Deuteronomy 27

Allahdi, “Ange kunkamrume, angeda men kunkamrume,” pena upuda, gel pala deiki di sekeipi upu

1Sun Israel nesala deiyo kepra taleami deiyo neng cap, Musa cap, sun kikiman beidi, Israel nesala yuma bulupra kunmaiyai bei. Beipa, Allahdi pepra deipu upu yumada, Musadi Israel nesala damai bena pepu. Ada, “Atumi nedi sun tep, pepra deipsen upuda, sun yumadi teka tenepra talepmumdi kunkamrume. Tenpunge peda men tamkamrume,” pepu. 2Tonda, sun Israel nesala Yordan me goupra, ortara Allah Yahwehdi sun tep karepseu mutu benkumum tumida, sun adipapu ila-ila gel dopra, agel nong deiki sengna tep, telep gat tu doupra gel deiki palepmumdi, telep kupra betaipkurume.

3Ukupmum dingeda, sun tep kalengrur Allah, er si Yahwehdi, ‘Angeda kunkamrume, angeda pio men kunkamrume,’ pepra, deipu upu yumada, yuk-yuk agel deiki sekeipkurume. Sun co puna neng si eremamipa, sun tep kalengamu Allahdi, telep tu mutu akeca-keca yuma kapu mutu karepsenepa kunkamrume,’ peiamu mutuda, sun konum bemumdi bena kunkamrume. 4Atep nengeda, sundi Yordan me goupra, ortara mutu neitamai konum wekra bemum dingeda, sun adipapu ila mutu buma deiki, er si Ebal mutu damai benkurume. Aceipu, sundi pala weik gel doropra, agel deiki sengna tep, telep gat tu doupra gel deiki palepmumdi, telep kupra ketenepra deipkurume. Ada, nedi sun tep,’ atumi di peipsentopu, amutu bemum taruda, ketenepra bena deipkurume. 5Amutuda adipapu sun nai bo Allah Yahweh, er si eremna tep, uku dongomnai betaipkurume. Ange betaimna tep nengeda, besi keca ya di men paupmange gel dipapu dopra duyamumdi, betapra deipkamrume.

6Deiyoda, sun nai bo Allah Yahweh, er si eremna tep keca, gam keca popnedi, uku dongomnaida, ila pala gel dipapu doropra, yamumdi betaipkurume. Dinino, agel er urasin telep betamna tep nengeda, besi keca ya di men betaipkamrume. Yapi keca popra uku dongomnai konum betapra deipmum dingeda, adeikipu sun nai bo Allah, er si Yahweh eremna tep, yana uku dongomyakankamrume. 7Tonda, ‘Nun cap, Allah cap, antapmepedi, telep kupra kikimanpu kunkamep’ tenen, antamdina tep keca ton, doupra kareryakankamrume. Adoupra kareryamum ngeda, meneng damai adipapu ajen kecada jemumdi, sun kange telep deiki di, mut pepra, ‘Telepe,’ pepraprumudi, sun nai bo Allah Yahweh er damai kunkamrume. 8Sengna tep gel ketenepra deiprumnya deikida, Allahdi sun tep, “Angeda ukunkamrume, angeda pio men kunkamrume,’ pepra deipseu upuda, telep kupra jeneka di agel nong deiki di sengdinkamrume.

9Musa cap, Israel sun deiyo talepra kurami neng capdi, aupu konum pepyopda, aupu ton dukdongoprap pepi. Aupu pepi nengda, Musa cap, tonda Allah er si eremna tep dodina ati neitamai pel dona neng, sun Lewi yala neng dinin, imam pel talepra dorami neng capdi, sun Israel yala nesala yuma tep bena pepi. “Nun kayapu, sundi upu pena gum dipapu, moupra gekemumdi, betapra kael kepkurume. Atumi deiki di, sundi si eremrum Allah, er si Yahweh, er nyapu sisa utopu konum keipmasera tep, sun pe upu ton men penkamrume. 10Ange tep nengeda, atumi sun nai bo Allah, er si Yahweh erdi, ‘Angeda kunkamrume, angeda pio men kunkamrume,’ tonda, ‘Telep kunada ake,’ pepra deipseu upu yuma, nedi doupra sun damai konum peipmasen upuda, moupra gekeprumudi, teka tenepmumnyopda, apepra deipseutopu kupra kunkamrume.

