Deuteronomy 26

Weni keca Allah karerbana tep, pepu upu

1Musadi, Israel nesala tep pepu.

Uda, amenda taru, sun nai bo Allah, er si Yahwehdi, ‘Telep mutu karepkamsene,’ pepra, peamseu mutu bemum dingeda, sundi amutu talepra pio kunkamrume. Amutuda, sun mutu sisi kepkamre. Acapu kunkamrume. 2Dakuramumnyane, wa peprumya menmena mouamre ngeda, weni keca yumada, kiprapmumdi Allah tep karerbankamrume. Allahdi karepkamser mutu neitamai koupmumpa, moupkamre weni keca yumada, alen di kipra karepkamrume. Karepkamrumaida, Allah er si Yahwehdi, ‘Acada ne si deipkamne, ne si eremna atida ake,’ pepra, weamudi pepkamseraipu karerbankamrume.

3Allah er si eremna ati talepra pel dona deiyo ngebo, er damai bemumdi upenkamrume. “Allah er sida Yahweh tep pepne, Allahdi ne co puna neng tep, ‘Amutu karepkamsene,’ pepra, sun deiki peramu mutuda, konum karepseupa, ne konum wekmane,” upepkamrume. 4Upeprumpane, Allah er si eremna ati pel dona deiyo ngebodi, sun kipmarum keca, er damai yan karepmum alen doropre dingeda, Allah er si Yahweh, er gispal dona cap, karena cap tep, gel pala taplakra yakra deipyai damaida, deipkamre.

5Ukupre pangeda, sundi Allah damai tep upenkamrume. Pumun taruda, ne co puna ngebo Yakubda, Aram mutu ngebo kuramudi, er mutu sisa men kwapka tep, tenpu mutupu men kuramudi, abenap, orbenap tali embaramu. Embaramnganen, er cap, er nerapu cap, er nyapu cap, er nyapsilip yuma cap, yambulanunpu kuramidi, sun Mesir mutu kwerepra benamidi kurami. Mesir mutu kurami taruda, mambul pel doramidi, tonda tali tengyakan neng utopu dinin, sun nyapu weik deipdanen embaramyane, gung weik kupbaramidi, sun puto ton weik kupbaramupa, yuk mutu nesala yumadi, ‘Uo, anengda mambule,’ teneramidi kael keami. Sun nimi weik kupbaramya tep, ukutaruda nun weik kunupe.

6Ataruda, sun Mesir mutu nesaladi, nun apu yapu tep, pio ikin pel cap, ikin keca cap, weika di sun nong deiki deriramipa, kange mun kange doupra kuramidi, mambul pel weik dimamipa dorami. 7Ukuramyane, kange mun weik kuramya deiki, nun apu yapu si eremamipa, sun tep makuramu Allah tep mororami. Mororamipa, Allahdi, nun co puna neng ikin pel doraminge cap, ali kuraminge cap, kange mun kange doupra kuraminge cap, yuma epudi gekepseu.

8Nun apu yapudi mororamipa, Allah er ila puto deiki di, Mesir mutu neitamai di doupra yakaramseu. Allah er putoda, ila weik kurura tep, erdi kunupsek pen pel cap, nimi men kupmanto keca cap, ila mambul keca kareramunge cap deiki di, aneng yumadi, ‘Uo akeca yumada, tek sisi Yahweh dipu pel donmasere,’ teneramidi, kware weik kupupa, moropsepi. Yahwehdi, nun apu yapu lyepudi, doupra duyaseue.

9Atep nun nai Allah, ukupseu dingeda, nun nai yapu cap, nun cap doupseudi, amutu duyana karepmasere mutuda, akeca-keca yuma, telep keca weike kure mutu konum karepmasere. Ukupmanto ngeda, sapi bisam weik mutu cadi, moum teyung weik karenunge. Tonda, mong me weik kure mutu cadi, weika di jepra kange derinupe. 10Ange tep nengeda, ne nai Allah, kandi karepsemumpa, menmena mouramre keca, weni ngeda kiprapnedi, kan gispal dona tep karepkene. Ange penkamrume. Ange utopu konum upeprum dingeda, duyarum keca Allah tep derinkamrume. Ukuprapmumdi, Allah gispal dona tep, tu gutam dipdongoprapmumdi, er si eremkamrume.

11Ukupmumnya deiki di, sun cap, sun nyapsilip cap yuma, akeca-keca yuma tali yamupra kareserenge yuma tep nengeda, sundi Allah tep, ‘Telepe,’ pepra, er sipu eremrumdi kange derinkamrume. Ukupmum taruda, sun Lewi yala neng cap, sun mutu neitamai tali tengyakan neng yuma cap, Allah er kareramseunge yuma tep, er si eremengedi kange derinkamenge. Musadi Israel nesala tep pepu.

Allahdi tali kareserya tep, bokra kankan kunge nesala karena tep, pepu upu

12Musadi Israel nesala tep pepu.

