Deu 28 | XteSC | STEP | Musadi sun Israel nesala yuma tep upepu. Sun Israel nesalada, sundi si eremrum Allah, er si Yahweh, er tepapu puto di talepmumdi, erdi, “Ange-ange yumada kunkamrume, angeda pio men kunkamrume,” pepra, deipu upu moupra gekeprumudi kunkamrume. Atep nengeda, atumi nedi sun gekenai lap pepra deipsen upupu, moupra talepmumdi, angepu tek sisi kumum pangeda, sun si eremrum Allah, er si Yahwehdi, sun erepra deipserepa, mutu ban-ban yuma kunung nesaladi, sun si kael kepsengedi, gispal donkamsenge. Sunda, yuk mutu nesala yumada, sun deiki tara kunkamrume. Sun yuk mutu kunge nesalada, sun amutarapu kunkamenge.

Deuteronomy 28

“Allahdi pepra deipu upu, moupra talepmengedi kunkameng nesalada, teleppu kunkamenge,” pepu upu

1 Musadi sun Israel nesala yuma tep upepu.

Sun Israel nesalada, sundi si eremrum Allah, er si Yahweh, er tepapu puto di talepmumdi, erdi, “Ange-ange yumada kunkamrume, angeda pio men kunkamrume,” pepra, deipu upu moupra gekeprumudi kunkamrume. Atep nengeda, atumi nedi sun gekenai lap pepra deipsen upupu, moupra talepmumdi, angepu tek sisi kumum pangeda, sun si eremrum Allah, er si Yahwehdi, sun erepra deipserepa, mutu ban-ban yuma kunung nesaladi, sun si kael kepsengedi, gispal donkamsenge. Sunda, yuk mutu nesala yumada, sun deiki tara kunkamrume. Sun yuk mutu kunge nesalada, sun amutarapu kunkamenge. 2 Sun nai bo Allah Yahweh er upupu moupra talepmumdi kunkamrume. Erpu talepmumdi, kumum pangeda, pio telep keca yala-yala yumada, palupra karenkamsere. 3 Ukupsere pangeda, sundi ila ati arum dopra kunkamrumai yuma cap, tonda sun wa penai yuma cap, bena kunkamrumai cap yumada, er dipapu talepseredi, telep kupra derinkamsere.

4 Tonda, Allahdi telep kweipserepa, sun nong peda telep kupra deipserepa, sundi deipmumpa, deipdanen bankameng nesala yumada, weik kunkamenge. Tonda, tu deiki di pepra koun keca yala-yala yumada, nongpu kunkamsere. Ange utopu, sun kambing bisam cap, domba bisam cap, sapi bisam cap, uda sun peirum ayam ma cap, yuk yala ma cap yuma peda, palupra karepserepa weik kunkamsere. 5 Allah erdi palupra kareserepa, sun gandum du dakmumnge peda, weik kunkamsere. Tonda gandum du taikrumudi, ange cap, yuk roti dana deiyo keca cap, tapakra dapkamrum jena peda, weika dipapu kunkamsere. 6 Tonda, Allah erdi palupra kareserepa, sundi sun ati tapra bura bana do, yuk mutu embana do, telep kupra kalekserepa, teleppu kunkamrume. Ange utopu, yuk mutu dakunmarumyanen, amenda taru sun pe ati tamupra yankamrum taruda, telep kupra kalekserepa, teleppu kunkamrume. Dan cei do yuma, sun kunkamrumai cap, embankamrumai capda, Allah dipapu melipserepa teleppu kunkamrume.

7 Tonda, Allah erdi telep kupra melimserepa, sun pon nesaladi, ‘Sun tep poptepe’ tenen, mar poryakankameng dinin, Allah er dipapu sun podandam neng yumada popbisipkamre. Sun pon nengdi sun tep, ‘Ukupra-ukupra bepedi popkamape,’ tenepmengedi, tenpu bisi deiki di yana popetepkamseng dinin, Allah erdi melipseredi, er puto karepserepa, sun anengda ila kware kuprepa, sun damai di tapra sepdaro, yuk-yuk bisi weik, yoneitam bisi deiki di, sepdaro bendopkamenge. Ada, kange mun kange doupmengedi, ‘Uo, ware kuptepe do?’ tenen, telep kupra men tenipmanto kupmengopda, sun kange boktoprepa, dana-dana tara sepdaro bendopkamenge. 8 Sun nai bo Allah dipapu, sun pel donkamrumnge yumada, yamupra kareseredi, telep kupra derinkamsere. Tonda, sun jen keca gandum du dakra, jena ati neitamai bena deipkamrumnge peda, adipapu dekpenkamsere. Tonda, Allah erdi sun tep yamupra kareserepa, sundi, ‘Ange kupkamepe, ange pel don dopetepkamepe,’ tenepra, pel donkamrum taruda, erdi melimserepa, akeca yumada, telep kupra deipserepa, teleppu kunkamrure.

