Deu 4 | XteSC | STEP | Ataruda Musadi Israel nesala tep pepu. “Sun yuma betapra gekepneso. Allahdi, ‘Angeda ukunkamrume. Tonda, angeda men kunkamrume,’ pepra, pedisere upu, nedi sun tep lape pepkusene. Aupu moupra gekepmumdi, bouna di Allah er amutara kumumnyopda, gam pio kunkamrume. Ukumum dingeda, Allahdi ukupu karepkamser mutu, telep mutu bena wekmumdi, amutu talepra kunkamrume. Ada, sun nai bo er si Yahweh, sun apu yapu tep kalekra meliamupa, sundi er si eremami Allah, er dipu pepseu upu tep pepsene.

Deuteronomy 4

Musadi Israel nesala tep, “Allahdi pedisere upu gekepra amutu kunkamrume,” pepu upu

1 Ataruda Musadi Israel nesala tep pepu. “Sun yuma betapra gekepneso. Allahdi, ‘Angeda ukunkamrume. Tonda, angeda men kunkamrume,’ pepra, pedisere upu, nedi sun tep lape pepkusene. Aupu moupra gekepmumdi, bouna di Allah er amutara kumumnyopda, gam pio kunkamrume. Ukumum dingeda, Allahdi ukupu karepkamser mutu, telep mutu bena wekmumdi, amutu talepra kunkamrume. Ada, sun nai bo er si Yahweh, sun apu yapu tep kalekra meliamupa, sundi er si eremami Allah, er dipu pepseu upu tep pepsene.

2 Sun nai bo Allah, er si Yahwehdi, ‘Angeda ukunkamrume, angeda ton men kunkamrume,’ pepra pediserepa, nedi pesene upuda, sundi ton cap tapangdina cap, kweredina cap, pio gume. Allahdi sun tep, ‘Angeda ukunkamrume, angeda men kunkamrume,’ pedisere upu, nedi dopra sun tep pepsene. ‘Sundi aupu yuma pio moupra gekepra kunkamrume’ tenena tep pepne. Aupu tenpunge peda, tamna gume.

3 Ange tep nengeda, sun pedipapu asuru konum epmume. Sun kaele, ada mutu si, Bahal-Peor mutu neitamaida, isok er si Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprur’ tenen, Bahal sekmupke. Tonda, ‘Baal’ sektepe dinin, aupu sekmepepa, dakunge nesaladi, ‘Bal sisa tenepnunga’ tenen, acada, er si yuk ‘Bahal’ sekmepu. Dinino aisokda er tenpua.} tep, er si eremami neng yumada, Allah er si Yahwehdi aisok si eremami nesala yuma poptapu. Ada, sun Israel nesala kan-kan pe, Bahal si eremami neng yuma poptapu. 4 Isok si eremami nesala popu dinin, sunpuda pio tupa Allah er teppu tupa talepra, er sipu eremrum nesalada, tupa gam kurume. Tenpu ngebo peda men poptapu. Gam tupa kurume.

5 Sun pe ton tenipetepso. Allah er si Yahwehdi, ‘Angeda ukunkamrume, angeda men kunkamrume,’ pepra, pediramseu upu yumada, ne gekepsidi peteremamsisi. Deiyoda, sundi bena wekmumdi, talepra kunkamrum mutu neitamaida, ‘Allahdi peipseu upu yuma gekepra, bouna di kunkamrum’ tenen, peteremamsisi. Aupu talepra kumum pangeda, Allahdi ukupu mutu karepserepa, dimpepra amutu neitamaipu, telep kupra kunkamruma tepa.” Musadi Israel nesala tep pepu.

6 Upepu dingeda aupu ton pepu. “Uda, apepsene upu gekeprumdi, moupra ketenepra deiya kuramrum pangeda, ban-ban yuma kunge nesala epsengedi, kael kepkamenge. Sun asuru dinkamsenge. Epsengedi, tonda Allah peiamupa sekami upu gekepmengedi, upenkamsenge, ‘Uo, sun Israel nesalada, pio mambul nesala kununge. Sunda, ila kael nesala kunung adano. Akeca-keca yuma, telep kupra kununge.’ Yuk mutu nengdi upenkamsenga tep pepsene,” Musadi pepu.