“Allahdi pepra deipu upu men gekepra kunge nesalada, kange mun keca doronkamenge,” pepu upu

11Atumi neitamai dipapu Musadi sun Israel nesala tep aupu pepu.

12Yordan me goupra ortara konum bemumdi dingeda, apepkusen deiyo nengda, ne cap, sun cap, ila mutu dup, er sida Gerizim, itara tekmepedi, sun Israel yala nesala yuma tep nengeda, “Nun nai bo Allahdi sun Israel nesala tep, telep kweipkamserum’ tenen, moropkepe,” pepra, telep upu pepmepe dingeda, sun deiki deipkamsepe. Ne cap tekameng nengda ake. Ada, Simeon yala neng cap, Lewi yala neng cap, Yehuda yala neng cap, tonda Isakar yala neng cap, Yusuf yala neng cap, Benjamin yala neng cap, sun yumada adipapu Gerizim mutu deiki bena tekmepedi, amutu kunkamrum nesala yuma tep, ‘Telep-telep kunkamrum’ tenen, telep upu pepra sun deiki deipkamepe.

13Ange utopu ton, sun Israel mutu neitamai kurumu nesaladi, Allah er upu yanipmumdi, mali-mali kupmumnyopda, sun nai bo Allahdi sun wenemna tep, ila kange mun keca sun nong deiki deipkamser kecada, yuk upu ton pepkamenge. Apepkusen yala nengda, ortara mutu, er si Ebal mutu, aila mutu dup deiki tekameng yala nengda ake. Ada, Ruben yala neng cap, Gad yala neng cap, Asyer yala neng cap, Zebulon yala neng cap, Dan yala neng cap, Naftali yala neng cap, aneng yumada, Ebal mutu deiki bena tekmengepa, Allahdi wenemna upu ton peprepa, gekenkamenge. Ada, sun Israel yala nesaladi, Allah er upu yaniptaprumudi, mali-mali kupmumnyopda, Allahdi wimna upu pepra derinkamserenge tep, pepmepepa gekenkamenge.

14Ayala neng yuma ketenepra tekmengopda, sun Lewi yala neng dipapu, upu ila di jenekai pepmengepa, sun Israel yala nesala yuma gekeprumudi, sundi tamupra, ‘Tek sisi pepmaruma cadi, angepu kunkamepe,’ pepra penkamrume. 15Atep nengeda, sun Lewi yala nesaladi, pepkameng ngeda, ake. “Allah er si Yahwehdi tali keca si eremnada, pio mali weik cadi, angeda ne songe. ‘Angeda pio mali,’ tenenun keca tep tenepra, petupra derina tep, gel cap, co cap, tonda logam cap deiki di petupra deipmengedi, inipra si eremnung nesala tep nengeda, Allah Yahwehdi anesala tep, ila kange mun keca, sun nong deiki deipkamre. Atep, sun Lewi yala nengdi, mali kuna kecapu yaserepa doronkamrume. Allah pepserya deiki di, ikin keca sun damai pio akunkamsere,” pepra, upu deiki di widongonkamsenge. Aupu Israel nesala yuma gekepmengedi, teka tenepmengedi, sundi tamupra, “Dyo, tek sisi pepmaseruma tep, amin pepmepe,” pepra pepkamenge.

16Tonda, “Ware neng do yuma, sun wisi nesala tep, bicau men tenepmengedi, aneng tep gispal dona gum dipapu, tapmengepa, tali kan-kanpu kuramengopda, atamenga menengda, Allahdi kareprepa, aneng sun nyapu damai ikin keca yarepa, doronkamenge. Adeiki di depkamenge,” pepra, upu deiki di wimna upu penkamenge. Aupuda, sun Israel nesala yuma gekeprumu dingeda, sundi tamupra penkamrum upuda ake. “Dyo, tek sisi pepmaseruma tep, nundi, “Angepu upkupkamre’ tenen, ‘Amin,’ pepmepe, pepkamrume.

