Deuteronomy 23

“Autopu kuamre nengda, Allah Yahweh er damai pio men yakankamnunge,” pepu upu

1Nun nai bo Allah er si eremna tep, er damai men yanmanto nengda pepkusene. Sun anengda ake. Bolop tenpu kuamre ngebo, tonda den sektapi ngebo, sun autopu nengda, Israel nesaladi Allah Yahweh er si eremna tep, er damai yakankameng taruda, sun anengda wisipra men yakankamnunge. 2Tonda, nimi dona gum dipapu tali-tali kuramengedi deamenge nyapuda, tonda ange midi deiprepa, dadeipdanen baramengane, morokyo di utara deiamenge neng cap, tonda, amidi deiprepa, dadeidanen baramengane, morokyo di utara deipkameng neng, agenerasi neng yumada, Israel nesaladi Allah Yahweh er si eremna tep, er damai yakankameng taruda, sun anengda wisipra men yakankamnunge. 3Tonda, Amon yala neng cap, tonda Moab yala neng cap, tonda sundi deipmengepa, dadeipdanen baramengane, morokyo di utara deipkameng neng, agenerasi neng yumada, Israel nesaladi Allah Yahweh er si eremna tep, er damai yakankamnung taruda, sun anengda wisipra men yakankamnunge. Angeda pio tupa kunkamrume.

4Uda, sun Amon mutu neng cap, Moab mutu neng cap, Allah damai men yakankamenga deiyoda, sun Israel nesala Mesir mutu kuramrumane, tapra bisi yakaramrum taruda, sun amutu nengdi jen cap, me cap men kareiamsei dinin, sun tep, ‘Sun anengda wipdongoptengepa, malipu kuptenge,’ teneamsei. Utenepseidi, sun anengdi bul karena kecada, Peor mutu dinin, Mesopotamia mutu kuramu ngebo, Beor er mi Bileamda, ‘Erdi Israel nesala damai karepkamre’ tenen, menenga keca co bo kareamya deiki di, pio mali kupya tepa. 5Sun anesaladi utenepra karepipa, Bileamdi sun tep, ‘Malipu kuptenge’ tenen, wipdongopseu dinin, sun nai bo Allah Yahwehdi, Bileam er pepu upuda men gekeamu. Angebodi, ‘Mali keca kupdongopnedi, sun anengda wipdongopna,’ tenepu ngeda, Allahdi tamupra telep kupra deiyamseue. Ange deiyoda, Allahdi sun tep bicau tenepseudi, kuamseu. 6Sundi sun Amon mutu nesala cap, Moab mutu nesala cap tep, sun kunkamrum ngeda ake. Ataru di dipra, doryankamre taru yumada, pio tep, sun amutu nesalada, sun tep pio men makunkamrume. Tonda, ‘Sun amutu nesala telep-telep kupra kupmengedi, kange deipra kunkameng’ tenen, sun anesala tep, telep kweipmumpa, men kunkamnunge.

7Dinino, sundi Edom mutu kunge neng tep nengeda, ‘Sunda tali neng cadi, malipu kununge, nun songe,’ pio men tenenkamrume. Deiyoda, sun amutu nesalada, sun kayapu neng, Israel yala nesaladi deipipa, dadeipdanen baramyanen, Israel yala nesala neitamai kunge nesala kununga tepa. Tonda, Mesir mutu kunung nesala tep, ‘Sunda tali neng kununga cadi, nun songe,’ men tenenkamrume. Deiyoda, men taru sunda Mesir mutu neitamai nimi bo neng, tengyakan neng utopu kupra kuramruma tepa. 8Atep nengeda, sun amutu nengdi deipmengepa, deipkameng nengdi deipkameng neng, doryankamre keteng tamun, weneri neng keprepa, adinin dortara deipkameng nengda, sunda Israel nesaladi Allah Yahweh er si eremna tep, er damai yakankameng taruda, sun aneng peda wisipra yakankamnunge. Angeda, pio tupa kunkamrume.

