Deu 25 | XteSC | STEP | Ware neng do, ton mali kupmengedi derepdangopda, sun yuma upu bongdina ati bengedi, ‘Ware ngebo mali kupmar do?’ tenen, werpetenkamenge. Sun upu bongdina deiyo neng dipu, upu yuma gekepmengedi, “Tek sisi anengda mali kupmanga cadi, wenepra popkamepe. Dinino, anengda mali kuna gum, teleppu kupmanga cadi, loptapkamepe,” pepra, upu bokeipkamenge.

Deuteronomy 25

Mali kupmenge neng wenemna tep, pepu upu

1 Ware neng do, ton mali kupmengedi derepdangopda, sun yuma upu bongdina ati bengedi, ‘Ware ngebo mali kupmar do?’ tenen, werpetenkamenge. Sun upu bongdina deiyo neng dipu, upu yuma gekepmengedi, “Tek sisi anengda mali kupmanga cadi, wenepra popkamepe. Dinino, anengda mali kuna gum, teleppu kupmanga cadi, loptapkamepe,” pepra, upu bokeipkamenge.

2 Wenemna deiyo nengdi, upu gekepra kael kepmenge dingeda, ‘Mali kupmare ngeboda, er mali kupmare keca ila mambula cadi, er tep bongopkamepe,’ tenepmengopda, upu bongdina deiyo ngebodi peiprepa, er dinmareai di, mali kupmare ngebo tuai deiki katuai maprepa, er mali kupmarya utopu, er wenemna tep, er nong deiki balena di bongopkamenge. Ada, metek mali keca kupmenge nengda, meteka dipu bongopkameng dinin, ila mali keca kupmenge neng tep nengeda, weika di bongopkamenge.

3 Ukupkamrum dinin, amali kupmare ngebo tep, denge nukrap 40 dipu, ponkamrume. Ton cap abisipra weika di itamna pona gume. Angeda, sun kabo pio weika di poprumnyopda, ‘Erda pio mali ngebo, nimi utopu gume, tali keca pua,’ tenepruma tep, ukuna meme. Musadi pepu. 4 Upepu dingeda, aupu ton pepu. “Sapi bisam ton jagung du gurungna tep, yaninmare taruda, ‘Jakung jeprur’ tenen, er sipyal ateng koudongona gume.” Musadi pepu.

Depre ngebo tapre ner dona tep, pepu upu

5 Musadi upepu. “Sun weitap duap kikiman kuramenge dinin, sun kabo ton er mi derina gum dipapu depredi, nyapu bung tapre pangeda, anerda yuk yala neng ton men dopkamre. Er pe domre yala nengpu, aner doprap nyapu deipra gwanamkamenge. Adepmare ngebo, er weitap duap kan-kan tenpu ngebodi, er tapmare ner tep, adipapu dopropredi, sun nyapu derinkamrenge. 6 Ukuprengedi nyapu deipbaramyane, anerdi kalenge mi deipyopda, depmare ngebo, er yo pununa tep derinkamre. Deiyoda, anerdi menmena deipre mi, er depmare ngebo si yo punupkamra tepa. Ukupre pangeda, Israel nesala deipgerekdanen banada, adepmare ngebo, er si men gum kupkamra tepa,” Musadi pepu.

7 Upepudi aupu dukdongopra pepu. “Dinino, konum depmare ngebo, er weit do, er du bo do, angebodi, ‘Aner tep men dopkune,’ pepra tapyopda, anerdi akati domengai wisi-wisi neng, sun ati beilya buplan dam bukra, upu bongnungai beredi, yana upepkamre. ‘Ne doamneu ngebo depupane, er tara nengdi tapnenga tep, mi men deiptenepane, ne nenge er si ton, Israel nesala kan-kan men kupkamre. Er tara nengdi men dopkamnenga tepa.’ Anerdi yana upepkamre. 8 Upeprepane, sun deiyo talepra kunge wisi nengdi, ayala neng tep upupmengepa, yange pangeda, sun tonpa aner dodana upu talenkamnunge. Upu konum talepmengepane, adepmare ngebo, er tara nengdi tupa, ‘Aner men dopkamepe,’ pepyopda, anerdi ukupkamre.”

