Deuteronomy 31

Yosuada Musa tep yo punupu upu

1Musadi Israel nesala tep pepu. 2“Ukutaruda, Ne kune keteng tamunda, denge weik seratus dua puluh (120) konum mapsi. Atep, sun deiyo ngebo ton cap men keptene. Ton ngeda, Allah er si Yahwehdi, ne tep konum peipneu. ‘Musa kanda, Yordan meda goupra ortara men benkamreme,’ peamneu,” pepu. 3“Atep nengeda, gekepneso. Sun nai bo Allah, er sida Yahweh, er dipu menmena mepra Yordan me goupra, ortara dubenkamsere. Sun damai baredi, sun bankamrumai kunkameng neng yumada, popkamre. Ukuprepa, aneng sun kuramenge mutu yumada, bena dopropkamrume. Ukupkamrum taruda, Allah peramutopu, Yosuadi sun deiyo ngebo kepredi, menmena mepra, Yordan me goupra dubenkamsere,” Musadi pepu.

4Upepudi, aupu dukdongopra pepu. “Atep nengeda, Sun nai bo Allah Yahweh er pedipapu, sun Amori mutu nesala, sun deiyo neng butene Sihon cap, Og cap tep poptapudi, sun taleamrei mutu yuma popra gawal dakamotopu, Yordan me ortara nesala utopu kupkamre. 5Allah er si Yahwehdi, ormutu nesala yuma popredi, aneng dopra sun buru deiki deipseredi, karepsere pangeda, nedi lap peipsisidi, ‘Ukupkamrume,’ pepsisitopu, anesala sun adipapu popropkamrume,” Musadi Israel nesala tep pepu.

6Upepudi, aupu ton pepu. “Ange tep nengeda, sun dipru neitamai cap, nonge cap puto kupra deipmumdi, kware gum dipapu balilapu kunkamrume. Sun bankamrumai yumada, sun nai bo Allah, er sida Yahwehdi, sun damai melipserepa, tonpapu bankamrume. Tonda, Allah pio men tapkamsere. Ange tep nengeda, ortara mutu nesala tep tenepmumdi, kwar pio men kunkamserure,” Musadi pepu.

7Upepropu dingeda, Musadi, Yosua tep upupudi, Israel nesala yuma wekmaiya kan-kan di pepu. “Kan dipru neitam pio moupra tenepmemdi, kan dipru neitamai cap, nonge cap, puto kupra deipmemdi, kware gum dipapu balilapu kunkamrume. Deiyoda ake. Allah er si Yahwehdi, sun co puna neng tep, ‘Amutu karepkamsene,’ peramu mutu, Israel nesala dopra dubenkamrume. Ormutu bemumdi, kandi amutu yuma bokra, Israel nesala yuma yuk-yuk karepmem pangeda, sundi amutu dopra, bena talepmengedi, dapio kunkamenge. Allahdi amutu karepkamserepa, dopra kunkamenga tepa.

8Kan nai bo Allah, Yahwehdi kan damai mepra tekredi, tamna gum tupa pio melipkerepa, tonpa bankamrume. Erdi sun yuma tep, pio men tapkamsere. Tonda, ‘Sunda dakwapye’ tenen, pio men kaukepkamsera cadi kanda, ‘Uo ware kuptene do?’ men tenenkamrume. Ange tep nengeda, kanda kwar kupkerepa, dipru bongtona gume, pio telep kange doupra kunkamrume,” Musadi pepu.