“Jen talena neng dodina ati dopra deipmengedi kunkamengaida, ‘Mali kupnung’ tenen, kalengdankamrume,” peipu upu

9Ukupmantonge ton pepkusene. Ada, sun Israel nengdi yuk mutu neng cap, ‘Mar podankup’ tenen, podarbemum taruda, ‘Mangkau di mali kun keca yala-yala yumada kupmepepa, Allahdi derepseredi, wenepserur, ‘tenen, beipra kunkamrume. 10Ukupmantoda, tenpu ngebo ton mali kun keca kupkamrenge ada, er angebo mapmare taru di, mangkau di er lin bisi di nyapu derin me, den ule kupre pangeda, er angebo adipapu jen talena neng sun dodina ati di gopra, er yuk bura tara bankamrure. 11Er angeboda, keana taru atep, tamupra jen talen neng damai yakana gum di, acapu bura tara dabena tali dakunmarepane, sintara keprepa, me gekropre dingeda, jen talen neng sun dodina ati damaipu tamupra yakankamrure. 12Mali kweipdarumu dingeda, sun adipapu keana taru tep, sun dodina ati dopra kunkamruma damai gum dinin, bura tara ton bena ketenemdinkamrume.

13Tonda ukupmanto, aketeneiamrumu ati dam bena kure ngeboda, er adipapu doupra ban keca ada, co balal utopu keca ton doupra bankamrure. Deiyoda, lin do, dei do, yukai bena kupdongopkure dingeda, ‘Yuk neng di do, Allah di do, amali keca epnung’ tenen, tu palipra deipredi, kupdongopredi, deiki tara tu di dopra, singidongonkamrura tepa. 14Ange ukunkamruma deiyoda, sun dodina ati dopra kunkamrumaida, sun pe yuk men kunkamrume. Sun nai bo Allahdi melipserepa, sunda er amuta kumumya deiki di, sun podana nengdi men yana popbisipkamsenge. Ukupkamrura cadi, sun dodina ati dopra deipmumdi, kunkamrumaida, mali kuna keca kuna gum di beipra telepepu kunkamrume. Ada, sun damai di mali kuna keca ton kuprum pangeda, sun nai bo Allahdi ange epyopda, sun damai di gopropserepa popbisipsenung tenena tepa.

Ange-ange yuma kuna tep nengeda, “Ukunkamrume,” pepra deipu upu

15Nimi tenpu ngebo ton, er ati melipra pel dona tep co bodi, yuk ngebo kunupra yana deiamrepa, er ati pel doramreyane, dabal kuprepa, ‘Ne song’ tenen, tapra beryopda, angebodi sun yuk neng damai yarepa, sundi, “Ne melipnetum do?” pepra, yana moropsere pangeda, sundi angebo tep, ‘Ne damai yakana gume, kan deiyo ngebo damaipu tamupra benkurume,’ men penkamrume. Sun adipapu angebo tep melimkamrume. 16Angebo er pe kange dipapu sun kunkamrum mutu dinin, aneitamai di ‘Neda amutu kunkune, ormutu kunkune,’ tenepre mutupu kunkamrure. Tonda, sundi er angebo tep, “Nun tenepmaptopu kupkurema,” pepra, puto di ila ikin keca deipra. lulumna upu pena gume.

17Sun Israel nesala yuma neitamaida, nimi pe, nerapu pe, isok-isok si eremna ati talepra, pel dongedi, tali nyangdana nesala kuramengtopu, pio men kunkamrume. 18Tonda, ange utopu ngeda, sun isok si eremna ati neitamai pel donmankap, sun pe nong deiki dipapu kunupropmange co boda, ange doupra, ‘Allah Yahweh karepkup’ tenen, doupra, Allah si eremna ati men duyakankamnunge. Ada, isok si eremnange cap, mali kuna pel dona deiki di doropmange co bo cap doupra, sun nai bo Allah tep karebana gume. Autopu ngeda, mali kunange cadi, erda pio yu tenerure.

