Deuteronomy 32

Musadi mut pepu upu

1Musadi, mut pepu upuda ake.

Ime kure keca yuma, ne upu pepkuna tep, sunda gekeneo. Tonda, tuai kure keca cap, nesala cap, ne upu penepa, sun yuma gekenkunerume. 2Ne peterepkusen upuda, weike melimkamsera cadi, mo puru sangamra utopu kupkamsere. Tonda, kwirye dei sakredi, pen paleramra utopu kupkamsere. Tonda, ukupu koupmenge betei deiki mo puru sangamra utopu kupkamsere. Tonda, ne peterepkusen upuda ukupkamsere. Ukupmantoda, wa pepra kouamengepane, mo weika di ceprepa, akeca bongopredi nepra du telep mouramretopu, ne peterepkusen upuda melimkamsere.

3Nun nai bo Allah er si Yahweh penkamne. Tonda, nun nai bo Allahda, ila mambul kurenge cap, er puto weik kurenge cap tep nengeda, ‘Erda pio telepe,’ pepra, er sipu eremepedi gudinkamepe. 4Nun nai Allah, yuk-yuk men kurure. Erda gel pala yangamra utopua kurure. Ila gel pio akuretopu, Allah peda, pio akurure. Er tenena cap, er kure keca capda, yuk-yuk men kurure. Er pel dore ngeda, pio teleppu kurure. Tonda, erdi, ‘Ukunkamne,’ perurtopu, angepu kurure. Er kure keca yumada, tek sisi kepra dumsisipu kurure. Allah er pel dore ngeda, ‘Ton tamna telep kupnedi, ton tamnada kaukepkune,’ men teneredi, er peretopu, ange yuma pel dorure.

Malinge tenpu peda ton men kuptue. Er kure keca yumada, yamupra dumsisipu kurure. Nimi kuramengtopu, erdi telep kupra upu dumsisipu bongdiserure. Atep nengeda, er si eremnupe. 5Ukurur dinin, ataru nesalada, er damai mali keca kunge nengda, er nyapu tupa men kununge cadi, ali weik kunkamenge. Ataru kunge nesalada, Allah men tenere bisi, gualin bisipu yange nesaladi, mali weik kununge.

6Allah er si Yahwehdi sun tep, teleppu meliamseu dinin, sunda er tep tamupra amali kuprum ngeda, warya tep do? Amali kuprum ngeda telep do? Sunda pio walwal nengto, kange tenena gum di, kael men kepmanto nesala utopu kuprume. Sun nai bo Allahdi, sun Israel nesala tep, ‘Ne mawa nesala kunkameng’ tenen, men ketekepseu do? Erda Israel nesala kwemdina deiyo ngebo men kurur do?

7Atep nengeda, pumun taru sun nong neng kuraminge, kange di ton cap tenenkamrume. Menop taru kurami nesala tep, tenenkamrume. Tonda, sun kael kemna tep, sun nai yapu cap, sun wisi-wisi neng cap, kurami taru Allahdi pel doramunge tep, asipeteprumpa, sundi lape peipkamsenge. 8Ataruda, puto keca yuma deiki tara kure ngebo, akeca-keca yuma talepra, Ila Eremna Ngebo Allahda, ketekemdina deiyo ngebodi, nimi yuk-yuk akuramitopu, sun talenkami keca yuma bokra kareramu. Tonda sun apu bo Yakub dinin, er si ton Israel, er nyapu akuramitopu, nukrapudi, sun talepra kunkami mutu peda, yuk-yuk bokra deipu.

9Uda, Allahdi akupunge deiyoda, er mambul tenere ngeda, erdi wepra anuamu nesala pua. Allah er mawa kecada, Yakub erdi deipra dadeipdanen barami nesala pua. Ada Israel yala nengda Allah er pedi wepra deipu nenge pua. 10Sun aneng kurami mutuda, telepai gum dinin, me cap, nimi cap men kurami mutu neitamai bena dipetepudi anesala epu. Amutuda, akeca-keca peda kouptengepa, men bongoptuai, katauai mutu kuramipa, Allahdi bena aneng epra melimamu. Allah dipapu sun putaramu keca yuma tep melipra kareramamudi, tupa kalengamu. Ada nimidi, sun asuru du tep, ‘Tolokserur’ tenen, pio moupra kalengamengtopu, Allahdi Israel nesala tep pio moupra kalengamu.