9 Allah Yahweh er tepapu puto di talepmumdi, er Allah Yahwehdi, “Angeda, kunkamrume, angeda pio men kunkamrume,” pepra, deipu upu gekepra kunkamrume. Ukupmumnya deiki di, sun si eremrum Allah Yahwehdi, ‘Anesalada, ne mawange kunkamnunga cadi, sun tep wepra deipnedi, pio makunkamsene,’ pepra, pedina upu deiki di, peipseunge utopu, sunda Allah er nyapu sisa kunkamrume. Atep, Allahdi pedina upu deiki di peiamseu utopu, pio teleppu kunkamrume. 10 Ukupra kumum pangeda, ware mutu nesala do yuma, yuk-yuk mutu, dana-dana taru kunung nesala yumadi, sun tep epra kael kepsengedi, ‘Uo, tek sisi Israel nesala, sunda Allah Yahweh, er pedi wepra deipu nesala kununge. Er nyapu sisa kununge, er sipu eremnunge’ tenen, kwar kunkamre. Atep, sun Israel nesala tep nengeda, pio gispal donkamsenge. 11 Allah Yahweh, erdi sun melipseredi, akeca-keca yuma teleppu kunkamsere. Tenpu ngeda, sundi tali lupra nyapu weika di kareserepa, weik kupbankamenge. Tonda, sundi talepra peinkamrum keca yala-yala yuma peda, weika di deipmengepa, dadeipdanen bange pangeda, pio weik kunkamsere. Tonda, sun co puna neng tep, Allah er pedi pedina upu peiamngada, “Nedi sun Israel nesala tep, karepkamsen mutuda, akeca-keca weik mutu karepkamsene,” pepra deiamutopu kupra, sun amutu kumumdi, tu deiki wa pepra koupkamrum keca yala-yala yuma peda, nongpu kuprepa, weika di kunkamsere.

12 Allah Yahweh er dipapu mo ketenepra im neitamai deipka cadi, sun mutu mo cemna li kepre pangeda, Allahdi karepredi, mo dokoteprepa cemkamre. Adeiki di sun pel donkamrum keca yala-yala yumada, teleppu kunkamsere. Ukupsere pangeda sundi kunkamrum keca cap, talenkamrum keca capda, pio weika di kunkamrura cadi, keana taru tep, yuk mutu neng tep karenkamrume. Sundi yuk mutu neng tep, karenada telepe pua. Dinino, sundi yuk nesala tep, “Nun tep, sun telerum keca ton, keana taru tep, karepseso,” penada pio men penkamrume. Ukunada mali tepa. 13 Sun nai bo Allahdi, nimi deiyo neng kepra deipserepa, nimi yala-yala yuk-yuk kuramenga neitamai talepra kunkamrume. Atep, sunda yuk neng tep, melimna neng kunkamruma guma. Sunda deiki tara, ila deiyo talepra kunkamrume. Yuk nesalada, sun amutara kunkamnunge. Atep nengeda, sun adipapu Allahdi, “Angeda kunkamrume, angeda pio men kunkamrume,” pepra deipseunge, atumi di pepsen upuda, moupra talepmumdi pio dombanapu kumum pangeda, sun kunkamrum mutu yumada, pio telep deikipu kunkamrume. Ton gopra yukai men benkamrume. 14 Tonda, sun akunkamruma neitamai di, Allahdi, “Ukupra kunkamrume, angeda men kunkamrume,” pepra deipu upuda, ware keca kupserya peda, men tamkamrume. Tonda tali keca tep, ‘Nun nai ake’ tenen, akeca si eremna cap, pel dona cap, pio men kunkamrume. Musadi sun Israel nesala yuma tep pepu.

“Allahdi peipu upu yanipmenge nesalada, ikin keca doronkamenge,” pepu upu

15 Dinino, sun nai bo Allah, Yahweh erdi “Angeda kunkamrume, angeda pio men kunkamrume,” pepra deipseunge, atumi di pepsen upuda, sun adipapu moupra men talepmumdi, pio dombanapu men kumum pangeda, sun kunkamrum mutu yumada, pio ikin weik kunkamrume. Atumi nedi sun damai lap pepsen nge, teka tenepra men talepmumnyopda, sun damaida, ikin weik keca yarepa, doropmumdi kange mun kunkamsere. Kange mun kunkamsere ngeda, ake. 16 Sundi ila ati arum dopra kunkamrumai yuma cap, tonda sun wa penai yuma cap, bena kunkamrumai cap yumada, er dipapu ikin weik keca kareprepa, doropmumdi kange mun kunkamsere. 17 Allah erdi palupra kareserepa, sun gandum du dakmumnge peda, metekanunpu kunkamsere. Tonda gandum du taikrumudi, ange cap, yuk roti dana deiyo keca cap, tapakra dapkamrum jena tep nengeda, Allah er dipapu ikin-ikin keca kareprepa, doropmumdi, kange mun kunkamsere. Atep nengeda, sun roti bun ketenemrumai cap, roti daprumudi, dopra derirum keca, er si keranjang capda, tali gopu kupkamre.

