Deuteronomy 29

Allahdi, “Sunda ukunkamrume, angeda men kunkamrume,” pepra, upu tapakra deipu upu

1Allah er si Yahwehdi Musa damai pedina upu pepra, deipu upuda ake. Ada, sun Israel nesala, Moab mutu bena kunmai taru di yana pepra deipu. Apepra deipu upuda, sun Israel nesala, Sinai mutu kunmai taru, Allahdi pedina upu yana pepra deiamu utopu upupu, Moab mutu kunmai taru peda, ton cap tapakra aupupu yana peipu.

Allah Yahwehdi, “Telep kupra deipkamsene,” pepra, pedina upu peiamseu upupu kange di ton cap, pepu upu

2Musadi Israel mutu neitamai kurami nesala yuma tep, “Sun yuma bulupra yankurume,” pepupa, sun yuma bulupra yana weki. Ukupipa, Musadi sun tep upepu.

Mesir mutu nimi deiyo kepra kuramu ngebo, Firaun cap, er taleamupa, amutara kuramidi, Mesir mutu kurami nesala yuma tep, deiyo kepra kurami neng cap, sundi talerami mutu-mutu yuma cap tep, sun damai Allahdi ila mambul keca, er ila puto di kwamu keca kupupa, sun Israel nesaladi, sun pe asuru di konum emrume. 3Ada, ‘Mesir mutu deiyo nengdi, ne pepne upu gekepkamneng do?’ tenen, ila ikin kurpetena keca cap, tonda, ila kange mun keca cap, nimidi men kupmanto pel cap, ‘Uo, tek sisi Yahwehdi apel dorure, tenepkamneng’ tenen, kunupsek pena pel domunge cap yumada, sun Mesir mutu nesala damai, Allah erdi kwamunge yumada, sun pedi konum emrume.

4Akeca yuma konum emrum dinino, dakupyakaramrumanen, ayana kunmarum taru peda, Allah Yahwehdi, ila kael kemna deiyonge ton men kareamseu. Erdi, ‘Sun anesalada, ne kwamsinge kael keptenge,’ tenenange ton, sun damai men karepseue. Atep nengeda, sun asuru di diramrum dinin, tonda amul di gekeramrum dinin, tek sisi ila deiyo ngeda, kapul men tenemrume. Atep, akwamunge yumada, sundi, ‘E deiyo neitamai ngeda ake’ tenen, betapra men kael keamrume. 5Nun nai bo Allahdi, denge weik keteng tamun empat puluh (40) tahun neitamai yumada, “Keana taru tep aca mutu neitamai bena, kunkamepe,” pepra dubenamseue. Tonda, ne Allahdi sun tep, meliamsisa deiki di, Sinai mutu katawai neitamai yumada, duyakaramsisi. Adoupra yakaramsisi taru neitamaida, sun keamrum opkal cap, yan bol sepatu cap, ton men gwelelepra sakromsue. Tupa teleppu kuramu. Musadi aupu pepu. Upepupa, Allahdi Israel nesala tep pepu.

6“Tonda, katawai mutu neitamai embaramrum taru yumada, jen keca roti kwaneng pe, anggur du yu me peda, ton men kwamseupa, men jeramrume. Akeca men kwamseua deiyoda ake. Ataru neitamai akeca men kareamsisipa, ‘Sun Israel nesala yumada, neda Allah, ne si Yahweh kune keca cap, ne puto capda, betapra kael kepkamneng’ tenen, sun putaramseu kecada, aputaramseutopu kupra, yakaramrume. Ange yumada men kareamsisi.” Allahdi peipupa, Musa gekepudi, Israel nesala yuma tep lap pepu. 7Upepu dingeda, er Musadi aupu ton dukdongopra pepu.

Tonda, nun yuma amutu yapu taru peda, Hesybon mutu deiyo kepra kuramu ngebo Raja Sihon cap, tonda Basan mutu deiyo kepra kuramu ngebo er si Ok cap, sundi nun Israel nesala yuma tep, ‘Nun butenedi popkunem’ tenen, mar peramserei dinin, nundi sun aneng cap, sun tara neng cap popbisipmepu. 8Sun aneng talepra kuramrei mutu tu yumada, nundi yana dalupra dopropmepudi, nundi amutu yumada, Ruben yala neng cap, Gad yala neng cap, tonda Manasye yala neng ton tara neitamai di, bokropi neng cap tep karepmepu. 9Ange yuma tep nengeda, nun yuma tep, Allahdi pedina upu deiki di, “Angeda kunkamrume, angeda pio men kunkamrume. Ukupmumnyopda, nedi pio teleppu kweipkamsene,” pepra deipseu upupu, talepmepedi pio kunkamepe. Ukupra kupe pangeda, nun kunkamep keca yumada, pio telep kupra nong kunkamsere.

