Deuteronomy 22

Melimdana tep, pepu upu

1Ukupmantoda, ware peina keca do yuma, yuk neng sundi peirameng sapi bisam do, tonda domba bisam do, sun cap kikiman kuramum nesaladi peiramenge keca ton, yawarapmarepa epmumnyopda, asuru di eprum dingeda, ‘Dyo, dakwapye, dayawarapye,’ tenena gume. Ange kuna gum dinino, sun peirameng keca wangapmarya epmumnyopda, adipapu doroprapmumdi, er pe deiyo ngebopu tamupra karenkamrume. 2Tonda, akeca taleamre ngebo, er ati kuramrurai cap, akeca taleamre ngebo, er nong cap sun walwal dingeda, agam keca douprapmumdi, sun pe ati sisa derirbemumdi, peinkamrume. Ukupmamumpane ukupmanto, akeca taleamre ngebodi enmarepa, gekeprumudi, kael kepmumyopda, er pe deiyo ngebopu tamupra karenkamrume. Deiyoda, telep kupra makudanapu kunkamruma tepa.

3Tonda, yuk nge peda ange kupmumtopu kunkamrume. Ada, yuk neng sun peirameng Keledai bisam do, opkal sekropa do, autopu ware yala keca do yumada, wangapmarepanen, akapmarepa sun asuru epmumnyopda, sun mutu neng, sun keca cadi, douprapmumdi, er pe deiyo ngebopu karenkamrume. Akeca yala-yala yuma tep nengeda, ‘Dakwapye, dawangapkamre,’ tenena gume. Makudanapu kunkamrume. 4Utopu ton, sun mutu neng dinin, yuk neng sun Keledai bisam do, sapi bisam do, sun cap tonpa kuramum neng peiramenge nge, bisiai loka dourberyopda, men epmanung nengdi tali mankau kange douramenga utopu kuna gume. Dinino adipapu sun kabo cap, tonpa abisam er nong erepra deipmumpa kange di ton cap telep kupra bankamrure. ‘Dakwapye, daloka dourbenmara peda, men melipkune,’ tenena gume. 5Ton upuda ake. Nerapuda, ‘Nimi utopu kupkune’ tenen, nimi kemne opkal men kemkamnunge. Ange utopu nimidi, ‘Nerapu utopu kupkune’ tenen, nerapu kemne opkal men kemkamnunge. Ange kupmenge nesalada, sundi si eremrum Allah, Yahwehdi, ‘Angeda ne pio songe, angeda pio mali weik’ tenen, yu kurure.

“Yuk yala-yala keca yuma kuna tep nengeda, ukunkamrume,” pepu upu

6Ukupmantonge ton ake. Sundi tali daembandenkap, ma ton er ati donaida tu deiki do, co balu di do, doprapredi du deipra iriamrur do, uda waluk bukamrepa kalekamrur do, ukuamrepa, epmum dingeda, ama sun ninda men doronkamrume. Ada, akapmare ma waluk abukamre ngeda, ‘Jepkun’ tenen, dopropkurum dinin, ange cap, ama sun nin cap, er du cap kikiman men doronkamrume. 7Tonda ama er nyapuda, sundi doropmumnyopda, sun ninda tapmumpa bankamrure. Ukuprum pangeda, sun kunkamrum taruda, neda sun nai bo Allahdi keteng tamun ton cap weika di karepsenepa, mapmumdi pio teleppu kunkamrume.

8Ukupmanto, sundi ukupu ati ton dopmumnyopda, akatida er nongda ban kupra dopmumdi, alau ati deiki tara amnyabo sirik dana-dana yumada beilya wipdongopkurume. Deiyoda, ‘Yuk neng akati deiki tara welepmengedi, saka popdanung’ tenena tepa. Akati deiki tara, yambul beilya dana-dana tara yuma wipdongopmumpane, nimi yuk neng ton akati amnyabo deiki di embanmankap, saka popyopda, aneng sun yapi sun akati deiyo neng deiki kupkamre cadi, yambul beilya konum wipdongopmum pangeda, sun pe damai ikin keca, menenga keca men doronkamrume. 9Tonda, anggur wa pepmumnyaida, anggur yalpu kounkamrume. Awa neitamaida, yuk yal keca ton pio gume. Ukupmanto, awa tu neitamai, yuk yal keca cap, anggur cap kouamumyopda, wisiprea peda nong men kinkamrume. Ange yuma tapkamrume. Ada anggur du wisipkamrenge pe, yuk yal keca nong kupkamrenge peda, tapkamrume. Deiyoda, anggur wa neitamaida, yuk yal keca men kounkamruma tep pepne.

