Deu 20 | XteSC | STEP | Sun mar podan taru kuprepa, sun podan neng cap mar podarbankamrum taruda, sun podan nengda, jen talen neng pio weika di, kuda bisam bali deiki bukra yankamenge nge cap, nimidi kuda bisam tapu gerekmengepa, gipra tu deiki embarameng keca, er sida kereta kuda deiki bukmengedi, sun damai poryakasenge nge cap, ange yuma epmumdi, sun kwar dangna gume. Ange gum dinin, pumun taru sun nai bo Allah Yahweh, Mesir mutu nesala kan-kan di melipra duyanamseu Allahdi, sun tep melimkamsere. Atep tumi-tumi yuma, er tepapu pio tenepra kunkamrume.

Deuteronomy 20

“Mar podan taru kupre pangeda, ‘Nun nai bo Allahdi melipkamsere’ tenepra kurumudi, podankamrume,” pepu upu

1 Sun mar podan taru kuprepa, sun podan neng cap mar podarbankamrum taruda, sun podan nengda, jen talen neng pio weika di, kuda bisam bali deiki bukra yankamenge nge cap, nimidi kuda bisam tapu gerekmengepa, gipra tu deiki embarameng keca, er sida kereta kuda deiki bukmengedi, sun damai poryakasenge nge cap, ange yuma epmumdi, sun kwar dangna gume. Ange gum dinin, pumun taru sun nai bo Allah Yahweh, Mesir mutu nesala kan-kan di melipra duyanamseu Allahdi, sun tep melimkamsere. Atep tumi-tumi yuma, er tepapu pio tenepra kunkamrume.

2 Tonda sundi, ‘Mar podarbenkup’ tenen, ketenepra gonga kepra benkumum taruda, Allah er si eremna ati pumbon pel talepra dona deiyo neng kan-kan, imam tenpu ngebo ton mepra tekredi, Israel nesala jen talen neng yuma tep, aupu pepkamsere. 3 Erdi upenkamsere. “Ne kayapu, sun yuma gekepneso! Israel yala nesala sunda atumi di pepsen upuda, moupra gekepkurume. Ukutaru sun mar podana tep, sun podan neng damai bemumnyopda, kwar kuna cap, dipru pu jena cap, ‘Uo ware kuptepe do?’ tenen, walwal pedan moropsemdana cap, pio men kunkamrume.

4 Apepmasen upuda, tali tep men pepsene. Deiyoda, sun nai bo Allah Yahweh erdi melipra embankamsere. Erdi melipra embankasera deiki di, er puto sun deiki deipserepa, sun podan neng yuma tep porbisinkamrume. Atep kwar kuna meme.”

5 Tonda, ‘Mar podarbenkup’ tenen, keteneipkamrum taruda, jen talen neng sun deiyo neng yumadi, sun amutara jen talen neng yuma tep, upenkamenge. “Sundi, ‘Mar podarbenkup’ tenen, ketenepmarum neng kan-kan neitamaida, nimi ton ati ‘Ukupu dopkaman’ tenen, ketenepmare ngeboda, ‘Er cap, nun cap podarbenkup’ tenen, ketenepra bankupaida, pio men benkurure. Angebo er ukupu donmare ati kapul men mapmare dipapu, mar podana deiki di popmengepa, depyopda, er ukupu dopmar ati pumbon, kange deipra men mapkamre. Atep, nun podan nengdi, ‘Angebo popnung’ tenen, tapra, er pe mutupu tamupra benkamre. Ada mar podana deiki di angebo popmengepa, er ukupu dopmare ati taprepa, ‘Yuk neng dopropnung’ tenen, ato ngeboda er pe ati tamupra bankamre,” pepra, sun jen talena deiyo nengdi upenkamenge.

6 Ange utopu, sun jen talen neng kan-kan neitamai di, nimi ton ukupu anggur tapu du wa pepra koupmarepa, du mounmarenge kapul men dakra jepmare ngeboda, nun cap mar men porbenkamepe. ‘Apepmanto ngebo ton akapyopda, tamupra banapu kunkamre’ tenen, pepsene. Ada tali tep gume. Mar podana deiki di angebo popmengepa, er anggur tapu du wa taprepa, ‘Yuk nengdi dopropnung’ tenen, ‘Angeboda mar podanai bana gume,’ penkamenge.