Allahdi nimi tep, ‘Ukunkamrume,’ peipu upuda, “Keteng tamun yoneitam bari kepre pangeda, kange di ton cap nungkamrume,” pepu upu

9Allahdi, “Ukunkamrume, angeda men kunkamrume,” pepra deipu upu yumada, Musadi aupu konum seku dingeda, Allah er si eremna ati pumbon pel dona deiyo neng, sun Allah cap, nimi cap, antamdina deiyo neng tep, aupu karepu. Uda, anengda, Allah er si eremna deiyo nengda, Lewi yala nengdi deriramipa, Lewi yala neng kurami. Tonda anengda, Allah er si Yahwehdi, “Ukunkamsene” pepra, Israel nesala tep pediramu upu kipra, doupra embarami bekin, er sida Peti Perjanjian, ange ton dubarami. Tonda, Israel nesala sun wisi-wisi neng, upu bongdina deiyo neng tep karepu.

10Musadi, aneng damai bena, Allah upu karepu dingeda, Musadi aneng tep aupu pepu.

Keteng tamun yoneitam bari konum kepre pangeda, yambul bura ati doprumdi, kalemna Bura Ati Ila Tumi kepkamrume. Ataru peda, ton nesaladi yuk nesala sun keca ke douaminge dinin, ka tamupra kapul men kareraminge yumada, daepkamrume. Ataru neitamaida, sundi penkamrum upuda pepkusene.

11Ataruda, Allah er si Yahwehdi, ‘Aceipu bulupkamrume,’ pepkamreaipu, Israel nesala yuma ketenepra bulupkamenge. Acapu, sun yuma yangepa, aupu doupra kange di ton cap sun damai nukra derinkamrume. Ukuprumpa, Allahdi, ‘Ukunkamrume, angeda men kunkamrume,’ peiamu upuda, Israel nesala yuma gekenkamenge.

12Ukupkamrume, sundi peiprumpa, Israel nesala sun nimi cap, nerapu cap, nyapu cap, tonda yuk mutu di tengyakan neng, sun mutu yankunge nesala yuma peda bulupkamenge. ‘Sundi yaso,’ pepmumpa yange pangeda, sun damai Allah er mem upu nukra deipmumpa, ange gekepmengedi, Allah er si Yahweh tep kwar kuprepa erdi, ‘Ukunkamrum, angeda men kunkamrume,’ peramu ngepu gekeprapmengedi, dukdongopra pio moupra kunkamenge.

13Tonda ukuprumpa, sun amenda taru deipkameng nyapu, Allah er mem upu men kael kepi neng peda, gekepmengedi, angepu moupra kael kepmengedi, sun nai bo Allah tepapu kwar kupserepa, er upu talepkamenge. Ada, sun Yordan me goupra, ortara bena kunkamrum mutu neitamai, ormutu talepra kunkamrum taru yumada, Allah er si Yahweh tep kware kunkamenga tep pepsene. Musadi pepu.

Allahdi Musa tep, ‘Ukunkamrum, ukunkamrume,’ pepu upu siryange pepra deipu upu

14Allah er si Yahwehdi Musa tep pepu. “Tek sisi kan depkamrem taru konum damai kepre. Atep nengeda, Yosua upupmempa, sun tonpa ne cap, sun nimi cap, antamna tep, ne si eremna ati, lyom opkal bol di domi ati damai bena tekrerumpa, nedi Yosua tep, ‘Nedi konum wepkene. Angepu kunkamrume,’ pepkamane,” pepu. Upepu pangeda, Musa cap, Yosua cap, Allah er si eremna opkal ati damaipu bereidi, Allah er damai tekrei. 15Berei pangeda, uku imnai ipmengepa, ila kurun ket bukra weleramre utopu, ila dua Allah si eremna opkal ati buplan damai yan teku. Ateku dua neitamaida, Allah er si Yahweh, adua neitamai yan teku.

16Ukupua kan-kan di, Allah er si Yahwehdi upu tenpu Musa tep pepu. “Kan den taru konum dam kepmara cadi, kan apu yapu deramitopu depmempa, sun ton peiamyaipu tu palipkengepa, sun cap beipye peingkamrume. Depmemnyopda, Israel nesala talepmuma tapmem pangeda, sundi ne tep ton tapnenge dingeda, sun benkameng mutu kunge nesala, si eremenge isokpu talepra si eremkamenge. Ne teppu, ‘Nun nai bo Allah,’ men tenenkamnenge. Ukupnenge dingeda, nedi sun tep, ‘Tek sisi ukunkamsene, ukunkamsene,’ pepra deiamsisi upuda, tapra yanipkamenge. Yuk keca sipu erepkamenga tepa.

