Deu 33 | XteSC | STEP | Musada, Allah er pel don ngebo kuramu. Tonda, er kapul depkou taruda, ‘Allahdi Israel yala nesala tep, telep kupra melipkamre’ tenen, Israel yala neng yuma tep, pingping keca karepudi aupu pepu.

Deuteronomy 33

‘Allahdi Israel yala nesala tep, telep kupra melipkamre’ tenen, Musadi pepu upu

1 Musada, Allah er pel don ngebo kuramu. Tonda, er kapul depkou taruda, ‘Allahdi Israel yala nesala tep, telep kupra melipkamre’ tenen, Israel yala neng yuma tep, pingping keca karepudi aupu pepu. 2 Allahdi Sinai mutu deiki yaudi, Seir mutu deiki keteng asuru pakra tengyakaramre utopu yaupa, sun diramipa, sun tep yana melipu. Tonda, erda Paran mutu dam deiki, dirin weik karepupa dirami. Allah er yau taruda, denge weik men nukmanto malaikat, sepuluh ribu (10.000) malaikat cap kikiman yaipa, er dumsisi buru tarada, uku bu jeramretopu kupupa, dirami.

3 Tek sisi, Allah erda, nimi tuai nesala tep bicau tenerure. Allahdi pio dumsisi nesala yumada, er nyapu kepre nengda, erdi talepra melimrure. Sun yumada, Allah er yan damai gutam tu dipra er si eremnunge. Tonda Allahdi, ‘Ukunkamrume,’ pepra peiamu upu tep, teka tenepra talepmengedi, dombanunge. 4 Ada Allahdi, ‘Ukunkamrume, ukunkamrume,’ peipupa, Musadi sekra karepseu upu, Yakub er yala neng yuma talenung upu tep pepne. Israel nesala aupu gekepra, pio talenkamenge. 5 Israel nesala, sun yala yuk-yuk yuma cap, sun yala deiyo-deiyo neng cap, bupra kurami taruda, Allahda sun ila deiyo ngebo kuramu.

6 Musadi Ruben yala neng tep, Allah moropudi upepu. “Ruben yala nengda, ton men depkamenge. Gawal men dakamenga cadi, ‘Sun nimi weik kunkameng’ tenen, moropkene,” pepu.

7 Upepu dingeda, Musadi Yehuda yala neng tep moropu, “Ne nai Allah, Yehuda yala neng moropkenga tep, gekepkurume. Pumun taruda, Israel neng dinin, yuk yala-yala yuma cap, Yehuda cap, bokrap yuk-yuk kepropi dinin, ukutaruda, kange di ton cap, sun pe neng cap, tenpuai tamupra deipkurume. Yuk neng men melipmengepa, sun pe buru dipu, sun podan neng tep, popbisipterenunge. Ange tep, ne nai Allah, kandi Yehuda yala nesala tep melipmem pangeda, kan puto deiki di, sun podan nengda popbisipkamenge,” Musadi pepu.

8 Upepu dingeda, Musadi, Lewi yala neng tep, aupu ton moropu. “Ne nai Allah, kan tenepsemumnge kael kemna tep, upu bongdina deiyo gel, kan Urim gel cap, Tumin ^{▼▼Urim cap, Tumin cap – Akeca buteneda, ‘Gel do, wareto keca do?’ tenen, nun yumada walwalpu kunupe. Dinino, sun imam nengdi, ‘Allahdi, nun kunkamep ngeda lap pepkamser’ tenen, akeca butene dipeteramya deiki di, ‘E, Allahdi upepsere-upepsere, angepu kunkamepe,’ teneramidi, moupra kael keamidi, Israel nesala tep lap perami. Tonda, Bilangan 27:21; Keluaran 28:30 dinkurume.} gel cap, Lewi yala neng tep karepmume. Ada kandi, ‘Anesala ne kange deipne,’ tenepmum ngepu, Lewi yala nesala karepmumpa akeca taleami. Masa mutu neitamai di, ‘Anengda telep kupkameng do, gum do?’ tenen, Lewi yala neng tep, kurpeten keca di kurpetepmume. Tonda, me bunga mutu si Meriba mutu neitamai di, sun Lewi neng tep, “Ukuna meme,” pepra, sun cap, kan capdi upu deiki pangdarumdi, kurpeten keca karepmume.