7 Upepudi, aupu ton dukdongopra pepu. “Ange tep nengeda, tenipetepso. Yuk nesala ban-ban yuma, denge weik akunung dinin, sunda nun Israel nesala utopu men kununge. Nun nai bo Allahda, mening damai kuserura cadi, nundi Yahweh tep moropmepyopda, erda nun damai kuredi gekeserure. Sun yuk mutu nesalapuda, angetopu men kununge. Sunda tali isok si eremnung nesala kununga tep pepsene.”

8 “Tonda angetopu, yuk mutu ban-ban yuma, nesala weik dakunung dinin, nun kunuptopu men kununge. Allahdi pedisere upu, nedi pepkusen upuda, pio telep upu kurure. Aupu neitamaida, mali keca tenpunge peda men kurure, pio lek ^{▼▼Lek upu penupada, ada ‘Kurun upu,’ tenena gume. Ada Indonesia upu deiki di, ‘Kitab Suci,’ peramengtopu tenena tep, ‘lek upu,’ tonda ‘mengne upu,’ tonda ‘pio telep upu,’ penupe.} upu, telep kurure. Ada, nun nai bo Allah, Yahwehdi, ‘Angeda ukunkamrume. Tonda, angeda men kunkamrume,’ pepra deipsue upuda, pio telepe tepa. Yuk mutu nesala yumada, ato upu men talenunge. Ton men kwapmare. Atep, atumida nedi Allah pedisere upu peterepkusene.” Musadi Israel nesala tep pepu.

Musadi Sinai mutu deiki gekepu upu, kange di ton cap pepu

9 Musadi Israel nesala yuma tep pepu. “Ne kayapu gekepneso. Sun yuma pio moupra kunkamrume. Ada, ‘Sundi konum gekeramrum upu cap, diramrum keca cap luprorum’ tenen, sun gam kunkamrum taru yumada, akeca yuma pio teneprumdi, moupra kunkamrume, pepsene. Ange yumada, lumdongona gum dinin, pio tenenapu kunkamrume. Ange utopu, sundi deriramrum yapu cap, sun nyapudi dadeipdanen, bankameng nyapu cap tep, ‘Allahdi upeserure,’ pepra nukrumudi, sun nyapu tep peteremkamrume.”

10 “Nun nai bo Allah er si Yahwehdi, Sinai mutu deiki, er upu peipneu taru kupu keca tep nengeda, kange di ton cap lap pepkusene. Sun kaele, Sinai mutu damai buluproprumpane, Allahdi upepneu. ‘Kandi kongpepmempa, sun Israel nesala yuma bulupmengepa, ne upu pepkamne. Deiyoda, sun kunkameng mutu neitamai, tonda sun gam kunkameng taru yumada, ne tep kael kepmengedi, ne tep gispal dopra, ne sipu eremkamnenge. Tonda, sundi sun nyapu yuma tep, ‘Allahdi er pesere upu gekepra talenkamrume,’ pepra, peteremdankamenge.’ Allahdi upepneu,” Musadi pepu.

11 Upepudi, aupu ton pepu. “Sun kaele, Allahdi er upu peipneu taruda, sun yuma amutu damai amutara yana buluprumpa, Sinai mutu deikida, ila uku jeramupa, uku bu im neitamai welepra bena dipu dinin, amutu dana-dana yumada dua weik kuramupa, Sinai mutu lelipdongoramu. Atara yuma kunungamu. Ange yuma sundi konum eprume. 12 Ukupu taruda, uku bu neitamai tekudi, Allah er si Yahwehdi, er upu ila di sun tep pepu dinin, er nongeda men eprume. Tek sisi erdi peramu upu gekeramrum dinin, er nong pio men eprume.”

13 “Tonda ataru peda, amutu neitamai Allahdi er upu takol bari (10) peipnudi, butene gel pala deiki di sekeipseu ngeda, lap pepneu. Erdi ne tep lap peipneupa, nedi sun tep lape pepsisipa konum gekeprume. Aupu deiyoda, Allahdi, ‘Israel nesala ne mawa nesala kunkameng’ tenen, ‘Ne Allahdi sun tep, ukunkamsene. Tonda, sunda ukunkamrume, angeda ton men kunkamrume,’ pepra deipseu upu tep pepsene.”