18 Tonda, Allahdi sun tep, mali kweipserepa, sun nong peda malipu kupra deipserepa, sundi deipmumpa deipdanen bankameng nesala yumada, metekanunpu kunkamenge. Tonda tuai di pepra, koun keca yala-yala yumada, nongda metekanunpu kunkamsere. Ange utopu, sun kambing bisam cap, domba bisam cap, sapi bisam cap, uda sun peimum ayam ma cap, yuk yala ma cap yuma peda, Allah er dipapu ikin keca kareprepa, doropmumdi kange mun kunkamsere. 19 Tonda, Allah erdi ikin keca weik kareserepa, sundi sun ati tapra bura bana do, yuk mutu embana do, men kalekserepa, ikinpu kunkamrume. Ange utopu, yuk mutu dakuramrumnyanen, amenda taru sun pe ati tamupra yankamrum taruda, men kalekserepa, ikin dipapu tamupra yankamrume. Dan cei do yuma, sun kunkamrumai cap, embankamrumai capda, Allah er dipapu ikin weik keca kareprepa, doropmumdi, kange mun kunkamsere.

20 Sundi er upu moupra men talepmumdi, ange yanipra men dombamumnyopda, sunda mali kuna kecapu kumumdi, sun nai bo Allah tep, “Nun songe,” pepra tapmumnyopda, sun damaida, dumsisi telep kuna deiyo keca ton men kunkamsere. Ukupseredi, sun damaida, kange mun kuna deiyo kecapu talepra kumumpa, ikin kecapu yakankamsere. Ada, ‘Uo ware kuptepe do’ tenen, kware weik kunkamrume. Tonda, ware pel don keca do yuma, ‘Angeda kupkupe’ tenen, apel-apel yuma piripetepmumpa, men kupmanto kupyopda, kange tenimtonapu kunkamrume. Tonda, sun gam kuna tep, goda weik men kepra derinkamsere. Adeiki di, sun yumada gum kupra deipkamsere. Yu nengdi, sun yuma tep poptapra gawal dakamenga tepa. Ange yuma kupkamserenge deiyoda, sun pua. Ada, sundi ne tep, ‘Nun songe’ tenen, konum yaniptapmaneruma tep pepsene. 21 Sun kunkamrumaida, ila kange mun pu jena yala-yala yuma, deiyo tupa-tupa yarepa, dororumudi, ikin weik deikipu kunkamrume. Ukuramrumnya deiki dipapu, sundi, ‘Amutu dopropkupe, acapu kunkamepe’ tenen, wekronkurum mutu neitamaida, dedonkamrume. Adeiki di tenpu ngebo peda, sun kunkamrum mutu neitamai di, ton gam men kunkamre. Apu jenkamsera deiki di, sun yumada dedonapu kunkamrume.

22 Allah Yahwehdi sun wenemna tep, kange mun pu deiyo keca sun damai deipserepa, pio tep benepdanen bankamrume. Adeiki di, amali kuna keca peda, nong kupbankamre. Tonda, apu jerepa benepdanen banange karepkamsere angeda ake. Nong bol deiki nena cap, nong yuma bol mali kuna cap, tonda talena pu cap, nong bupu kuna cap, pu yala weika di karepkamsere. Tonda sun kounkamrum keca yumada, koluna keca deiyo kareprepa, koludonkamsere. Utopu ila puto kumanya karepserepa, sun koun keca yala yuma dalupra tamkamsere. Aikin weik keca sun damai yakaramrepa, doronkamruma deiki di, sun yumada, depbaramumyanen, gum kupra deipkamsere. 23 Ataru yumada, Allahdi sun wenemna tep, mo yambul peda ton men karepserepa, men cemkamsere. Ukupsere pangeda, sun kunkamrum mutu tu neitamai yumada, gelal sepkamre. Adeiki di tuda besi gat keca gatamamre utopu kupkamsere. Pio gelal sepkamra tep, koun keca yumada men parapmanto kupkamre. 24 Ange utopu, Allah Yahwehdi im deiki di mo kareserurtopu kupra, ton men karepkamsere. Ange gum dinin, sun kunkamrum mutu neitamaida, tu kalkal pepredi, bute kuramrenge karepserepa, im deiki di sun deiki sakyopda, sun yumada gum kupropkamrume.