9 Sun Lewi yala nengdi Allah kan tep, pio weika di teka teneramidi, ‘Nun nai yapu cap, nun nin yapu cap, nun weit yape cap, nun du yape cap, nun nyapu cap yumada, yambul mambul dinin, Allah er puda ila mambule’ tenen, kurami. Ukuramya tep, nun nai Allah kandi, ‘Ukunkamrume, angeda ton men kunkamrume,’ pepra deipsemum upuda, pio moupra taleamidi kalengami. Ukuramidi kandi, ‘Ukunkamsene,’ pepra deiamsemum pedina upuda, teka tenepra dombaramidi, ‘Israel nesala ton dombanung do, kael kepmang do?’ tenen, moupra kalengamidi peteremami.

10 Ukungedi kan nyapu Israel nesala tep, kan upu doupra peteremsenunge. Ada, Yakubdi deipupa dadeipbarami nesala, er yala nesala Israel neng tep, kandi, ‘Ukunkamrume, angeda ton men kunkamrume,’ pepra, peamsemum upu peteremsenunge. Ukungedi, “Nun nai Allah telepe,” pepra, nintong telep keca cap, nimi peirameng keca cap popra duyangedi, Allah er karena tep, pala gel taplakra yakeipyai deiki, uku sekra dongopmengedi, Allah kan si eremnunge.

11 Atep nun nai Allah, Lewi yala neng tep, telep kweipmemdi, melipmem pangeda, sun kael keamidi pel dorameng keca yuma, puto weik kepkamre. Tonda, sun pe buru di pel domenge keca yuma tep, kandi kange deipkamreme. Utenena tep, kan tep moropkene. Ukupmumdi, Lewi yala neng, sun podan neng yumada, Allah kandi popra, gum kupra deipmum pangeda, popnapu kupmum pangeda, kange di ton cap, sun podan neng men tektenge,” Musadi Lewi yala nesala tep Allah moropu.

12 Upepu dingeda, Musadi Benyamin yala neng tep moropudi pepu. “Sunda Allah bicau teneramseu neng cadi, Allah er damai kumumpa, erdi sun tep kalekra diserepa, komuni lukunda yumada, kware pio gum dipapu, telep kange doupra kunkamrume. Tenpu ngebodi, er mi oupra baramrepa, amidi tali kange doupra baramretopu, kunkamrume. Allahdi ange utopu kupra kalengkamsera tepa.” Musadi Benyamin yala neng tep pepu. 13 Upepu dingeda, Musadi Yusup yala neng tep pepu. Yusup erdi deipgerekdanenge tep pepu. “Ne nai Allah Yahweh, anesala sun kunkameng tu yumada, kwirye dei cap, mo purya cap karenkamrume. Tonda, kan melipmempa, sun tu amutara di, me beleprepa gwepra jenkamenge.

14 Tonda, Allah kandi melipmempa, keteng deiprepa, tonda war tekamrepane, atu deiki di akeca-keca yuma bongopredi, du weika di mouprepa, pio telepnge dakmengedi, ‘Weika di jenkamenga’ tenen, moropkene. 15 Tonda, pumun dadi abukamu mutu gon-gon ada, pio telep keca akapu ngeda, ‘Kandi melipmempa, dopropkameng,’ tenen, moropkene. Ange utopu, pumun dadi abukamu mutu buma neitamai, kandi melipmempane, ‘Pio telep keca mouramrenge yuma dakmengedi, kipkameng,’ tenen, moropkene.

16 Ange utopu, Allah kandi sun Yusup yala neng tep, tuai telep keca akapunge yuma, pio telepnge karepmuma deiki di, ‘Telep keca weika di, kange telepa di dopropkameng’ tenen, moropkene. Pumun taru bo bum keca palpal neitamai, uku jepmaua neitamai kupu ngebo, ‘Allah kan dipu Yusup yala nesala tep, pio melipkamrum’ tenen, moropkene. Akeca-keca yuma, pingping keca moropmaken keca yumada, Allah kandi, ‘Yusup er yala nesala damai deipkamrum’ tenen, moropkene. Ange tep nengeda, Yusup er yala nesaladi, atelep keca yuma dopropkamenga deiyoda, Yusup er du yapu yumada, akurami dinin, Yusupda sun deiyo ngebo, sun deiki tara kuramnga tep, amenda taru er yala nesalada, telep keca weika di dopropkamenge.