14 Angepu gum dinin, Allahdi ne tep aupu ton pepneu. “Kandi, Israel nesala tep, ne karepkusen upu peteremkamrume. Ada, nedi, ‘Ange ukunkamrume, angeda men kunkamrume,’ pepra, lap pepkuken upuda, Israel nesala tep peteremkamrume,” pepra deipneue. Ange tep, sundi aupu dopra, Yordan me goupra, ortara mutu, Allahdi karepkamser mutu neitamai bemum dingeda, aupu pio moupra gekepmumdi talenkamrume. Allahdi, ‘Amutuda sun mawa mutu pio kunkamre’ tenen, karepseua cadi, erdi peipseu upu dopropmumdi, pio men tapkamrume. Aupu talenapu kunkamrume.” Musadi Israel nesala tep pepu.

“Yuk-yuk keca urasin utopu petupra keteneprumdi, ‘Angeda Allah utopu kurure,’ pepra, akeca si eremna meme,” pepu upu

15 Musadi Israel nesala tep pepu. “Sun pio tenepra kunkamrume. Ada Sinai mutu, tonda amutu si Horeb mutu deiki, Allahdi ila uku bu kan-kan neitamai di upu peipseu taruda, er upu gekeprum dinin, er nongeda pio men eprume. 16 Aupu pepmasena deiyoda ake. Ada, ‘Sundi mangkau kange doupra, mali kudidarumupa, Allahdi derepseredi wenepserur’ tenen, pepsene. Sundi sun pe tep, moupra kalengdankamrume. Pio men kunkamrum ngeda ake.

Ada, ‘Akecada nun nai bo kurura tep, er si erepkamepe’ tenen, sun pedipapu gel cap, co cap dopra, nimi urasin utopu keca petupra men derinkamrume. ‘Ukupmumdi, tali kange doupra, akeca si ereprum’ tenen, pepsene. Atep, sundi petupra derin keca tep, ‘Nun nai bo ake,’ pepra si eremna pio meme pepne.

17 – 18 Ange utopu ton, tu deiki tali embaramre keca yuma cap, ma im neitamai langamre keca yala yuma cap, po yala-yala yuma cap, me mokon neitamai embaramre mekina yala yuma cap, ware keca do yuma, akeca urasin utopu kupra, ketenepra deiya si eremna pio gume,” Musadi pepu.

19 Upepudi, aupu ton dukdongopra pepu. “Yuk keca urasin utopu petupra deipmumdi, akeca si eremna gume. Apepmasen upu deiyo ton ake. Ada, sun im deiki kungepa epmum keca tep, ‘Si ereprumudi, mali kuprum’ tenena tepa. Ukuna meme. Ada, keteng cap, ware cap, kuru cap, Allahdi ketekepra deipupa, im deiki kurur keca yuma peda, epmumdi, ‘Uo, angeda mambul cadi, akeca si eremkamepe,’ tenenada, pio meme tep pepsene. Allah er si Yahwehdi, akeca-keca yuma ketekepra deipupa, ware mutu do yuma, nesala ban-ban yumadi, akeca tali dinunge. Atep nengeda, akeca-keca yumada, si eremna meme, pepsene.

20 Akeca yumada, tali keca kurur dinin, sun Israel nesalapuda, Allahdi konum wepra deipseudi, ‘Ne mawa nesala’ pepra, konum peipseu. Tonda, nimidi besi do, emas do, akeca doupra, ‘Mali keca gum kuprepa, mawange pio telep kupkamre’ tenen, uku dongoramengepane, uku jerorepa, mali keca gum kurure. Ange utopu, Mesir mutu neitamai, Allahdi sun Israel nesala mali kuramrum keca tep daepra gum kupra deipseudi, ‘Ukuda sunda dumsisi nesala kununge,’ pepra deipseudi, telep kupra deipseue. Telep kupra deipseudi, Mesir mutu neitamai di, ikin weik kuramepu dinin, dalupra dopropseudi, lyepseue. Ukutaru, sunda er mawa nesala konum kurume. Allahdi sun tep, ‘Ne nyapu’ tenen, makupra pio talenkamsere.” Musadi pepu.

