Deu 3 | XteSC | STEP | Tonda, nunda Basan mutu udatara mutu bepu. Bepu taruda, Basan mutu ila nimi deiyo ngebo, Raja Og cap, er jen talen neng yuma capdi, Edrei mutu damaipu, nun cap podana tep ketenepra yai.

Deuteronomy 3

Israel nesaladi Basan mutu taleamu ila nimi deiyo ngebo Raja Og poptapu upu

1 Tonda, nunda Basan mutu ^{▼▼Basan mutu – Basan mutu perami ngeda, Galilea Mokon deiki udapu tara mutu (ara utara) dinin, keteng dangban tara bukamo. Tonda, ataruda, sun Israel nesaladi kuraminge tep, upu sekinge dina tep nengeda, Bilangan 21:33-35 tonda Bilangan pasal 32 neitamai di epkamrume.} udatara mutu bepu. Bepu taruda, Basan mutu ila nimi deiyo ngebo, Raja Og cap, er jen talen neng yuma capdi, Edrei mutu damaipu, nun cap podana tep ketenepra yai. 2 Sun anengda, ‘Israel nesala tep popkupe’ tenen, nun damai yai dinino, Allah Yahwehdi ne tep yana upepneu. “Musao, sun aneng tep, kwardangna gume. Ne putoda sun deiki konum deipmasene. Ada, amutu talepra kurur ngebo cap, er talepra kurur mutu cap, er jen talen neng cap yumada, sun deiki konum deipsena cadi, anesala porbenkurume. Ada men taru Hesybon mutu ila nimi deiyo ngebo, Raja Sihon cap, sun Amori yala nesala Hesybon mutu kurami nesala cap poamruma utopu kupra, sun aneng peda poptapkurume,” peiamneu.

3 Atep nengeda, ataruda nun nai Allah Yahwehdi Basan mutu taleamu ila nimi deiyo ngebo Raja Og cap, er nyapu cap, er jen talen neng yuma cap dopra, nun deikipu deipseupa, nundi anesala yuma popra gawal dakmepu. Tenpunge peda ton, pio men tapmepu. 4 Ataru dipapu, atara neitamai kuramu mutu yuma, embendapudi, sun kurami mutu neitamai dorami ati arum yumada, popra gawal dakmepudi dalupra dopramupu. Tenpunge peda, ton pio men tapmepu. Ange utopu amutu kurami nesala yuma peda poptapmepudi gawal dakmepu. Ukupmepudi, akati arum dengeda, enam puluh (60) ati arum dopra kurami mutu yumada, nun dipapu dalupra dopropmupu. Ada, Basan mutu ngebo, Raja Ogdi nimi deiyo ngebo kepra, Argob mutu yuma taleamupa, kurami mutuda, nundi popra sirya dakmupudi, amutu yuma nunpu dopramupu.

5 Apopmupu mutu nesala yumada, sun ati arum dana-dana tara yuma, ila lyom gel beilyada, ila di erepra ongopgenepra wiamidi, akati arum doramyai wengbana tep bisi damaida, ila lyom besi di, buplan yuma dopra keteneiami. Tonda, abuplan dopra keteneiaminge daramdongona tep keca peda, besi beton utopu kupra ketenepra deiamidi daramami. Tonda, yuk mutu yambul-yambul ati arum dopra kuramyaida, ila lyom gel beilya, ila di erepra ongopgenepra men wiami. Akati arum yumada, tali banangaipu dakuramipa, poptaprapmupudi, dalupra dopramupu. 6 Amutu yuma wekrapmupudi, popra sikke buktapmupu. Ada, nimi cap, nerapu cap, sun nyapu cap yumada, popra gawal dakamopudi, sun ati arum yumada uruptapmupudi gawal dakmupu. Angeda, men taru Raja Sihon Hesybon mutu kuramudi, taleamu mutu yuma wekra poamuputopu, Basan tara peda utopu kupmupu. 7 Dinino, sun amutu nesaladi domba do, sapi do, sundi talepra peirami gam keca yala-yala yumada, gam kepmanpu dopropmupu. Tonda, sundi talepra kurami mutu tu cap, sun dorami ati arum neitamai kuramidi talerami bung keca yala-yala yuma capda, akeca yuma dalupra dopropmupudi, ange yumada nun pengepu kepmupu. 8 Ataru dipu nundi nimi deiyo neng butenedi talepra kuramrei mutu yuma dalupra dopropmupu. Ada, Yordan me goupra orketeng yakan tara neitamai dinin, Yordan me duman tara cap, adinin Arnon me duman di dipdongopra, deiki tara mutu dapu tara (ara utara) ila mutu dup, er si Hermon ^{▼▼Hermon mutu – Aila mutu dupda, Galilea laut mokon deiki tara dinin, keteng dangban tarada ati arum sida, Sidon mutu bukamo. Keteng yakan tarada, ati arum si Damasik mutu bukamo. Aneitamai dinin, yambula nun itara iknapi dam tarada, (ara selatan) yambulanun Hermon mutu dup bukamo} mutu damai, atara yuma dopramupu.

