Deuteronomy 21

Ton nengdi, yuk neng popmange dinin, nimi pona deiyo ngebo men kael kepmengopda, lepsisingna tep, pepu upu

1Ukupmanto, Allah Yahwehdi, ‘Sun kunkameng’ tenen, karepseu mutu neitamai kunkamrum taruda, nimi ton popmengepa, sun wai dam depmarepa mankau di bandenkap epkamrume. Epkamrum dinin, ‘Uo, apopmange ngeboda, ware ngebodi poptapmau do?’ tenen, men kael kepmumnyopda, ukupkamrume. 2Depmare ngebo er nong epmumyopda, adipapu amutu deiyo kepra kuramenge neng cap, tonda mali kupmange nge upu lepsisingna deiyo neng cap, sun damai bena pepmumpa, anengdi apoptapmangepa depmare ngebo damai bengedi, angebo depmaryai di, amutu neitamai ati arum dopra kunung nengda, ‘Dan ati arum damai kurur ngebo do?’ tenen, kunumpetena keca dopra, bena deipra dirpetenkamnunge. Ukupmenga deiki di, adepmare ngebo er nong damai kure ati arum meneng damai ngeda, ‘Ange acei’ tenen, kael kemkamnunge.

3Meneng damai kupre ati arum konum kael kepmengopda, sun akati arum dopra kuramenge nesala, sun talepra kuramenge neng bena pepmengepa, sun amutu nengdi, angebo sun men kael keami nengdi, er popmainge tep, telep karen keca dopra, Allah tep karepkamnunge. Ukupkamnunga cadi, sun akati arum talepra kuramenge neng bena pepmumpa, sapi bisam nernge ukupu nenmarenge tenpu, ketenepra derinkamnunge. Tonda, asapi bisam ner ngeda, pel dona tep keca, er kum damai deipmengepa, ikin keca gipra dubanmare ngeda, ange men pel doramre sapi bisampu ketenepra derinkamnunge. 4Amutu deiyo nengdi, aketenepra deipmange sapi bisamda, sun aneng dipapu doupra, me cena gum, me tupa-tupa embaramreyai, ada wa pepra men koupmantoai doupra bengedi, adipapu aner sapi bisam kum talepra, copdongopmengedi ponkamnunge. Ada akeca pona tep, ketenepra deiamengeai dipapu bena ponkamnunge. Angeda, apopmare ngebo er kunumnange tep karepkamnunge.

5Ange kupkunge taruda, Lewi yala neng, imam pel doramenge nengda, melipmengepa, sun tonpa aceipu bankamnunge. Ada, sun anengdi mali kupmange ngeda, kael kemengedi, “Angeda ukupkurume,” pepra, lepsisingna neng kununga tepa. Sun Lewi yala nengda, sun nai bo Allah Yahwehdi, ‘Ne si eremna ati pumbon pel donkamneng’ tenen, wepra deiamu neng kununge. Tonda, Allahdi, ‘Sun anengda, ne talenun nesala, sun telep kudina tep, sun aLewi yala nengdi, ne si deiki di telep upu penkamnunge. Tonda, nimidi yu upu deiki di pangdana cap, uda podana cap, uda, yu kuprepa, deremdana di mali upu pedana cap tep, apel donkamnenge’ tenen, Allahdi telep kupra ketenepra deipu neng kununga cadi, aneng dipapu alepsisingna pel donkamnunge.

6Poptapmangepa, depmare ngebo damai ati dopra kuramenge nesala talepra kuramenge neng, sun deiyo nengda, sun buru yumada dopra, aner sapi bisam popra me damai deipmangai, er damai bengedi, sun adipapu buru aner sapi bisam deiki deipra mekunkamnunge. 7Tonda, sun anengdi sun buru tang me kunmenge taru puda, adepmare ngebo tep, “Gume, angebo popmar ngeboda, nundi men popmape. Ange utopu, adepmare ngebo popmangu neng ton, nundi ange pio men epmapa tep, nun walwale,” penkamnunge.