11Ukuramu taruda, ukupmantonge ton pepkusene. Ada, Mul Damnye ma walup bukamrepa, er nindi lyana peteremna tep kuredi, ati doamrea sirik tara yan bukredi, longtamrepa, er mi lukrana dukduk pepredi, baba perepa, er nindi pol deiyoai taleprepa, langamra utopu, Allahdi Israel nesala tep, pio moupra kalekra melimamu. 12Israel nesala tupa-tupa melipra dubaramu ngeboda, yuk tali isokdi gume. Allah er dipapu kalekra meliamudi, kikiman kuramu. Yuk mutu nesaladi si eremami isokdi gume.

13Allahdi meliamupa, Israel nesaladi mutu deiki welepra embarami. Allahdi Israel nesala tep meliamupane, sun pe wa peamipa akeca-keca weika di du mouamupa, kipra jerami. Tonda, akeca-keca gum mutu, pio mali mutu neitamai kurami dinin, Allahdi melipra kareramupane, Israel nengda, sun putaramu keca yala-yala yuma, telep keca dopra jerami. Tonda, Allahdi meliamnga deiki di, sun eramipa, gel kan-kan di mong me eramidi, mong me gwepra jerami. Tonda gel weik tu deiki, sun zaitun co kourami dinin, Allahdi meliamupa, zaitun co du mouramupa, er du dakra minyak ton purupra jerami.

14Tonda, Allahdi meliamupane, sun sapi bisam cap, kambing bisam cap, moum tuyung me weik akapupa, dororamidi jerami. Tonda, domba bisam cap, kambing cap, nong weiknge kareramupane, popra galemnapu jerami. Ton ngeda, Basan mutu domba gemnge pio telepnge, ton kareramupa popra jerami. Tonda jagung utopu jen keca, gandum cap, tonda anggur me telepngepu kareramupa dopra jerami.

15Allah er mawa nesala, Israel nengda, ange-ange yuma jeramipane, sun nong genada, galemna dopramupa ila di nepbarami. Akeca-keca teleppu kuramupane, sun Israel nesaladi, balila kepra, menop taru di, sun ketekeiamu ngebo, Allah tep, ‘Nun song’ tenen, tapi. Tonda sun tep lyepramu ngebo Allahda, er si yanipra tamami. Nimidi, ‘Yu nengdi popsenung’ tenen, ‘Ila mutu yangne gel leleipkamser’ tenen, agel iriamu tara inimbaramengtopu, sun lyemna deiyo ngebo Allahda, ila mutu yangne gel utopu kuramseu dinin, sundi er tep tamami.

16Allah tamami dingeda, amutu neitamai kurami nesala si eremami isok-isok, pio mali-mali isok, sun sipu eremamya deiki, Allahdi Israel nesala tep tulum kemdina cap, yu kemdina cap weik kuramudi, mali kange doamudi, sun tep dipru wiliamemeu. Isok-isok yuma tep nengeda, pio mali kununga cadi, Allahdi, ‘Angeda ne songe,’ tenerure.

17Tonda, Israel nesaladi, Allah tep gum dinin, tali isok si tep, sun gam kun keca popra karerbaramidi, isok sipu eremamidi gudirami. Israel nesaladi, isok si eremami ngeda, menop taru men kael keami. Aisok si yumada, ukupu taru amutu nengdi lap peramipa, kael kepi. Aisok-isok yumada, Israel nesala sun nong nengdi, akeca pio men si eremamidi, sun tep kwar men kuramu. 18Mutu yangne gelda, pio bungamretopu, sun nai bo Allahda, pio meliamseudi, men tamamseu dinin, sun Israel nesala ketekepra deiamseu Allahda, tapmumdi luprorume.