21 Upepudi aupu ton pepu. “Sunda ukupu karepkuser mutu wengbenkamrum dinin, nepuda amutu men wekamne. Aca, akunmap mutu neitamaipu depkamne. Deiyoda ake. Men di jen me men kwamupa, sundi engepra mali-mali peramrumpa, ne mali kange doupsidi, yu di mali kupsipa, Allahdi ne tep derepneue. Derepra wenepneudi, upepneu. ‘Gume, Musa kanda, Yordan me goupra, ortara keteng wengbaramre tara neitamai, Kanaan mutu pio men wekamrume. Israel nesala tep karepkamne mutuda, kanda men wekamrume, acapu depkamreme,’ pepra, Allahdi wenepneu. Allahdi yuk mutu karepserepa, sun yumada, Yordan me goupra ortara, telep mutu talepra kunkamrume. Ne puda sun cap kikiman men benkamepe, acapu depkamne,” Musadi pepu.

22 Upepu dingeda, aupu ton pepu. Ange tep nengeda, neda Yordan me goupra, ortara mutu men benkamne, amutu neitamaipu depkamne. Dinino, sunpuda Yordan me goupra, ortara pio telep mutu bemumdi, amutu bena dopropmumdi, talepra kunkamrume.

23 Ton ngeda, sundi lumdongona gume! Allah er si Yahwehdi, ‘Israel nesalada, ne mawa nesala kunkameng’ tenen, ‘Ukunkamrume, angeda men kunkamrume,’ pepra, deipseudi tupa pedisere upu yumada, pio moupra tenepmumdi, talepra kunkamrume. Tonda, Allah er si Yahwehdi, sun tep konum peipseutopu, ware keca do yuma, tali keca urasin utopu kupra, deiapnedi si eremnada pio meme. Allahdi akeca tep, konum ‘Meme,’ pesere keca yumada, pio men kunkamrume.

24 Ange men kunkamruma deiyoda, nun nai bo Allah Yahweh, erda uku bu di mali keca yuma jedoramretopu ngebo kurure. Tonda er nyapuda, yuk-yuk keca ton si erepmengopda, erdi pio yu weik ngebo kurure. Sundi yuk keca si ereprumnyopda, angeda kaukepra, tali men taptue.” Musadi Israel neng tep aupu pepu.

Musadi isok si eremna tep, pepu upu

25 Musadi pepu. “Tonda, yuk taru sun amutu bena kumumdi, nyapu deipmumpa, sundi dadeipdanen, bankameng nyapu weik kupmengopda, mali men kunkamenge. Ada, akeca-keca yuma ketekepmengedi, mali keca si men eremkamenge. Ange utopu, yuk mali kun keca ton, pio men kunkamrume. Mali kupmumpa, Allahdi sun tep yu weik kupyopda, Allahdi wenepra popserepa, ikine weik kupkamsere.” Musadi pepu.

26 Upepra aupu ton pepu. “Atumi nedi pepkusen upuda gekepneso. Amenda taru, sundi balila kupmumdi, tali keca si eremna tep, petupra deipmum pangeda, Allahdi sun tep yu kupyopda, ila di wenepkamsere. Tonda, im neitamai kure keca cap, tuai kure keca cap yuma, akwamre keca yumadi, disenunga deiki di, ‘Nedi tek sisi upu pepsene,’ pepra puto di pepsene. Ada, yuk tali keca yuma tep, ‘Nun nai bo ake’ tenen, si erepmumnyopda, Allahdi sun tep yu kuprepa, sun wenemna tep, popra gawal dakamsere. Uda ukutaruda, sundi, ‘Yordan me goupra ortara mutu pio bena kunkamep,’ tenepmarumada, akapmar dinin, mali kuprumnyopda, keteng tamun weik men kunkamrume. Menmena Allahdi sun tep, amutu neitamaipu wenepseredi, popra gawal dakamsere.

27 Tonda, mali kuprumnyopda, Allah er si Yahwehdi sun tep tapseredi, amutu neitamai dinin, yuk-yuk mutu neitamai di dokotepserepa, sunda ban-ban yuma kunge nesala kan-kan bena kunkamrume. Tali tengyakan neng utopu kunkamrume. Yuk mutu neitamai kunkamrum taru, nimi pio weika di depkamrum dinin, sun gung metekanunpu gam kunkamrume.