25 Tonda, sun nai bo Allah Yahwehdi pepra deipu upu men gekepmumdi, tapmum pangeda, erdi sun tapserepa, sun pona tep nesala yangedi popbisipkamsenge. Ukupsengepa, sundi sun podan neng tep, ‘Popbisiptepe’ tenen, moupra betapmumdi, tenpu bisi deiki di kalekra benkamrum dinino, sun podandam neng dipapu yangedi popbisipsengepa, kware weik kupserepa, sepra yuk-yuk yoneitam bari bisi deiki di bendopkamrume. Ukupmum pangeda, sun mutu dana-dana tara kunung nesaladi, sun mali kumum keca epsengedi, ‘Uo, angeda tek sisi sunda mali kuramya deiki dia’ tenen, sun kange dipapu sun pe mali kuramya deiki di kupya,’ tenenkamsenge. 26 Sun popkamseng nengdi, sun Israel nesala poptapsengedi, bisipsengopda, sun depmum taruda, sun nong yumada, ma yala-yala cap, bura tara neitamai kure mali gam kuna keca cap yuma, yangedi sun jen keca kepkamsenge. Tonda, amali gam keca di, sun nong yana jenkamseng taruda, yuk nengdi, akeca tep ton men yana enepkotepkamenge.

27 Tonda, Allah Yahwehdi, pumun taru Mesir mutu nesala, sun wenemna tep, sun nong deiki kareamupa, toro deriramutopu, sun peda utopu kupkamsere. Tonda, sun nong bol deikida, kot susu cap, dipapu amupkamsere. Utopu tonda, nong bol deiki yumada, giring danapu karepkamsere. Ukupkamser taruda, asusu kwetepra derina tep obat ton jekamruma peda, pio men kwetepkamsere. 28 Tonda, Allah Yahwehdi sun deikida, mutana talen keca karepkamsere. Tonda, asuru puna karepkamsere. Ukupserya deiki di, akeca yuma betapra men epmanto kunkamrume, Men epmumdi, men kael kepkamrume. Tupa wang-wang pena cap, walwal kuna cappu kunkamsere. 29 Ukupserya deiki di, ila keteng komuni kepmarya peda, sundi akeca betapra men epmumdi, asuru puna nengdi komdaramenga utopu kunkamrume. Adeiki di, sun bana tep bisida men dinkamrume. Tonda, sundi pel donkamrum keca yumada, nong men kemkamsere. Gum kudonkamsere. Sun yuk nengdi, sun keca yuma ton ataru-ataru yumada, pio dalum donkamsenge. Ukupsenge taruda, yuk nengdi sun tep men melipkamsenge.

30 Sun nai bo Allah, erdi pepra deipseu upu tep, teka men tenepmumnya deiki di, apepmasen ikin keca yumada, sun damai yarepa doronkamrume. Sun mun peramum ner tep, ‘Dopkup’ tenepmum tarupu, amun peramum ner, yuk nengdi dalupra dopmengedi, kikiman mankamenge. Tonda, sun ati dopkamrum dinin, adopmum ati men kunkamrume. Tonda, sun anggur du wa pepra koupkamrum dinin, er nongda, sun pe neng men kipra jenkamrume. 31 Tonda, sun pe peiramrum sapi bisam, sun pe damai di popkameng dinin, er nong galemna ton men karepkamsenge. Tonda, sun keledai bisam yumada, sun pe asuru dinmamumnyai dipapu, yuk nengdi gerekdaro bankamseng dinin, tamupra men duyankamsenge. Tonda, sun domba bisam yuma peda, sun podan neng damaipu karepkamsenge. Ukupkamseng nge yumada, yuk nengdi epmengedi, ‘Bicau’ tenen, men melimyankamsenge. 32 Sundi deipkamrum nyapu yuma peda, sun pe dinmamumnyai dipapu dopra, nimi bo neng mutu melipra pel dona tep, karepmengepa dubenkamnunge. Ukupmengepa, atumi-atumi yumada, sun nyapu tep, ‘Eptepe’ tenen, enmamumpa, asuru pu jenkamsere. Ukupra pio enkamrum dinin, sun nyapuda men epkamrume. Tonda, sun damai tamupra men yankamsenge. Talipu enkamrume.

33 Tonda, sun pe deipra, pel dopmumdi, tu deiki koupkamrum keca yumada, sun men kael keamrum neng, yuk mutu di yakan neng, nimi bo neng yangedi yana sun wa tu yuma doropropkamsenge. Dinin, sun pe nengda, ton men doropkamrume. Tonda, yuk nengdi yu kuprepa, sun damai tupa-tupa ikin keca derinkamsenge. Sun tep, porbisinapu kunkamsenge. 34 Ange yuma ukupsenga deiki di, mutana neng utopu kunkamrume. Mutana talenkamsere. Deiyoda, sun damai ikin weik keca yarepa, doronkamruma deiki di kunkamsere.