19Sunda Allah er nyapu cap, er ner nyapu cap, utopu kuramrum nesala dinin, Allah taprum pangeda, Allah epseudi ange tep nengeda, sun tep dipru pu jeramupa, yu kupra, sun tep, ‘Dakwapye’ tenen, tapseu. 20Yu kupka tep nengeda, Allahdi pepseu.

Sun damai di ne nongda inipnepa, sun ton cap men epkamnenge. Ukupnepa, sunda kupbaramenga sirya taruda, ‘Ware kupkameng do?’ tenen, dinkamne. Sun tapkamnada, tali tep gum dinin, deiyoda, sun ataru kunge nengda, dumsisinge ton men kununge. Sundi, ‘Ukunkamepe,’ pengetopu tek sisi pio men kununge. Mali nyapudi, sun nai yape men gekengedi, malingepu kuramengtopu, ataru nesaladi ne tapra, ne peipsi utopu men dukdongopra kununga tep, nedi sun tapkamne.

21Sun tek sisi Allah gum dinin, isok si eremenga deiki, ne dingeda, ‘Uo, warya tep, ne sipu tupa men eremnunge’ tenen, sun tep dipru wilipneupa, mali kange dounune. Tonda, tali keca, isok si eremenga deiki di, yu weik kunerure. Sun ukunengeya tep nengeda, ne menop taru men weiamsi nesala dinin, tali yala nesala makupne pangeda, Israel nesaladi, ‘Uo, warya tep do? Nun men melimserur dinin, yuk tali yala nesala melimrurada, warya tep do?’ tenen, dipru wilipra mali kange dounkamenge. Ange utopu, yuk yala nesalada, tek sisi ne tep telep kupra men kael keamnei nesala dinin, sun tep makuramnepane, Israel nesaladi, ‘Warya tep do?’ tenen, yu kupkamre.

22Ange yuma ukupkamnada deiyo ake. Ne yuda, uku bu jeramre utopu kupra jepbaramreyane, konum depra benami neng mutu, tuai amutara peda jepbankamre. Ne yu, uku bu utopu ngeda, tuai mutu yuma pe, nimi kouamenge keca yuma pe, nimi talenge keca yuma peda jepropkamre. Tongeda, ila mutu-mutu yuma, tuai iriamu tara peda, uku jepropredi gawal dakra ayuma jepropkamre. Ada, nimidi, ‘Amambul keca men gum kupmanto keca,’ tenenung keca yumada, nedi gum kupra deipkamne. Allahdi pepu.

23Upepudi, aupu ton pepu.

Nimidi sun podan neng tep, mar sun damai yan dopmengedi, marapmengetopu, nedi tupa-tupa pio kange mun kecapu weika di karepnepa doronkamenge. 24Ukuramne dingeda, nedi karepnepane, wai dam kipmanto keca gum kupreyopda, sun jen putapya deiki di, sun nonge boun kuprepa, pu jepra deiki cap di denkamenge. Tonda nedi karepnepane, ila kange mun pu ajeramrepapu, nedi mangkau kepnepa, denkamenge. Tonda, nedi karepnepane, yuk-yuk keca bura mutu kunung keca di, aneng popra jepropkamenge. Tonda ne karepnepane, kel-kel tu deiki embaramre yu baldi sitopkamrepane, nimi weika di denkamenge.

25Tonda nedi karepnepane, sun ati dam bisi neitamai yuma, sun podan nengdi, parang ya di popdanen embangedi, sun nyapu weika di denkamenge. Sun nyapu gum kupkamenge. Ukupmengepa, ati kunmange neng yumada, kwar kunkamre. Ukunkameng taruda, kaber nerapu cap, kaber neng cap, wisi neng cap, pio metek nyapu cap, sun yumada depmengepane, gum kupra deipkamenge.