28 Tonda, amutu neitamaida, Allah tep teka tenena neng neitamai men kunkamruma cadi, amutu kunge nesaladi, tali keca tep, ‘Nun nai bo’ tenen, petupra deipmengedi, akeca si eremamengtopu, amenda taruda, sun Israel nesala pedi, tali keca deipmumdi si eremkamrume. Ukunkamrum dinin, co cap, gel cap, yuk gat keca cap dopropmumdi, si erepmumyop peda, akeca yala-yala yumada, asuru di men epsetenge. Tonda amol di men gekepsetenge. Jen keca dopra men jeptenge. Nintong telep keca men gekeptenge. Nimi buru di ketekepra deriramengedi, si eremenge keca yumada, tali keca pua. Akeca yumada, tali kecapu dinin, amenda taru neitamaida, sundi akeca tep si eremkamrume.” Musadi pepu.

29 Upepu dingeda aupu ton pepu. Ange kuna utopu gum dinin, sundi ortara telep mutu neitamai di, ‘Nun nai bo Allah, er upu gekepmepepa, er kange deipkamser’ tenen, ‘Ware kuptepe do?’ tenepra kupmumdi, Allah tep gispal dopmumdi, er sipu erepmum pangeda, Allah er si Yahwehdi gekepkamsere. Sun damai yana kunkamre. Uda, ‘Tek do, telel do?’ tenena gum dipapu, sun dipruai di teka pio tenepmumnyopda, tek sisi Allahda sun damai kunkamsere.

30 Uda, lumdongona gume. Mali kupmumnyopda, ikin keca weik kupserepa, sun kange dipru neitamai di, ‘Uo, ware kunkamep do?’ tenen, mali kange doupra kumum dingeda, sun nai bo Allah Yahweh tep, pio putapkamsere. Sun nai bo Allah, er si Yahweh, er damai tamupra yankamrume. Er tep, teka tenepra pio tenenapu kumumdi, er upu gekepra domyakamom pangeda, Allah er si Yahwehdi sun tep, ka di ton cap melimkamsere.

31 Sun nai bo Allah, erda nimi tep menmena men wenemsere dinin, bicau teneprap melimserur ngebo kurura cadi, sundi er damai tamupra yamumnyopda, epseredi melimkamsere. Tonda, erdi sun apu yapu tep, ‘Ne mawa nesala kunkamrume,’ pepra pediramseu upuda, men lupronkamre. Erdi sun apu yapu tep, ‘Ukupra melipra kunkamsene,’ pediramseu ngeda, pio tenenapu kunkamre. Tonda, sun tep pio men tapseredi, popra gawal men dangkamsere. Tupa melimkamsere. Allahdi ukunkamsere. Musadi pepu.

Ada, Musadi, “Allahdi upeipneu upu doupra, sun Israel nesala tep konum lap pepsene,” pepu.

“Nun nai bo Allah er si Yahweh, er tenpu kurure,” pepu upu

32 Musadi Israel nesala tep pepu.

Uda sun ton tenipetepso. Tonda yuk nesala tep asipetepkamrume. Pumun taru di dipra, ukutaru yumada, apepmasentopu keca menop taru ton kuramu do, gum do? Ange utopu pio men kuramu. Allahdi nimi ketekepra deiamu taru dinin, ataru di dipra ukutaru pe, ukutaru kure keca ton men kuramu. Tonda, im sirik, mutu sirik, amutu neitamai yuma peda, ange utopu keca ton pio men kuramu. Tonda, nimi ban-ban yumadi, menop taru neitamaida, ato keca tep pio men teneramidi, yuk neng tep men lap perami. Ukutaru Allahdi sun tep melipra kuserur keca yumada, pio mambul kurura tep pepsene.

33 Tenipetepso. Ada, ware mutu nesala do yuma, yuk mutu nesaladi, uku bu jenmaua kan-kan di Allah er upu peipupa, gekerami dinin, men depi do? Sun kael do? Gume angetopu pumun taru pio men kuramu. Dinino, sun Israel nesalapuda, Allahdi sun tep, uku bu kan-kan di, er upu peipupa mening damai di gekeprum dinin, adipapu men deprume. Dena gum dipapu tupa gam kurume. Angeda ila mambule.

