Deuteronomy 24

Dopdanmanka tamna tep, pepu upu

1Musadi Israel nesala tep pepu. “Uda nimidi ner dopmangepane, amenda taru anerdi mali kupre pangeda, angebodi aner tep dabal kuprepa, angebodi, ‘Aner ne songe, aner tep bicau tupa men tenenune,’ tenepreopda, tamna tep nengeda, ukupkamre. Ner tamna surat sekra aner karepredi, ‘Tapkene,’ pepre pangeda, aner adipapu akati neitamai di tapra bankamre. 2Anerdi angebo er ati konum tapra beryopda, yuk ngebodi aner putapreyopda doptue.

3Uda, anerpu dinin, kange di, bena dopre ngebo peda, aner tep dabal kuprepa, ‘Anerda ne songe,’ pepyopda, aner tamna tep surat sekra karepredi, er ati pumbon di dokotepre pangeda, menmena doamre ngebodi, ka tamupra aner men doptue. Ange utopu, aner butene taru dopmare ngebo depyopda, aner menmena taru doamre ngebodi, ka tamupra aner men doptue.

4Uda, menmena doamre ngebodi aner taprepa, yuk ngebo ton kange di dopredi kikiman kuramrenga tep, menmena doamre ngebo tep nengeda, aner pio men doptue. Deiyoda, Allah er kangeda, ‘Anerda, mali tep, konum men dopmanto ner kurure. Ada pio mali,’ tenerura tepa. Atep, menmena ngebodi anerpu kange di tamupra dopyopda, Allah tep mali kudirure. Ange tep nengeda, Allahdi karepseu mutuda, ‘Ato mali keca kupmepepa, amutu yuma mali kupserur’ tenen, ato keca pio men kunkamrume.” Musadi pepu.

Musadi, ‘Ukuprap kunkamrume,’ pepu upu

5Musadi aupu pepudi, aupu ton dukdongopra pepu. “Nimi ton ukupu ner dopre ngeboda, jen neng mar podana tep bange taruda, angebo cap melipra bana gume. Tonda yuk ikin pel ton, er deiki derina gume. Telep ngeda, keteng tamun tenpu ton tapmumpa, er ner cap, sun kange deipdarengedi, telep kupra kikiman kunkamrenge. Ada erdi er ner kange telep kudinkamreya tepa.

6Tonda, apepkusen nge, ton men kunkamrume. Sun kayapu nengdi, sun co bo ke dopropkumengopda, gandum do, yagung du do, sun taingne gel dorona gume. Ada, ‘Sun mambul keca talepnepane, sun ke dopmenge co bo tek sisi tamupra karepkamneng’ tenen, sun taingne gel, deiki tara derinung gel pe, amutara derinung gel peda, men dopropkamrume. Ato keca dopropmumnyopda, nimidi yuk mutu neng upula dopra, ateng koupra talenunga utopu cadi, ukuna meme. Sun kayapu neng, sun taingne gel dopropmumnyopda, ikin kuprepa, pel men doptengedi, men jepmengopda, depnunga tepa. Atep, yuk neng sun ila mambul kecada dorona gume.

7Sun pe Israel neng kan-kan, tenpu ngebodi yuk ngebo tep, upula dopropredi, ateng koupra taleramredi, ‘Angeboda tali keca utopu kurure,’ tenepre dingeda, amenda taru talepre ngebo dopra, yuk neng tep kunuprepane, sundi angebo doupra dubengopda, ada pio mali. Tonda angetopu, tenpu ngebodi, yuk ngebo upula dopra, ateng koupdongopredi, ‘Ne ikin pel talipu pel donkamrume,’ pepyopda, ange peda pio mali. Ware ngebo do yuma, angetopu kupmengopda, yuk neng upula dopre ngeboda adipapu poptapkamrume. Angeda tamna gume. Ato ngebo popmumnyopda, ukupmumya deiki, sun Israel nesala kan-kan mali keca gum kupra deipmumdi, gawal dangkamrume.” Musadi pepu.

