Deuteronomy 30

Allahdi, “Ukunkamrume,” peramu upu konum tek sisi kuprumnyopda, erdi telep kupra deipserepa, akeca-keca yuma teleppu kunkamsere pepu upu

1Musadi Israel nesala tep pepu.

Ataruda sun tep konum lape pepmasene. Amenda taru Allahdi telep keca ton karenkamsere. Ton taruda, kange mun keca winange ton karenkamsere. Atep, sun moupra tenenkamrume. Amenda taruda, sun nai Allah er si Yahwehdi sun dopropseredi, yuk-yuk mutu neng kan-kan derinkamsere. Deipserepa sun yuk-yuk kunkamrum taru neitamai yumada, ‘Allahdi nun wenemna tep, kange mun keca winange karepmaser do? Telep kupmepepa, telep kunangepu karepmaser do?’ Angeda sundi moupra tenenkamrume.

2Sun cap, sundi deipkamrum nyapu cap, ‘Nun nai bo Allah er si Yahweh, er damai tamupra bepedi, erdi peamseu ngepu talepra angepu kunkamepe,’ teneprum dingeda, sun kange dipru yuma cap, sun nonge cap, Allah er deikipu deipkamrume. Ada nedi atumi deiki ‘Ukunkamrume,’ pepmasentopu, Allahdi peramunge moupra gekepmumdi, angepu talepra kunkamrume.

3Ukuprum pangeda, sun nai bo Allah, er si Yahwehdi bicau tenepkamsere. Ukupra tenepseredi, sun men di taleamrum keca gum kupunge yuma, ka di ton cap karenkamsere. Tonda, sundi mali kuramrumpane, sun wenemna tep, dopropseudi yuk-yuk mutu neng kan-kan deriramseupa, yuk-yuk mutu neitamai kuramrum dinino, amenda taruda, sun nai Allahdi dokoteamseuai neitamai di, tamupra duyankamsere. Duyasere dingeda, men di gum kupseu telep keca yuma, kange di ton cap karepserepa, weik kupbankamsere. 4Amenda taruda, Allahdi sun dopra karen mutu dokotepserepa, amutu bemumdi mutu sirik, im sirik kunkamruma peda, sun nai bo Allah er si Yahwehdi, ka di ton cap sun bupra duyaseredi, tenpuai deipkamsere.

5Ukupsere pangeda, pumun taru sun co puna neng talepra kurami mutu talepra kunkamrume. Tonda, sun amutu kumum taruda, akeca-keca yuma weik kareserepa, weik kupbankamsere. Ange utopu, amutu neitamai deipserepa, nimi weik kupbankamrume. Pumun taru sun co puna neng akeca-keca yambulanunpu taleramidi, nimi yambulanunpu kurami dinin, sunda ange utopu men kunkamrume. Amenda taru, Allahdi sun dopra, amutu neitamai deipsere pangeda, sunda akeca-keca pio weik talerumdi, nimi peda pio weik kupbankamrume.

6Ukupmum taruda, sun nai Allah, er si Yahwehdi, sun dipru neitamai mambul pel donkamsere. Ada, metek sal nyapu, ‘Allah erngepu kunkameng’ tenen, sun den bam bol deiki tarange sektapmengetopu, Allahdi sun tep ukupu dipru karenkamsere. Ada sun cap, sundi deipkamrum nyapu cap yuma tep, Allah er si Yahwehdi er tep pio teka tenena kange karepkamsere. Karepkamserenge deiyoda, ‘Sun kange dipru cap, sun nong cap, ne Allah tep tamupra karepkamnenge. Tonda pio kunkamenge’ tenen, ukupu dipru karepkamsere.

7Allah er si Yahwehdi, mali kuna tep widongon keca dopropredi, sun podan neng cap, yu tenesenung neng cap, tulum deiki di ikin keca, sun nong deiki derisenung neng yuma tep, sun deiki widongonkamre. 8Ukupyopda, amenda taru sunda menop taru kuramrumtopu, Allah er si Yahwehdi, ‘Angeda kunkamrume, angeda men kunkamrume,’ pepra pemu ngepu, kange di ton cap gekepmumdi, tamupra yamum dingeda, er peamseutopu dukdongopra kunkamrume. Ada, atumi di pepmansen ngepu gekepmumdi, moupra talepra kunkamruma tep pepsene.

9Ange konum kuprumnyopda, sun nai bo Allah er si Yahwehdi, melimserepa akeca-keca yuma teleppu kunkamsere. Ada, sun pel donkamrum keca yuma, nong kepbankamsere. Tonda, sun nyapu derinkamrumnge cap, pein keca peinkamrumnge cap, tonda wa pepra kounkamrum keca cap yumada, Allahdi telep deipserepa, weik kupkamsere. Ada, Allahdi kange deipseredi, telep kupra deipsere pangeda, akeca-keca yuma, nonge weika di kunkamsere. Sun co puna neng tep, pumun taru, kange deiamudi weika di kareramutopu, amenda taru sun peda utopu, telep keca yala-yala yuma weika di karenkamsere.

10Dinino, angeda tali tep men kupkamsere. Ange gum dinin, Allah er si Yahwehdi, ‘Angeda kunkamrume, angeda men kunkamrume,’ pepra peramunge gekeramidi, mem upu buku neitamai sekeiaminge, sun adipapu gekepmumdi, tek sisi talepra kuprumnyopda, melimkamsere. Tonda, er tep teka tenepmumdi, sun dipru kange cap, sun nong cap er deikipu deipmumdi, dukdongopra kunkamrume. Ukuprumnyopda, Allahdi kange deipseredi, weika di makunkamsere. Musadi Israel nesala tep pepu.

