dinin, mangkau kange dipapu yuk neng popmengepa, sundi, ‘Popmarpa, depmar ngeboda, er tara neng yu kuprepa, kwangdakra angebo popnung’ tenen, nedi, “Ati arum weneri (3 kota) wepmumdi, ketenepra deipkurume,” pepra deipmasene.

8Allah Yahwehdi sun apu yapu tep, “Nedi ila pala telep mutu karepkamsene,” pepra, pedina upu deiki di peiamu. Allahdi aupu pediramutopu, ila pala weik mutu karepserepa, dopropmumdi, amutu kurami nesaladi dorami ati arum weneri ton wepmumdi, ketenepra deipkamrume. Ukupmumyopda, nimi dina gum di, mangkau di, yuk neng popmengopda, akati weneri (3 kota) keteneipkamrumnge neitamai, sepdaro bena kunkamenge.

9Ne Musadi, “Angeda ukunkamrume, angeda men kunkamrume,” peipsenetopu tek sisi kupmumnyopda, Allahdi ila pala telep mutu karepkamsere. Tonda, sun nai bo Allah er si Yahwehdi, ‘Sunda ne mawa nesala kunkamenge’ tenen, “Angeda ukunkamrume, angeda pio men kunkamrume,” pepra deiamseu upu, pio moupra gekerumudi, aupu talepra dombamumnyopda, tek sisi Allahdi amutu karepkamsere. Tonda, sun nai bo Allah Yahweh, er deikipu sun kange deiprumudi erdi, “Atelep bisipu dombankamrume. Telep kunada ake,” pepra pediseretopu, gekepra kupmumnyopda, tek sisi Allahdi atelep mutu karepkamsere. Atep apala weik mutu konum karepserepa dopropmumnyopda, sun adipapu weneri ati arum (3 kota) ton tapakra wepmumdi, ketenepra deipkamrume.

10Apepmasentopu, ngantan bari ati arum wepra deipmumnyopda, telep kunkamrume. Ada nimi ton mali men kupmarepapu, er kabo dina cap, yu tenena cap gum dipapu, mangkau di popyopda, sundi, “Angeboda er mali kupmarenge wenemna tep, menmena poptapkupe,” pepra, ‘Angebo tali lupra poprum’ tenen, pepsene. Nimidi dina gum di, yuk neng mangkau di popmengepa, sundi aneng wenemna tep, kwangdakra men poptapkamrume. Adipapu aneng popmumnyopda, Allahdi aneng sun yapi, sun nong deiki deipseredi, sun tep wenepkamsere. Atep, ‘Nimidi mali men kupmarepapu, mankau kange di popmengepa, sun Israel nengdi aneng kwangdakra poprum’ tenen, amutu neitamaida, ati arum ngantan bari wepra ketenepra deipkamrume.

11Dinino, ware ngebo do yuma, deiyo men kwapmarepapu erdi, ‘Ne kabo tep yu kupnerepa, angeboda ne song cadi, poptapkune,’ tenepredi iniprepa, er kabo mangkau di meneng damai barepa, yu tenepre ngebodi er kabo popyopda, ada tek sisi pio mali kupkamre. Ato ngebodi, yuk ngebo poptapredi, ‘Er tara nengdi ne wenemna tep, kwangdakra popnenung’ tenen, sepdaro nimi men popmantoai ati arum beryopda, telep men kunkamre. Sundi angebo tep, ‘Dakwapye dakurye,’ tenena gume. Ato ngebo nimidi men popmanto ati arum weprumnge (3 kota) sepdaro betua peda, sundi angebo tep tamna pio gume, dorbemumdi, angebo wenepkamrume.

12Angebo tek sisi pio mali kurura tep, er pe mutu talepra kunge wisi neng yumadi, ‘Angebo dorbeso,’ pepra nimi doproipmengepa, nimi popmare ngebo dorbengedi, ateng koupra ka tamupra er pe mutu duyangopda, nimi wenepra pona deiyo ngebo karepkamenge. Karepmengopda, nimi pona deiyo ngebodi, amali kupmaredi nimi pomre ngebo, er kwang dangna tep, er angebo tamupra poptaprepa depkamre.

13Apoptapmumpa depkamre ngebo tep, sundi bicau men tenenkamrume. Nimi ton mali men kupmarepapu, tali portamrur ngebo tep, kwangdakra poptapkamrume. Dina di yu tenepra nimi porameng neng yumada, yuk tali Israel nesala kan-kan men kunkamenge. Ato nesala yumada, poptapra gawal dangkamrume. Ukupmumnyopda, sun Israel nesala yuma telep kupra kunkamrume.

“Tu bokra wilimdonaida, ‘Ton cap utara gisikra doproptene,’ men tenenkamrume,” pepu upu

14Tonda, tu bokra wilimdonai tep, ‘Ne talene tu sirikai ake’ tenen, gel dopra derirameng ngeda, sundi, ‘Tu ton cap tapakra doproptene’ tenen, agel dopra gisikra yukai men derinkamrume. Sun nai bo Allah, er si Yahwehdi karepkamser mutu neitamai, tu bokra yuk-yuk karepkamsertopu, atupu dopropmumdi, talepra kunkamrume. Sun kapul men yanamrum taru, sun men di atu talepra kurami nesaladi, tu bokra wilimdonai tep deiami gelda, gisikra yukai derina meme. Musadi Israel nesala tep pepu.