Musadi, ‘Kikiman telep kuna tep ukunkamrume,’ pepu upu

8Musadi Israel nesala tep pepu. “‘Sengna suse utopupu cap, bol kouna pu capda, nun mutu neitamai yuma weik kuserura,’ tenena tep nengeda, ato kange mun keca sun nong deiki kupre pangeda, Allah er pel don neng, sun Lewi yala nengdi, ‘Ukupkamrume’ pepra penkamengepu, kael kepra apengetopu kunkamrume. Nedi, sun Lewi yala neng tep, ‘Ukunkamrume,’ pepra pepterepsitopu, angepu gekepra moupra kunkamrume. Tenpunge peda tamna gume. 9Mesir mutu tapra, bisi neitamai yakaramrum taru, sun nai bo Allahdi Miryam tep karepu ngeda, lumdongona gume. Miryamdi balila kupudi, mali kupka tep, Allahdi er nong deiki kot suse karepupa jeramu. Angeda tenepra kunkamrume,” Musadi pepu.

10Musadi aupu pepu. Sundi sun keca dopra, sun kayapu tep, ke taru tep karepkumum dingeda, sun kayapudi sun keca ke dopropkungyopda, sun kayapu ati wekra, sun pedi aneng sun keca men dopropkamrume. Ada, sun kapdi, “Ke taru tep dopropkuken keca, tek sisi tamupra karepkamkena cadi, ‘Kandi, teka tenepkamnerum’ tenen, ke taru tep, ne mambul keca karepkukene,” pepredi karepkuser kecada, sun pedi angebo ati wekra men dopropkamrume. 11Ange gum dinin, er ati bura tarapu bena dimpepra tekmumpane, er penge bodi er tenepre keca yankarepkamserure.

12Tonda, er mambul keca karepkere ngebodi, kankan ngebo kuryopda, er opkal cap, er selimut cap, ato keca dorona gume. Er mambul keca ila di putapkamra cadi, ke taru tep, tenpu lukunda peda, ato keca dopra pedongona gume. Ada, ‘Er keca dopropnyopda, ambutumipu tamupra karepkamemene,’ tenena gume. Er mambul keca dorona pio gume.

13Kankan nesaladi, sun keca ke dopropmengedi, ‘Tek sisi tamupra karepkamne’ tenen, sun mambul keca sun tep karepmenge kecada, lukunda neitamai deipra dimpedongona gume. Ipkure taruda, ke tep karepsenge mambul kecada, adipapu tamupra karenkamrume. Ukupmanto ngeda, er opkal do, er selimut do, ke tep dopropmumnyopda, ipkure taru konum kupre pangeda, er mambul keca tamupra karepkamrume.

Karepmempa, kenekredi alukunda neitamai bul tep kuprepa mapredi, kange deipkamkere. Kange deipkeredi, kan tep, ‘Telepe’ pepredi, Allah tep, “Ne nai Allaho, ne kabo tep makunkamrume,” pepra moropkamkere. Tonda, sun nai bo Allahdi sun kupmamum keca epseredi, ‘Sun kupmangada, dumsisi kunmange,’ tenepra kange deipkamsere. Musadi pepu.

14Upepudi aupu ton pepu. “Tali pel dona tep, kankan kunge nengda, akeca-keca pe yuma gum neng tep, kika derina gume. Tonda, sun pel dopmengepa ne, sun pel dona tep, co bo adipapu men karepmumnya deiki di, sun nong deiki ikin keca men derinkamrume. Apepmasenada, sun pe mutu neng Israel neng do, yuk mutu di tengyakan neng do? Tenpu mutu di, ati kikiman kurum neng yuma tep pepsene. Kankan nesaladi, ‘Pel dopnepa, co bo karepkamnenge,’ tenepmengepa, pel dopsengopda, aneng tep, ‘Dakwapye’ tenen, ikin keca sun nong deiki derina gume. Sun maton keca, adipapu karenkamrume.

