Deu 2 | XteSC | STEP | Musadi sun Israel nesala yuma bulupra wekmaiyai di pepu. Nun nai bo Allahdi, ‘Tamupra katuai mutupu bena kunkurume,’ pepra deipseu pangeda, nun yumada, kange di tamupra me gumai, pio katuai tara bisipu bepu. Ukupmupudi, ila laut mokon er sida Teberau penge mokon dam tara bepu. Angeda, Allah Yahweh erdi, ‘Ukupkamrume,’ peipneutopu kupmepu. Ukupmupudi, Edom mutu tarapu, pio tep ongomgenenamepudi, tumi weika di ongomgenepra embaramepuanen, amutu dam tara tupa embanapu kuramepu.

Deuteronomy 2

1 Musadi sun Israel nesala yuma bulupra wekmaiyai di pepu.

Nun nai bo Allahdi, ‘Tamupra katuai mutupu bena kunkurume,’ pepra deipseu pangeda, nun yumada, kange di tamupra me gumai, pio katuai tara bisipu bepu. Ukupmupudi, ila laut mokon er sida Teberau ^{▼▼Teberau – Ila laut mokon Teberau sekmepu ngeda, yuk Allah upu buku neitamaida, ‘Teluk Akaba’ seki. Dinino, alautda, tenpua. Er si butene perameng dinin, alautda tenpu kurure.} penge mokon dam tara bepu. Angeda, Allah Yahweh erdi, ‘Ukupkamrume,’ peipneutopu kupmepu. Ukupmupudi, Edom mutu ^{▼▼Edom mutu – Edom mutu sekmepu ngeda, yuk Allah upu buku neitamaida, ‘Sier mutu’ seki. Dinino, amutuda tarada, tenpua. Amutu er si butene perameng dinin, amutuda tenpu kurure.} tarapu, pio tep ongomgenenamepudi, tumi weika di ongomgenepra embaramepuanen, amutu dam tara tupa embanapu kuramepu. 2 Acapu ukupra kuramepupane, Allah Yahwehdi ne tep yana pepneu. 3 “Kan cap, sun Israel anesala yuma capdi, amutu dam tarapu pio embanapu kuramruma cadi, akonuma. Ukutaruda, amutu tapra, dutara (ara utara) keproprumudi, adipapu Utara tamna benkurume,” pepra deipseu. 4 Tonda, aupu ton peipneu. “Ataruda, kandi sun Israel yala nesala tep, ‘Ukupkamep, ukupkamep,’ penange ton, bena pepkurume. Angeda ake. Sunda amutu neitamai benkumum taruda, pio kange doupra moupra teneprumudi, bouna dipu amutu neitamai benkamarume. Ada, sun tara neng ton amutu neitamai kununga cadi, adipu Edom tara benkamarume. Atarada, sun kayapu neng ada, Esaudi deipupa, dadeipdanen banung neng, Edom yala neng kunung mutu benkamarume. Sun amutu kunung nesaladi, sun Israel yala neng tep kwar tenesenunga cadi, kange moupra bouna di bankurume.

5 Tonda, sundi amutu nesala tep nengeda, ‘Aneng mar porbenkamape,’ tenena pio gume. Sun damai ton men bena popetepkamrume. Tonda, sun aneng kunung mutu, atara yumada, nedi sun Israel yala neng tep, metekanun peda, ton men karepkamsene. Deiyoda, Edom mutu dam tara yumada, nedi Esau yala nesala tep, konum kareamsipa, men di talepra kununge. 6 Dinino, sun jen keca cap, me cap putapseryopda, sun aneng damai bemumdi sun pe co bo deiki dipu kunuprapmumdi, jenkamrume. 7 Atep sunda moupra tenepetepkurume. Sun pel doramrum taru neitamai yumada, sun nai bo Allah Yahwehdi, telep kupra kweiamseudi, sun putan keca yala-yala yuma yamupra kareramseu. Tonda, Allah erdi, ame gum mutu, ila katuai mutu neitamai bisi embaramrum taru cap, embankamrum taru capda, er dipapu kalekra melimamseutopu, tupa melimkamsere. Tonda, keteng tamun denge empat puluh (40) tahun neitamaida, pio katuai mutu embaramrum taruda, sundi er si eremrum Allah Yahweh erdi erepra kuramudi, sun putapseu keca yumada, aputaramseutopu kupra kareramseu. Tali putanapu kupra men tamamseu. Allahdi Musa tep peiamupa, Musadi, sun Israel nesala tep pepu.