35 Tonda, sun si eremrum Allah Yahwehdi sun yan yumada, toro utopu susu karepserepa, pu jenkamsere. Apu jenkamser ngeda men kwetepmantonge cadi, men gum kupkamsere. Tupa pu jenapu kunkamsere. Tonda, sun toro susu pu talepkamserada, yan bulbul dipra, giso potong yumada, apu dipapu jenkamsere. Men gum kupkamsere. 36 Sun cap, sun deiyo ngebo capda, Allah Yahwehdi doupra, yuk mutu nesala kunungai ada, sun walwal mutu, tonda, sun co puna neng peda, sun kael kemna gum mutu dubenkamsere. Ukupserepa, amutu neitamai bena kumumdi, amutu nesala sundi gel cap, co cap doropra, nimi urasin utopu kupra, ‘Nun nai ake’ tenen, betamidi tali si eremami keca, si erepra kunkamrume. 37 Allah Yahehdi sun doupra bena deipserepa, kunkamrum mutu neitamaida, sun dana-dana tara kunge neng, yuk-yuk mutu nengdi, sun epsengedi, kware pio weik kunkamre. Tonda, Allah erdi wilipra tali-tali keipserepa, sun yuk nesaladi autusengedi, nalemkamsenge. Ton ngeda, ‘Uo, ange ton kupserur’ tenen, kwar-kwar kupra kunkamenge. Sun ikin weik kupkamser ngeda, upu talepmengedi, yuk mutu neng tep nungkamnunge.

38 Sun nai bo Allah, erdi pepra deipseu upu tep, teka men tenepmumdi, men talepra kupmumnyopda, adeiki di, ikin keca weika di, sun damai yarepa, doronkamrume. Ada, sun wa pepra yal keca weika di bolongkamrum dinin, nongda yambulpu doronkamrume. Deiyoda, sun wa pepra koupkamrum keca yumada, sul podi jenkamsera deiki di, gum kunkamsere. 39 Sun wa peamrumnyaida, anggur du bolokmumdi kalengkamrum dinin, du men dangkamrume. Utopu anggur me peda, men jenkamrume. Deiyoda, anggur co yumada, bulbula di jepra gawal dangkamre. 40 Tonda, sun kunkamrum mutu neitamai yumada, Zaitun du mouramre coda, weik tengkamre dinin, du yumada, aco dupai dipapu lyupra sangkamre. Ukunapu kurepa, sundi zaitun minyak me men doronkamrume. Atep nengeda, ‘Mambul pel donkameng’ tenen, nimi dingna tep, zaitun minyak me gwepra, sun giso deiki men dikra derinkamrume.

41 Tonda, sundi sal nyapu cap, ner nyapu cap deipkamrum dinin, sun pon nengdi yana popropsengedi, sun nyapu yumada, dalupra doropsengedi, sun pe karen mutu neitamai dubena, wenemna ati derirbengepa, sun yumada nyapu men deiamenge neng utopu kupra kunkamrume. 42 Tonda, co du, jen co yala yuma koupkamrum nge cap, koun keca yala yuma koupkamrum nge cap yumada, co bo jen keca di jedonkamre utopu, jen keca sengna di sengdonkamre. 43 Yuk karen mutu yange, nimi bo neng sun kan-kan kunung nengdi talepsengedi, ton cap puto di talenkamsenge. Ukupsenga deiki di, sun anengda, ila deiyo neng kunkamnunge. Dinin, sun putoda, yambul kepra deipkamsenge.

44 Ukupkameng taruda, sun anengda co bo weik kupkamre cadi, “Sundi nun Israel neng tep keana co bo ton karepseso,” pepra moropmumpa, sundi karenkamseng dinin, akarepkamsenge ngeda, sundi tamupra karenada men karenkamrume. Tonda, sundi animi bo neng tep, keana taru tep, co bo ton men karenkamrume. Deiyoda, sunda akeca-keca pe gum neng cadi, adoropmamumnge yo pununada, doropra karepmanto ngeda, men kwapkamser atepa. Ukupserya deiki di, sun yumada, sun aneng dipapu talenkamsenge. Sun nai bo Allah, erdi pepra deipseu upu tep, teka men tenepmumnya deiki di, apepmasen ikin keca yumada, sun damai yarepa doronkamrume.

