Deu 34 | XteSC | STEP | Musadi ban mutu neitamai, mutu si Moab mutu taprapudi, yuk mutu si Nebo mutu dup welepu. Nebo mutu deiki dinin, mutu dup si peramyai Pisga mutu dup welepu. Pisga mutu dupda, ada Yordan mekin dinin, keteng yakan tara kurure. Nimi ati Yerikoda, nimi ati arum weik domyai, Yordan mekin ortara keteng wengbaramre tara kurure. Pisga mutu dupai di, keteng wengbaramre tarada, nimi ati domyai Yeriko mutu eptume. Amutu deiki konum welepu pangeda, Allahdi Musa tep pepu. “Uda, nedi karepkamsen mutu yumada, keteng wengbaramre tara, ortara akapmarada adano, amutu yuma epo,” pepu. Upepupa, Musadi Nebo mutu deiki dinin, ortara epu mutuda ake. Ada, dutarada, Uwa Mokon akapu dinin, amokon deiki tara mutu si Gilead tara epu. Adinin pio dipdongopra itara mutu, per icei Galilea mokon deiki tara dinin, nimi arum domyai mutu si Dan mutu ton epu. Amutu yuma epu.

Deuteronomy 34

Musa depu upu

1 Musadi ban mutu neitamai, mutu si Moab mutu taprapudi, yuk mutu si Nebo mutu dup welepu. Nebo mutu deiki dinin, mutu dup si peramyai Pisga mutu dup welepu. Pisga mutu dupda, ada Yordan mekin dinin, keteng yakan tara kurure. Nimi ati Yerikoda, nimi ati arum weik domyai, Yordan mekin ortara keteng wengbaramre tara kurure. Pisga mutu dupai di, keteng wengbaramre tarada, nimi ati domyai Yeriko mutu eptume.

Amutu deiki konum welepu pangeda, Allahdi Musa tep pepu. “Uda, nedi karepkamsen mutu yumada, keteng wengbaramre tara, ortara akapmarada adano, amutu yuma epo,” pepu. Upepupa, Musadi Nebo mutu deiki dinin, ortara epu mutuda ake. Ada, dutarada, Uwa Mokon akapu dinin, amokon deiki tara mutu si Gilead tara epu. Adinin pio dipdongopra itara mutu, per icei Galilea mokon deiki tara dinin, nimi arum domyai mutu si Dan mutu ton epu. Amutu yuma epu.

2 Tonda, yuk mutu ton epu ngeda ake. Ada, karen mutu itarada, Yordan mekin dinin, keteng wengbaramre tara, Dan mutu dinin, ortarada mutu si Naftali tara ton epu. Tonda Naftali mutu deiki tara kurya, utarada mutu si Manase yala neng kunkamengai epu. Adinin dutara ton, mutu si Efraim tara, Efraim yala neng kunkamengai ton epu. Adinin dutara ton, ila Uwa Mokon damai dinin, ortara keteng wengbaramre tara, Yehuda yala neng kunkamengai, Yehuda tara ton epu. Adinin dipdongopra ortara, keteng wengbaramre tara, ila laut mokon ton orkapupa, atara neitamai kwuamu mutu yuma epu. Ada Pisga mutu dup dinin, keteng wengbaramre tara, ila laut mokon ortara daneitamai kure mutu yuma epu.

3 Tonda amutu ton epu. Ada Yehuda mutu atara kuprepa, dutara dapu tara mutu ton, me men kure mutu si Negeb tara ton epu. Tonda nimi arum weik domyai sida Yeriko mutu epu. Amutuda Pisga mutu dup di, keteng wengbaramre tara dinin, yambul deiki tara kuamupa epu. Yeriko mutuda, telep banai kuamu. Tonda Yeriko mutuda, co du si korma co du mouramre co palpal kurure. Yeriko mutu adi dipdongopra, per utara karenai dapu mutu neitamai ton, nimi ati si ton Soar mutu kwamupa epu. Yeriko adine, dutara neitamaida, uwa weik mokon kwamupa, amokon dutara sirikaida, nimi ati Soar mutu kwamupa epu.