8 Upepudi, aupu ton pepu. “Uda, Allahdi upepseu pangeda, nun yuma Elat mutu dorami ati arum cap, tonda ati arum er si Esion-Geber mutu ton, abisipu tara ban bisida, tapmepudi, dapu mutu utara (ara selatan) bemepu. Nun kayapu neng, Esaudi deipupa, dadeipdanen yakarami nesala ton, Ebon mutu dam tara kuramyai di tapra utamna bisi benamepu. Ukupra debenamupkanen, adipapu ila laut mokon er sida Laut Mati iriamu tara mutu dukdongopra benamepu. Abisi bepu dingeda, tamuprapmepudi, keteng yakan tara, ila katuai mutu ton ada Moab mutu katuai tamna benamepu. 9 Amutu Moab tara bepu taruda, Allah Yahwehdi ne tep upepneu. “Sunda Lotdi deiamu ngebo, Moab yala nesalada, amutu neitamai kununga cadi, sundi Moab nesala tep ton, ‘Mar porbenkamap’ tenen, men dupkamrume. Tonda, sun amutu nesala men bena popkamrume. Tonda, Ar mutuda, nedi konum karepsipa, sun talepra kununge. Ada Lotdi deipupa, dadeipdanen yakarami neng tep, amutu konum menop taru kareamsi. Atep, sun talepra kunge mutu yumada, yambul peda bokra ton, sun Israel yala nesala tep, pio men karepkamsene,” peamseu.

10 Uda, menop taruda, Ar mutuda, Emim yala nengdi talepra kurami. Sun anengda, nimi denge pio weik neng kuramidi, sun nongda, ila lyom neng kurami. Ada, sun urasinda, Enak ^{▼▼Enak – Enak yala neng tep nengeda, yuk Allah upu buku neitamaida, ‘Anakim’ seki. Sun si butene perameng dinin, anengda ayala neng tenpua.} yala neng peramenge neng, sun nong lyom kurami utopu, Emim neng peda utopu nong lyom neng kurami. 11 Enak yala neng kurami utopu neng kurami. Tonda sun amutu neng tepapu, yuk nengdi, ‘Sun sida Refaim yala neng,’ perami. Tonda, sun aneng tepapu, sun Moab mutu kurami nesala dingeda, aneng tep, ‘Sun si ton Emim neng kununge,’ perami. 12 Menop taruda, Edom tara neitamaida, Hori yala nesala ton amutu neitamai kurami. Dinino, Esaudi deipupa, dadeipdanen yakarami neng, sun Hori yala nesala tep popra eneproidi, sun aneng dipapu amutu talepra akurami. Ukupi dingeda, sun kurami mutu yumada, bena arapra talepidi kurami. Ukurami ngeda, Allah Yahwehdi Israel nesala tep, telep mutu tu karepupa, amutu kurami neng tep popbisipidi, sunpu amutu talepra kurami nengdi tamami keca cap, ati arum cap, dopropitopu, sun Esau yala neng peda, utopu kurami.

13 Uda, Musadi aupu ton dukdongopra lap pepu. Allah Yahwehdi ne Musa tep peipneu. Ukutaruda, sun Israel nesalada, Zered me doman goupra, ortara mutu bena wekurume,’ peipneu. Atep, Allah Yahwehdi ne tep, peipneutopu, nun yumadi kuramepu.