17 Yusup yala neng, sun puto cap, sun mambul kuramne keca capda, ila sapi bisam gemnge, menmena deipmenge nge, puto weiknge utopu kurure. Nimidi tapu men gerekmantonge, men peikmanto bura sapi bisam jem ngeda, er abol yakut yu weik akapmarya di, nimi lukra poramre. Ange utopu, Yusup yala neng, puto weik kupmengedi, sun podan neng ton popmengedi bisbisa kapkamenge. Yusup yala nengdi yuk mutu nesala, mutu sirik im sirik kunge nesala yuma peda, dipdongopra, popbisipkamenge.

Gem sapi bisamdi, er abol yakut butene di, nimi lukra poramretopu kupkamenge. Tenpu abolyakutda, Yusup er mi Efraimdi deipupa, dadeipdanen yakanung yala neng, denge weik beribu-ribu neng kununge. Butene abolyakutda, Yusup er mi Manasedi deipupa, dadeipdanen yakanung yala neng, denge weik beribu-ribu neng kununge. Anengda, men nukmanto dinin, sun jen talen nengdi pio weika di kupbankamenge. Musadi Yusup yala neng tep pepu.

18 Upepu dingeda, Musadi Zebulon er yala neng tep Allah moropu.

“Ne nai Allah, kandi melipmempa, Zebulon yala nengda, sun ila laut mokon deiki embangedi, yuk-yuk mutu neng damai bengedi, kunupdangepa, ‘Sun keca weik kupyopda, kange deipkameng’ tenen, moropne. ‘Ange utopu, kandi melipmempane, sun Isakar yala nengda, sun tenda ati deipra kumengaipu, telep keca weik kupbankamser’ tenen, moropne. Atep, kange deipkamenge.

19 Ayala neng butene di, sundi yuk-yuk mutu neng ton upupmengepa, amutu deiki yangedi, Allah er gispal dona tep, er tep karepmanto keca, tek sisi telepnge kareryakankamenge. Ataruda, sun cap, yuk-yuk mutu neng cap, ila laut mokon deiki di dekankameng keca kunupdange pangeda, akeca-keca yuma weika di dopropkamenge. Tonda, laut mokon sirik dinin, me wenenga deiki deipmengedi, kunupdankamenge keca, weika di dopropmengedi, ila isomka neng kunkamenge. ‘Ukunkameng’ tenen, moropkene naio,” Musadi Zebulon yala neng cap, Isakar yala neng cap tep, Allah moropu.

20 Upepu dingeda, Musadi Gad er yala neng tep pepu. “Nun nai Allah tep, kan si ila di eremkenupe. Deiyoda, kandi Gad yala neng tep, sun kunkameng mutu tapakra weik ton cap, kepra deiprumnyopda, Allah kandi telep kupra deipkamserume. Gad yala nengda, ila singa pusdi, yu weik kuredi, nimi buru do, giso do, popra jeramretopu, Gad yala neng peda, yuk mutu neng tep, pona puto weik neng kununge.

21 Gad yala nengdi, ‘Tu pio telep ngeda, nun pedi nun pe tep dopropkamepe,’ teneramidi, tu pio telepngepu dalupra dororamidi dakununge. Amutu ila deiyo nengdi, pio telepai dopropmantonge dopropi. Atu weika di, sun Gad yala nengpuda, sun pedi, sun pe tep, dopropidi gawal daki. Israel nesala sun ila deiyo neng yuma bulupra weki taruda, Allahdi Israel yala neng tep, ‘Ukunkamne,’ teneramu keca utopu, Gad yala nengdi kupi. Tonda, Allahdi, Israel nesala tep, ‘Ukunkamrume, ukupra kunkamrume,’ peamseu ngeda, sun Gad yala nengdi kupi.” Musadi Gad yala neng tep pepu.

22 Upepudi, Dan yala neng tep pepu. “Dan yala neng, sunda ila singa pus kaberngedi erepra, bura saka baramretopu kuredi, sunda Basan mutu neitamai di inipra kuremaipu, dato-dato di, sun podan neng tep, erepra puto di porbenkamrume.” Musadi Dan yala neng tep pepu. 23 Upepudi, Naftali yala neng tep pepu. “Naftali yala neng sun tep nengeda, Allahdi pio bicau tenerure. Atep, Allahdi Naftali yala nesala tep, weika di melimrure. Allahdi kareprepa, Naftali yala nesala dopropkameng mutuda, Galilea mokon dam tara di dipdongopra, keteng wengbaramre mutu yumada dopropkamenge. Tonda amokon dam tara di dipdongopra, itara mutu ton dopropkamenge.” Musadi Naftali yala neng tep pepu.