45 Ukuprumnya deiki di, tupa-tupa ikin keca sun deiki yarepa, doropmumnya deiki di, sun yuma gum kupropkamsere. Deiyoda, sun nai bo Allah Yahwehdi, “Ange kunkamrume, angeda pio men kunkamrume,” pepra deipseu upu cap, “Telep kunada, ake,” pepra, deipseu upu capda, tapruma tepa. Tonda, erdi pepra deipseu upu men gekepra kuruma tep wenepkamsere. 46 Kange mun kange kun keca, sun damai tupa-tupa yakankamsera deiyoda, sun pe mali kunkamruma menengada, Allahdi sun deiki derinkamsere. Tonda, ada sundi deipmumpa, deipdanen bankameng neng yumada, pio tep angepu doronkamrume. Aikin keca kupseryopda, sundi, ‘E, tek sisi nun yumada, nun nai Allah, er upu yaninapu kuramupka cadi, akuramupka deiki di, aikin kecada, petenkemna keca utopu tep, tupa-tupa yakankamsere’ tenen, kael kepkamrume.

47 Sun nai bo Allah Yahweh, er dipapu sun kun kecada, ware yala nge yumada, konum meliamseudi, telep kupra, pio weika di telep keca deiamseue. Dinino, sundi er tep, ‘Nun nai telepe,’ pepra, kange derina dipapu, erdi pepra deiamaseu upu yumada, sun telep kange doupra, dipru amutara kepra, men talepra kunkamruma tep, erdi menenga keca karenkamserure. 48 Atep nengeda, Allah Yahweh erdi sun pon neng doproiprepa, sun poryankamseng nengdi, sundi popbisipsengedi, sun talepsengepa, sun aneng amutara kumumdi, sun pelpu tali donkamrume. Adeiki di, sunda jena cap, me cap, putanapu kuramserepapu kunkamrume. Tonda, sun kenengna opkal gum kuprepa, nong bana kupserepapu kunkamrume. Ange utopu, sunda akeca yala-yala yumada, gum deikipu kunkamrume. Allah er yu kuprepa, adipapu sun wenemna tep, ikin keca sun nong deiki deipserepa, kange mun kange doupra kuramumnyanen, gum kupbankamsere. Ukupmanto ngeda, mali kupmenge neng tep, rantai tapu di ateng koupmengepa, wenemna ati pumbon dongoramengtopu, ikin keca pio weik sun deiki derinkamsere.

49 Ukupkamsera tep, Allah Yahweh, er dipapu sun upu gekena gum neng, yuk karen mutu dakunung neng, mutu ban-ban yuma kunun muru siryai dadi dopra deiprepa, sun poryakana tep yankamenge. Ukupmantoda, dato-dato di bep ma lakra yakarepa, nimi kwardangamenga utopu, sun karen mutu yu nengdi, sun damai menmena poryankamseng taruda, kware weik kupkamrume. 50 Adopra deipkamre karen mutu nengda, urasin yu weik kununge. Atep, sun mutu wisi neng cap, nerapu cap, nyapu yuma cap tep nengeda, ton bicau men tenepkamenge. Anesala yuma tep, puto dipapu tulum kupredi, poptapnapu kupkamsenge. 51 Tonda, ayu nengdi, mar poryankamseng taruda, sun domba bisam do, sapi do, ma do, sun peirum keca yala-yala yuma cap, tonda sun kourum keca yuma capda, gum kupra deipkamsenge. Ukupmengedi, dakupbaramenganen, ukupmenge pangeda, sun jen keca yala-yala yuma gum kupra deipmenge pangeda, sun pe ton poptapra, gum kupra deipkamsenge. Ada, sun gandum du yuma cap, tonda anggur du cap, anggur me cap, minyak zaitun me cap, tonda sun peirum sapi bisam cap, kambing bisam cap, domba bisam cap, akeca yuma gum kupra deipsengepa, akeca yumada, gum kupra deipmenga deiki di, sun yuma depropkamrume.

52 Allah Yahwehdi, sun wenemna tep karepserepa, poryankamseng nengda, yu weika di yangedi, warekra popkamsenge. Ada, sun nai bo Allah Yahwehdi, ‘Atelep mutu kunkameng’ tenen, kareamseupa, sun aceipu kurum mutu-mutu neitamai yumada, sun pon nengdi yana warekra popkamsenge. Ukupsengedi, ila lyom gel beilya ^{▼▼gel beilya – Akeca gambar dina tep, Bilangan 32:17 dinkurume.} wiamumdi, ‘Angeda men urupmanto. Nun podan nengdi, ange men welepra popsetenge,’ tenemumnge yuma, amutu-amutu neitamai yumada, tek sisi uruptapmengedi, poryankamsenge. 53 Sun podan nengdi, sun kurum mutu yana wareksenge taruda, sun jen keca yuma, gum kupra deipsengepa, jen putapserepa, sundi, ‘Uo’ tenen, teniptopmumdi, dipru pu jepkamsere. Ukupserya deiki di, sun nai bo Allah Yahwehdi tali yamupra kareserur nyapu yumada, jena gum tep kumumdi, sun pe nyapu cap, sun ner nyapu cap, popmumdi, jenkamrume.