Amutu kunkamrum taru yumada, keteng tamun denge weneringe konum kepyopda, Allahdi kareserenge yuma bokra, morokyo kepra deipmumdi, tenpunge wilipra, seper sepuluh (10%) bokra, Allah ati pel don neng, Lewi yala neng cap, yuk kankan kunge nesala cap karepkamrume. Tonda, akecapu dinin, sun mutu neitamai kunge dinin, tali tengyakan neng cap, yambul nyapu sun wisi neng deiami nyapu cap, ada lyan nyapu cap, solu nerapu cap tep, bokra karepkamrume. Karepmum pangeda, sun kurum mutu-mutu yuma, kankan kunge nesala putaramretopu jenkamenge. Mesumpu men kunkamenge.

13Kankan nesala tep konum karepmum dingeda, sun nai bo Allah, er si Yahweh damai tep, sundi upenkamrume.

Naio, keteng tamun weneringe deiki, kan gispal dona tep karekenup keca, kan mawa ngeda, nun ati pumbon di dopra, tali kankan kunge nesala tep konum karepmepe. Tonda, kan ati pel don neng Lewi yala neng cap, nun mutu neitamai kunge dinin, tali tengyakan neng cap, yambul nyapu sun nai yapu deiami nyapu cap, solu nerapu cap tep, bokra karepmape. Ton lumdongona gum dipapu, men tapmape ngeda ake. Kandi pepsemumtopu konum kupmape. Atep, kandi, “Ange kunkamrume,” peipsemum upu yumada, konum gekepra kupmape.

14Tonda nun nai Allah, kan tep karenup ngeda, tenpu peda ton, nun kayapu depmangpa, engepra bulupmepu taruda, kan mawange ton men jepmepu. Tonda, nun mali kupmepu taruda, kan damai men wekmanto kupmepu taruda, nundi kan mawa keca dopra men jepmepu. Tonda, ‘Konum derami nesala, sun sambaladi melipkamser’ tenen, kan mawa keca ton dopra, sun tep men karepmepu. Ange yuma gum dinin, kan Yahwehdi, “Angeda ukupkamrume, ukupra kupkamrume,” pepra deiamsemum upu yuma, moupra gekeramepudi, angepu kuramepu.

15Ange tep nengeda, Allah kan mutu im deiki di, pio lek kurem mutu diserumai di, nun tep dirume. Ukupmemdi, kandi wepra deiamsemum nesala, Israel neng tep, ‘Telep kweipsememdi, nun putan keca karenkamserume. Nun mutu telep kupra deipkamserume’ tenen, moropkepe. Ada, kandi nun apu yapu tep, “Ukunkamsene, tonda pio telep mutu, akeca-keca yuma weik kurur mutu karepkamsene,” pepra peiamsemumtopu, ‘Ukutaru nun tep karepkuserem’ tenen, moropkepe. Apepmasentopu upepkamrume. Musadi Israel nesala tep pepu.

Allahdi Israel nesala tep, “Ukunkamsene,” pepra pedina upu deiamunge tep, pepu upu

16Musadi Israel nesala tep pepu.

Atumida nun nai bo Allah, er si Yahwehdi, ‘Ukupkamrume,’ pepra deipsere. Ada, Allahdi peipmanerpa, ne Musadi pepmasen upu yumada, moupra gekepmumdi, angepu dombankamrume. Ada yambula dipu kuna gume. Allahdi peiamseu upu yuma moupra gekepmumdi, sun dipru kange dukdongopra dumsisipu kunkamrume.

17Atumi deiki sundi pepmarumpa, gekepmasene. Ada sundi, “Gume nun nai bo Allahda Yahwehpu kurure. Yuk tali keca yuma tep si men eremkamepe. Allahdi peipseu upu yumada, wenemna upu cap, ‘Angeda kunkamrume, angeda men kunkamrume,’ pepra, erdi peipseunge yumada, moupra gekenkamepe. Allahdi, ‘Abisipu benkamrume, ne tep dombankamnerume,’ peiamseutopu kunkamepe.” Sundi aupu pepmarumpa gekepmasene.

18Upeprum pangeda, Allah konum gekepmaserdi, sun Israel nesala tep, atumi upepmasere. “Uda ne mawa nesalada, Israel nesala pua. Ne nyapu utopu kunkamenge,” pepmasere. Angeda, men di Allah er si Yahweh konum sun deiki peamseutopu kange di pepmasere. Tonda, erdi, “Angeda kunkamrume, angeda ton men kunkamrume,” pepra peiamseu upu yuma, ‘Gekepra kunkamrum’ tenen, pepmasere.

19Sundi er peiamseu upu moupra gekepmumdi, pio kupmumnyopda, sun Israel nesala tep ereipserepa, nimi yumadi, ‘Uo, anengda sun mambul weike. Allah erda pio telepe,’ pepra, Allah er si eremkamenge. Allahdi, nimi yala-yala yuma, weika di ketekepra deiamu dinin, yuk yala nesala ban-ban yumada, yambul mambul kunung dinin, sun Israel nesalada, Allahdi ereipserepa, ila mambul nesala kunkamrume.

Ukunkamrada, tali tep gume. Ada, ‘Israel nesala ne mawa nesala kunkamnenga tep, sun tep wepra deipkamne. Sun si mambul kupkamre. Sun tep, yuk mutu nengdi gispal dopkamenge’ tenen, Allah er si Yahwehdi weiamseue. Ange yumada, Allahdi sun apu yapu tep konum, “Ukunkamne,” pepra peiamutopu kunkamsere. Musadi Israel nesala tep lap pepu.