24 Upepudi, Asyer yala neng tep pepu. “Sun apu bo Israeldi deiamu nyapuda, weik dakunung dinin, Allahdi sun yuma tep nengeda, yambula di melimkamre dinin, sundi deipi mi Asyer tep nengeda, erda pio mambule cadi, Allahdi er yala neng tep weika melimkamre. Er tep ila pingping keca karenkamre. Er weitapsilip tep nengeda, Allah yambula di kange deipkamre dinin, er Asyer tep nengeda, ‘Erda pio telepe’ tenen, ila di kange derinkamre. Allahdi melimrepane, Asyer er mutu neitamaida, zaitun co du pio weik mouramrepane, zaitun du dakra purupmengepa, zaitun minyak weik kupkamre. Asyer yala nengda, isomkapu kunkamenge.

25 Telep ukungepa, sun nimi ati domengedi, akati dana-dana tara ongopra ikameng beilyada, er buplan dengdongon kecada, gat keca besi cap tembaga cap di betaipkamenge. Abeilya buplanda sun podan nengdi men dakra wektenge, pio akunkamre. Asyer yala neng yumada, keteng tamun weik gam kunkamengtopu, sun puto peda pio weik kunkamre. Yuk mutu nengdi Asyer yala neng tep, men bisbisa kapkamenge.” Musadi Asyer yala neng tep pepu.

26 Upepu dingeda, aupu ton pepu.

Israel nesala tep kalekra melimrur Allahda, er utopu ngebo ton pio men kurure. Er tenpua. Sun yuk yala nesala yuk-yuk isok si eremenge ngeda, tali kecapu. Israel yala nesala, sun si eremnung Allah, erda pio telep, ila puto ngebo kurure. Sun nai bo Allahdi, ‘Israel nesala melimkamne’ tenen, im cap, dua cap deiki di yana melimserure. 27 Allahda pio kunkamre. Yuma taru yuma, sun tep melimseredi kalengserepa, mali keca di sun damai men yatue. Allah er ila puto buruda, sun amutara taleseredi, er buru deiki di pio kalengkamsere. Sun podan neng tep, Allahdi upu sengrepa, sun damai men yakankamenge. Allahdi sun tep puto karepseredi melipserepa, sun podan neng tep, ‘Aneng popkupe,’ pepra eneprumpa, bura saka bendopkamenge. Ukupmengepa, aneng popra gawal dakamrume.

28 Ange tep nengeda, Israel nesala yumada, sun yuk telepaipu kunkamenga cadi, Yakub er deipgerekdani yumada, kange doupra teleppu kunkamenge. Mali nengdi sun tep men yana poptenge. Amutuda, jen keca weike akapkamre. Ada, mo puru im deiki di sakredi, sun kunai telep kupra deiprepa, gandum cap, anggur me cap weik kurure. Sun mutu neitamaida, teleppu kunkamenge.

29 Atep, sun Israel nesalao. Sunda pio telep kunkamrume. Allahdi pio telep kupra deipkamsere. Allah er si Yahwehdi sun Israel nesala tep, lyepra deipseudi weamseu dinin, yuk mutu kunge nesala tep nengeda, angetopu sun tep men wepu. Allahdi sun tep melimserure. Jen talena nengdi, ‘Mar di popsenung’ tenen, teng kenengamentopu, Allahdi sun tep moupra kalengserure. Nimidi pio telep parang ya doupmengedi, kalengdaramengtopu, Allahdi sun tep, kalekra melimseredi, sun podan neng tep popbisipkamre.

Ukurura tep, er melipserepa, sun podan neng damai bemum pangeda, anengdi kware weik kuprepa genedongonkamenge. Ukupmengedi, ‘Uo, nun pona gume, bicau tenepseso,’ pepra moropkamenge. Aneng yuma popbisipmumdi, sun nong deiki yanipkamrume. Tonda, sun isok si eremna tep, mutu deiki deriramenge kecada, uruptapmumnya deiki yanipra bankamrume.