10Atumi di sun yumada, Israel yala neng tep, yuk-yuk deiyo keprum neng cap, amutu talepra kunung neng cap, tonda jen talena deiyo kepra kunung neng cap, nimi yala yuma capda, sun bupra sun si eremrum Allah, er si Yahweh damai yana wekmarumpa, epmasere. 11Tonda sun nerapu cap, sun nyapu yuma cap, sun kurum mutu neitamai kunung nimi bo neng yuma cap, tonda sun melimna tep co tona pel cap, me gwena pel cap, dousenge nesala peda acapu bupra awekmarume. 12Uda, sun yuma awekmaruma deiyoda, tali tep gume. Deiyoda, sun nai bo Allah Yahwehdi sun tep pedina upu pepra deipseu ngeda, talepra kunkamruma tepa. Atep abupra wekmarum nesala yuma tep, pedina upu deiki di koupdongopsera cadi, Allah erdi, “Ange-ange yuma talepra kumumdi, apel dopra kunkamrume,” pepra deipseretopu, sundi, “Tek sisi, angepu talepra kunkamepe,” pepra deiprumudi, Allah Yahweh, erdi pedina upu peipsertopu kupra kunkamrume.

13Apedina upu deiki di, sun Israel nesala yumada, atumi di sun nai bo Allahdi, ‘Sunda ne nyapu, ne mawa nesala kunkameng’ tenen, konum wepra deipsere. Adeiki di, ‘Sunda ne nyapu kungepa, neda sun nai bo Allah kunkamne’ tenen, kupsere. Ada Allahdi, “Sunda ne nyapu kurumupa, neda sun nai bo Allah kunkamne,” pepra, sun co puna neng Abraham cap, Isak cap, Yakub cap sun damai peiamu utopu kupra, ne Musadi sun damai ton pepsene. 14– 15“Ange-ange talepra kumumdi, pel donkamrume,” pepra, Allah Yahweh erdi pedina upu deiki pediramu upuda, sun atumi bulupmarum neng tepapu men pepsene. Dinino, atumi Allah Yahweh dinmaserai, er damai yana bulupra wekmarum nesala, sun yuma tep apedina upu pepra deipsere. Tonda, nun ayana wekmap nesala pe, atumi men wekmang nesala pe, nundi deipmepepa, dordeipdanen bankameng nesala yuma pe tep, aupu pepra deipsere.

“Allahdi pedina upu pepra deipunge yanipmenge pangeda, menenga keca yarepa, doronkamenge,” pepu upu

16Sunda, nun co puna neng, Mesir mutu kurami taru ikin pel dorami ngeda, kael keprumudi tupa tenenkurume. Tonda, yuk mutu nesala kuramya kan-kan, sun bisi yakarami ngeda, ange peda tupa teneprume. 17Sunda, amutu kurami Mesir mutu nesaladi, tali-tali keca tep, ‘Angeda, nun nai’ tenen, si eremami kecada, co cap, gel cap tonda perak cap, emas cap deiki di petupra deiamidi, ‘Nun deiyo ngebo,’ pepra, si eremamidi, mali kurami kecada konum lap peramipa, sun ton diramrumdi, gekeramrume.

18Atep nengeda nimi do, nerapu do, sun bung keca do, uda, sun Israel yala nesala do, atumi aca yana wekmarumdi, aupu gekeprum nesala yuma neitamai di, sun nai bo Allah Yahweh er si eremna gum, tapmumdi yuk mutu nesala, sun si eremenge keca tep, ‘Uo, Allah tapra, yuk mutu nengdi si eremenge kecapu eremkamne do, gum do?’ tenen, kange tenimtonapu kurum do? Ne walwale, dinin, atali kecada, si men eremkamrume. Sundi tali keca si erepkamrumada, ukupmanto ngeda pepkusene. Ada, nimidi koupmengedi, jenung keca dinin, ajenung kecada tamupra, su peramra utopu, yuk tali keca tep, si erepmumnyopda, amenda taru tek sisi pio ikin weik kupkamsere. Ange tep nengeda, sun kunkamrumai yumada, ‘Tali keca tep, si erepmepyopda, ila mali kupnup’ tenen, moupra kalengdamumdi kunkamrume.

19Sun ayana weka gekenmarumpa, Allah erdi, “Mali keca si erepmenge nengda, ikin keca doropkamenge,” pepra,’ pedina upu deiki di, ‘Angepu kunkamenge’ tenen, puto di peipserenge yumada, sundi gekeprume. Apedina upu konum gekeprum nengda, ‘Nunda aupu konum gekepmepa tep, amenda taruda, nun pedi putapseretopu, tali lupra mali kunkamepe. Angeda, telepe pua,’ pio men tenenkamrume. Sun peda sun kange tenepmumngepu kupmumnyopda, sun damai peda, ikin keca yarepa doropkamrume. Ada, Allahdi sun mali kunange tep, wenepseredi menenga keca karepserepa, telep kunange pe, mali kunange peda, ikin keca yaryopda, sun yuma ikin keca yarepa donkamre. Utopu, mali kun kecapu talepra kuramre ngebo peda, ikin keca yarepa doronkamre.