8Atep nengeda, nun nai Allah Yahwehdi kan cap, kan nyapu nun Israel nesala Mesir mutu kuramupupa, lyepromumtopu, ataru peda, nun tep kau kepmemdi, lyepropserume. Nun Israel nesalada, kan nyapu kunupa cadi, adepmare ngebo popmangu nengda, tek sisi nun walwale. Atep, adepmare ngebo er yapida, nun deiki men deipkamserume. Angeboda, er mali kuna gum dipapu popmangpa, depmarura cadi, angebo tep menenga ikin kecada, ‘Nun tali neng doropnup’ tenen, moropkepe. Atep kau kepsememdi, angeda, gum kupra deipkamserumdi, kange di telep kweipserume, naie,” upepra, moronkamnunge. Ukupra konum moropmengopda, Allahdi adepmare ngebo, er yapida, sun nong deiki men deipkamre. Amutu nesalada, kau kepkamre ja. 9Uda, Allahdi, ‘Sunda, angepu kuptenge,’ teneserur ngepu, sundi angepu kunkamrume. Allahdi sun tep peipmaserpa, apeipsentopu, amutu depmare ngebo tep nengeda, ukunkamrume. Ange kupmum pangeda, Allahdi adepmare ngebo, er yapi tep, sun damai ikin keca men derinkamsere. Ataru-ataru yumada, Allahdi ‘Angeda telepe, tek sisi kunada ake, ukunkamrume,’ peserengepu talepra kunkamrume. Musadi pepu.

Mar podanai benamkap, yuk mutu nerapu dalupra duyankameng nerapu tep nengeda, “Ukunkamrume,” pepu upu

10Sun nai bo Allah Yahwehdi, mar podarbenkumum taru, puto karepserepa, sun podan mutu neng yuma bena popbisipmumdi, ton nesalada, ‘Nun pel donkamseng’ tenen, tomopra duyakankamrume. 11Amutu neng tomopra doupra yana deipmarumyanen, ukupmantoda, urasin pio telep kaber ner ton eprumdi, ‘Uo, anerda ne dopkamne,’ teneprum dingeda, ukupkamrume. 12Aner doupra, sun pe ati tamupra bankamrume. Sun ati dubemum dingeda, adipapu er aner potong yuma adipapu toutamkamrure. Tonda er buru gala seng tamkamrure. 13Ukupre dingeda, aner tomopmum taru kemamre opkal peda, kwiriptapredi opkal yuknge kemkamrure. Aner kan ati kunkamre taruda, war tenpu mapkamre. Amapkamre taru yumada, tali kuramredi, sundi er nai sisa cap, er nin sisa cap, er wisi nesala yuma pomrumnge tep, ange teneredi engenkamre. Atep nengeda, ataru yumada, aner cap kikiman men mankamrume. Ukuamumpane, awar konum gawal dakre pangeda, aner dopmemdi, aner cap kikiman mankamrume.

14Dinino, autopu ner, sundi dopra doamumpa, kikiman kuramrumdi, er cap kikiman mapmarumyane, amenda taruda, ‘Gume, anerda pio men dopkupe,’ tenepmum dingeda, sundi aner tep, ‘Yuk neng co bo kunupropkupe,’ men tenenkamrume. Dinin, sun adipapu aner tapmumpa, beredi er pe tenepretopu kunkamrure. Aner tep nengeda sundi, ‘Gume anerda tali ner cadi, co bo kunupropkune,’ tenena do, ‘Tali pel dipnepa donkamre,’ tenena do, ange yumada men tenenkamrume. Deiyoda, tali tep gume. Sunpe kange dipapu anerda doropra domumdi, kikiman mapmamumya tep, yuk nengdi, ‘Anerda dakwapye, mali ner utopu kurure,’ tenenkamnunga tepa.

“Menmena weni deiamum nyapu tep, sun talepra kunkameng ngeda bokra karepmumpa, talepra kunkamnunge,” peipu upu

15Ukupmanto upu ton pepkusene. Ada, nimi tenpu ngebodi ner butene dopra kuramrepane, ton nerda ila di kange derirure. Ton nerda, kange men derirure. Uda, anerapu ataru dipapu sal nyapu butene deipkamrenge. Dinino, pio menmena weni mi deipkamre nerda, sun akange bodi men kange deiamre nerdi deipkamre. 16Ukupre pangeda, sun akange bodi, erdi taleamtu keca yuma bokra, er nyapu tep karepkutuopda, ware kupkamtu do? Ada, angebo er kange deiamre nerdi deamre mi tarapu men kemrure. Tek sisi weni mi deiamre ner, er kange men deiamre ner dinin, er deiamre mida tek sisi weni mi kurura cadi, amipu er nai bodi er taleramre keca neitamai di, weik tara ton bokra, ami tepapu karenkamrure. Ada, er kange deiamre nerdi deiamre mi, er tamnapu kepreya deiki di, kange men deiamre nerdi menmena weni deamre mi, er talenange yambul keiprur atepa. Ukunada mali tep, angeda men kunkamrume.