54 – 55 Tonda, ware neng do yuma, uda er amutu sisa ngebo, er dipru boun kuredi, yuk neng yuma tep, tulum kuna gum dipapu, pio bicau tenepra, weika di melimrur ngebo peda, yuk neng tep, jen keca bokra men karenkamrure. Er pe mening damai kunge neng peda, men bokra karenkamrure. Autopu ngebo peda, ‘Dortaru kange mun kupkamner,’ tenepredi, ketenemna keca yuma keteneipredi, kurur ngebo peda, kange mun kuprepa, yuk neng tep, pio men melimkamrure. Er peda, ‘Uo, ware keca tep warekseng do?’ tenepredi, er pe nyapu sisapu popra jepkamre. Ada, jen keca yuknge ton gum kupkamra tepa. Tenpu ngebodi, er mi popra jenmarenge galemnada, er kapu sisa yuk neng do, utopu er domrur ner, bicau teneramre ner do, tonda er nyapu sisa tupa gam kunge nyapuda, er cap kikiman kunmange nyapu do, yumada, apopra jenmare mi galemnada, men bokra karenkamre.

56 Ange utopu ton, amutu sisa ner, pio dipru telep ner, tonda pio puto boun nerda, anerdi, ‘Uo, ware keca kuptenya deiki di, yuk taruda telep kuptene do?’ teneredi, tu deiki yanipra, tali lupra men embarur ner peda, utopu kupkamre. Ada, sun podan nengdi, ‘Israel nesala popbisipkup’ tenen, sun mutu warekameng taruda, sun jen keca yuma gum kuprepa, aner peda jen putaprepa, jena tep, ‘Ware kuptene do?’ tenepredi, inipra er pe mi dinin, ukupu deipmare mipu popra, mi dei sekropa yuma jepkamre. 57 Tonda, er domre ngebo cap, er mal ner cap tep, bicau tenedanung dinin, ataruda ikin weik kupkamra cadi, er nengedi bicau tenerur ngebo cap, er mal ner sisa cap, er nyapu tupa gam kunmange nge cap tep, jen keca yambulanunpu akapyopda, ange ton bokra, sun tep men karepkamre. ‘Ne dipapu jepnedi, gawal dakamne’ tenen, kunkamre. Sun karen mutu ila yu nengdi, warekra poryankameng taruda, sun Israel nesala kurum mutu ban-ban yumada, ila ikin keca weik kunkamruma cadi, sun putan keca yala-yala yuma gum kupkamre. Atep, arup pepmasen ner utopu nerapu yumada, mi deipmenge taruda, mi deiyo deipkamrenge peda, dopredi inipra jepkamre. Tonda, nyapu ton deipyopda, anerda pio boun ner dinin, ami popra inipra jepkamre ja. Deiyoda, yuk jen keca tenpunge peda gum kuprepa, pio tupa men kupkamra tepa.

58 Ange tep nengeda, sun Israel yala nesala yumadi, sun nai bo Allah, er si Yahwehdi, “Angeda ukunkamrume, angeda pio men kunkamrume,” pepra deipupa, abuku neitamai sekeipinge moupra men talepmumdi, sun nai bo Allah Yahweh, er ila mambul si kure ngebo, er tep, ila di gispal men doupmumnyopda, er dipapu wenepkamsere. Yahwehdi akeca-keca yuma taleredi, ila eremna ngebo kurura cadi, er sipu men erepmumnyopda, wenepseredi, ila ikin keca ton karepkamsere. 59 Sun nai bo Allah Yahweh, erdi sun deiki cap, sundi deipmumpa, deipdanen bankamrum neng deiki cap yumada, ila kange mun pu jena deiyo keca karepkamsere. Amali pu jena deiyo kecada, pio jenkamsere. Ton taru ton tapmaseryanen, ton jepmaseryanen, men kunkamsere. Tupa-tupa pio tep jenkamsere. 60 Ada, er sipu telep kupra men erepmumdi, er upupu men talepra kupmumnyopda, sun Mesir mutu kuramrum taruda, ila kange mun pu jen keca kareamupa, sundi asuru emrum utopu puda, er dipapu kareprepa, sun damai yarepa, doropkamrume. Ukupkamrum dinin, ajenkamser puda, men kwetepmanto kupkamsere.