4 Allahdi Musa tep amutu-mutu yuma benbenepupa, Musadi epu pangeda, Allahdi pepu. “Nedi Abraham cap, Isak cap, Yakub cap tep, ‘Amutu karepkamsene,’ peiamsi mutu adano. Ada nedi sun tep, ‘Deipmumpa, dadeipdanen bankameng nesala tep, amutu yuma dopra karepkamne,’ peramsi mutu adano. Kan Musa tep nengeda, benbenepkenepa kan asuru di amutu epmarem dinin, kan nong puda Yordan mekin goupra, ortara kure mutu yumada men wengbenkamrume. Acapu depkamrume.” Allahdi Musa tep pepu.

5 Allahdi kapul taru peramnga utopu, Allah er si Yahweh, er pel don ngebo Musa, Moab tara neitamaipu depu. 6 Musa depu pangeda, Allah er si Yahwehdi Musa er nong dopra, Moab tara neitamai dinin, mutu sida, Bet-Peor mutu dam peipu. Bet-Peor mutu atara, ortara ban kuamngai neitamai peipu. Dinino, apeipuaida, dortaru di dipdongopra ukutaru peda ton, Musa peipkaida men kael kepidi men dinunge.

7 Musa gam kuramu taruda, keteng tamun denge weik, seratus dua puluh tahun (120) deiki kuramnganen, depupa, peipu. Musa depkou taruda, er asuru tupa telep kupupa, telep kupra diramu. Tonda, er nong cap, er puto cap tupa telep kupu, bol mali men douramu dinin, depu. 8 Musa depu pangeda, Israel nesaladi Musa er depunge tep, Moab mutu neitamai bupra, ue denge weneri 30 tumi neitamai yuma, Israel nesala yuma engerami. Ataru kuramitopu, ue denge weneri, 30 tumi konum kupupa, tapi. Sundi Musa tep engerami ngeda, gawal dakidi dimpepi.

Musa kuramunge tep, pepu upu

9 Uda, Musa tupa gam kuramu taru neitamai di, ‘Angebodi ne yo punupkamner’ tenen, Yosua wepra deipu. Yosua er nai sida, nimi si Nun perami. Angebo er mi Yosua tep, Musadi er pel pununa tep wepra deipudi, er buru Yosua deiki deipudi wepra deipudi, er tep Allah moropu. Ukupka tep nengeda, Allahdi Yosuada, ila kael kemna deiyo keca weik kareramupa, ila kael ngebo kuramu. Atep, Israel nesaladi, Yosua peramu upu gekeramidi, dombarami. Ada, Allahdi ‘Ange kunkamrume,’ pepra Musa deiki peiamupa, Musadi lap peramu upu yuma gekepra dombarami. Allahdi Yosua deiki meliamupa, Israel neng dopra embaramupa, sun Israel nesala er amnyo tara yakarami.

10 Musada Allah cap mening damai di, sisingdoramrei ngebo kuramu. Israel nesala kan-kan di, Musa kuramutopu ngebo ton, ton cap pio men kurami. Musa er tenpua. Allah upu lap perami neng ton, Israel nesala neitamai kurami dinin, Musa utopu ngebo ton pio gume. 11 Allahdi Musa dopra dokotepudi, er puto deiki meliamu pangeda, Mesir mutu neng damai Musadi kunupsek pen pel cap, nimi men kupmanto keca cap, mambul pel doramu. Ukuramnga deiki di, Mesir mutu nesala yumadi, ‘Uo tek sisi Allah er dipapu apel donmasere,’ tenen, kael keami. Tonda ukuramnga deiki di, Mesir ila nimi deiyo ngebo Firaun cap, er amutara kurami deiyo neng cap, er tara nesala yuma cap ikin weik kuramidi, amutu kurami nesala yuma kange mun kange doupra kurami.

12 Tenpu ngebo peda ton, Musa pel doramutopu men dorami. Israel nesala kan-kan nimi men kupmanto keca cap, kware weik kupra deipserur keca cap, mambul pel men doramipa men dirami. Musa kuramutopu, yuk ngebo utopu neng ton pio men kurami, ton men kununge. Er tenpu kuramu.