9 “Sun kabo deamre ngebo tamre ner yaredi, Israel nesala, sun wisi-wisi neng, upu bongdina deiyo neng damai yaryopda, ‘Aner men dopkamne,’ pepre ngebo, er kenamrenge yan bol sandal kwiriptaprapredi, angebo er urasin deiki ule tulupra deipkamre. Ukupre dingeda, anerdi upepkamre. ‘Gume, akupmanada, tali tep gume. Ada, ware ngebo do yuma, sun yala neng depmangepane, sun kayapu yo pununa tep, sun tapmenge nerapu men dopmengedi, nyapu ton men deipmengopda, ukupkamepe. Ada sun kayapu yo men punupkamenga tep, kupmange,’ tenenkamrume.

10 Ware ngebo do yuma, sun kayapu depmengedi, tapmange ner men dopredi, nyapu ton men deipyopda, ataru di gonga kepra, dortara yumada, angebo er yala neng deipdanen bankamenge nesala yuma tepangeda, Israel nesaladi, ‘Sunda yan bol kwiripra lortamna yala neng adano,’ pio penkamnunge,” Musadi pepu.

Yuk mali kunange peda, “Ange-ange ukunkamrume,” pepra, deipu upu

11 Nimi butene podanmarengepa, ton ngebodi ton ngebo tep, puto di taleamrepane, ton ngebo men lyepdanmanto kupyopda, angebo er ner yaredi, ‘Lyepkun’ tenepredi, er kange dipapu ‘Puto di talepnepa, pu jepredi, angebodi ne nengeda tapkure’ tenen, er nenge talepmare ngebo tep, er bolop cap, den cap puruptalepyopda, ukupkurume. 12 Angeda, pio mali kuna cadi, ukupre nerda, er buruda sekra tamkamrume. Aner tep, pio bicau tenepmumdi, ‘Dakwapye, er buru men sekupe,’ tenena gume.

13 Tonda, ikin keca kunumpetena tep nengeda, ‘Angeda, ikin do, kanam do, er kiloda ware kuprap do?’ tenen, akeca-keca yala-yala yuma ikin kael kemna tep derirpeterameng kecada, ‘Tali upu pepnepa, weikanun doproptene’ tenen, lukra kipmengedi, ikin dirterena ngeda, ton ngeda ikin nge, ton ngeda kanamnge ketenepra derina gume. Ukuna deiki di tali upu pedana gume. 14 Ange utopu ton, sun ati arum dopruma neitamai di, gandum do, yakung do, tepung do, er ikin kunumpetena keca tep nengeda, weika di kinange cap, meteka dipapu kinange cap, men derinkamrume. Akunumna keca yala-yala yumada, er ikinda tek sisi akwapmaretopu, kunupetepra karenkamrume. 15 ‘Ikinda ware kuprap do?’ tenen, kunumpetenung keca deiki cap, tonda lukra kirameng keca deiki capdi, tek sisingepu kunkamrume. Ukupkamruma deiki di, sun kuna go karepserepa, Allah Yahweh erdi karepseu mutu talepra kunkamrume. 16 Ukunkamruma deiyoda ake. Sun nai bo Allah Yahwehdi, ‘Kunumna tep nengeda, tali-tali minina upu petamnung neng yumada, ‘Ne dabale, anengda, ne songe,’ tenerure.

“Amalek mutu neng yuma popkurume,” pepu upu

17 Mesir mutu di tapra bisi yakaramrum taruda, Amalek yala nengdi sun tep kuamsei ngeda tupa pio tenenapu kunkamrume. 18 Sun nai bo Allah tep kware men tenepidi, sun Amalek mutu nengdi, ‘Sun Israel neng tep amenda domyaseidi poptepe’ tenen, piriamsei. Ada, sun peda nong boun kupra, puto yuma gum kuamseu taru sika di domyaseidi, sun kayapu amenda kange mun deiki di yakarami neng yuma, sun damai yana pomi. 19 Ange tep nengeda, sun nai bo Allah Yahwehdi, sun tep karepkamser mutu neitamai bemumumyopda, sun podan neng dana-dana tara yuma poprumudi, akunkamenga kan-kan kunkamrume dinin, tupa mar men porbenkamrume. Dim peprappu kunkamrume. Atep, tali kange doupra, teleppu kunkamrum taruda, sundi Amalek mutu neng yuma popra, gawal dakamrume.

Ukupkamrum dinin, sun Amalek mutu nengdi sun Israel nesala tep, ‘Sun anengda nundi potamkamepe,’ tenerami ngeda, men lumdongonkamrume. Sun amutu nesala mali weik kurami ngeda, pio tenenapu kunkamrume. Apepsentopu sun cap, sun talenung keca cap yuma gum kupra derinkamrume. Mutu ban-ban yuma kunkameng nesaladi, sun Amalek yala neng tep, tupa men tenenkamenge. Lumdongonapu kunkamenge.