61 Allahdi nimi wenemna tep, pu yala-yala weik, sun damai dokotepkamre. Ada, ila kange mun keca Allah Yahweh erdi pepra deipupa, yau ngeda, abuku neitamai men kapunge peda, erdi kareprepa, amenda taruda sun tep pu jenkamsere. Jeramserepanen, depbaramumnyanen, dorkunkamre taru neitamaida, sun Israel yala nesalada, adipapu gum kupropkamrume. 62 Tek sisi pepsene. Sun Israel yala nesalada, nimi dengeda, kuru im deiki weike, men nukmanto ingamre utopu, kuramrum dinin, amenda dorkunkamre taru neitamaida, gam kunkamrum nengda, yambulanunpu kunkamrume. Deiyoda, tali tep gume. Ada, sun nai bo Allah, er si Yahwehdi, “Angeda kunkamrume, angeda pio men kunkamrume,” pepra deipu upu tep, dukdongopra men kuruma deiki di, gum kupra deipkamsere.

63 Tonda, Allah Yahweh, erdi sun tep kange deipseudi, telep kupra deipseupa, sundi deiprumpa, dadeipdanen, yakaramumyanen, sun nyapuda pio weik, men nukmanto kupyakaramrume. Dinino, sundi Allah er peipunge moupra men talepruma cadi, ange tep pangeda, sun damai ikin keca karepserepa doropkamrume. Ada ikin keca doropkamruma deiki di, sun yala nesalada yambulanunpu kunkamrume. Sun denge weik kuramrum ngeda, gum kupkamsere. Tonda, sundi, ‘E amutu wekmepedi, talepra telep kupra kunkamepe’ tenen, bena keana taru kunkamrum mutuda, Allahdi kange di tamupra dopropkamsere. Amutu neitamaida, weik men kunmamumpapu tamupra doropkamsere.

64 Tonda, Allah Yahwehdi sun tep, amutu neitamai di enepra donokserepa, nimi yuk mutu neng kununga kan-kan dabena kunkamrume. Tuai mutu neitamai, ban-ban yuma neitamaida, bena kunkamrume. Amutu bena kumum taruda, sun amutu kunge nengdi, tali gel cap, co cap, yuk telep keca cap, dopra petuprapmengedi, sundi, ‘Nun nai yapu acei’ tenen, tali keca tepapu si eremkamrume. Atali kecada, sun pe, sun co puna neng pe, men kael keamrumngepu, talepra si eremkamrume.

65 Tonda, yuk-yuk mutu nesala kurameng mutu neitamai bena kunkamrum taruda, bouna di telep deikipu kun mutu ton pio men epkamrume. Ikin kangepu doupra kunkamrume. Tonda, sundi, ‘E, amutuda telep cadi, amutuda nun pio talepra kunkamep mutu adano’ tenen, pio men kunkamrume. Amutu utopunge ton men epkamrume. Beipye peingna telep mutu ton men epkamrume. Pio embanapu kunkamrume. Deiyoda, nun nai bo Allah Yahwehdi, ikin keca karepserepa, sundi, ‘Uo, ware keca tep kupser do?’ tenen, dipru pu jepserepa, kange bongtonkamsere. Adeiki di, ‘Nunda ukupkamepe’ tenen, kange ton men doupkamrume. Kange tenimtonapu kunkamrume. Amutu neitamaida, sun asuruda ikinpu kupkamsere. Tonda, sun dipru bulungsangnapu kunkamsere.

66 Sun akunkamrum taru yumada, ikin kecapu yaserepa, pio kange mun kangepu doupra kunkamrume. Komuni pe, lukunda peda, ‘Uo, depkamap do, popkamseng do?’ tenen, kwarepu kuserepapu kunkamrume. 67 Ukupra kunkamruma tep nengeda, ware taru do yuma, pio ikin kange doupra kunkamrume. Atep, dan taru do yuma, ‘Sun kwar kupserepa, dipru neitamaida, luk-luk penkamsere. Ukupserepa, ipna taru dipapu, ‘Uo, menmena iptue,’ tenenkamrume. Ange utopu tonda, lukunda taru dingeda, ‘Uo, menmena berektue,’ tenenkamrume. Deiyoda, sun asuru di epkamrum ikin keca cap, kange mun keca cap, epkamruma deiki di, sun dipru neitamaida, pio mali-malipu tenedankamrume. 68 Dorkunkamre taruda, sun nai bo Allahdi, tamupra mokon deiki kapal di kipra, Mesir mutupu doproipkamsere. Mesir mutu di doupra benkuseu taruda, Allahdi, “Gume, sunda Mesir mutu tamupra men yankamrume,” peiamseu. Tonda upepu. “Mesir mutu neitamai tamupra benkamrumu taruda, sun pedi, ‘Uo, ware kupra gam kutepe do?’ tenen, sun podan neng tep, “Nun nimi pe, nerapu peda, co bo deiki di kunupsemumpa, sun pel talipu donkusepe,” pepra, bena moropkamrum dinin, tenpu ngebo peda, ton men kunupkamsenge. ‘Anesalada, dakwapye, nun songe,’ tenenkamsenge.