9 (Ila mutu dup Hermon mutu tepapu, sun Sidon mutu neitamai kurami nesala dingeda, ‘Siryon mutu,’ perami. Tonda, sun Amori mutu neitamai kurami nesala dingeda, ‘Senir mutu,’ perami dinino, amutuda tenpu mutu teppu, si butene perami.) 10 Raja Ogda, basan mutu kuramudi taleamu mutu neitamai yumada, nun dipapu poptapmupudi dopropmupu. Ada, Gilead tara ^{▼▼Gilead – Gilead tarada, Yordan me ortara, keteng yakan tara bukamo. Er mutu wilimdonaida, dutara dinin, itarada (ara selatan) Yabok me embaramu. Itara deiki tara dinin (ara utara) utara wilimdonaida Yarmuk me cap, Galilea mokon cap deiamudi kwamu.} yuma cap, adinin deiki tara, Basan tara yuma cap, amutu neitamaida douai tara erepra buku mutu yumada, nunpu dopropmupu. Amutu di dipra yambulanun itara, iknapi tara (ara selatan) karen mutu keteng yakan tara domi ati arum er sida, Salka mutu cap, tonda akati di deiki tara ati arum er si, Edrei ^{▼▼Edrei – Edrei ila ati arumda, Yordan me ortara, keteng yakan tara di dorami. Yarmuk me embaramngai dinin, yambul dutara (ara selatan) bukamo. Ada, iknapi dam tarada, (ara selatan) Yabok me embaramu. Salka ati arumda, Edrei mutu dinin, yambul dutara dinin, iknapi tara dorami (ara selatan). Ton, akati arum buteneda, Basha tara neitamai dorami.} mutu cap, ange yuma peda nunpu dopropmupu. Menop taruda, atara cap, akati butene yuma capda, Raja Ogdi taleamu. 11 Sun nong ila lyom yala nesala, sun sida Refaim yala neng kupya karamyanen, sirik ngeboda, Raja Og kuramu. Erdi Basan mutu tep nimi deiyo kepra taleamudi kuramu. Ataru amutu nesala sundi, er Raja Og tep, pio gat keca di, er manai tep keteneipi. Akeca dopra derirami nge er lyomda, empat meter cap, deiki tara yambulanun ton cap dopra derirami. Raja Og er manai tep palada, dua meter utopu dorami. Ange er meter nukra dona tep nengeda, men di, ‘Ukupra donkamepe,’ pepra, nukra peiaminge utopu kupra, dopra derirami. Raja Og er manaida, besi kecadipu, dorami ngeda, sun Amori yala nesala dorami ati arum, er sida Raba mutu, neitamai dadeiamitopu, tupa akurura cadi, aca dipu eptepe.