26Nedi uperamsi, “Nedi sun tep enepra dokotepnepane, sun yuma gum kupkamenge. Yuk neng yumadi, sun si tupa men tenenkamenge. Aneng tep lupronkamenge. Sun kungenge ton cap tuai nengdi men tenepkamenge.” 27‘Ukupkamne,’ tenepsidi peramsi dinino, nedi Israel nesala yuma popra gawal daknepa, sun podan nengdi, walwal kupmengedi, balila kupmengedi, ‘Allah er si Yahwehda ila puto ngebo, penung dinin, Yahwehdi ange men kuramu. Er nyapu Israel neng yuma, nun pe puto dipapu popmepue,’ pepra, ‘Kange eremnung’ tenen, tenimtonune.

28Sun Israel nesalada, telep kupra men tenenunge. Ila kael neng men kununge. Sundi, ‘Ange kuptepe, angeda men kuptepe. Telep ngeda ace, mali ngeda ace,’ tenen, kael kemnada men kununge. 29Uo, sundi, ‘Tupa mali kupmepyopda, amenda taru kange mun kunkamepe’ tenen, kael keptengtoda, telep kuptenge dinin, ange men kael kepkamenge. Angeda tek sisi kael keptengopda, telep kupkamtenge dinin, men kupkamenge.

30Tenpu ngebo dipapu seribu jen neng tep, domembetu do? Ange utopu, butene neng dipu 10.000 jen neng tep, popbisipretengedi, ‘Sepra embaso,’ pepretenge do? Gume, angeda men kupmanto. Tek sisi, sun nai bo Allahdi aneng tep, ‘Dakwapye, sun dapoptenge’ tenen, men pepyopda, ange men kupmanto. Sun nai Yahwehdi, ‘Israel nesala dapoptenge’ tenen, men pepyopda, yuk mutu nengdi, men popbisiptenge. Ila mutu yangne gel pio akuramretopu, sun nai bo Allah pio kalengamu dinino, Israel nesala sun wenemna tep, Allahdi sun tep tamupane, sun podan nengdi popbisirami.

31Ange tep nengeda, kael kepso. Yuk mutu nengdi si eremnung kecada, puto gum keca dinin, nun nai bo Allah puto weik ngebo, ila mutu yangne gel utopu kurure. Sun tali si eremenge keca utopunge gume. Israel nesala, sun podan neng pedi, ange penunge. ‘Gume, Allah er si Yahwehda, tek sisi ila puto weik ngebo, er utopu ngebo ton men kurure,’ penunge.

32Ukupmanto ngeda pepkune. Tek sisi mali anggur tapu, yaten malinge dipu bongoramretopu, apio mali kurami nesala peda, mali neng dipu derirami. Sun apu ya peda, Sodom mutu neng utopu kurami. Ange utopu, mali anggur tapuda, mali tuai di bongoramretopu, sunda pio mali mutu, Gomora mutu utopu mutu di yakarami. Sun kurameng kecada pio mali cadi, ukupmanto ngeda, anggur tapu duda, telep me men kwapmar dinin, nimi pon me utopunge akwapmare. Sun anggur tapu duda, taue men perur dinin, yu weik kurepa, men jepmanto kurure.

33Ange utopu, sun anggur me ketekemnungada, kobom baldi inipra mapmaryadi, nimi si topredi, yu ul kipdongoprepa, nimi deramenga utopu kununge. Ange yuma deiyoda, sun kunge keca yumada, pio mali kununga tep pepne. 34Ne Allahdi pepsene. Nedi sun tep wenepra kupkamne kecada, tupa men tenenun do? Angeda men lupronkamne. Nimidi sun kunumna weik keca, ‘Gum kupserur’ tenen, pio telepaipu mawa deipmengedi, selok dukdongoramengtopu, sun tep wenepkamne keca tupa tenenune. ‘Ataru ace,’ tenepnyopda, aneng wenepkamne.