“Dena dopropkurum do, gam kuna dopropkurum do,” pepra asipetepu upu

11Musadi Israel nesala tep pepu.

Atumi deiki nedi, ‘Angeda kunkamrume, angeda men kunkamrume,’ pepsen ngeda, ikin weik men kurure. Ange tep nengeda, sundi, ‘Uo angeda, ikine tep men kuptepe. Angeda nun men kupmanto keca pepsere,’ tenen, kange mun kange doupra tenimtona gume. Tonda, ‘Angeda karenai cadi, men bena doproptepe,’ tenena gume. 12Allahdi peipseupa, nedi pepmasen upu tep nengeda, sundi men penkamrume. Ada, uo, im deiki kurura cadi, nun pedi men dorbetepe. Tonda, sun pepu men asimdankamrume. ‘Ware ngebodi im deiki welepra, aupu dorbetudi, ka di duyasetudi, lap pepsetu do? Ukupsetupa nun gekeptepedi, teka teneptepe do?’ tenen, asimdarum dinin, ukuna gume.

13Ange utopu, apeipmasen ngeda, ‘Laut mokon ortara kapu do?’ tenen, sun pepu asimdarumdi, ‘Ware ngebodi ortara goupra, bena dopra yan lape pepsetupa, gekeptepedi, kael keptepe do?’ tenen, asimdana gume. 14Ange yuma men tenenkamrume. Allahdi peipseupa, nedi lap pepmasen upuda, sun damai kurure. Akurepa konum kael keprumdi perume. Ukuprumdi, sundi tenepra kael kemrumdi, sun dipru neitamai konum akurura cadi, adipapu angepu talepra kunkamrume.

15Atep nengeda, sun gekepneso. Atumi deiki sundi wepkurum ngeda, konum lap pepra deipsene. Ada, telep kuna cap, pio gam kunange cap wepkurum do? Mali kuna cap, denange cap wepkurum do? Tenipetepmumdi wepkurume. 16Angeda tali tep men pepsene. Deiyoda ake. Atumida nedi sun tep, ‘Telep ngeda ace. Angepu kunkamrume,’ pepra konum deipsene. Ada, sun nai bo Allah er si Yahweh tep, kange deipra er pepungepu dukdongopra kunkamrume. Tonda, Allahdi, ‘Angeda kunkamrume, angeda men kunkamrume,’ pepra deipseu ngeda, Allah mem buku deiki sekeipingepu talepra kumumdi, dukdongopra amutara kunkamrume pepsene.

Ada ukupmumya deiki di, sun tupa kunkamrume. Tonda, sundi deipmumpa, dadeipdanen benkamrum neng yumada, weik kupbankamre. Ange konum kupmumnyopda, tali men pepsene. Sun nai bo Allahdi, ‘Karepsenepa benkamrum,’ peamseu mutu bana tep nengeda, ukutaru konum dam kupra tep, amutu wekra kumumnyopda, sun nai bo Allahdi telep keca karenkamsera deiki di, teleppu kunkamrume.

17Ukupkamser dinino, sun kange neitamai di Allah tep, ‘Nun songe,’ tenepmumdi, er peramunge gekepra, teka men tenepmumdi, isok si eremna tep genepdongopra kumum pangeda, Allahdi sun tep wenepra poptapkamsere. 18Atumida nedi tek sisi pepsene, Allah tapra malipu kupmumnyopda, erdi sun tep poptapseredi gawal dangkamsere. ‘Yordan me goupra, ortara mutu wekmepedi, amutu talepra kunkamepe’ tenen, keteneipmarum dinin, isok sipu eremum pangeda, Allahdi tek sisi sun gum kupra deipkamsere. Tonda, malipu kupmumnyopda, erdi ‘Karepkamsene,’ peamseu mutu bena kunkamrum taruda, sun gam kuna tep nengeda, go weik men mapkamrume. Yambulanunpu kumumdi depkamrume.

19Ukutaruda, sundi sun nai bo Allah, er si Yahwehdi peamseu ngeda, gam kuna deiyonge do, dena deiyonge do, tonda telep kuna deiyonge do, ikin keca dorona tep widongona deiyonge do, ange yumada, nedi konum lape pepmasena tep, sun pedi wepkurume. Amenda taru sundi ne tep, ‘Ange men lap pepsemume’ pepnerum tenen, ukutaruda, nedi im deiki gam kure keca cap, tuai mutu gam kurur keca cap upupnepa, sun wepkurum ngeda, epkusenge. Ange tep nengeda, gam kunangepu wepkurume pepsene. Gam kunange wepmum pangeda, sun cap, sundi deipkamrum nyapu cap gam kunkamrume. ‘Ukunkamrum’ tenen, pepsene.

20Tonda, gam kuna deiyo keca wepmumnyopda, ‘Sundi sun nai bo Allah er si Yahweh tep, kange deiprumdi er pere upu moupra gekemumdi, erpu talepra dukdongopra kunkamrum’ tenen, pepsene. Ukunkamrumnge deiyoda, Allah er si Yahwehda, sun gam kuna deiyonge kurura tep pepsene. Ukupmum pangeda, sun wengbenkamrum mutu neitamaida, sun pe cap, tonda sundi deiprumpa, deipdanen bankamenge nesala yuma cap, gam kunkamrum taruda, go weik karepkamsere. Ada, sun co puna neng Abraham cap, Isak cap, Yakub cap tep, Allahdi, ‘Amutu karepkamsene,’ pepra, ‘Pediramu mutu bena kunkamrum taruda, weik kupkamre,’ tenena tep, angeda pepsene. Musadi Israel nesala tep pepu.