7 Ange utopu aupu ton penkamenge. “Ware ngebo do, abulupra wekmarum neng kan-kan neitamai di, ‘Aner dopkamne’ tenen, mun konum perur dinin, aner kapul men dopmare dipapu, ‘Nimi ner dopkamne,’ teneramre ngebo akapyopda, angebo er pe ati tamupra bana telepe. Ada mar podana deiki di angebo popmengepa, er mun peramre ner taprepa, ‘Yuk neng dopnung’ tenen, ato ngeboda er pe ati tamupra benkurure,” pepra, sun jen talena deiyo nengdi penkamenge.

8 Tonda, jen talen neng sun deiyo nengdi, sun amutara jen talen neng yuma tep upenkamenge. “Sun akunmarum neng kan-kan di, ware ngebo ton kwar kuna cap, dipru boun kupmaserdi, moropsemna cap kunmaser do? Ato ngeboda, er pe ati tamupra bana telepe. Angebodi er kayapu yuk jen talen neng, ‘Er kware kunmarenge epmengedi, pingping kange doupmange ngeda, boun kupra deiprur’ tenen, kware kupmare ngeboda, er pe atipu tamupra bankamrure.” Sun jen talen deiyo nengdi, sun amutara jen talen neng yuma tep penkamenge.

9 Jen talena deiyo nengdi, sun amutara jen talepra kunung neng melimna tep, jen talena deiyo neng ton wepra deipkamenge. Ada, sun amutara jen talepra kunung neng tep, ‘Nun podan neng popra bisbisa kemna tep, ukupra kunkamepe,’ pepra melipkamenge. Jen talena deiyo nengdi, sun amutara jen talena deiyo neng ton, yuk-yuk wepra deipmenge nengdi, sun amutara tali jen talen neng yuma tep, “Ukupra kunkamepe,” pepra, upu lap penkamseng neng ton wepkamenga tep, pepsene.

Sun podan nesala tep, “Ukupkamrume,” pepra lap pepu upu

10 Ware mutu do yuma, sun podan nesala kunge mutu damai bemumnyopda, ‘Amutu neitamai kunge nesala popkamep’ tenen, wareng benkamrum taruda, sun menmena di amutu nesala tep upepkamrume. “Gume, nun kangeda, ‘Sunda nun amutara kumumpa, nundi pel dipmepepa, nun pel tali dopmumnyopda, nun cap, sun cap, tali kange deipra kikiman telep kupra kunkamepe,’ tenenup dinin, sun dano? Ware tenepmarum do?” pepra asipetepkamrume. Upeprumupa, amutu nesaladi, ‘Uo, nun cap kikiman kunada pio men kunkamepe,’ tenepra, mali kange doupmengedi, sun tep buplan men pakeipmengopda, lupra ponapu kunkamrume.

11 Dinino, sundi asipeteprumupa, amutu neitamai kuramenge nesaladi, sun ati arum domidi, ongopgenepra wiami gel beilya potokami buplan pakeipsengedi, “Telepe, sundi pepmaserumtopu kikiman nun cap kunkamepe. Nunda, sun amutu tara kupedi, sun pel talipu donkamepe,” pepmengopda, akonuma. Amutu nesala pona gum dinin, sun amutara yasengopda, sun Israel nesala amutarapu kungedi, “Sun pel melimna neng kupedi sun pelpu nundi palepra donkamsepe,” penkamenge.

12 Dinino, sun amutu kuramenge nesaladi, “Gume, sun Israel yala nesala cap, nun cap, kikiman telep kupra men kunkamepe. Sun amutara pio men kunkamepe,” pepsenge pangeda, pona pua. Atep anesalada, “Nun cap kikiman men kunkamepe,” pepsengopda, amutu kuramenge nesala yuma tep, ponapu kunkamrume. Sundi amutu neitamai bemumnyopda, bena warekra ponapu kunkamrume.

13 Ataruda, sun nai bo Allah Yahwehdi, tenepra er puto sun buru deiki deipkamsere. Ukupseryopda, amutu kunge nesala yuma porbisipkamrume. Ange konum ukupmumnyopda, sun Israel nesala yuma amutu neitamai bena wekmumdi, amutu kunge nesala yumada, yu weik parang ya di, anesala yuma popra gawal dangkamrume.

14 Ukupkamrum dinino, amutu nerapu cap, nyapu cap, tonda sundi talepra peirameng keca yuma cap, ware yala keca do, amutu neitamai kuramre keca yumada, doronkamrume. Sun podan nesaladi taleamenge keca yumada, dalupra dopropmumdi, sunpu talepra kunkamrume. Ada sun nai bo Allah Yahweh, er puto karepserya deiki di, yuk mutu nesala yuma popbisipmumdi, sun taleamenge keca yuma dopropkamrume. Dopropmumnyopda, sun dipapu akeca yuma talepra kunkamrume.