10Tonda wa pena taruda, sapi bisam cap, keledai bisam capda, wa tu palina tep keca er si bajak, angeda tenpungepu men tapu koudongonkamrume. Telep ngeda, keledai bisam yuk, sapi bisam yuk, sun yuk-yukpu pel donkamrurunge. 11Utopu tonda, domba bol cap, kain lenan cap di, tapakra winung opkalda, pio men kemkamrume. 12Tonda, adipapu sun deiki opkal ngeda, sirik-sirik koudongona tep tapu ton, er si umbai, yuk-yuk keteneipkurume. Dana-dana tara dumbari sirik-sirikaida, umbai tenpu-tenpu wipmarumnge getepkamrume. Ada, sun nong lelimdongomna tepa.

“Nimi cap, nerapu cap dodana taruda, ange-ange ukunkamrume,” pepu upu

13Ukupmanto nimi tenpu ngebodi, kaber ner ukupu dopmarepa, tonpa mapmarenge dinin, ngedi tamuprapredi, ‘Uo, anerda ne songe’ tenen, angebodi er kange yuk tenepredi, ‘Deiyo men kwapmarepapu, anerda ne song cadi, tali lupra taptene’ tenen, ukupra tenipkamre. 14Ada ukupmantonge tep pepne. Ato ngebodi, er pe kange dipapu, ‘Gume, aner taptene’ tenen, mok upu deiki di aner er si yanipredi, aupu utopu ngeda pepkamre. “Gume, anerda er cap tonpa mapmanemu taruda, kaber kuramre nerdi nimi cap tonpa antameng ner kamo utopu men epmane. Erda, nimi cap konum kikiman kuramre ner utopu kupmaua epmanue. Atep, anerda ne songe,’ tenepredi, upepkamre. 15Angebodi, amok upu upepyopda, akaber ner, er nai cap, er nin cap sundi, adipapu angebo cap tonpa mapmarengepa, yapi bapmare kain doupra, amutu upu bongdina tep deiyo-deiyo neng damai dubankamrenunge. Adubenkamreng ngeda, sun deiyo-deiyo nengdi epmengedi, ‘Sun ner mida tek sisi kaberpu kuramya tepa,’ tenenkamenge.

16Ataruda adipapu, aner er nai bodi, sun upu bongdina deiyo neng damai di, upepkamre. “Ne ner mida, angebo dopkamre’ tenen, tek sisi konum dopsidi,’ angebo tep karepsipa, konum maprei dinin, ataruda nun ner mi dopmau ngebodi, ‘Anerda ne songe,’ tenepmaredi, nun ner mi tep, upepmare,” penkamrure. 17“Tonda, angebodi tali upu deiki di, ‘Aner cap mapmanemu taruda, kaberpu kuramre nerdi, nimi cap tonpa antameng ner kamo utopu men epmane. Erda, nimi cap konum kikiman kuramre ner utopu kupmaua epmanue. Atep aner tapkune,’ pepra tenepmare. Angebodi utenepmaredi, amok upu pepmaser dinin, tek sisi, angebo cap, nun ner mi cap, kikiman mapmarei taruda, er yapi embenmaupa, alyom kain deiki palepmau ngeda, acapu dinkurume, adano,’ pepra, jenek penkamrure. 18Aner mi er nai bodi, ange konum lap pepyopda, adipapu sun amutu upu bongdina deiyo nengdi, akain epmengedi, konum kael kepmengopda, aner mi dopmau ngebo tep upupmengepa, sun damai yare pangeda, er tep wenepra, ikin keca dopra er deiki derinkamnunge.

19Ukupmenge dingeda, sundi angebo tep ikin derinkamnunge. Ada kunumna weik gel uang, er sida perak, seratus (100) moropmengepa karenkamrure. Ukupre pangeda, amutu deiyo-deiyo nengdi, aner er nai bo tep, karepkununge. Akarepkameng nge deiyoda, amutu neitamai kure Israel ner tep, er si mali kweipmaua tepa. Tonda, anerda angebo er ner sisa pio dopra kunkamrure. Sun gam kunkamreng taru yumada, angebodi aner men tapkamre. Pio kikimanpu kunkamrerunge.

20Dinino, ukupmanto ton. Angebodi er dopu kaber ner tep, ‘Ne songe,’ tenepredi, ‘Anerda er cap tonpa mapmanemu taruda, kaber kuramre nerdi nimi cap tonpa antamenge ner kamo utopu men epmane. Erda, nimi cap konum kikiman kuramre ner utopu kupmaua epmanue,” pepre pangeda, er nai cap, er nin capdi, yapi palepmau opkal epeteprengedi, men kwapyopda, ‘Uo, anerda, konum kaber taru di tek sisi yuk ngebo cap ton antaprei,’ tenepmarengdi, kael kepra lap peprenge pangeda, angeda yuke. 21Ange kuprepa, kael kepmengopda, akaber ner, er nai cap, er nin cap, aner adipapu doupra, er wisi nesala ati buplan damai bena deipkurunge. Ukuprenge pangeda, amutu ila ati arum doramengedi neitamai di nimi yopu bulupra yangedi, aner gel di doupra popmengepa denkamrure.