17Ukupmenge pangeda, ataru dipu ne ila tulum sun tep kupkamnere. Ukupnerepa, sun tep tapkamsene. Tonda, sun damai ne mepropnedi, sun melipra men kaleksenyopda, yuk nengdi Israel nesala popra bisbisa kapkamenge. Tonda ila mambul keca cap, ikin weik keca cap, tupa sun damaipu kuprepa, kange mun keca sun damai kunkamsere. Ikin weik kupre taruda, ukuprepa sundi pepkamenge, ‘Uo, ila mambul keca nun damai kuser ngeda, nun nai bo Allahda nun damai ton men kurura tep, ikin weik kuserur do? Teka Allahdi tapseua tep, ikin kuserure,’ pepra mali penkamenge.” 18“Upepra mali penkameng dinin, ataruda sun damai di gopropnedi, men melipra kalekamsene. Ange yumada, sundi ne tapra yuk isok sipu eremengedi, pio mali kununga deiki ja,” Allahdi pepu.

19Upepudi, aupu ton pepu. “Ange tep nengeda, apepkusen mutda, ange sekrapmemdi, Israel nesala tep bena peterepkurume. Pepmem pangeda, Israel nesaladi amut penkamenge. Ukupmengedi, amutda nedi sun tep, wenemna upu pio kupkamre. Ada, nedi Israel nesala tep, teleppu kuramsi dinin, sundi mali kuramidi tapneia tep, awenemne mut pepkusene.

20Ukupkameng keca lape pepkusene. Ada, nedi sun co puna neng tep, ‘Pio telep mutu karepkamsene,’ peramsi mutu wengbana tep, anesala doupra dubenkamne. Amutuda, akeca-keca weik mutu, pio telep mutu tep, nimi pein keca weik kure mutu cadi, sapi cap, kambing cap, domba cap, moum tuyung susu me weik kurure. Tonda, mong me cap pio weik kurure. Telep keca yamupra karepnepa, sun putaramretopu weike jepmengepa, boupmengopda, sun nong galemna weik kunkamre. Dinino, kange deipra teleppu konum kupmengopda, sundi ne tapra, isok sipu eremengedi gudinkamenge. Isok sipu eremkamenge. Ukupmengedi, nedi, ‘Ukunkamsene, ukunkamsene,’ pepra peipsinge upuda, yanipmengedi, ne tep songe tenepkamnenge,” Allahdi pepu.

21Upepudi aupu ton pepu. “Ataruda, weika di ila mambul keca cap, ikin keca cap, tupa sun deiki kuprepa, sun kange mun kunkamre taruda, ukuprepa, apepkusen mut upuda, sun tep wenemna upu ton kupkamre. Ange deiyoda, amut peipkusen ngeda, sekra karepmem pangeda, sun deipgerekdani bankameng nyapu yuma kael kepmengedi, peipdanen bankamenge. Amenda taru, men lupropkamenga tepa. Amenda taru ikin keca weika di, sun deiki konum kupyopda, amut upu sun kange di ton cap tenenkamenge. Sun kapul kupmenge taru dinin, sun kupkamenge kecada, ne konum kaele.

Ada, nedi, sun co puna neng tep, ‘Ne si deiki di pepsene. Apio telep mutu karepkamsene,’ pepra deiamsi upu, amutu kapul dubenkamsen taruda, sun amenda taru mali kupkamenge ngeda, ne konum kaele.” Allahdi Musa cap, Yosua cap tep pepu. 22Upepka tep nengeda, Allahdi peipupa, Musadi amut upu yuma seku dingeda, Israel nesala tep peterepupa, kael kepi.