35Ukunung neng sun menengada, ne Allahdi sun mali pel donung utopu kupra, ila di wenepnepane, sun kange mun weik kunkamenge. Nimidi olapne keca deiki saka popdaramengtopu, sun mali kuramenga tep, amenda taru nedi aneng tep wenepkamne. Sun aneng pon taruda, sik men kupmare. Aneng popnedi, gawal dakamne taruda, menmena yankamre, konum dam kepre. Allahdi pepu.

36Allah er si Yahwehdi, er nyapu sun malinge tep, upu bokeipredi, wenemkamre dinin, sun puto gum kuprepa, aneng konum gum kupbangopda, ka di ton cap bicau tenepkamre. Er nyapu, yuk neng amutara kungedi, tali pelpu donge neng pe, uda sun pe kange dipu pel donge neng peda, gum kupbangopda, Allah diredi, bicau tenipkamre. Bicau tenepredi, er amutara kunge neng, Israel nesala tep, ka di ton cap, dipru boun kuprepa, bicau tenepredi lyepropkamre. 37Ukupre dingeda, Allahdi er nyapu tep, “Sundi isok tep, ‘Nun nai bo, puto ngebo,’ pepra si eremamrum ngeda, ukutaru dan cei kunung do? ‘Nimi popsenung’ tenen, mutu yangne gel iriamu tara nimi inimnungtopu, sundi tali keca tep, ‘Melipkamseng,’ teneramrum dinin, ukutaruda akeca dan do?” pepra asipetepkamre.

38“Sun isok gispal dona tep, isok si eremamumdi, gam keca popra, meta dopra karerbaramrume. Tonda, aisok si eremna tep, anggur me cap doupra karerbaramrum dinin, ukutaruda aisok upupmumpa, sun adipapu yan melipkamseng do? ‘Kange mun keca yakaserur’ tenen, atali keca upupmumpa, yan melipsetenge do, gum do?” Allahdi pepkamre.

39Ukutaruda, sun yumadi ne kael kepneso. Tek sisi sun nai bo Allahda, ne tenpu kunune. Yuk Allah ton pio men kurure. Atep nengeda, ne dipapu gam kuna deiyo cap, dena deiyo cap, karesenune. Ange utopu, telep kuna cap, mali kuna deiyo cap yumada, ne dipapu karesenune. Nedi, ‘Popkamsene,’ tenepnyopda, popnune. ‘Kwetepkamsene,’ tenepnyopda angepu kunune. Ware keca do yuma, ‘Nedipu talepra wenepkamne,’ tenepnyopda, ware ngebodi lyepsetu do? Gume, yuk nengdi ton upu men seknetengdi, men lyepsetenge. 40Tonda, nimi yuma epmengedi, ‘Uo, pio tek sisi pepsere, tenepkamneng’ tenen, ne buru erepnedi tek sisi pepne. Tek sisi, neda, Gam Kuna Deiyo Ngeboda, ne tenpu kunune. Neda, pio kunkamne.

41Ange tep nengeda, nedi sun wenemna cap, pona cap tep, ya ketenepra deipnepa, si leng-leng penkamre. Aya doupkamne ngeda, ‘Allahda nun songe,’ tenenenung nesalada, wenepra pona tep ketenepra deipkamne. Sun mali nengdi ne tep mali kuramneitopu, sun tep, wenepra upu bokeipsenedi, poptapkamsene. 42Sun yumadi ne tep, ‘Nun songe,’ tenenung nesalada, popnepa ne mar deikida, sun yapipu kupkamre. Ne parang ya di sun popnyopda, sun nong yuma sekropnedi, gawal dakamsene.

Ukupkamne taruda, sun ateng koupra wenemna ati dongorami nesala peda, popnepane, sun yapi embankamre. Tonda, ne nyapu Israel neng tep, sun podan neng, sun deiyo nengda, ‘Pio jen talen neng kunkamep’ tenen, giso potong men sengami neng tep, sun kum sektapnepane, sun giso sakrepa sun yapi embankamre. Allahdi pepu.