17Tonda “Ware neng do yuma, tenpu ngebo er kabo peamre wa tep, ‘Awa tuda, sirikai acei’ tenen, gel deriramenge ngeda, ton cap gisikra bena yukai deipre ngebo tep nengeda, “Allahdi kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamenge. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, “Angepu upkupkamre’ tenen, ‘Amin,’ pepmepe, pepkamrume. 18Tonda, asuru puamre ngebo tep, ‘Saka poptu’ tenen, mali bisi peteremna ngeboda, mali kuna kecada, er angebo deiki kunkamre. Ada, mali bisi pepre ngebo tep nengeda, “Allahdi kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamenge. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, “Angepu upkupkamre’ tenen, ‘Amin,’ pepmepe, pepkamrume.

19Tonda, Ware ngebo do yuma, nimi bo neng cap, tonda yambul wein nesala cap, solu nerapu cap, sun keca upula doropre ngebo cap, upu lepsisikra bongdina taruda, deiyo men kwapmarepapu, mali upu peptapre ngebo capda, “Telep men kunkamre,” pepra, wimna upu pepkamrume. Ada, angebo tep nengeda, “Allahdi ikin keca kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin,’ pepmepe,” penkamrume. 20Tonda, ware ngebo do yuma, tenpu ngebo, er mi sisadi er nai bo domre ner, er cap kikiman maprenge ngeboda, erdi er nai bo tep tulum tenepredi, pio mali kweiprur ngebo cadi, “Erda telep men kunkamre,” pepra, upu deiki di wimna upu peipkamrume. Ada, angebo tep nengeda, “Allahdi kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin,’ pepmepe,” pepkamrume.

21Tonda, ware ngebo do yuma, tenpu ngebo, tali gam kunung keca cap kikiman mapre ngeboda, telep men kunkamre. Ada, angebo tep nengeda, “Allahdi ikin keca kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin,’ pepmepe,” penkamrume.

22Tonda, ware ngebo do yuma, tenpu ngebo, er mal ner sisa do? Tonda, er nai bo er mal ner do? Uda, er nin er weit ner do? Er du ner do, aner cappu kikiman mapre ngeboda, “Telep men kunkamre,” pepra, upu deiki di wimna upu peipkamrume. Ada, angebo tep nengeda, “Allahdi ikin keca kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin, pepmepe,” pepkamrume. 23Tonda, er yamal ner cap kikiman maprenge ngeboda, “Telep men kunkamre,” pepra, upu deiki di wimna upu peipkamrume. Ada, angebo tep nengeda, “Allahdi ikin keca kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin,’ pepmepe,” penkamrume.

24Tonda, ware ngebo do yuma, tenpu ngebodi, er damai kunge neng tep, nimi ton inipra poptapre ngeboda, ‘Erda telep men kunkamre,’ pepra, upu deiki di wimna upu peipmengepa, er depkamre. Ada, angebo tep nengeda, “Allahdi ikin keca kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin,’ pepmepe,” penkamrume. 25Tonda, ware ngebo do yuma, tenpu ngebodi, mali men kupmare ngebo cadi, deiyo men kwapmarepapu, er kabo yuk ngebodi yu kuprepa, bul kalengna keca doropra karepredi, ‘Poipnerume,’ peprepa, aupu gekepredi popre pangeda, aupu pepmaredi bul keca karepmare ngeboda, ‘Erda telep men kunkamre,’ pepra, upu deiki di wimna upu peipkamrume. Ada, angebo tep nengeda, “Allahdi ikin keca kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin,’ pepmepe,” penkamrume.

26Tonda, ware nesala do yuma, Allahdi, “Angeda kunkamrume, angeda pio men kunkamrume,” pepra, deipu upu yanipre ngebo cap, tonda Allah erdi pepra deiputopu men kupre ngebo capda, sun Lewi yala nengdi, ‘Sunda dumsisi telep men kunkamre,” pepra upu deiki di wimna upu peipkamrume. Ada, angebo tep nengeda, “Allahdi ikin keca kareprepa, angebo er damai ikin keca yarepa, doronkamrure. Adeiki di depkamre,” pepra, upu deiki di wimna upu penkamrume. Aupuda, sun Israel nesala yuma gekeprumu dingeda, sundi tamupra penkamrume. “Dyo, tek sisi pepmaseruma tep, nundi, ‘Angepu upkupkamre’ tenen, ‘Amin,’ pepmepe,” penkamrume.