15 Ange yuma, “Ukunkamrume,” pepra, lap pepmasen dinin, moupra gekepneso. Sun podan neng, yuk mutu kuramenge nesala tep, “Nimi yuma popbisipmumdi, sun nerapu, nyapu cap, sun talerameng keca yuma cap, dalupra doronkamrume,” pepmasen upu yumada, sun adipapu yuk karen mutu dabena kunkamrum taru yuma peda, apepmasentopu kupra bena kunkamrume. Dinino, sun Israel nesala kunkamrumai, sun damai kunge nesalada, anesala tep nengeda, autopu keca sun damai pio men kunkamrume. Sun Israel nesala cap, kikiman kunkameng nesala tep, men porbisinkamrume.

16 Dinino, yuk-yuk karen mutu, sun nai bo Allah Yahwehdi, ‘Ne mawa Israel yala nesaladi, amutu talepra kunkamenge’ tenen, keteneiamseudi, karenkamser mutu yumada, amutu nesalada ponapu kunkamrume. Yuk karen mutuda, sun nai bo Allahdi sun tep, “Karepkamsene,” pepra pediramseu mutu cadi, amutu kuramenge nesala yuma cap, ware keca do yuma, gam kure keca yala-yala yuma cap, poptaprumudi, gawal dangkamrume. Ukupmumnyopda, sun pe mutu sisa utopu kepra talepmumdi kunkamrume.

17 Sun nai bo Allah Yahwehdi sun tep, “Anesala yuma poptapkamrume,” pepra deriseretopu, sundi amutu si pepkusen mutu talepra kuramenge nesala yumada, ponkamrume. Ada, Het mutu kunung nesala cap, Amori mutu kunung nesala cap, Kanaan mutu kunung nesala cap, Feris mutu kunung nesala cap, Hewi mutu kunung nesala cap, Yebus mutu kunung nesala cap yumada, popra gawal dangkamrume.

18 Angeda tali tep men pepsene. Deiyoda, ake. Apepmasen mutu kunge nesala yuma men popra gawal dakmumpa, gam tupa kungopda, sun cap, amali kunge mutu nesala cap, wisipra kuramrumyane, amenda taru sun amutu nesala yumadi, talepra mali kungedi, isok si eremenge kecada, sun ton peterepsengepa, sun Israel nesala peda amali kun kecapu dopropmumdi, mali weik kunkamrume. Ada, tali isok si erepmumdi, Allahdi, ‘Ne song,’ tenere keca talepra kumumnyopda, adeiki di, ‘Sun nai bo Allah Yahweh yaniptapmumdi, er damai ton mali kupra deridarum’ tenen, pepsene. Musadi Israel nesala tep pepu.

19 Upepudi, aupu ton dukdongopra pepu. Ukutaruda, yuk upu ton pepkusene. Sunda, ‘Amutu nesala popbisipkup’ tenen, tenpu mutu neitamai ton bemumdi, amutu kuramenge nesala bena warengnapu kumumdi, ware denge weik kupyopda, amutu nesala tep, bena warekra kunkamrum taru neitamai yumada, amutu neitamai kuramre co yala-yala yumada, kwenepra men tamkamrume. Tonda amutu neitamai paramrepa, du jeramenge co du yala-yala yumada, pio men kwemtamkamrume.

Ada, amenda taru amutu neitamai bena kumum taru talepra kurumudi, sun pedi aco du yuma dakra jenkamruma tepa. Tonda, aco yala-yala yumada, tali co pua. Nesala kutenge teptoda, kwenepra gawal daktum dinin, tali copu kurura tep, amutu co kwemtamnada meme. Amutu co di sun ton tamupra men ponkamsera tep, pepsene.

20 Dinino, sun peda konum kaele. Amutu neitamai pare co yumada, moupra dipetepmumdi du moupre dinin, nimidi men jepmanto co yala yumada, sun putapseryopda, kwemna telepe. Ada tali tep gum dinin, sundi, ‘Kweptapmepedi, amutu nesala, sun ati arum domya dana-dana tara wiami gel beilya damai ikra deipmepedi, aco deiki di welepra agel beilya dinipra, akati neitamai wekmepedi, anesala poptepe,’ tenepmumnyopda, amutu neitamai paredi du men moure copu kwemtamna telepe pua.