20Apedina upu konum gekepmarya peda, ware neng di do, mali kuna keca kupre ngeboda, Allahdi, ‘Angeboda kaukepnedi, telep kupra deipkune,’ pio men tenenkamre. Dinin, autopu kupre ngebo tep nengeda, Allah yuk weik kuprepa, wipdongopredi, ikin keca dopra, er nong deiki derinkamre. Ada, “Sundi mali kuprumu nengda, aikin weik keca sun damai yakankamsere,” pepra deipsipa, abuku neitamai sekeipitopu kupra, yaserepa donkamrume. Adeiki di, amali kuna neng yumada, Allahdi sun mali kunange tep, kaukemna gum dipapu, sun tep wipdongopredi, poptapra, gum kupra derinkamre. 21Ada, Allah er upu yaniptapmengedi, malipu kunge nesalada, Allah er si Yahwehdi, Israel yala nesala kununga neitamai di wepra deipredi, “Ange-ange kunkamne,” pepra, pedina upu peipupa, abuku neitamai sekra deipitopu kupra, wenepra wipdongopredi, gum kupra deiprepa, yuk Israel yala nesala yuma, ange epmengedi, ‘Uo angeda, Allahdi kupmare’ tenen, kael kemkamenge.

22Ange ukuamya tep, doryankamre taruda, sundi deipmumpa, deipdanen bankameng nesaladi deipkameng neng cap, tonda yuk karen mutu di, sun mutu neitamai dayakankameng nesala cap yumadi, Allah erdi ikin weik keca cap, kange mun keca cap, sun mali kupmenge nesala damai karepserepa dopromum ngeda, sundi epmengedi, kael kemkamsenge. 23Allahdi ikin keca weik karepre pangeda, amutu neitamai kunkameng nesala, sun wa bun telep tu yumada, tu darapredi, katauaipu kepkamre. Tonda, tong weik peramrenge, er si belerang cap, garam ue cap, weika di karenkamre. Adeiki di, sun wa tu yumada, sikke bute di atu deiki kepdongoprepa, malipu kunkamsere. Ange deiki di, tu mali kupre pangeda, atu deiki koupkameng keca yuma men bungopkamre. Tonda, atu deiki papmanto mutmuta peda, men papkamre. Ada men taru Allah er yu weik kupupa, Sodom cap, Gomora mutu cap, Adma mutu cap, tonda Seboim mutu cap yumada, gum kupra deiamutopu, sun kunkamrum mutu peda, gum kupra deipkamsere.

24Gum kupra deipserepa, mutu ban-ban yuma kunung nesala yumadi, ange epmengedi, “Uo, ware keca tep Allahdi, sun anesala kurami mutuda, gum kupra deipu do? Tonda, sun amutu kurami nesaladi, wareto keca kuramya tep, Allah er yu pio weik kupupa, sun aneng cap, sun mutu cap, mali kweipudi, gum kupra deipu do?” pepra asimkamenge. 25Upepra asipmengopda, tamupra upepkamenge, “Gume, deiyo ange tep kupke. Sun amutu kurami nesaladi, sun co puna neng si erepyakarami. Allah erdi sun tep “Ange-ange kunkamrume,” pepra, pedina upu deiki peramu ngeda, sun amutu kurami nesaladi men gekepra kuramya tep, kupke,” penkamenge. “Sun amutu bena kunkami nesala tep, sun nai bo Allahdi, sun anesala yumada, Mesir mutu kuramipa doupra, yaudi, pedina upu peiamunge yumada, tapya deiki di kupke,” penkamenge.

26Anesaladi mali kun keca pio weik kuramyada, ake. Ada, sun nai bo Allah tek sisi ngebo taprapidi, tali keca sun kael kemna gum keca tepapu, “Nun deiyo keca,” pepra, si erepya deiki di kupke,” penkamenge. Tonda, asi eremami isok yumada, sun nai bo Allahdi, “Atali keca yumada, men si eremkamrume,” pepra, deiamu keca si eremamya tep, kupke,” penkamenge. 27Deiyo ange tep, “Allah er si Yahwehdi, er nyapu tep, yu weik kupupa, kange mun keca yuma doupra, sun deiki deiamupa, ikin kange kuamnge,” penkamenge. Tonda, “Aikin keca karepupa, doprominge yumada, abuku deiki sekra, deipye,” penkamenge. 28“Allah Yahweh, er yu weik kupupa, angeda adipapu kuramu. Tonda, Allah er yu pio weik kupka deiki di, sun Israel nesala amutu kuramipane, amutu neitamai di dopra, sun yuk nimi bo neng mutu donokamnge. Ukupupa, sun Israel nesala yumada, yuk neng mutu bena, kuramye,” penkamenge.

29Tonda, ware kupra yala keca yumada, nun nai bo Allah Yahweh, ‘Er dipapu ange kuptene’ tenen, kael kemrure dinino, angeda nun men kael kemnupe. Ada inimnange kurure. Allah Yahweh er dipapu kael kemrure. Dinino, Allah erdi nun tep, “Sunda angeda kunkamrume, angeda pio talepra men kunkamrume,” peiamu ngeda, nun cap, nundi deipmepepa, deipdanen bankameng nesala deiki konum pepra deiamseue. Atep nengeda, nun yumadi, angepu talepmepedi kupbankamepe,” Musadi sun Israel nesala tep pepu.