Yordan me goupra, ortara keteng yakan tamnada, Israel nesala yala yuk-yuk kuramitopu tu bokra dopropinge tep, pepu upu

12 Musadi sun Israel nesala tep pepu. Uda, Basan mutu konum dopra nun kepmepu dingeda, nedi bokra Ruben yala neng cap, Gad yala neng cap tep karepsi. Sun butene yala neng tep karepsi ngeda, Arnon me duman tara utara tamna karepsi. Ada, ati arum er si Aroer mutu doramyai cap, aneitamai dinin, dutara (ara selatan) kwamu tara, Gilead tara cap, atara neitamai dorami yuk ati arum cap, dopra karepsi. Ada, Gilead mutu yuma gum dinin, dana tara neitamai bokrapsidi, ton tara dopropsidi karepsi. Ukupsi ngeda, ada nedi sun yala butene neng kunkamyai tep kareamsi. ^{▼▼kareamsi – Akupinge yuma kael kemna tep, Bilangan pasal 32 dinkurume.} 13 Tonda, Gilead tara dinin, dana tarange cap, Basan mutu yuma capda, tupa ton akupmau ngeda, nedi bokrapsidi, Manasye yala neng dini, sun yala neitamai di wilipra, Yordan me goupra keteng yakan tara kunkami neng tep karepsi. Basan mutuda, ila nimi deiyo ngebo, Raja Ogdi taleamu mutu tepa. Amutu neitamai yuma, er si tep nengeda, Argob tara ton perami. (Aila pala tara, er si Basan tara yuma tep nengeda, menop taru, ‘Atarada, sun nong ila lyom neng, sun Refaim yala nengda, Basan mutu ada sun mutu pua,’ perami).

14 Tonda, Manasye yala nengdi deiami ngebo, er si Yair, amenda taru erdi Argob mutu yuma popbisipudi dopropu. Ada, Basan tara yuma tep pepne. Ada, Gesur yala neng kurami mutu, atara di dukdongopra, ortara sun Maakha yala nesala kurami mutu kwamngai, atara neitamai kwamu ati arum yuma cap, mutu tu cap yuma bena dopropu. Dopropu dingeda, amutu neitamai kwam ati arum yuma tep nengeda, ukupu si ton pepra deipu. Ada er pe si utopunge, Hawot-Yair pepra deipupa, sun yuma asipu peramidi, ataru peda aperamitopu, ukutaru peda tupa asipu pio penunge. 15 Gilead tarada, nedi bokra, Manasyedi deipu ngebo, erdi deipupa dadeipdanen, yakarami nesala, sun Mahir neng tep karepsi.

16 Tonda, Gilead tara neitamaida, mutu tu ton bokra, sun Ruben yala neng cap, Gad yala neng cap tep karepsi. Ada, Arnon me duman neitamai kapu mutu di dukdongopra, benamnganen, ortara embaramu me, Yabok me damai daneitamai kwamu mutu tu bokrapsidi, sun ayala butene neng tep karepsi. Ada, nedi amutu bokrapsidi, sun Ruben yala neng cap, Gad yala neng cap tep karepsi. Sun mutu wilimdonaida, Yabok me embaramraida, sun Amon yala neng kurami mutu acapu kwamu. Amon yala nesala kurami mutu di dukdongopra ortara mutuda, men karepsi. 17 Sun mutuda, Araba tara ^{▼▼Araba tara – Araba tarada, ila laut mokon, er si Laut Mati peraminge itara kwamngai adinin, utamna dapu mutu, ila katuai mutu tep, Araba tara perami.} ton peraminge karepsi. Ada, ila laut mokon er si Laut Mati ^{▼▼Laut Mati – Laut Mati perami ngeda, alaut mokon pumbon, garam pio weik akurura tep, mekina do, yuk mokon pumbon kure gam keca do, tenpunge peda amokon pumbon gam men kurure. Atep, aila mokonda er si tep Laut Mati penunge.} dutamna mutu (ara selatan) kwamu. Amutu wilimdonai pio itara, deiki tarada, Laut Mati orketeng dangban tara kwamngai, adinin dipra benamuane, deiki tarada (ara utara), Yordan me dari tara yakaredi, Laut Mati wengrure. Tonda, adinin orketeng yakan tarada, ila mutu dup, er si Pisga mutu bukamoa, tonda amutupu dinin, er si tep Nebo mutu ton perami mutu bukamo. Aca dinin, dutamna (ara selatan) kwamu mutu, atamna yumada dukdongopra baramnganen, Laut Mati dari tara, adinin dutara ton (ara selatan) kwamu mutu yumada, ange ton bokra karepsipa dopropi.