Nimi mali kunge keca lap perbana tep, pepu upu

15Musadi Israel nesala tep pepu. “Ware mali kuna do yuma, nimidi mali keca kupmengopda, yuk neng epmengedi, sun kupmenge keca lap pena tep nengeda, tenpu ngebo ‘Ne asuru di epmana cadi, teka er mali kupmaue,’ pepre pangeda, adeiki dipapu ‘Teka’ tenepra mali kupmare ngebo menmena wenemna gume. Dinino, yuk neng cap tapakra butene neng do, weneri nengdi do, sun ukuprap nengdi, ‘Gume, nun peda amali kupmare ngeda, nundi epmape,’ pepmenge pangeda, adeiki dipu ‘Angebo tek sisi mali kupmare’ tenen, wenepkamrume.

Angebo kupmare keca, tenpu ngebo dipu, ‘Ne asuru di epmane,’ peptu dinin, yuk neng butene nengto, weneri nengto di men epmengopda, angebo tep talipu men wenepkamrume. Nimi wenemna tep upu bokeipkamrum taru yumada, nimi butene do, weneri do, “Nundi ton epmape,” pepra lap peptengopda, mali kupmare ngebo wenemna telepe. Gum dingeda gume.” Musadi pepu.

16Upepudi aupu ton dukdongopra pepu. Upepu dingeda, “Aupu ton cap tapakra pepkusene,” pepu.

Ada dipru mali ngebo tenpu di, nimi poramredi, mali-mali weik kure ngebodi, yuk ngebo tep, ‘Angebo mali kupmare ngeda ake,’ pepra lap pepyopda, adipapu amali kure ngebodi pere upu, teka men tenenkamrume. Tonda, ‘Angebo mali kupmare,’ pepre ngebo tep, er upu gekepra adipapu wenemna gume.

17Ange gum dinin, nimi poramredi mali kure ngebodi, aupu utopu pepyopda, aupu pepre ngebo cap, ‘Er mali kupmare,’ pepmare ngebo cap kikiman doupra, nimi upu bongdina deiyo ati duyakankamrume. Sun butene akati neitamai, Allah er si Yahweh, er damai wekrengepa, sun upu bongdina deiyo neng cap, Allah er si eremna ati pumbon neitamai pel dona deiyo neng capdi, ‘Tek penmaser do, gum do?’ tenen, aupu yuma moupra gekepkamenge. Ataru aupu gekepmengedi, upu bokeipkameng nengda ake. Ada, Allah cap, nimi cap, antamdina deiyo neng, imam neng cap, tonda Israel nesala sun upu bongdina deiyo wisi neng cap, bulupra wekmengedi aupu gekepkamenge.

18Upu bongdina deiyo nengdi, aupu yuma moupra gekepmengedi, adipapu, ‘Tek penmaser do, telel penmaser do?’ tenen, akeca-keca yuma tep asipmengedi, moupra dipetepmengopda, betapra tenepmengedi, aneng dipu upu bokeipkamenge. Nimi upu bongdina deiyo nengdi, aupu yuma moupra gekepmengedi, beta epra kael kepmengedi, ‘Gume, ayu ngebodi er kabo tep, “Mali kupmare,” pepra, minina upu pepre ngeboda, mok upupu penmare,’ tenepmengedi, ange yumada moupra tenepmengedi, sun adipapu amok upu pepre ngebo tep, ‘Ada tali upu penmara’ tenen, wenepkamenge.

19Ada, ware neng do yuma, sundi sun kayapu neng tep, ‘Mali kupmare,’ pepmange dinin, mok upu deiki penge nengda, adipapu ila di wenepkamrume. Wenepkamrumada, ake. Anengdi, ‘Nun kapda ila di ukupra wenepkamrume,’ pepmenge ngepu, sun mok upu penge neng, sundi pepmangetopu ila di wenepkamrume. Sundi sun kayapu neng tep, ‘Ikin keca deipra wenepkamenge,’ tenepra pepmengetopu, amok upu penge neng tep, ikin keca deipra wenepkamrume. Ukupmumnyopda, sun kan-kan neitamai di, sun mali kunge neng cap, nimi poramenge neng cap, yu neng cap, sun mali kunge keca capda, gum kupra derinkamrume. Ange yumada gum kupkamre ja.

20Apepmasentopu konum kupmum pangeda, sun yuk dakunge Israel nesala yuma gekepmengedi, kware weik kupyopda, ‘Uo, nun kayapu tep, mok upu cap, minina upu cap pepmepyopda, ikin keca deipra wenepkamsenge. Ila di wenepsenung’ tenen, kael kepmengedi, mok upu penada yapronkamenge. Mok upu ton cap tapakra men penkamenge. Pio tek sisi upupu pio penkamenge.

21Ton nengdi, yuk neng tep, mali kupmengedi popmengopda, amali kunge neng tep bicau tenena gume. Ukupmanto ngeda, nimi popne ngeboda, er peda pona telepe pua. Ukupmanto ngeda, ake. Ada nimi buru sektapre ngeboda, er pe buru sektapkamrume. Yan sektapre ngeboda, er pe yanda sektapkamrume. Tenpu ngebodi, yuk ngebo asuru luktapyopda, er pe asuru peda luktapkamrume. Utopu sun si luktapre ngeboda, er si peda luktapkamrume. Sun yu nengdi yuk neng tep mali kupmengetopu, aneng sun wenemna tep nengeda, utopu kupra wenepkamrume. Musadi Israel nesala tep pepu.