43Ange tep nengeda, sun ban-ban yuma kurum nesalao, sun yumadi, Allah er nyapu cap, kange deipra pingpina di kunkamrume. Deiyoda, mali nengdi, Allah er pel don neng weike poramipa, sun yapi embaramu. Ange tep nengeda, Allahdi, amali neng, sun wenemna tep, poptapkamre. Allahdi, er tep, ‘Nun songe,’ tenenung nesala tep nengeda, yu tenepra ponkamre. Erdi sun tep, wenepra popkamre. Ada, mali nengdi, Allah er mutu cap, er nyapu cap tep, mali weik kurami ngeda, Allahdi lepsisikra dopredi, lyepropkamre. Ange yuma telep kupra deipkamre. Musadi amut upu pepupa, Israel nengdi gekepi.

44Musadi amut upu pepkou taruda, er cap, Nun er mi Yosua cap, Israel nesala damai kikiman yai. Musadi, Allah tep gudinmaudi mut penmaupa, sun Israel nesala yumadi gekenmai. 45Musadi Israel nesala sun kori, amut upu yuma konum pepkopda, Israel nesala yumadi gekepipa, erdi sun tep upepu. 46“Ne ataru pepsen ngeda, moupra gekepmumdi kael kepra kunkamrume. Ukupkamruma deiyoda ake. Ada nedi sun tep, ‘Angeda kunkamrume, angeda men kunkamrume,’ pepra, pepmasen upu yumada, sundi sun nyapu tep peterepmum pangeda, sun nyapudi aupu yuma moupra gekepmengedi, angepu teka tenepra kupbankamenge.

47Ange tep nengeda, apepsen upuda tali tep men pepsene. Dinino, sun pe gam kuna tep pepsene. Aupu gekepmumdi dukdongopra bouna di kuramum pangeda, aupu deiki di, Yordan me goupra, ortara benkunkamrum mutu neitamai di, keteng tamun weika di, telep kupra gam pio kunkamrume.” Musadi pepu.

‘Mutu si Nebo mutu deikida, Musa depkamre,’ pepu upu

48Musadi aupu konum pepropu pangeda, atumi dipapu, Allah er si Yahwehdi, Musa tep pepu. 49Moab mutu tara dinin, ila mutu-mutu weik kupkaida, Abarim mutu welepkurume. Ada, ati arum domyai kota Yeriko mutu ortara, atarada Nebo mutu deiki welepkurume. Welepmemnyopda, Yordan me ortara dinkurume. Ada, Nebo mutu welepmemdi, Israel nesala karepkaman mutu, Kanaan mutu ortara epkureme. Kanaan mutu wekmengedi, amutu talepra kunkamenge. Amutuda, sun mutu sisa kunkamre.

50Ange yuma konum epmem dingeda, kan amutu Nebo mutu deiki depkamareme. Depmemnyopda, kan co puna neng deramipa, palipya sun sambala benami mutupu bena kunkamrume. Ange utopu, kan du bo Harun peda, Hor mutu deiki deamupa, palipipa, er apu yapu mutu benamutopu, kan peda kupkamareme.

51Ukupkamrema deiyoda pepkukene. Deiyoda, sun butene yuk-yuk dinin utopu, nedi, ‘Ukunkamrerum,’ peipsisi upu teka tenena gum di, sun yuk teneprerum ngepu kuprerumpa, sun Israel nesala dirami. Ada, me cap, nimi cap gumai, mutu si Sin mutu dinin, mutu sida Meribat, tonda Kades mutu damai di amali keca kuprerume. Sun Israel nengdi, ‘Allahda pio Lek ngebo kurure,’ teneramnetenge dinin, sun mali kuprerumnge epya deiki di, angeda men teneramnei. Ukuprerum ngeda, ada ne nong cap, ne upu cap, yanina utopu cadi, ukutaru wenepkamakene. Ne tep teka tenepra men guiamnereruma deiyo di depkureme. 52Ange tep nengeda, ortara mutu, Kanaan mutuda men benkurem dinin, karenai di asurupu epkamareme. Allahdi Musa tep pepu.