34 Ange utopu, sun kael do? Dan mutu nesala tep, yuk mutu nesala taleramya neitamai, Allahdi dalupra lyepudi yukai dubeu do? Dinino, Allahdi sun Israel nesala tep, Mesir mutu neitamai di lyepra duyanamseua deiyoda, ‘Israel neng, ne mawa nesala kunkameng’ tenen, kupseu. Gume, yuk mutu nesala yumadi, ‘Allahdi angetopu kupseu,’ men peptenge. Sun Israel nesala pua. Allahdi ange kupka deiyoda, ‘Israel nesala ne mawa neng kunkameng’ tenen, kupseu.

Tonda, Allahdi sun Israel nesala tep, Mesir mutu neitamai di dalupra dopropseudi, lyepseu taruda, kurpetena cap, nimi men kupmanto keca cap, im neitamai mambul pel dona cap, nimi podana keca cap, er pe ila puto kemna cap, er pe buru di ila puto pel doramunge cap, ayuma deiki di, sun tep dalupra lyepseue. Ange peda ila mambule. Ange-ange yumada, sun nai bo Allah Yahweh, er pe buru di, ila puto weik keca kupupa, nimi yuma kware weik kurami dinin, sun Israel nesaladi akeca-keca yumada, sun pe asuru di diramrumdi, konum kael keamrume. Angeda ila mambule.

35 Tonda, Allahdi pumun taru, er puto deiki di kupyakaramunge yuma pe, ukutaru tupa kurenge yuma, upu peserenge yuma deiki di konum lape peamseudi, tupa peserure. Ada, ‘Nun nai bo Allah, er sida Yahweh, er tenpua kurure. Yuk Allah ton pio gume. Yuk Allah ton men kurure, er pua,’ tenepmumdi kael kemkamrum tenen, mambul pel weik doramseudi, tupa doserure. 36 Allahdi, ‘Ne mawa nesala wenepnepa, ne tenenetopu kunkameng’ tenen, im deiki di er upu peramupa, sun gekeramrume. Tonda, Sinai mutu ila uku bu jenmaua neitamai di peiamseu. Tonda, me gum mutu neitamai Allahdi peramseupa konum gekeramrume. Angeda ila mambule.

37 Tonda, Allahdi sun apu yapu tep, bicau teneramu deiki di, sundi derirami nyapu, ada sun ukutaru kurum Israel nesala tep konum wepra deipseu. Ada, ‘Anesalada, ne mawa nesala kunkameng’ tenen, wepra deipseu. Ukupu dingeda, Allah er pedi Mesir mutu yaudi, er ila puto deiki, Mesir mutu neitamai di sun apu yapu dalupra doupropseudi, acapu duyaseue. 38 Amutu duyaseua deiyoda ake. Ada, yuk mutu-mutu yuma, nesala weik kungedi, sun puto weik dakunung dinin, Allah erdi sun tep bisbisa kapredi, anesala sun mutu dopra, sun Israel nesala tep karepkamsere. Ukupre pangeda, sun amutu bena doupra wekrumdi, amutu yuma cap, amutu neitamai kure keca yuma cap, sun mawa keca kupkamra tep, amutu yuma bena talepra kunkamrume. Apepmasena yumada, ukutaruda amutu akuretopu dopropkamrume. Musadi Israel neng tep pepu.

39 Upepu dingeda, aupu ton dukdongopra pepu. “Atumi di diprap, yuk dorkunkamre taru yumada, lumdongona gume. Pio tenimkamrume. Sun nai bo Allah, er si Yahweh, er tenpu im deiki cap, im neitamai cap, tuai mutu ban-ban yuma cap, erpu talepra kurure. Yuk ngebo ton Allah utopu pio men kurure.

40 Tonda bouna di kumumdi, Allahdi, ‘Angeda kunkamrume, tonda angeda men kunkamrume’ pepra, er upu peiamupa, atumi deiki nedi sun tep peteremsenenge yumada, gekenkamrume. Ada, atumi di diprap, dorkunkamre taru yumada, Allahdi pere upu pio moupra talepra kunkamrume. Angepu kupmumnyopda, amenda taru yuma, sun cap, sundi deipmumpa, deipdanen bankamrum nesala yuma peda, teleppu kunkamrume. Tonda ukupmumnyopda, Allahdi ukutaru karepkuser mutu bena kunkamrum taruda, keteng tamun pio weik talepra kunkamrume. Allahdi, ‘Anesalada amutu pio talepra kunkamenge’ tenen, karepkusere.” Musadi Israel nesala tep pepu.