14 Uda, mutu si Kades-Barnea mutu di gonga kepra, kupyakaramepuane, Zered me doman goupra, atara yapu tumi dinin, aketeng tamun neitamai yumada, denge pio weik, tiga puluh delapan tahun deiki di, bisi embanapu kuramepu. Amutu yan kuramupu taruda, Allahdi peamseutopu, Kades-Barnea mutu di gonga kepmepu taruda, sun jen talena du neng yuma, tupa gam kurami nengda, ataru 38 keteng tamun neitamai tupa kupyakarami du neng, sun jen talena du neng yumada, konum deamie. Tenpunge peda gam tupa men kuramu. Angeda, Allah Yahwehdi, ‘Ne upu yanipmaruma cadi, katuai mutu di talipu embaramrumpanen, siryada, sun du neng yuma depkameng ja,’ peamutopu kupu. 15 Angeda tek sisi pepmepe. Amutu neitamai yana kuramidi, embanapu kurami taruda, Allah Yahwehdi tupa-tupa sun aneng yuma tep, ikin keca sun nong deiki deriamnga deiki di, sun du neng yuma poramuanen, gawal dakra gum kweiamu. Ada, Israel yala nesala kunkamengaida, ne upu yanitamamnei du nengda, gam tupa men kunkamenge. Ne upu gekenenung nengpu, gam kunkamenge. Aneng dipu, Kanaan tara mutu bena wekmengedi kunkamnunge. Allahdi peiamutopu kupi.

16 – 17 Sunda, Kades-Barnea kunmapu taru konum du neng kurami jen talena neng yuma, konum depropiopda, Allah Yahwehdi ne Musa damai yana peipneu dinin, nun Israel yala nesala yuma tep upeamseu. 18 Sunda atumi dipapu gonga keprapmumdi, Moab nesala kunge tarapu wekra benkurumua cadi, Ar mutu tara bisipu bemumdi, amutu wilimdonai goupra ortara wekra benkurume. 19 Sunda Moab tara wekra baramumnyanen, Amon yala neng kunge mutupu benkamrume. Dinino, sun Amori yala nesala kunungaida, Lotdi deipupa, dadeipdanen, yakarami yala nesala tep, amutu tu, ne Allahdi, konum kareamsi. Atep, sun Israel nesaladi Amon yala nesala ton dumna gume. Tonda, sun pona gume. Deiyoda, amutu tu yumada, ne Allahdi sun Lot er gerekdanen yala nesala tep konum kareamsa cadi, tu metekanun peda, sun Israel yala nesala tep men dopra karepsetene. Allahdi aupu konum peamseu. Musadi pepu.

20 Uda, amutuda er si tep ton Refaim yala nesala kurami mutu perami. Tonda men taruda, amutu kurami neng tep, sun Amon mutu kunge nengdi peramyada, ‘Amutu neitamaida, sun Zamsumim yala neng kununge,’ perami. 21 Amutu kurami nesalada, sun Zamsumim yala nengda, nimi denge pio weik men nukmanto kuramidi, puto weik neng kurami. Sunda Enak ^{▼▼Enak – Enak yala neng tep Ulangan 2:10 dinkurume.} yala neng pio lyom nong neng kuramya utopu, sun Zamsumim neng peda utopu kurami. Dinin, Allahdi amutu menop taru kurami nesala, sun Enak nesala yumada popbisipupa, sun Amon yala nesaladi, amutu talepra kurami. Tonda, sun Enak nesala taleami keca cap, ati arum capda, sun Amon yala nesaladi dalupra dopropi.

22 Ange kuputopu, Allahdi sun Esau yala nesala tep, melimamu. Ada, menop taruda, Edom tara neitamaida, Hori yala nesala ton amutu neitamai kurami dinino, Esaudi deipupa, dadeipdanen yakarami neng, sun Hori yala nesala tep popra eneproidi, sun aneng dipapu amutu talepra akurami. Ukupi dingeda, sun kurami mutu yumada, bena arapra talepidi kurami. Ukurami ngeda, Allah Yahwehdi sun Esau yala nesala tep, amutu kurami neng, sun Hori nesala tep popbisipudi gawal daku. Atep, sunpu amutu talepra kurami nengdi tamami keca cap, ati arum cap, dopropitopu, sun Esau yala neng dipu, akeca yuma talepra kurami. Abuku seki taruda, sun Esau yala nesaladi, amutu neitamai tupa kurami. 23 Ange yambulanun utopu, dapu tara dinin, ila laut mokon er sida, Laut Tengah, alaut pirman tara neitamai yumada, sun Awi yala nesala kurami. Ukurami dinin, keteng dangban tarada, mokon deipra sekdongoamu mutu tenpu, er si pulau Kereta, amutu kurami nesaladi, sun Awi yala neng kurami mutuda, yan popbisipidi, dalupra amutupu talepra kurami. Ukupyopda, sun Kereta neng dipapu, amutu tu yuma talepra kupbaramiyanen, selatan tamna dinin, Gasa mutu tu damaida, sun mutu wilimdonai tep, bena doroami.