15Ato neng tep nengeda, pel apio donmangepane, keteng men dangbenapre taru dipapu, sun pel dona tep karen co bo do, yuk karen keca do, adipapu karenkamrume. ‘Yuk taru dipu karenkamsene,’ tenena gume. Anengda pio kankan kunge nesala tep, men karepmumnyopda, sun putan keca men kunuptengedi, men jeptenge. Akankan kunge nengdi, ‘Angebodi karepnerepa, kunupra jeptene’ tenen, pel donmanunga cadi, sundi aneng tep men karepmum pangeda, anengdi Allah er si Yahweh tep, ‘Uo, sun konum karepmasetenge. Warya tep do?’ pepra, Allah moromenga deiki di, Allahdi sun Israel neng tep, ‘Mali kunmange,’ tenepkamsere.” Musadi pepu.

16Upepudi aupu ton pepu. “Sun nai yapu mali kupmengenge tep, sun nyapudi pona gume. Tonda, sun nyapu mali kupmengenge tep, sun nai yapu pona gume. Dinino, ila mali keca kupmengepa, ‘Ito wenepra popkupe,’ tenenup ngeda, wenepra poramep ngeda, amali kupre ngebopu wenepmumdi, popkamrume. Sun mali kupmenge keca tep, yuk neng tapakra men ponkamrume. Amali kupre ngebo pua,” Musadi pepu.

17Upepudi aupu ton pepu. “Sun mutu neitamai kunung dinin, tengyakan neng cap, lyan nesala cap tep, dumsisipu kunkamrume. Tonda solu nerapudi, sun putan keca gum kuprepa, yuk neng keca ke dopropkamenge tep, sun keca ke karepkumumdi, ‘Tek sisi tamupra ne keca karepkamner’ tenen, solu nerapu sun deiki tara kenengmenge opkal dorona gume. Ato nesala yuma tep nengeda, ‘Gume sun tali neng tep, dakwapye, sun keca upula dopropmepepa, ware nengdi pepsetenge do?’ tenen, sun keca upula dorona gume. Aneng yuma tep nengeda, dumsisi kupra upu bongdinkamrume.

18Tonda tupa tenepkurume. Mesir mutu kuramrum taruda, ikin pel weik dimamseipa, sun nong deiki deipseipa, tali pel don neng kuramrum taruda, sun nai bo Allahdi lyepropseue. Atep nengeda, arup pepmansen upu yuma moupra gekepra, dumsisipu kunkamrume.” Musadi pepu.

19Upepudi aupu ton pepu. “Ton ngeda, sun gandum wa do, jagung wa do, wai kinmamumya, akeca sekmumdi koupra, deiya tapmumdi lupromum ngeda, tamupra dorbana gume. Sun wai dam tapmum ngeda, tali tengyakan neng cap, sun nai yape konum deami nyapu, lyan nyapu cap, solu nerapu cap, aneng yumada, sun keca gum cadi, kankan kunge nesalapu kununga cadi, sun dipu doryankamenge. Ukuprumya deiki, sun nai bo Allahdi, pel yuma dopbarumya tep, melimserepane, yuma teleppu kupkamsere.

20Ange utopu, sundi, ‘Zaitun co du kipkamepe’ tenen, palina dopra aco teru gege pepra bongopmumpane, zaitun co du ton tuai men sakyopda, kange di ton cap, aco teru men gege penkamrume. Menmena taru zaitun co gege pepra popmum pangeda, co du ton men sakyopda, ange yuma tapmumdi, sun kankan kunge nesala tep karenkamrume. Amenda taru anengdi, akeca bulupra doryankamenge. Ada, sun mutu kunung dinin, tali tengyakan neng cap, lyan nesala cap, tonda solu nerapu cap, sun keca gum tep, sun dipu doryankamenge.

21Utopu anggur tapu co du dakroprumdi, tupa akapre ngeda, kange di ton cap men dangkamrume. Akapre ngeda, tapmumpa, sun kankan kunge nesaladi doryankamenge. Ada, sun tali tengyakan neng cap, lyan nesala cap, solu nerapu cap, sun keca gum tep, sun dipu tupa akapmarenge doryankamenge. 22Sun adipapu tupa tenipkurume. Mesir mutu kuramrum taruda, ikin pel dimamseidi, sun nong deiki deipseipa, tali pel don neng kuramrumdi, kange mun kange doupra mambul pel doramrum taruda, sun nai bo Allahdi lyepropseue. Atep nengeda, apepmansen upu yuma moupra gekepra kunkamrume.” Musadi Israel nesala tep, pepu.