Israel nesala sun kayapu neng mangkau di popmengepa, yuk nengdi yu kuprepa kwangdana tep popnung’ tenen, doroipmengepa bena kunkameng mutu tep, pepu upu

41 Amenda taruda, Musadi Yordan me ortara, keteng yakan tara, ila ati arum weneri bena ketenepra deipu. 42 Aketenepra deipu mutu deiyoda, ukupmanto, sun Israel yala ngebo, yu tenena gum dipu, mangkau di kundenkap mangkau di er kabo popre ngeboda, yuk nengdi yu kuprepa kwangdana tep, ‘Angebo popnung’ tenena tep, sun mangkau di popmenge neng, autopu neng akati arum weneri, tenpunge wepra bena teleppu kuna tep, ketenepra deipu mutupu wengbankamnunge. Nimi mangkau di popre ngebo ukupredi, kware gum dipapu teleppu kunkamrure. 43 Aketeneipu ati arum sida ake. Tenpu ngeda, Beser mutu katawai mutu neitamai dinin, yambul gon deiki kwamu. Amutuda, Ruben yala neng dopropidi kurami ati arum tenpunge tep aca ketenepra deipu. Tonda, Gad yala nengda, Gilead tara neitamai dinin, ati arum sida Ramot mutu. Sun Gad yala neng kurami mutu tenpunge tep keteneipu. Tonda, weneri ngeda, Manasye yala neng tep nengeda, Basan tamna neitamai dinin, akati arum sida Golan mutu ketenepra deipu.

Allahdi, “Angeda ukunkamrum dinin, angeda pio men kunkamrume,” peipunge tep, Musadi, Israel nesala sun damai, lap pepu upu

44 Musadi, sun Israel yala nesala yuma tep, “Allahdi, ‘Angeda kunkamrume, angeda pio men kunkamrume,’ pepra deipseu upu yumada, sun gekenmaiyai di lap pepu. 45 Aupuda, Allahdi, “Ange-ange ton kunkamrume, dinin, angeda pio men kunkamrume,” peiamu upu cap, tonda, “Angeda moupra taleprumudi, pio kunkamrume,” peiamunge cap, tonda, “Telep kunada, angepu kunkamrume,” peiamunge cap, Musadi sun Israel nesala tenena tep lap pepu. Aupu pepu taruda, sun Israel nesala Mesir mutu kuramya taprapidi, bisi barami taru neitamai di aupu lap pepu. 46 Ataruda, sun Israel nesalada, Yordan me goupra, orketeng yakan tara neitamai dinin, mutu sida Bet-Peor ortara kwamnai dinin atara tenpu mutu banai acei, amutu damai bei tarupu, aupu lap peipu. Amutu neitamai dipu, sun Amori yala nesala tep, ila nimi deiyo kepra taleamu Raja Sihon, erda Hesybon mutu kuramngaipu, sun Israel nesaladi er tep popbisiami mutu, amutupu kunmai taru, Musadi aupu peipu.

47 Israel nesaladi Raja Sihon popbisipidi, sundi er men di taleamu mutu neitamai yuma yana doproami. Tonda, Basan tara taleamu ngebo, Raja Og cap, er tara neng cap yuma tep popbisiami. Abutene mutuda, sun Amori yala neng kurami. Ada, Yordan me goupra ortara keteng yakan tara talepra kurami mutu, sun Israel nesaladi bisbisa kapidi, amutu yuma talepra kurami. 48 Sun Israel yala nesaladi bisbisa kapidi talepra kurami mutuda, dutara arah selatanda, ila embaramre me sida Arnon me pirman dinin ati arum dominge, amutu si Aroer mutu adinin, dipdongopra, itara, deiki tara (arah utara) tamna di dipra, ila mutu-mutu bukamngai sida, Sirion mutu damai, amutu yuma talepra kurami. Uda, Sirion mutuda, ton weik tara nengdi, amutupu dinin, er sida, Hermon mutu penunge. 49 Tonda, sun Israel nesaladi talepra kurami mutu tupu dinin, Yordan me goupra, ortara keteng yakan tamna yuma cap, adinin dipdongopra dutamna (arah selatan) tamnada, ila laut mokon deiamngai, er si Laut Mati, aca di dipra ortara keteng yakan tamna ton, Pisga mutu dana-dana di yana dipdongoamu mutu beidi, aupu yuma talepra kurami.