24 Musadi sun Israel nesala tep pepu. Moab mutu bisipra yapu taruda, Allahdi nun tep peamseu. ‘Ukutaruda, sun adipapu Arnon me duman goupra, ortara benkurume. Berumnyopda, nedi sun tep Amori mutu ngebo, Raja Sihon, erda Esibon mutu talepu ngebo cap, er taleamu mutu tu cap yumada, sun Israel nesala tep karepsenepa, bena popbisipmumdi, er taleamu mutu tu yumada doropkamrume. Ukupmumdi, amutuda sun talepra kunkamrume. Allahdi peiamseu. 25 Ataru dipapu, Allah Yahwehdi peamseu. Atumi di gonga kepra, nedi sun tep karepsenepa, yuk-yuk mutu neng, dana-dana tara yumadi, kael kepkamsenge. Kael kepsengedi, sun tep kware weika di kunkamrure. Angeda, tek sisi kupkusene. Ukupsenepa, ange epmengedi, yuk mutu nesala, dan tara mutu kunung nesala do yumada, sun Israel nesala tep upu lap pepmenge taruda, sun tepapu kware pio weik kupkamrure. Tonda, yuk mutu nesaladi sun kuramrumya kael keamsenge nengdi, ada ‘Sunda Israel neng yakanmanga,’ pepmengepa gekepmengopda, moropsepredi kware weik kunkamre. Allahdi peamseu.

Israel nesaladi Raja Sihon popbisipi upu

26 Ataruda, Kedemut mutu damai dinin, nimi men kuramyai pio katuai kunmapudi, ‘Nunda kange tenpu doupra, teleppu kunkamneme’ tenen, pedina upu peipsidi, nimi deiyo ngebo Raja Sihon, erda Hesybon mutu talepra kuramu ngebo, er damai upu perbana tep, nimi ware kuprap neng do, dopra deipsipa, sundi aupu lap perbei. 27 Aupuda ake.

Naio, kandi nun tep, “Telepe,” pepsemempa, kan talepra kurum mutu neitamaida, bisi yo sisapu, nun embenkamepe. Tonda, kan talepra kumem mutu bisi embenkopi taruda, nundi yan ton domopra, tebalal tara pe, dumsisi tara peda, yuk tara men yanipra benkamepe. Bisi yo sisapu benkupyanen, yuk mutupu bena kunkamepe,” pepra moroamsi. 28 Nun jena cap, me cap, putapserepa, ‘Nun jepkupe,’ tenepmepyopda, co bo deiki dipapu kunupra jepkamepe dinin, moropkepepa, jepmepyopda, adipapu kan talepra kurum mutu tapra, bisi embenkamepe. Ange pua. 29 Ukupmepidi, nunda baramepyane, Yordan me goupra ortara benkamepe. Ukunkamepada, nun nai Allah Yahwehdi, nun tep kareamseu mutu benkupa tep, moropkepe. Tonda, Esaudi deiamupa, dadeipdanen yakange nesala, Edom mutu neitamai kunung neng cap, tonda Moab yala nesala dinin, Ar mutu kunungai cap tepangeda, nundi ayala butene neng tep, ‘Sun kurum mutu neitamai bisida, nun embenkupyanen, ortara mutu benkamepe,’ pepra moropmepupa, sun amutu butene nesaladi, ‘Jo, telepe, sunda nun talepra kunup mutu bisi neitamai embenkurume,’ pepseipa, yakanupe,” pepra, yana moropmepu.