18 Menop taruda, nedi sun keteng yakan tara kunkamrum neng ^{▼▼kunkamrum neng – Aupuda, Musadi sun Ruben yala neng cap, Gad yala neng cap, Manasye dana tara yala neng cap tep pepu. Sunda Yordan me goupra orketeng yakan tara kunkami neng tepa.} tep, sun yala neng tep nengeda, ‘Ange kupkurume,’ pepsisi. Apepsi upuda ake. ‘Sun nai Allah Yahwehdi, Yordan me goupra atara keteng yakan tara ukupu karepmaser mutuda, amenda taru sun amutu neitamaipu bemumdi talepra pio kunkamrume. Dinino, ataruda amutu neitamai di, Yordan me goupra ortara, keteng dangban tara benkurume. Deiyoda, sun kayapu neng, Israel yala neng dinin, Yordan me goupra ortara keteng dangban tara kunkameng nesala, sun makuna tep, orbena kunkamrume. Ada, sun jen talen neng yuma cap, ila-ila puto neng yuma capda, jen doupra bemumdi, balila deipra, mepra Yordan me goupra orketeng dangban tara benkumum pangeda, sun kayapu Israel neng, yuk yala-yala nesala yumada, sun amenda melipra benkamnunge, peiamsi.

19 Tonda sun atara kunkamrum neng, sun nerapu cap, sun nyapu cap, tonda sun talepra peirum gam keca yala-yala yuma cap, ange yumada acapu kunkamnunge. Ne kaele, sun damaida akeca pio weik kuserura cadi, sun tep karepsesi ati arum yuma, amutu neitamai, sun ati arum damaipu kunkamnunge. Sun jen talerum nengpuda, Yordan me goupra orketeng dangban tara mar porbenkurume. Ada sun kayapu neng makuna tepa. 20 Sun kayapu tep melipra dubenkamrum nengda, orketeng dangban tara moupra kalekmumdi doupra baramrumyane, sun nai bo Allah Yahwehdi, ‘Sun tep amutu karepkamsene,’ peamu mutu bena wekamnunge. Ada, Allahdi sun kareprepa kunkameng mutu neitamaida, Yordan me goupra bengedi keteng dangban tara bena kunkameng mutu tepa. Ukupmengedi, ortara nesala popbisipmenganen, gawal dakmengopda, ton cap podana gum dipapu, telep kange doupra kunkamenge. Ada, sun atamna, keteng yakan tara mutu konum bisbisa kapmarumdi, amutu tu yuma doroprumdi, telep kange doupra kurum utopu, sun kayapu neng peda, Israel yala neng dinin, keteng dangban tara orbena kunkamnunge. Apepmasentopu konum kupmumpa, sun kayapu neng nimi podana gum dipapu, telep kange doupra konum kupmengopda, sun tamupra Yordan me goupra keteng yakan tara yamumdi, sun tep kareamsisi mutu tuaipu yana talepra apio kunkamrume. 21 Tonda, atarupu, nedi Yosua tep upepsi. ‘Sun nai bo Allah Yahwehdi, aketeng yakan tara yuma talepra kurami ila nimi deiyo neng Raja-Raja cap, sun tara nesala cap tep, bisbisa kapudi, sun mutu yuma dalupra dopropudi, sun Israel nesalala tep karepseuada, konum dinmarumdi kael kepmarume. Allahdi kurepa dinmarum keca yumada, kandi konum epra kael keamuma cadi, Raja sihon cap, Raja Og cap, abutene nimi deiyo neng tep bisbisa kupu ngeda, konum kael kepmume. Allahdi abutene Raja neng tep kuputopu, ortara Yordan me goupra orketeng dangban tara kunge Raja neng yuma tep nengeda, utopu kupkamre ja. Atep, sun kayapu Israel nesala kunkamengai yumada, ormutu wekra bememyopda, ormutu bena popbisipmumdi, sun kunkamenge mutu tu yuma bena doronkamrume. 22 Amutu neitamai talepra kuramenge nimi deiyo neng cap, amutu nesala yuma cap tep, kwar men dangkamrume. Deiyoda, sun nai Allah Yahwehdi, sun tep ila puto karepseredi, tonda, erdi kalekra pio melimkamserya deiki di, sundi ormutu talenung nesala yuma popbisipkamruma tep pepsene.