23Ataru dipu, nimi si Nun er mi Yosua tep, Allah er si Yahwehdi pepu. “Kan dipru neitamai pio moupra tenepmemdi, kan dipru neitamai cap, nonge cap puto kupra deipmemdi, kware gum dipapu, balilapu kunkamrume. Ange deiyoda ake. Ne Allahdi sun co puna neng tep, ‘Amutu karepkamsene,’ peramsi mutuda, Israel nesala dopra dubenkamrume. Ne Allahdi kan damai teknedi, tamna gum tupa pio melipkenedi, tonpa bankamneme. Nedi kan tep pio men tapkamkene. Atep kwar pio men kunkamrume,” Allahdi Yosua tep pepu.

24Allahdi, “Angeda ukunkamrume, dinin angeda men kunkamrume,” pepra deipu upu yuma, Musadi tenpu peda ton men tapudi, tenpu buku neitamaipu sekra deipu. Gonga kemnai di dipdongopra, sirya gawal danai peda, pio mambul kange doupra sekra gawal dau. 25Konum gawal dakra seku dingeda, Lewi yala neng dinin, sunda Allah er si Yahwehdi, ‘Ukupkamsene, sun ton ukunkamrume,’ peipu upu kipi co bekin, er sida Peti Perjanjian doupra embarami neng tep, Musadi aneng tep pepu.

26“Allahdi, ‘Ukunkamrume, ukunkamrume,’ peipupa seksi upu yumada, dopropso. Ukupmumdi, sun nai bo Allah peiamu upu deiami co lase bekin, er sida Peti Perjanjian pumbon deipyaipu bena deipkurume. Ukupmumpa, pio akaprepa, Israel nesaladi mali kupmenge taru yumada, ‘Aupuda wenemna upu peamseua’ tenen, tupa kaprepa tenenkamenge,” Musadi pepu.

27Upepudi aupu ton pepu. “Ange pepmasenada, tali tep gume. Ne kaele, sunda balila weik cap, nimi deiyo neng upu gekena gum cap nesala kurume. Tonda, ne gam kuramne taru di, sun taleramsi taru pe, sun nai bo Allah er si Yahweh tep, balila kupra er upu gekena gum di, yaniramruma cadi, ne kaele, ne konum depnyopda, ataru peda pio weika di ton cap, balila kepra mali weik kunkamrume.

28Atep nengeda, sun Israel nesala yuma gekepneso. Sun deiyo talepi neng cap, deiyo wisi neng cap tep upupmumpa, ne damai bulupkamenge. Bulupra ne damai yangepa, ne tenepsi upu yuma, sun damai pepnepa gekepkamange. Gekepmengopda, im deiki kunge neng pe, tuai mutu kunge nesala peda, ‘Israel nesalada, Allah er mem upu konum gekepmange’ tenen, dinkamsenge.

29Ange peda tali tep gume. Deiyoda, ne kaele, ne depne pangeda, nedi sun tep, ‘Angeda meme,’ pepra peteremamsisi ngeda, tapmumdi, yuk mali bisipu bena, pio mali-mali weik kunkamrume. Tonda, Allahdi, ‘Angeda pio malinge cadi, ne songe,’ tenere keca peda, amenda taru tali lupra kunkamrume. Ada, sun pe buru di keteneipmumdi, petupra deipkamrum keca tep nengeda, Allah er si Yahwehdi sun tep, pio mali kange doupra, yu weik kupkamsere. Ukupmum pangeda, Allahdi sun wenemna tep, ila kange mun keca, sun nong deiki deipkamsere.” Musadi pepu.

Ataruda, Musa aupu yuma Israel neng yuma gekenmaiyai pepra gawal daku. 30Tonda, ataruda, Musadi amut upu yuma pepu. Ada amut upu gonga kemnai di, dipdongopra sirya gawal danai peda penmaupa, sun Israel nesala yuma gekenmai.