30 Upepra moropmepu dinino, Hesybon mutu talepra kuramu ila nimi deiyo ngebo, Raja Sihondi nun tep, ‘Jo, amutu bisida, telepe daembeso,’ men peamseu. Deiyoda ake. Nun nai bo Allah Yahwehdi angebo Raja Sihon, er tep kika keca kareamupa, angebo balila weik kupka deiki di, ‘Gume, nun mutu neitamai men embankamrume,’ pepra upu sekseu. Dinino, Allahdi teneamu ngeda, ake. ‘Balila kuprepa, ne Allahdi Israel nesala tep puto weik karepnepa, sundi er popra gawal dakamenge,’ tenepseue. Allahdi ukupseudi, angebo Raja Sihon, er taleamu mutu yumada, nundi gonga kepra, er taleamu mutu yuma dalupra doropmepedi, amutu tu yuma peda, oryankamre taru di aca peda kunmape.

31 Ange konum kupuopda, Allah Yahwehdi ne tep upepneu. ‘Raja Sihon cap, er talerur mutu cap yumada, dopra sun Israel nesala deikipu konum deipsene. Atep, amutu yumada, sun adipapu gonga kepra dopropmumdi, amutu yuma dalupra doproprumudi, talepra kunkamrume,’ peiamneu. 32 Upeipneu pangeda, ataru dipapu, Raja Sihon cap, er jen talen neng yuma capdi, ‘Israel yala nesala tep, mar porbenkupe,’ tenepseidi, nun kunmapu mutu Yahas mutu damaipu yai. 33 Dinino, nun nai Allah Yahwehdi, ‘Gume, anesala yumada, Israel nesaladi popra gawal dakung’ tenen, Raja Sihon er tara neng yuma dopra, nun deikipu deipseupa, sun aneng yuma, nundi popra gawal dakmepu. Ada er pe ngebo Raja Sihon cap, er nyapu yuma cap, er jen talen neng cap yumada, nundi popra gawal dakmepu.

34 Aponmapu taru dipapu, anesala kurami mutu yumada, dalopra dopropmepu. Doropmepudi, amutu neitamai kurami nesala yuma peda, popra gawal dakamepu. Ada, nimi cap, nerapu yuma cap, tonda nyapu yuma cap, popra gawal dakmepu. Ton tenpu ngebo peda, men tapmepu. Sun yuma popra gawal dakamepudi, tenpunge peda men tapmepupa, gam kurami. Yumada, popra gawal dakmepupa, depnapu kupi. 35 Dinino, sun amutu nesaladi talepra peirami gam keca yala-yala yumada, gam kepman dopropmupu. Tonda, sundi talepra kurami mutu tu cap, sun doami ati arum yuma neitamai kurami taru, talerami bung keca yala-yala yuma capda, akeca yuma dalupra doproamepudi, nun pengepu kepmepu.

36 Nun nai Allah Yahweh, er ila puto deiki di, nun tep meliamseupa, Raja Sihondi taleamupa, er tara nesala kurami mutu ati arum yumada, dalupra doroamepu. Ada, Aroer ati arumda, Arnon me duman pirman tara kwamu mutu cap, tonda ame duman neitamai kuramidi ati arum dominge cap, adi dipra dukdongopra ortara Gilead mutu cap, aneitamai mutu yumada, dalupra doroamepu. Raja Sihon taleamu mutu neitamai yumada, sun ati arum dana-dana tara ila lyom gel beilya wiaminge akwamu dinin, ange-ange yuma tep nengeda, uruptapmepudi, akati arum yuma tepangeda, “Uo, angeda, kange mun kupsere cadi, tapkupe,’ pio men teneamepu. Amutu yuma bisbisa kapmepudi, dalupra doproamepu.

37 Ukuramepu dinino, nun nai Allah Yahwehdi, ‘Atara kunung nesalada, sundi men popkamrume,’ pepra upu sekamseutopu kuramepu. Atep nengeda, nunda sun Amon yala neng kurami mutu damaida, men porbenamepu. Ada, embaramre me si, Yabok me duman pirman dorami ati arum cap, tonda amutu neitamai dinin, mutu buma deiki dorami ati arum kurami nesala cap, men porbenamepu. Anengda tapmepu. Ukupmupka deiyoda, nun nai Allah Yahwehdi, ‘Ukunkamrume,’ pepra deiamseutopu kupmepu.