19Ukupmanto yuk Israel yala neng, sun co bo putapmarur dinin, men kapyopda, moropsengepa, aIsrael neng tep sun co bo keana kareamrum ngeda, aneng keana taru tep karepmum co boda, ‘Ton cap tapakra karepseso,’ pepra, men moronkamrume. Ange utopu, co bo do, kunumna weik keca do, jen keca do, yuk talerum keca yala-yala yuma peda utopu, keana taru tep yuk Israel yala neng tep karepmumnyopda, amenda taru anengdi akeca tamupra karepkamseng taruda, ‘Nun kecada keana taru neitamai di dopra taleamruma cadi, ataru yo pununa tep, co bo ton cap tapakra karepseso,’ pepra, pio men moronkamrume. Ukunada pio mali tepa. 20Dinino, yuk mutu neng, sun nimi bo nengdi, moropsengepa, aneng tep ke taru karepmumnyopda, akeca amenda tamupkamseng taruda, co bo ton tapakra karena telepe pua. Sun pe Israel nesala tep nengeda, tapangna pio meme. Sun anengdi adoroami utopu kupra tamunkamsenunge. Apepra deipsen upuda, sun yuma gekepmumdi angepu kunkamrume. Ukumum pangeda, sun nai bo Allah Yahweh erdi, sun akunkamrum mutu neitamai kunkamrum keca yumada, pio telep kupra derinkamsere.

21Ukupmanto, sundi sun nai bo Allah Yahweh tep, “Ange tek sisi kupkamkepe,” pepra, pedina upu deiki peiamrum ngeda, tamna gume, apeiamrumtopu kupra, adipapu ange kupkamrume. Deiyoda sundi, sun nai bo Allah Yahweh tep, “Ukupra-ukupra kupkamepe,” pepra, deiamrum ngeda, sun nai bo Allah Yahwehdi, “Apepra deipneitopu kupra kupkamneng ja. Tonda, sundi upu pepra deipneitopu karenkamneng ja’ tenen, diserure. Atep, sundi apeiprumtopu kupra men karepmumnyopda, sun pe damaipu mali kudidarume. Allahdi, ‘Ukunada, mali,’ tenerura tep, ukupmumnyopda, erdi wenepkamser ja. 22Sundi sun nai bo Allah tep, “Ange kupkamne, kan gispal dona tep, akeca ton karepkamkene,” pepra, pedina upu deiki di men peiamrumu dingeda, ange peda telepe pua. Pedina upu men perumudi, ange ton men kupmumnyopda, sundi mali men kurume. 23Dinino, sun pe kange dipapu tenepmumdi, ‘Angeda Allah Yahweh tep karepkamepe. Er gispal dona tep, ukunkamepe,’ pepra, sun pe upu di, pedina upu deiki di Allah Yahweh tep peamrumu ngeda, sun adipapu apeiamrumtopu kupkamrume. Karena tep nengeda, tek sisi angepu karenkamrume. Gum dingeda, pio mali kupkamrume.

24Ukupmantoda, sun jen putanmaserpa, yuk neng sun anggur wa pepra kouamengai bisi embankap epmum dingeda, aputapmaseretopu kupra doropmumdi jenkamrume. Angeda mali gum dinin, ‘Amenda taru ton jepkamne’ tenen, anggur du ton cap weika di daknedi, ne alen kipra jerbenkune,’ men tenenkamrume. Ukunada mali tepa. 25Ange utopu, tonda sun jen putanmaserpa, yuk neng sun gandum wa pepra kouamengai bisi embankap bemumdi agandum epmum dingeda, aputapmaseretopu, buru di du dakropmumngepu jenkamrume. Dinino, gandum yoda parang utopu keca, er sida sabit ya di sekra, weika di dorona gume. Ange peda mali kuna tepa. Musadi sun Israel nesala tep, Allahdi peiamu upu ton lap pepu.