Akupkamenga deiyoda, ake. Aner er wisi nesala ati tupa kuramre taruda, nimi men domre dipapu, yuk neng cap tali-tali kuramua deiki di, amutu neitamai tep, ali dangna utopunge kuramya tepa. Tonda autopunge kupra wenepra popmumnya deiki di, amutu neitamaida, autopu mali kunange ton cap men kunkamenga atep, ange kupmumdi, gum kupra derinkamrume. 22Tonda, nimi tenpu ngebo ton, yuk neng domenge ner cap tonpa mapmarengepa epmumnyopda, sun angebo cap, aner cap, sun butene adipapu popmumpa denkamrenunge. Ukupmumnya deiki di, amutu neitamaida, autopu mali kuna ngeda men kunkamenge. Adeiki di mali kuna kecada, Israel nesala damai di gum kupra derinkamrume.

23Uda ukupmantonge ton ake. Sun ati arum dopra kunkamrum mutu neitamai di, kaber ner tenpu kuramrepane, yuk ngebo mun peramya konum dopkamarepane, er kabo yuk ngebodi, aner dopra tonpa mapmarengepange, epmumnyopda, ukupkamrume. 24Adipapu sun akuprenge neng butene douprapmumdi, sun ila ati arum doramrumya, bisi buplan dam bena deipmumyopda, gel di dopra, popmumpa, denkamnunge. Tonda aner popmumpa depkamra deiyoda, ila ati arum doramrumai neitamai di kunmarenung dinin, er anerdi ila upu deiki di, ‘Ne melipneso,’ pepra, men moropmareya tep, aner poptapkamrume. Ange utopu ton, nimi ngebo popkamrumnge deiyoda, yuk ngebo mun peramre ner upula dopra mapmarya tepa. Sun autopu neng butene yumada, ukupra ponkamrume. Adeiki di, amutu neitamaida, autopu mali kuna keca ton cap men kunkamenge. Atep adipapu gum kupra derinkamrume.

25Dinino, tonda tek sisi mali kunange dinin, ukupmanto kaber ner tenpu yuk ngebo mun peramrea konum dopkamere ner dinin, wai dam di upula doroprapredi tonpa kunmarengepa epmengopda, amali kupmare nimi ngeboda, deiyoda er dia. Atep, adipapu angebo wenepra popmengepa denkamrure. 26Angebo poptapkamrum dinino, ‘Anerda er damai di ton weneptepe’ tenen, kurpetena gume. Angeda, aner er tep wenepra popmengepa denange ton gum tepa. Deiyoda, anerdi nimi popmanto mali kun keca men kupmare dinin, angebodi er puto deiki di aner dopudi, kikiman kupmarya tepa. Tonda, amali kupmare ngeda, ukupmanto nimi tenpu ngebo ton, deiyo men kupmarepapu, er damai kupmare ngebo, tali lupra poptaprepa depyopda, ange utopu ton kurure. Ada, nimi popmare ngebodi, er pe dipapu yuk teneprapredi, yuk ngebo mankau kunmare ngebo poprepa deramra utopunge kupkamra tepa. Atep nengeda, aner tep men wenepra poptapkamrume. 27Angeda, aner cap angebo capda, nimi yuk neng kuna gumai, wa pen damai dipapu atapmarenga tepa. Tonda, sun kikiman antapmarenge taruda, anerdi, ‘Nimi yuk neng tep melipnetenge’ tenen, ila upu deiki di upupra moropmatu dinin, nimi gumai tep, men gekepra melipmanga tepa. Atep, mali kunange deiyoda, ernge gume, ada nimidi pua.

28Uda, ukupmanto ton pepkune. Nimi tenpu ngebo, er puto dipapu, kaber ner tenpu, nimi mun pena gum ner dopra, er puto deiki dipapu sun kikiman mapmarengepa epmumnyopda, ukupkamrume. 29Akupmare ngeboda adipapu, aner er nai bo tep, er tappa kareramenga utopu uang perakda lima puluh (50) di karenkamrure. Ukupre dingeda, anerda tek sisi angebo er ner pio dopra kunkamrure. Deiyoda, angebo dipapu palepra doropmarya tepa. Anerdi, ‘Telepe,’ men tenepmarya peda, angebo er puto di aner dopra mapmarure. Tonda, angebodi aner doprepa, kunkamreng taru yumada, angebodi aner tep dabal kupya peda, pio men tamkamrure.

30Tenpu ton cap pepkusene. Ada, ware ngebodi do, nimi tenpu ngebodi er nai sisa doamre nerda, pio men donkamrure. Ukupyopda, er nai bo sisa, er si pio mali kweiprepa, er nai boda, pio ali dakra kunkamre. Atep, angeda pio meme pepne. Musadi sun Israel nesala tep pepu.