Musa Kanaan mutu men weku upu

23 Ataruda ^{▼▼Ataruda – Ataru mutu tu bokra karepi ngeda, tonda, Musadi pel doramu ngeda, kael kemna tep, Bilangan 27:12-14, tonda, 32:48-52 dinkurume.} nedi Allah Yahweh tep upepra moropsi, 24 “Teka ne nai Allah Yahweh, kanda akeca-keca yuma talememdi, pio deiki tara ila eremna ngebo kurume. Kandi ila puto deiki di kumem kecada, ne kan amutara pel don ngebodi konum dinedi kael kemnun dinin, weika di ton cap kael kepmantonge tupa akapmara cadi, neda, metekanunpu konum kael keamsi. Kanda, nimi men kupmanto keca kapul taru di gonga kepra kuramumnge cap, tonda daneitamai di ila kange mun keca kumemnge yumada, kan dipapu kurume. Yuk allah-allah yuma cap, isok cap, puto kure keca cap yumada, im deiki do, tuai mutu do yuma, kan kumemnya utopu ton men kununge. Kan dipapu ila mambul pel yuma dorume. 25 Atep nengeda, naio, neda kandi, ‘Telepe dabetue,’ tenepnetumpa, Yordan me goupra orketeng dangban tara betene. Teka ne nai Allah, ormutu betenedi, tu pio telep mutu eptene. Tonda, Yordan me goupra ortara akapu mutu buma yumada, pio telep mutu kurure. Utopu, Libanon mutu peda, urasin pio telep mutupu kururada, ne ton eptene’ tenen, ila di putanerure. Atep ormutuda ne ton betene,” pepra moramsi.

26 “Upepra moropsi dinino, nun nai Allah Yahwehdi, ne upu ton men gekepneudi, ne tep yu kupneu. Deiyoda, ne tepapu gume. Sun Israel nesala mali kuramruma deiki di, Allah Yahweh erdi, ne tep yu kupupa, ‘Kanda apepmanerem upuda, ton cap men pepkamnerume, dakwapye,’ pepra wenepneue. Adeiki nedi er tep moropsinge ngeda gekepra, ‘Telepe,’ men peamneu. Upepra moropsipa, Allahdi ne tep tamupra upepneu. ‘Musa kandi ange tep, ton cap tamupra men pepkunerume,’ pepra wenepneue. 27 Wenepneudi, aupu ton pepneu. ‘Kanda adipu Pisga mutu ^{▼▼Pisga mutu – Aila mutu dupda, ton Allah upu buku neitamaida, Pisga mutu penung dinin, ton buku neitamaida, Nebo mutu penunge. Dinino, aila mutu dupda, si butene dinin, amutuda tenpua.} deiki welepmemdi, kan asuru di lapra, Yordan me goupra ortara, keteng dangban tara kapu mutuda, itamna cap, utamna cap, tonda keteng yakan tara cap, keteng darbana tara cap yumada, kan pe asuru dipapu dipetepkurume. Dipetepmemdi, epmem ngeda, kandi moupra kael kepkurume. Deiyoda, kanda Yordan me goupra ortamna, keteng dangbana tarada, men benkamrema tepa.

28 Aepmamem nge yumada, kandi Yosua tep, ‘Nun nai bo Allahdi upkupkamsere, kalekra melipseryopda, ortamna kunge Raja neng yuma tep, bisbisa kapra gawal dakamepa tep, ange-ange kupkamrume,’ pepra dipru kwadimna upu peipkurume. Deiyoda, Yosua dipapu aIsrael nesala yumada, doupra Yordan me goupredi, kan asuru eptapmarem mutuda, keteng dangban tara wekrapredi, ortara mutu yumada, bisbisa kapredi, bena kareprepa, sun Israel yala nengdi amutu yuma talepra kunkamenge,’ peamneu. 29 Allahdi aupu upepneupa, nun yumada acei di tapra, ati arum si Bet-Peor mutu ortara kwamngai, nunda atamna ame duman banaipu, bena kuramepu.” Musadi sun Israel nesala tep lap pepu.