17Atep nengeda, anerapu butene domu ngebo, er taleramre keca yuma neitamai bokrapredi, butene-butene keteneipredi, er tek sisi menmena weni deiamre mi tep nengeda, karenkamrure. Ware keca do yuma, er nai bodi taleamre kecada, butene-butene kupra dopropkamrure. Anyapu butene tep nengeda, utotopu kupra men bongdinkamrure. Ada, kange deipmare ner cap, kange men deiamre ner cap, sundi menmena deiprei nyapuda, utotopu bokra men karenkamrure. Tek sisi weni mipu er nai bo taleamre kecada, butene kupra dopropkamrure. Amenda deipre mida, tenpu-tenpu kupra dopropkamrure. Atep, apepne utopu kupra karenkamrure. Tonda, sun nai bo taleamre kecada, ‘Ne nyapu, tek sisi menmena weni mi deipsi ngeda, weik tara keca adipapu karepkamne’ tenen, ketenemdinkamrure. Tonda, wilipredi amipu karenkamrure. Deiyoda, angebo er kaberto kuramu taruda, puto kuramudi, ami menmena deipka cadi, amida tek sisi er weni deipre mi kurura cadi, er nai bodi taleramre keca yuma, butene-butene kupra doronada, er dipapu doproptue.

Mali kupmenge nyapu tep nengeda, “Ukunkamrume,” peipu upu

18Ukupmanto upu ton pepkusene. Uda, sun deiamrum sal nyapudi, sun nai yapu cap, sun nin yapu cap, sun upu men gekepsengepa, er nai, er nindi, ‘Telep kuptu’ tenen, popra weneprengepane, asal nyapu pio kika kupmengedi, sun upu men gekepmanto kupmengopda, ukunkamrume. 19Sun sal nyapu kika deipmengedi, upu men gekepmanto kupmenge pangeda, sun nai cap, nin cap, sun wisi nesaladi, ami doupra, amutu nesala talepra kungedi, pio moupra kunung nimi deiyo-deiyo neng, sun damai dubankamnunge. Ada, sun ati arum dana-dana ongopra wipra deiami gel beilya neitamai dinin, ila buplan keteneiamyaipu, aceipu ami doupra bengedi, sun mutu deiyo neng tep, “Nun nai yapu, sundi nun kika kuramre mi wenepra, dumsisi keipseso,” pepra, bena moronkamnunge.

20Ami doupra, akati arum ila buplan damai dubenkameng taruda, amutu ati arum dopra, kunung nesala yuma tep, deiyo kepra talenung neng tep nengeda, aupu katuai dipapu penkamnunge. “Gume, nun mida, kika deipredi, nun upu men gekepmanto kurure. Pio kika-kikapu kuredi, nun penup upu yanipredi, pio men gekeserure. Mali-malipu kupredi, jen keca yala-yala yuma adipapu, weika di jeredi, gawal dangdorure. Tonda, yu me kunupra jeredi, mali-malipu kurure,” pepra, bena lap penkamenge. 21Ukupmum pangeda, amutu kunung nimi yumadi, ami tep, gel dopra popmengepa denkamrure. Ukupmumya deiki di, mali kuna keca ton amutu neitamai men kunkamre. Sun adipapu gum kupra derinkamrume. Ukupkamruma deiki di, sun kurum mutu yumada, telepepu kunkamre. Tonda, sundi ukuprumupa, yuk mutu kunge Israel nesala yuma, aupu gekepmengedi, kwar kuprepa, moupra kunkamnunge.

Wenepra popmenge ngebo deprepa peina tep, peipu upu

22Tonda ukupmanto upu ton pepkusene. Angeda, tek sisi pepnetopu kunkamrume. Ukupmantoda, mali kun keca weik kupmare ngebo wenepra popmengepa depkamre. Adepkamre ngebo, er nongda tali dakuamre co deiki do, sundi ikameng lyom co deiki do, co tapu di gerengkotemkamnunge. Ada, ‘Yuk neng epmengedi, ‘Uo’ tenen, kael kepmengedi, sun pe ton mali men kunkamnunga,’ tenena tepa. 23Ukupkamnung dinin, wenepra popmengedi, er nong dopra co deiki deipmange ngebo, er nongda alukunda neitamai yumada, aceipu tapmamumpa men kumkamrure. Dinino, atumi keteng kapul men wengbere taru dipapu, er nong doupra tu pumbon peirbankamnunge. Aco ikra tapu di gerekotepmamum ngebo, tupa acapu kupmare pangeda, Allahdi amutu kuramrum neng, sun wenemna yuma tep, ikin keca karenkamsere. Atep nengeda, ‘Ukupserur’ tenen, adepmare ngeboda, er nong adipapu dopra, atumi idona taru dipapu peirbankamrume. Deiyoda, adeiki di, sun tep Allah Yahwehdi karepseupa, kumum mutu neitamaida, mali kupra men derinkamrume.